أنا اللمبة ...أنت مين ؟!!

تابعت كما تابع الكثيرين "البرادعي مانيا" التي أصابت قرابة المائة ألف من أبناء مصر كما تابعت حوار العاشرة مساءا مع د.محمد البرادعي المدير العام السابق للوكالة الدولية للطاقة الذرية وليس عبد الله غيث صاحب المقولة الشهيرة في المسلسل " أنا البرادعي يا رشدي" كما أشارت سيدة بسيطة حين سؤالها في البرنامج عن البرادعي من يكون ! والدكتور البرادعي كما هو معلوم حاصل على جائزة نوبل مناصفة مع الوكالة وليس حاصلا على شهادة الأيزو كما تفضل شاب وأضاف في نفس البرنامج !
طالب البرادعي بإجراء تعديل على الدستور المصري كشرط للترشح ! وأكد انه لن يخوض الانتخابات ممثلا عن حزب مما يتطلب تعديل المادة التي تختص بشروط ترشيح المستقلين
وصلت ولا لسه ؟
نقول كمان

بغض النظر هل البرادعي من منظوري الشخصي يصلح أو لا يصلح
وبغض النظر عن إحساسي اللا متناهي بالألم والحسرة على شعب عانى من القهر في التلاتين سنة السابقة لدرجة انه بيتلكك عشان يبقى عنده أمل ووصل لمرحلة " أنت بتقول ترشيح !! انتخبوا البرادعي يا جدع" وقرروا يعملوا حملة لمسانده مرشح مش مترشح أصلا وقانونيا لا يمكنه أن يترشح
وبغض النظر إن البرادعي بيتكلم عن التعديلات الدستورية اللي اتكلم فيها كل خلق الله من سنة 2005 ولا حياة لمن تنادي مش عارفه إيه الجديد!
وبغض النظر عن إن كتير من المنضمين لجروب البرادعي فاكرين ان عددهم لما يزيد بعون الله البرادعي هيبقى الريس
وبغض النظر عن إن تكاثر عدد المنضمين للجروب مش هغيير من الوضع شيء
والموضوع أكبر من كدا بكتير
وبغض النظر عن السواد الأعظم والأغلبية الساحقة في الشارع المصري ما يعرفوش البرادعي دا يطلع إيه أصلا
وبغض النظر عن انعدام ثقتي في ال 100 ألف المنضمين للجروب في إنهم وقت الجد هيسدوا وهينزلوا الشارع ومش هترسي في الأخر على الناس اللي اتهانت وهي واقفة ضد التعديلات الدستورية في مايو 2005( اللي عايزين نغييرها دلوقتي ) وهما هما نفس الناس اللي هتتصدر دلوقتي والمية ألف يناموا قريرين العين وضميرهم مرتاح أنهم أدوا دورهم وداسوا الزراروانضموا للجروب !
بس عموما خير
البرادعي لمبه ! وإحنا داويتنا مسدودة بقالها 30 سنة ..والكهربا مش واصلة أصلا
وصلوا الكهربا ..ونضفوا الدواية ..ووقتها لمبات كتير هتظهر مش بس اللمبة اللي محطوطة في فاترينة العرض

رسائل البحر

قبل مشاهدتي للفيلم بيوم واحد كنت أجلس أمام البحر في الإسكندرية كان البحر في ذلك اليوم غريبا فهو عادة إما هادئ أو ثائر
في ذلك اليوم كان مزيجا بين هذا وذاك...يهدأ فجأة ويثور فجأة بعنف شديد ... تحدثت ...صرخت بكل ما بداخلي من قوة بدون صوت موجهة كلامي له وليس للبحر ..نعم فالبحر عندي من أعظم أشكال تجلي عظمته.. قلت ...ماذا تريد أن تقول.. هناك شيئا يقال لي لا أتلقاه لا أدركه... هناك رسالة ما أعجز عن فهمها..
ما الذي يحدث في حياتي ! هل هو مقصود أم لا! هل هو قدر أم نتائج ؟! لم أتلقى أي رد!

في اليوم التالي رأيت يحيى واقفا أمام البحر الهائج صارخا فيه : جيتلك وأنا مش محتاج اِدتني رزقي .. جيتلك وأنا جعان بخلت عليا .. ده ظلم ولا فوضى!؟
ليأتي الرد في مشهد لاحق على لسان نوار..قائلة فيما معناه : كنت عارفه إن اللي بعمله فيه بيؤلمه ..بس كان لازم يتألم ..عشان يكبر..وينضج

عجزت عن فهم الرسالة التي حملها البحر لي وأنا أقف أمامه لأفهمها في اليوم التالي
ربما لم يفهم يحيى رسالة البحر ..أخبرته نورا أن ليس المهم فهم الرسالة بقدر ما يهم أن تدرك أنها رسالة لك !

بين يحيى البرئ الذي يكره أن يستمع للموسيقى مسجلة ويفضل العزف الحي ..لسبب بسيط ..أنه يكره أن يعلم مسبقا ما سوف يقال أو يحدث ..لا يحب الأشياء ذات النتائج المعروفة مسبقا..تفقد تلك الأشياء الكثير من جمالها ..جزء كبير من جمال الأشياء أن لا تعرف ما الذي سيحدث ! وبين نورا التي تشعر بالدونية رغم أنها الأصدق مع ذاتها ...لا تبرر لنفسها ما تفعل لتقنع نفسها أنها شيء غير حقيقتها كما يفعل الجميع .. وقابيل الذي يخشى فقدان ذاكرته كي لا ينسى ذكرياته فهي أهم ما يملك حتى لو كلفه هذا الأمر حياته ووو وأشياء أخرى.... فهمت
ربما لم يصلني مورال معين ..فالفيلم في نظري رسائل متتابعة لا معنى شامل
ربما أيضا هذا ما كنت أحتاجه..ربما فسر الفيلم رسائل كثيرة تلقيتها في السابق
وحدة ..خوف ..ألم ..حب ..صدمة...حنين ..حيرة ..صداقة ..رغبة ...سلطة...ظلم..مادية ..موسيقى..قهر..قدر ..غضب..راحة..سكينه..زهد..بساطة..براءة ..حزن ..استنكار..وربما إنكار وفي النهاية حقا لا يهم ! لا يهم أن أفهم الرسائل بقدر ما يهم أن أعيش التجربة فالنتيجة ستحدث والرسالة ستصل في كل الأحوال حتى لو لم تفهم من الأساس أنك تلقيت رسالة
ربما لا يفهم أحد ما كتبته أنا أيضا هنا
ربما لأن ما كتبته لا يحمل أي معنى شامل
ليس أكثر من رسائل
كرسائل البحر

لتكن مشيئتك

عندما أصبحت على استعداد لتقبل وحدتي ..وجدت أناسا في كل مكان
وعندما عزمت على مواجهة مخاوفي …قابلت المحارب الساكن بداخلي
وحين قررت تقبل خسائري ..مُنحت عطايا لم أتوقعها
وفي لحظه استسلامي التام للشعور بالخواء…وجدت امتلاءا لانهائي

ما حاولت الهروب منه لاحقني ..وعندما قررت تقبله غيرني ..وأسعدني

*

الحياة مؤلمة..تعيسة ...سخيفة... نعاني فيها كثيرا ولكن لا داعي للاستعجال سوف تنتهي قريبا..ربما أسرع مما نتصور

*
توقف عن بناء الجدران ..وأبدأ ببناء الجسور .تلك الجدران التي تعتقد أنها تدرأ عنك ضرر الآخرين ما هي إلا وسيله لعزلك أنت عمن حولك..فتصبح وحدتك حتمية ..ويصبح سقوطك سهلا
*

لا يجب أن نعتقد نحن الأحياء أن الأموات يشعرون بالوحدة.. نحن فقط من نشعر بالوحدة ..لو كنت حصان أو شجره لما شعرت بما أشعر به الآن
حياة الكائنات الأخرى أكثر بساطه..أكثر وضوحا ..أكثر إنسانيه ..أكثر واقعية ..
نفقد نحن البشر يوما بعد يوم جزءا من آدميتنا ..جزءا من ارتباطنا وصلتنا بالعالم والكون من حولنا ..نتحول لأشياء ليس لها قلب..قتلنا أنفسنا يوم قتلنا أمنا..الأرض..حولنا الحياة لمعاملات مادية بحته سرق منها الإحساس
أريد أن أعيش في عالم أخر..بمعاير أخرى ... مؤقتا قررت الانتقال للعيش في عالمي الخاص بروحي..عالم مواز ..هكذا أفضل .. فلتنجو روحي وليبقى جسدي غارق في مادية هذا العالم
........

يا الله ...بينما أنا بعيده عنك .أسير في طريق مليء بالصعاب ..علمني أن أقول ..لتكن مشيئتك
على الرغم من الحزن..على الرغم من الألم ..امنحني القدرة على أن لا أتذمر... أن أغمض عيناني و أتنهد من أعماقي وأقول..لتكن مشيئتك
امنحني القوه ..امنحني الإرادة وخد مني كل ما يؤخر نفسي عن قول ...لتكن مشيئتك

Screw it….let’s do it AGAIN !

عدت السنة بسرعة

 لما قررت أقول وإيه يعني حاجات كتير أوي أتغيرت فيا وفي حياتي مابقتش بسمع الحاجات اللي بتضايقي نجحت في إني اعمل حواليا حيطة تمنعني من التأثر بالاشياء السلبية المحيطة
و"ليه لأ" النظرية اللي قررت امشي عليها سببتلي إحساس دائم بالسعادة لأني السنة اللي فاتت عملت حاجات كتير جديدة

أول مرة اعملها في حياتي  :)

في بداية السنة دي أنا عايزة اشكر ماما وبابا ..اتنين بيؤمنوا بالحب وعلموني أحب كل حاجة حتى ابسط الأشياء وعملوني أحب الحياة وأحس اني أنا وهي واحد وجزء من بعض واني اتبع منظومة الكون وفي رابط خفي بيني وبين كل حاجة وأي حاجة
كل اللي أقدر أقوله دلوقتي قد إيه شيء عظيم انك تختار إنك تحب بدل ما تعوز لما تحب الحياة بتديلك غالبا ولما ما بتديلكش ما بتزعلش لأنك أصلا مش عايز
بس لما تعوز مش دايما بتديلك وبتفضل عايز وعايز وعايز وتلف زي التور في الساقية وبتنسى تعيش وبتنسى تستمع وما بيبقاش عندك قدرة على الرضا
حياتي مش مثالية ..أبدا ...بس حقيقة واحدة أنا عارفاها ومتأكدة منها وهي قد إيه أنا كسبت كتير من حبي للحياة
أشكرك يارب على كل اللي عندي

كل سنة وانتو طيبين :)

وقفة احتجاجية

غيروا المعاد بقى يوم التلات بنقابة الصحفيين الساعة السادسة مساء وقفة احجاجية ضد جدار العار

وبكره في وقفة احتجاجية في نقابة المحامين

 

بس خلاص ياريت تقروا الدعوة عند نوارة

وقفة احتجاجية بنقابة الصحفيين

سعيكم مشكور

المهزلة

ماكنتش ناوية اتكلم خالص ابدا نهائي عن مهزلة مصر والجزاير بس الخبر دا شنجني جدا وقضى على البقية الباقية من الصبر جوايا

http://www.shorouknews.com/ContentData.aspx?id=163460

كفاية بقى بجد كفاية

احنا كدبنا الكدبة وصدقنا نفسنا والعالم كله من حوالينا منقسم ما بين قرفان مننا ومصاب بنوبة ضحك هستيري علينا

عرررررة حاجة تعرررر بجد بقى احنا نسكت اكرملنا يمكن الناس تنسى او نصعب عليهم فيبطلوا ضخك علينا

كل اللي عملناه غلط من اول لقطة لاخر مشهد

من ساعة التسمم والكسكسي والبنج في التكييف والكلام دا كنا قدمنا مذكرة للفيفا تحقيق ولو لينا حق كنا خدناه ليه ماحصلش موقف رسمي من الحكومة المصرية ؟ ليه مافيش ولا محضر يوحد ربنا بالوقائع دي ؟

سؤال محتاج رد عليه فورا ؟ سكتنا ليه ؟

ليه لما جم ماتش القاهرة والالتراس ضربوهم بالطوب- باعتراف الالتراس شخصيا -اعلامنا عمل فيلم ساااذج ما يدخلش على عيل في ابتدائي؟ قال طوب جايبينه معاهم من برا قال !! ليه ماعذرناش بدل الانكار والفيلم الهابط ؟

بعد ماتش القاهرة لما اتقال ان في ميتيين جزائريين ليه مافيش موقف رسمي ؟فين الداخلية تنفي الادعاءات دي ؟ليه مافيش مسؤول محترم طلع في التيليفيزيونات ينفي الكلام دا بدل ما اعلامنا افتكر نفسه في عركة شارع وهاتك يا ردح ونرد على الشتيمة بشتيمة ؟ ليه ماستنكرناش تسخيين الاعلام الجزائري الكذاب ونعذر شعب واصلاله صورة بتقول اننا موتناهم ؟!!بدل مانقعد نشتم فيهم باسوأ الالفاظ العنصرية الموجودة والغير موجودة في الكتب !! ماكنش يصح اعلامنا ينساق لخناقة الحواري دي ابدا

لما يكونوا الجزائريين بيتابعوا إعلامنا ما يصحش ابدا يلاقوا كل الناس طالعين يسخروا منهم ويقولوا عليهم مش عرب أصلا ويعايروهم بالاحتلال ويفكروهم مرارا وتكرارا إننا أسيادهم مش عارفه بامارة ايه الى اخر الهراء

ليه في ماتش السودان باعتين ناس فاكرين نفسهم رايحين مهرجان كان ( حد يبعت فردوس عبد الحميد )مع انه معروف مسبقا انه ماتش مش بسيط وفي شحن نفسي بشع من الجانب الجزائري دول ناس فاكريين اننا موتنا مشجعينهم حطوا نفسكم مكانهم .فين مشجعيين الكورة. فين الالتراس اللي ضربوا منتخب الجزاير بالطوب ؟ وفين المشجعيين الاهلاوية اللي حرقوا مشجع زمالكاوي في احد الماتشات وليه الاندهاش من عنف مشجعيين الكورة الجزائريين واحنا عندنا زيهم بالظبط ؟!! كنا نبعت جمهور كورة ويتصرفوا مع بعض بقى بعيد عن الشعوب والحكومات اللي ماكانش المفروض تتدخل في خناقات عيال

نهايته ..احنا تعاملنا مع الوضع باسوأ ما يمكن دي ماتشات كورة وبيحصل كدا في العالم كله لو في غلط فهو علينا احنا تماما في كل حاجة بداية من اعلاميين مسخنتيه لفانيين جهلة عنصريين لابن رئيس الجمهورية اللي بيعاير الجزائريين انهم ما بيعرفوش يتكلموا عربي!!

نسكت بقى اكرملنا وننسى نغمة كله الا كرامتي اللي افتكرناها فجأة عشان شوية عيال تافهيين مشجعيين كورة متعصبين موجودين في كل العالم وموجودين عندنا بردو وياريت نفتكر ان المصريين بقالهم سنين بيتهانوا من القاصي والداني وجوا قبل برا وماحدش اتطرفله رمش

نهر الجنون

عجزت عن فهم الاسباب والدوافع الحقيقية لما يحدث هذه الأيام بين مصر والجزائر

يرفض عقلي ان يتقبل فكرة ان ما يحدث سببه كرة القدم ! لو صح هذا الافتراض فهذه ولا شك نهاية العالم

هناك كم لا معقول من الغل بداخل كلا الطرفين تعدى الملاعب والكرة وطال رموزا ليس لهم في ماحدث لا ناقة ولا جمل

وانطلقت العبارات العنصرية من هنا وهناك فهذا يعاير ذاك بموقف حكومته من احداث غزة التي حدثت في نهايات العام المنصرم والأخر ينعته بالهمجي والبربري الامازيغي

منتهى الجهل!!

اشاعات في الجزائر مفادها وصول 11 قتيلا في توابيت من القاهرة تسببت في سلسلة اساءات يتعرض لها المصريين المقيمين في الجزائر

الوضع حقا مؤسف لا استطيع تقبل فكرة ان يؤذى أحد أو يموت بسبب الكرة !

أنا أحب كرة القدم واتابعها باستمرار واشجع منتخبنا واتمنى وصوله لكأس العالم

ومازال حماسي للمباراة القادمة مشتعلا ولكني اقولها بمنتهى الصدق ان لم يقدر لنا ان نتأهل يوم الأربعاء وصعدت الجزائر فسأشجعها وكأنها مصر

الفائز يوم الأربعاء سيكون العربي الوحيد في كأس العالم القادم ..لست من المتحمسين للقومية العربية في الحقيقة ولكن بحكم اشياء كثيرة مشتركة هم الأقرب نفسيا لي

ومازال السؤال يطرح نفسه ..ماذا حدث ؟ ما الأسباب الحقيقة للغل والغضب والكره والعنصرية التي تبدو فيِ نظري بلا داعي ! لا أذكر أبدا أوربما لم يصل لعلمي أن هناك رواسب من أحداث قديمة بيننا وبين الجزائر بعيدا عن كرة القدم

يبدو أنه نهر الجنون الذي شرب منه الجميع الا من رحم ربي

أقاوم كل أسواري

أقاوم كل أسواري ..

أقاوم واقعي المصنوع

من قشٍ وفخار ..

أقاوم كل أهل الكهف ، والتنجيم ، والزار ..

تواكلهم

تآكلهم

تناسلهم كأبقار ..

أمامي ألف سيافٍ وسيافٍ

وخلفي ألف جزارٍ وجزار ..

فيا ربي !

أليس هناك من عارٍ سوى عاري ؟

ويا ربي ؟

أليس هناك من شغلٍ

لهذا الشرق ..

غير حدود زناري ؟؟

...

نزار قباني