فاصل من الكوميديا السوداء

هي ايده مالها
صوابعه اتقطعت في حادثة
ربنا يشفيه
يشفيه ازاي ؟ بقولك اتقطعت خلاص يعني اتقطعت خالص مش موجودة ايده مش هتنبت صوابع تاني مثلا
ايه اللي انتي بتقوليه..هو لو ربنا عايز يشفيه مش هيقدر مثلا
قادر على شيئ ..بس ادعيله دعوة ليها معنى
يا سلام ..هي ربنا يشفيه مالهاش معنى !
؟*&%$#@@@!*&&%

**************************************

في حفلة اكون اللي كانت من اسبوع في مصر ..بغض النظر انه فاشل وياع وبغض النظر عن كم الدعاية المهول على واحد مالوش لازمة وبغض النظر عن الزحمة المريعة في الزمالك اليوم دا وبغض النظر ان ال stage وقع
ليه لما اكون يقرر يعمل stage diving ويرمي نفسه على الجمهور الناس توسع له !!! ( الموقف اتحكالي من شاهد عيان )

************************************

واقفة كدا ليه يا انسة
العربية وقفت مني "اكيد مش واقفة بالعربية على كوبري اكتوبر الساعة 2 الضهر بشم عادم عربيات"
وقفت ليه ؟
قطعت بنزين
وحضرتك مش عارفه انك مش المفروض تطلعي الكوبري وانتي ماعكيش بنزين
والله انا اعرف اني مش المفروض اساسا امشي في الشارع من غير بنزين بس يظهر المؤشر بايظ فمعرفتش ان البنزين خلص بس في ناس جايبنلي بنزين وجايين دلوقتي "وانا راكنة على جنب وعاملة دابل فلاشر "
طب كدا يبقى في غرامة
غرامة !!! تحت مسمى ايه الغرامة بالظبط ؟! غرامة بنزين خلصان !
(وفي نص الحوار اذ بي افوجأ ب بيتش باجي بيخبط العربية من ورا سايقه واحد عسكري مرور)
ايييييييييييييييييييييييييه داااااااااااااااااااا انت بتعمل اييييييييييييييييييييييييييييييه
بنزقلك العربية !!!
حضرتك مش بتزق العربية حضرتك بتخبطني وانا اساسا شادة البريك يعني العربية مش هتمشي من مكانها !
انتي بتزعقي ليه الحق علينا يا انسة اللي عايزين نساعدك !! ..."فاصل من قلة ادب رهيبة من عسكري المرور "
قفلت الشباك ونزلت الهاند بريك واستسلمت لل بيتش باجي وهو بيرزع في العربية على كوبري 6 اكتوبر

*****************************************

في نفس ذات الوقت اللي انا واقفة فيه على الكوبري كان واقف قدامي واحد راجل لابس بدلة كاملة بالكرافات ونضارة شمس في عز الحر مابيتحركش ولا كأنه تمثال رمسيس ..انا الحقيقة افتكرته مخبر سري او امن قومي او امن دولة اي حاجة
بعد مدة مش قليلة لاقيت عربية جيب سودا وقزازها اسود وقفت ونزل منها بادي جارد وست شكلها كدا فنانة في نفسها اوي مختفية في نضارة شمس اكبر منها وبدلوا الاماكن في صمت وسرعة وجدية والاخ اللي كنت فاكراه مخبر ركب معاهم !
انا كنت فاكرة الحاجات دي بتحصل بس في افلام المقاولات في حقبة التمنينات المجيدة

****************************************
أنا عندي واحد صاحبي من مقيدين الفكرة دي
مقيدين ايه ؟! تقصد انه يعني ضد الفكرة ولا معاها
لا معاها من مقيدين اللي هي مؤيدين يعني
آآآآه ...انت كنت مزوغ في كل حصص العربي ايام المدرسة بقى
يا سلااااام لعلمك بقى انا كنت شاطر جدا في النحو ...انتي اللي شكلك كنتي خايبة في العربي قوليلي تعريب الفاعل كدا

؟*&%$#@@@!*&&%

شكررررررررررررررررا

فالنكتفي بهذا القدر

صبــاح مريــم

تستيقظ من نومها ..تبقى ممدة على السرير مفتوحة العينين تتأمل اللاشيئ ..تجول بنظرها في الغرفة كأنها تحاول استيعاب من هي ..واين ..وماذا يحدث ..
تبدأ في الادراك ..آه نعم ..أنا مريم ..عمري 30 ..أعيش مع أبي وأمي ..و..وماذا أيضا ..آه ..أنا اعمل ..ولي أصدقاء ..و. ..ووحيدة
عند بلوغ هذه النقطة تحديدا ..تقفزمريم من سريرها كالعادة محاولة طرد احساس سيئ انتابها ..قررت مريم منذ زمن ليس بقليل أن لا تسمح لأي مشاعر سلبية بالسيطرة عليها
في السابق كانت مريم اذا فرحت فكأن كلمة الحزن حذفت من قاموس الحياة ..فهي تفرح كما لو أن الاحزان لم تزرها يوما
وإذا حزنت ..فكأنها لم تعرف الفرحة من قبل قط
أما الآن فهي لا تفرح ولا تحزن ...ليست سعيدة ..ولكنها أيضا ليست تعيسة ..لم تعد عيناها تعرفان الدموع بمعناها التقليدي ..فدموعها اليوم لا تتعدى كونها لمعة عابره ..وكذا أضحت ضحكتها ..مجرد ابتسامة تحمل شبح ضحكات الماضي
ربما أصبحت مريم اليوم أكثر نضجا من ذي قبل ..فهي على الرغم من كل الأحاسيس المختلفة الغريبة التي تعتريها ..الا انها تشعر بسلام داخلي لم تعهده في نفسها

اعتادت مريم كل صباح وفور استيقاظها أن تذكر نفسها بمن تكون في كلمات مقتضبة ..فلسبب ما لا تعلمه تمر اللحظات التي تلي استيقاظها مباشرة عليها وكأنها لحظات هاربة من الزمن ..لحظات تفقد فيها الإدراك تماما
تخشى مريم دوما أن تنجح هذه اللحظات في ان تسرقها من واقعها ..فتسافر معها ناسية اومتناسية كل ما مضى

تفتح الشباك لتسمح لأشعة الشمس الدافئة في صباح يوم بارد بالتسلل الى غرفتها حاملة معها نسمات الصباح الباكر
احساس الماء الدافئ ..فنجان القهوة ..رائحة بخور الفانيليا ..صلاة بإخلاص ودعاء من القلب بأن يحفظ الله من تحبهم ويحميهم من الشرور ..تكوَن هذه الأشياء مجتمعة صباح مريم .

تأخذ رشفات صغيرة متتابعة من فنجان قهوتها وهي تمسك بكتاب ( فارس النور) تضع فنجان القهوة جانبا وتغمض عينيها وتختار بعشوائية احدى الصفحات لتقرئها ..
اعتادت مريم أن تختار كتابا كل فترة يحوى حكما اوكما تفضل هي تسميتها ( علامات) تعطي روحها دفعة طاقة إيجابية تساعدها على الإستمرار
تغمض عينيها ..وتمسك بالكتاب ..تجعل الصفحات تركض وتركض بين يديها وتتوقف عند احدى الصفحات وتقرأ( العلامة) او حكمة اليوم ..
كل فارس نور قد شعر بالخوف من دخول معركة
كل فارس نور في وقت ما من الماضي قد كذب أو غرر بشخص ما
كل فارس نور قد سار في درب لم تكن دربه
كل فارس نور تألم لأكثر الأسباب سخفا
كل فارس نور قد اعتقد ولو لمرة واحدة على الأقل أنه لم يكن فارس نور
كل فارس نور قد أخفق في واجباته الروحية
كل فارس نور قال "نعم" عندما أراد قول "لا"
كل فارس نور قد آلم شخصا ما أحبه
ولهذا فهو فارس النور ...لأنه مر بكل هذا ومع ذلك لم يفقد الأمل إطلاقا من أن يكون أفضل مما هو عليه

تيتسم ....تغلق الكتاب وتستمع الى فيروز ... احدى ضروريات صباح مريم
لا تعتقد مريم أن هناك شيئا غنته فيروز لم تسمعه وتحفظه عن ظهر قلب ..
تستمتع مريم بجارة القمر وهي ترتدي ثيابها استعدادا للذهاب الى العمل ..

تتمايل على النغمات في هدوء بإبتسامة بسيطة

تتوالى الأغاني ...تغني فيروز

يا ريت أنت و أنا بالبيت

شى بيت أبعد بيت

ممحي ورا حدود العتم و الريح

و التلج نازل بالدنيي تجريح

يضيع طريقك ما تعود تفل

و تضل حدي تضل

و يزهر و يدبل ألف موسم فل

و تضل حدي تضل حدي تضل

و ما يضل بالقنديل نقطة زيت

تبتسم مريم ..
فكلمات الأغنية نكأت الجرح مرة أخرى ..

اي كلام ....

ان تكون من مواليد اواخر السبعينات واوائل التمنينات ..دا بيعني ان طفولتك وبداية مراهقتك كانت في التمنينات ..

من اهم ما يميز فترة التمنينات البشاعة والشناعة في ازياء اللبس ..ابتدائا من الإبوليت ( السفنج اللي بيتحط في كتاف الجاكت )



مرورا بالقصة الطايرة (واوعوا حد يقولي ماكنتش بعملها ) والشعر الكيرلي والالوان الكتير (تكني كلرز) وظهور الفسفوري
والتيشرت اللي من جوا البنطلون ونطلع حتة منها كدا برا ونتني البنطلون من تحت برمتين تلاتة على ضيق شوية :)
بشع بشع بشع ..وفاكرة ايامها كمان كان الريس هارينا بدل سفاري ...

من اهم ما يميز الحقبة الجميلة دي كمان ..المزيكا ..بس بأمانة ..المزيكا وقتها كانت حلوة اوي

اول واكتر حد اثر فيا


مادونا ..يا خرااااااااااااااااشي ع الحب اللي كنت بحبه للست دي ..اي حاجة تلبسها لزمن ولابدن اني البسها فورا
نفس تسريحة الشعر ...نفس الاكسسوارات ..نفس الستريتش اللي فوقه جوب ..
وطبعا كل اغانيها حافظاهم اكتر من اسمي ..كنت بقعد بالساعات حاطة حفلاتها في الفيديو وبقلدها بالحركة والهمسة
وخصوصا الحفلة اللي انا حاطه صورة منها دي ..كان نفسي في يوم ابقى مغنية مشهورة زيها واقف على مسرح فيه مليون متفرج واغني وارقص واتنطط كدا
كنت بحس باحساس حلو اوي وانا متقمصة شخصية مادونا في مراهقتي :)))
وكنت بتفشخر فشخرة رهيبة لما حد يقولي مادونا او انتي شبه مادونا ( مع اني لا امت ليها بصلة بس الناس تحب كدا جبر الخواطر) او انتي لابسة زي مادونا ...يااااه ..احس وقتها بانشكاح مرعب..واحس اني نجحت نجاح منقطع النظير

حبيت كمان فرقة مش عارفه ليه ماحدش فاكرها خالص :) يمكن عشان كانوا فشلة باين ولا ايه

New kids o the block



وانا بدور على صورة ليهم لاقيت واحدة ما بعد التمنينات ..واضح انها في نص التسعينات مثلا ..شكلهم نضف اوي :)



كنا عاملين انا واصحابي فرقة وبنقلدهم وكنا بنقعد نتدرب على الرقصات بتاعتهم ..كنا بنقلدهم بالظبط
وغيرهم كتير زي مايكل جاكسون وجورج مايكل وبون جوفي وكيلي مينوج وديبي جيبسون و مودرن توكنج ووووو...
وشريهان

حبيبة قلبي ربنا يشفيها ..الفوازير وياشي ياشي والف ليلة وليلة وشارع محمد على وعلشان خاطر عيونك
شريهان كانت بالنسبة ليا حلم ..

بحب ايام مراهقتي جدا جدا ..بتضحكني بجد ..لما بتفرج ع الصور بموت من الضحك :)
منظر عاااار ما ينفعش حد يشوفه ..ومش عارفه ليه واثقة من نفسي اوي كدا في الصور ..مش لاقية امارة ع الثقة دي :)

كنت بكتب مذكراتي :) النهاردة الصبح وانا بدور على حاجة لاقيت مذكراتي وقعدت اقرا شوية مت من الضحك
يااااه ...معقولة دي كانت اكبر همومي ..معقولة انا مخنوقة اوي كدا من كدا ...

ايام رايقة وحلوة ..اسمع اغاني واقرا واذاكر وارقص زي شريهان والبس زي مادونا واروح النادي واكل ومبي ونعمل حفلات انا وصحابي اجري والعب ..واحلم واتكسف.. واعيط واضحك و....اعيش..
انا كنت حرة ..كنت حرة بجد ..
وحشتني حريتي ...انا بجد متضايقة اني كبرت

يا بنـت يـا ام المريلـة كحلـي....
يا شمس هالة و طالة من الكولة
لـو قلـت عنـك فـى الغـزل قـولـة
ممـنـوع علـيـا ولا مسموحـلـي
انا احب اقول الشعر فى الحلوين
و الحلو اقولة يا حلو فى عيونـة
و لـو ابتديـت بشفايفـك النـونـو
ما يكفنيـش فيهـم سبـع دواويـن
يا ملاك يا جنية يا سـت الحسـن
يعجبنـى توهـانـك فــى أحـلامـك
يعجبنـى شـد الخـصـر بحـزامـك
يعجبنـى اخـدك للكتـب بالحضـن
راحـوا الصبـايـا والصبـايـا جــم
أجمل مـا فيهـم ميـن غيـر بنتـي
و اجمل ما فيك يا بنتـي ان انـت
فــى عينـيـك لمحة من حـنـان الأم

....

نفسي ارجع البس المريلة تاني

انا ..والعود ..و ..صبا !

بحب الموسيقى جدا من صغري

افتكر اني بداية تعلقي بالموسيقى كان السيمفونيات العالمية

كنت طفلة صغيرة عمري ما عداش ال 5 سنين

وبسمع بتركيز شديد بيتهوفن وموتسارت وباخ

وحبيت اوي Ode to joy

مقطوعة في السيمفونية التاسعة لبيتهوفن ..واستغربت جدا انه كمل السيمفونية دي بعد ما فقد سمعه نهائي !!

وبالرغم من ان اسم المقطوعه دي يدي ايحاء انها حاجة سعيدة ..الا اني كنت بحس فيها بحزن معين !!

لما كبرت اتجهت للموسيقى العربية ....ودا كان بداياته في اولى اعدادي ...وحبيت القانون والكولة الحزينة ..

والعود ...

اشتريت اول عود في حياتي وانا في السن دا تقريبا ...

وفضلت انا والعود اصحاب فترة طويلة ....لحد ما اخدتني الحياة منه

زي ما اخدتني من كل حاجة تانية حبيتها واتعلقت بيها

ونسيته خالص وبقى مصير عودي الحبيب..مصير غريب ..وحيد ..حزين ...عودي مرمي فوق الدولاب بقاله سنين

مسكته النهاردة الصبح اول ما صحيت ..وحاولت اعزف اي حاجة ...لاقيت اللحن تاه مني ...

لاقيتني مش قادرة اعزف اي حاجة ...

كل دا افتكرته ليه وايه مناسبته اساسا !!

اني امبارح كنت صاحية وقت اذان الفجر ...وسمعت الاذان ..عادي ..بتحصل كتير

امبارح يظهر في مؤذن جديد في مسجد قريب مننا ...المؤذن كان بيأذن في مقام صبا

اكتر المقامات حزنا ..دايما بيستخدموه تعبيرا عن الحزن الشديد الاقرب للبكاء ...واحب مقام لقلبي

...وقليل جدا في حياتي المرات اللي سمعت فيها حد بيأذن في المقام دا

افتكر وانا صغيرة اوي ..كل ما كان يعجبني مقطع في اغنية قديمة اجري اسأل بابا ..هيا دي مقام ايه ..يقولي صبا

واكتشفت اني اول حاجة عزفتها على العود

مقطع من اغنية لسه فاكر الحتة اللي بتبدأ ب

( كانت الايام في قلبي دموع بتجري وانت تحلالك دموعي وهيا عمري)

الحتة دي تحديدا كانت مقام صبا بردو !

غريبة ...ليه المقام دا بالذات اتعلقت بيه كدا ..ماعرفش ..وودني بقت حساسة ناحيته جدا

بقيت بعرفه هوا الوحيد من وسط مقامات الموسيقى الكتير

اللي دايما بتلخبطت فيهم وعمري ما كنت شاطرة في اني افرقهم عن بعض

ومن الاغاني اللي في مقام صبا

ام كلثوم ..هو صحيح الهوا غلاب

الاماكن لمحمد عبده

واغاني تانية يمكن مش كتير ...

بس حتى الاغاني اللي في مقام تاني وبيكون جواها كوبليه صبا بيكون الكوبليه دا احب حتة في الاغنية لقلبي

لو كنت مقام موسيقي ...لكنت بالتأكيد هتمنى اكون صبا

اللينك دا في اذان بكل المقامات ..اتمنى يعجبكم وتقولولي ايه اكتر مقام حبيتوه :)

http://www.qoranway.com/alathaan.html

يَارِيَاحاً لَيْسَ يَهْدا عَصْفُهَا .... نَضَبَ الزَّيْتُ وَمِصْبَاحِي انْطَفَا

يا فؤادي لا تسل اين الهوى .....كان صرح من خيال فهوى

اسقني واشرب على اطلاله.....واروي عني طالما الدمع روى

من اروع ما غنت ام كلثوم ومن اروع ماكتب ابراهيم ناجي

والقصيدة الاصليه على طولها الا انها احلى بكتير من الاغنية

لحظة بيقف فيها الزمن ...

لحظة بتخليك تفتكر كل اللي راح ...واولهم عمرك


ذَهَبَ العُمْرُ هَبَاءً فَاذْهَبي ........... لَمْ يَكُنْ وَعْدُكِ إلاَ شَبَحَا

صَفْحَةً قَدْ ذَهَبَ الدَّهْرُ بِهَا .......... أَثْبَتَ الحُبَّ عَلَيْهَا وَمَحَا

اُنْظُري ضِحْكِي وَرَقْصي فَرِحاً........ وَأَنَا أَحْمِلُ قَلْباً ذُبِحَا

وَيَرَاني النَّاسُ رُوحَاً طَائِراً .... وَالجَوَى يَطْحَنُنِي طَحْنَ الرَّحَى

لحظة بتخليك تفكر في كل اللي جاي ...وانت رافع حواجبك

ومش مستوعب وبتتسائل كأنك طفل تايه

اعمل ايه ....

عِنْدَ أَقْدَامِكَ دُنْيَا تَنْتَهي.................... وَعَلَى بَابِكَ آمَالٌ تَمُوتْ

وتلاقي روحك بتصرخ بكل مافيها من قوة ...قوة ضعيفه مكسورة مجروحة

صرخة عالية مدفونة ...بتوهم نفسك بيها انك قادر تقف على رجلك تاني

وانك هتنسى وهتعيش ..

أَعْطِني حُرِّيَتي اَطْلِقْ يَدَيَّ........ إِنَّني أَعْطَيْتُ مَا اسْتَبْقَيْتُ شَيَّ

آهِ مِنْ قَيْدِكَ أَدْمَى مِعْصَمي............... لِمَ اُبْقِيْهِ وَمَا أَبْقَى عَلَيَّا

احْتِفَاظي بِعُهُودٍ لَمْ تَصُنْهَا........... وَإِلاَمَ اللأَسْرُ وَالدُّنْيا لَدَيَّ

حقيقي قصيدة رائعة واغنية في منتهى الجمال ..

كبرياء مجروح وقلب عصره الالم ..

ومحاولة لتجميع اشلاء احساس ولملمت بقايا انسان ...

والوقوف مرة تانية ..وتحدي للنفس قبل اي حاجة تانية ...

لكل حد انكسر...

لكل حد حس في لحظة ان الزمن وقف..

لكل حد حس انه عمره راح ع الفاضي ..

إلام الاسر والدنيا لديَ ....:)

أنا من الجيل اللي..

انا من الجيل اللي حضر حرب الخليج
انا من الجيل اللي شهد مذبحة الحرم الابراهيمي واتفاضة الاقصى واطفال الحجارة
انا من الجيل اللي شهد سقوط الاتحاد السوفيتي
انا من الجيل اللي انتهى في عهده جيل كامل من القادة العرب السابقين الا قليل
السادات ... عرفات ...الملك فهد ...الملك حسين ...حافظ الاسد ...صدام حسين ...
انا من الجيل اللي كان بيتفرج على فوازير نيللي ويقلد شيريهان
انا من الجيل اللي حضر مصر للتأمين ...المسلسل هيبدأ امتى
واكل بيمبو وجيرسي وسامبا اللون الموف
انا من الجيل اللي اتربى على صوت فيروز وام كلثوم
وحب على اغاني فؤاد وعمرو دياب وعرفهم من ايام في السكة في السكة والشمس تجمعنا وبتغني لمين يا حمام وهلا يا هلا
واتعلم العمق البسيط على ايدين منير ومنيب وصلاح جاهين
انا من جيل رافضك يا زماني يا مكاني انا عايز اعيش في كوكب تاني
انا من الجيل اللي حضر طفرة في عالم الموسيقى اسمها حميد الشاعري
انا من الجيل اللي عاصر 3 مصريين اخدوا نوبل
وقرأ من صغر سنه لنجيب محفوظ واحسان عبد القدوس ويوسف السباعي وعباس العقاد وغيرهم
واستمتع بملف المستقبل ورجل المستحيل
انا من الجيل اللي رقص على اغاني مادونا وياللي وسطك وسط كمنجة وحفظ كل اغاني جورج مايكل
انا من الجيل اللي قالوله في مغنين جداد اسمهم مصطفى قمر وايهاب توفيق ومغني شعبي اسمه حكيم
وفيلم جديد مكسر الدنيا اسمه Pretty women
انا من الجيل اللي لما كانوا بيقولوله وهوا صغير ان هيجي يوم هيبقى فيه تيليفون محمول
وممكن تشوف الشخص اللي بتكلمه
كان بيعتبر دا حلقة خيال علمي وماتصورش ابدا انه يحصل في الحقيقة
انا من الجيل اللي صدمته التكنولوجيا والانترنت
وماكانش فاهمها في الاول خالص !
انا من الجيل اللي شهد ايام ماكان التيليفيزيون قناة اولى وتانية وبيفكروا يفتحوا التالتة
غير كدا ماتلاقيش
انا من الجيل اللي كان بيستنى حلقة العلم والايمان بفارغ الصبر ويجيله حزن وشجن وخوف من موسيقته
انا من الجيل اللي كان بيقولوا عليه في برنامج العالم يغني ( اما لهواة التسجيلات فبنقولهم يستعدوا عشان جايبنلهم النهاردة مفاجأة)
انا من الجيل اللي ارتبط معاه يوم الجمعة بالشيخ الشعراوي
انا من الجيل اللي مادخلش سينما غير على كبر لما فتحوا سينمات ممكن الانسان الطبيعي يدخلها
وعملوا افلام ممكن الواحد يشوفها
انا من الجيل اللي شهد صحوة السينما الجديدة بعد ماكانت الافلام عبارة عن (كلمة السر ..خالتي بتسلم عليك)
في فيلم المفروض انه مخابرات وقضية واسرائيل وحاجة مهمة
ياااااه
الكلام مش هيخلص

شكرا لعمر طاهر :)