سرطان الثدي breast cancer

Pink ribbon

سرطان الثدي
هو نوع من أنواع السرطان يصيب في هذه الحالة انسجة الثدي يصيب الرجال والنساء ولكن الاصابة في الذكور نادرة الحدوث
السرطان بشكل عام هو نوع من الأمراض يجعل الخلايا المصابة به تنمو وتتغيير، وتتضاعف بصورة خارجة عن نطاق السيطرة مما يكون أورام
يعتبر سرطان الثدي من بين أبرز الأمراض المؤدية إلى الوفاة بين الإناث

الفحص المبكر
يمكنً للنساء إجراء الفحص الذاتي مرة كل شهر هذا بالاضافة للكشف السنوي بال ماموجرام بداية من سن العشرين

الماموجرام عبارة عن صورة أشعة اكس على الثدى ، وهو فحص بسيط وغير مؤلم تقوم به آله خاصة من آلات أشعة اكس
طريقة الفحص الذاتي
الوقوف أمام المرآة وفحص الثديين إذا كان هناك أي شيء غير معتاد ، تورم ، ألم ، إفرازات غير طبيعية..إلخ.
وضع اليدين خلف الرأس والضغط بهما إلى الأمام دون تحريك الرأس أثناء النظر في المرآة.
وضع اليدين على الوسط والانحناء قليلاً مع ضغط الكتفين والمرفقين إلى الأمام.
رفع اليد اليسرى واستخدام اليد اليمنى في فحص الثدي الأيسر من القسم الخارجي وبشكل دائري مع التركيز على المنطقة بين الثدي والإبط ومنطقة أسفل الإبط.
الضغط بلطف للتأكد اذا كانت هناك أية إفرازات غير طبيعية.
تكرار نفس الخطوات على الثدي الأيمن.
تعاد الخطوتان السابقتان عند الاستلقاء على الظهر

أعراض سرطان الثدي

ظهور ورم في موضوع معين من الثدي
تغير في شكل أو حجم الثدي
انخفاض أو نتوئات بالجلد
تغير في لون الجلد
خروج افرازات شفافة أو دموية من الثدي أثناء الفحص الذاتي

هناك بعض الحقائق الهامه التى يجب معرفتها

أولا : يوجد شفاء تام لبعض هذه الأورام الخبيثة وليس صحيحا إنه إذا ثبت وجود ورم خبيث فلا شفاء ولا رجاء.. هذا خطأ جدا. فنسبة الشفاء من الخبيث آخذه فى الإزدياد مع ظهور علاجات جديدة وعقاقير جديدة وقد تصل إلى 85-90 % فى الحالات المبكرة.

ثانيا : أهم عامل يحقق الشفاء التام هو الكشف المبكر والعلاج المبكر. كثير من المرضى يقولون "إننا لاحظنا وجود الورم الغريب منذ فترة لكنه لا يؤلم لذلك لم نفعل شيئا" وهذا خطأ أخرين من خوفهم من المرض ينكروا وجوده ولا يذهبوا للكشف وهذا أيضا خطأ

ثالثا : علاج سرطان الثدي أساسا جراحيا لكن يوجد علاج تكميلى على نفس الأهمية وهو علاج إشعاعى أو كيماوى أو هرمونى أو كلهم في نفس الوقت ويؤدى إلى نتائج جيدة.

رابعا : إذا تم إجراء جراحة للثدى فتوجد أجهزة تعويضية وعمليات تكميلية تحسن الواقع جدا وتقربه إلى الطبيعى

الإكتشاف المبكر بيفرق كتير

Breast Cancer

Cancer du Sein

إنما أشكو بثي وحزني إلى الله

اللهم إليك أشكو ضعف قوتي.. وقلة حيلتي.. وهواني على الناس

يا أرحم الراحمين أنت رب المستضعفين وأنت ربي

إلى من تكلني.. إلى عدو يتجهمني أم إلى قريب ملكته أمري..

إن لم تكن ساخطا علي فلا أبالي.. غير أن عافيتك أوسع لي

أعوذ بنور وجهك الكريم الذي أضاءت له السموات والأرض وأشرقت له الظلمات وصلح عليه أمر الدنيا والآخرة

أن تحل علي غضبك.. أو تنزل علي سخطك.. ولك العتبى حتى ترضى

ولا حول ولا قوة إلا بك

! عندما يعبر العابرون مرة أخرى

ومازالت الحياة تفاجئني

ماذا يحدث ..ولما ..
غريب أن يعود الى حياتي أشخاص ظننت أنهم عابرون
لن أنكر أن عبورهم قد ترك أثر
ولكنني اعتبرتهم مجرد عابرون لم اتوقع ظهورهم مرة أخرى في حياتي أبدا ..أبدا

صديق قديم لا أعلم عنه شيئا منذ 5 سنوات تقريبا ..لم يكن صديقا بالمعنى الفعلي ..هوأقرب لأن يكون شخص عابر رمي لي بكلمات تحمل رموزا في وقت احتجت فيه لإشارة تدلني على الطريق

وامرأة تجاوزت الستين احترت في الماضي هل لها وجود حقيقي ام انها محض خيال
فهي أشبه بملاك يظهر في وقت الازمات وكفت عن الظهور في حياتي منذ قرابة ال 10 سنوات

ظهر الاثنان الآن مرة أخرى
هل لأني في حاجة حقيقية للسلام النفسي والحكمة والصبر الموجودين في داخل كلاهما وكان لهما عظيم الأثر في نفسي ؟

هل احتياجي لهذه الأشياء استدعاهم وسمعوا النداء ؟ أم هي تصاريف القدر !
أخشى أن يكون ظهورهم الآن ليس الا هدم لصورة خيالية وجدت داخلي واستقرت طوال السنوات الماضية

لم أتوقع ظهورهم مرة أخرى ..لا أنكر دهشتي ..ولكن ..لنرى !

time is the greatest thief

ماعييش أجيب هدية يا ماما

ماما
صباح الخير ..كل سنة وانتي طيبة
زي ماقولتلك النهاردة الصبح لما صحيتك على صوتي الرائع وادائي المتميز " ماعيش أجيب هدية يا ماما ان شا الله أعدم عنيا يا ماما "
وطبعا السبب معروف يا حبيبتي ..انك اخدتي مرتبي أول الشهر عنوة وغصب واقتدار عشان تسدديلي ديوني غصب عني وسيبتيلي فتات
فكانت النتيجة الطبيعية اننا النهاردة يوم 21 في الشهر وانا على وشك التسول
بس حقيقي حقيقي اثرتي فيا أوي وانتي بتقولي( ايه أعدم عنيا دي بعد الشر ) بس كالعادة الفرحة عمرها قصير ولاقيت الجملة اللي بعدها ( طيب مش مشكلة هستنى لأول الشهر بس هتعزميني على الغدا فين )
والله ياماما ماكنش يتعز ..أنا النهاردة أخري فول وطعمية

مامي

متهيألي انك لسه فاكراني بحب بابا أكتر منك ..ودي مش حقيقة على فكرة بس أنا مش عارفه اصحح لك المعلومة دي نهائي
الظروف كلها ضدي ..والماضي الاسود بتاعي معاكي بيطاردني مش مديني فرصة اني أقولك اني زمان كنت بفضل بابا أكتر مش بحبه أكتر وأن السبب في التفضيل دا انك كنتي الطرف اللي بيعاقبني وبيزعقلي وكان شاهد على كل كوارثي فكرد فعل مضاد أصبح بابا هو " المفضل " لأنه "فضل" فترة من الزمن مش عارف حقيقتي المرة اللي أكتشفتيها انتي بدري ب " قلب الأم " سبحان الله

أمي

في معلومات لازم تعرفيها
1- وأنا في ابتدائي كنتي بتصري تدخليني السرير الساعة 7 ! ولازمن ولابدن انام على انغام بيتهوفن وباخ وإخواتهم
أنا كنت بنام من كتر الزهق مش عشان هما مريحيين للأعصاب زي ماكنتي فاكرة

2- أنا كنت بتضايق جدا لما يعملوا استدعاء ولي أمر في المدرسة وتيجي وأبقى فاكراكي جاية تاخديلي حقي وأتفاجئ انك واخدة صف المدرسة ! ليه يا ماما كدا ؟! حصل ايه يعني لما اتسلق نخلة ولا لما احط صمغ على كرسي المدرسة ؟! في حكاية النخلة انا مش أكتر من إني بجيب بلح للعيال
والصمغ على كرسي المدرسة عشان تلزق وماتقومش ودا لأني بحبها ومش عايزة المدرسة اللي بعدها تيجي لما الحصة تخلص لأني ماكنتش بحب مدرسة الحصة اللي بعدها
يعني الصمغ دا تعبير عن حبي مش زي ما كلكم كنتوا فاكرين

3- أنا أسفة جدا بجد إني ضيعتلك شبكتك ..كل ما بفتكر اني عملت كدا بزعل من نفسي بجد اوي أنا ماكنش قصدي
4- أنا عارفه إني كنت شقية بشكل مخيف وإني تعبتك أوي ..بس ما تقدريش تنكري اني كنت مسلياكي تسالي رهيبة ..مش عارفه ليه كل ما بقولك كدا بتنكري ولما أقولك اني نفسي ربنا يرزقني ببنت زيي تقوليلي ما تدعيش على نفسك الدعوة دي
أعترفي يا مامي ...أنا كنت مسلياكي صح !

5- أنا بتضايق أوي لما بضايقك ..بزعل من نفسي أوي بجد لأنك حقيقي ما تستاهليش اني ازعلك ولا لحظة
انتي جميلة اوي يا ماما وطيبة وحنينة وضحكتك بتحسسني ان الدنيا كلها بتضحك وأنا من غيرك مش عارفه ممكن أعمل ايه في حياتي ربنا يخليكي ليا ويبارك في عمرك ويديكي الصحة ويجزيك خير عن كل حاجة عملتيها معايا طول حياتي
انتي بجد أم عظيمة والله مش عشان انتي أمي ..أنت فعلا أم عظيمة

وسيبك بقى من الأغنية الهبلة اللي غنيتهالك الصبح ..أنا لما أروح هغنيلك ست الحبايب :)

ملحوظة 1 : كل سنة وكل الأمهات بخير وعلى رأسهم أختي اللي بقت أم مؤخرا عقبال كل البنات يارب :)

ملحوظة 2 : الموضوع دا فاصل ومازلنا مستمرين في سلسلة " الوحدة أهون " والتعليقات في الموضوع السابق ما زالت متاحة للي يحب

هؤلاء الذين فشلوا في تعلم دروس الماضي ملعونون بتكرار أخطائهم

في مثل هذا اليوم غالبا ما أكون أكثر تعاسة من اليوم
في مثل هذا اليوم منذ سنوات فقدت شخصا احببته بشدة
افتقدته كثيرا
اليوم لا أشعر اني أفتقده بنفس القدر
ربما اصبح احدهم أكثر قربا لي من ذلك الشخص فاستطاع ملئ الفراغ الذي أحدثه غيابه الأعوام الماضية
يقولون أن الأحزان تولد كبيرة وتصغر مع مرور الزمن
أحزاني لم تكن كذلك
تولد متوسطة الحجم ..و تكبر وتكبر وتكبر حتى تصبح كبيرة بدرجة تجعلني أضحك بهستريا كلما نظرت اليها
وما أن تدرك أحزاني أني أسخر منها تأخذ في الإنكماش والتلاشي حتى لا يبقى منها غير أثارها التي بدوري أنساها أو هكذا أعتقد
المهم أنني لم أعد أفتقد ذلك الشخص ..بل أنا الآن ممنونة لفقده
فلولا أني فقدته لما كان للبديل وجود الآن

البديل لم يكن شخصا بحثت عنه ووجدته أمامي فجأة
تكون البديل ككرة الثلج ..كلما طال الطريق تكون البديل حتى أصبح بحجم يستهويني ..يناسبني ..أقبله وأحبه
يحتفظ البديل في قلبه بالشخص المفقود ..يحيطه أشياء كثيرة..تستطيع رؤيته ان كنت على دراية بفن الغوص في الأعماق ..فهو يشبهه كثيرا وان كان يختلف عنه بشدة

الخلاصة اني لم اعد أفتقد من فقدت ..

البديل والشخص المفقود كلاهما بعض مني ان جاز التعبير

دربي الذي أردت

كثيرا ما اعتقدت ان الحياة التي اعيشها لم تخلق لي
او لم اخلق لها

حلم وحلم وحلم وحلم
واستيقظت على واقع لا يمت لأحلامي بأي صلة

مشيت دروب عدة ..انا من اخترتها وقررت السير فيها
لم يكن اي منها دربي الذي اردت

فاصل من الكوميديا السوداء

هي ايده مالها
صوابعه اتقطعت في حادثة
ربنا يشفيه
يشفيه ازاي ؟ بقولك اتقطعت خلاص يعني اتقطعت خالص مش موجودة ايده مش هتنبت صوابع تاني مثلا
ايه اللي انتي بتقوليه..هو لو ربنا عايز يشفيه مش هيقدر مثلا
قادر على شيئ ..بس ادعيله دعوة ليها معنى
يا سلام ..هي ربنا يشفيه مالهاش معنى !
؟*&%$#@@@!*&&%

**************************************

في حفلة اكون اللي كانت من اسبوع في مصر ..بغض النظر انه فاشل وياع وبغض النظر عن كم الدعاية المهول على واحد مالوش لازمة وبغض النظر عن الزحمة المريعة في الزمالك اليوم دا وبغض النظر ان ال stage وقع
ليه لما اكون يقرر يعمل stage diving ويرمي نفسه على الجمهور الناس توسع له !!! ( الموقف اتحكالي من شاهد عيان )

************************************

واقفة كدا ليه يا انسة
العربية وقفت مني "اكيد مش واقفة بالعربية على كوبري اكتوبر الساعة 2 الضهر بشم عادم عربيات"
وقفت ليه ؟
قطعت بنزين
وحضرتك مش عارفه انك مش المفروض تطلعي الكوبري وانتي ماعكيش بنزين
والله انا اعرف اني مش المفروض اساسا امشي في الشارع من غير بنزين بس يظهر المؤشر بايظ فمعرفتش ان البنزين خلص بس في ناس جايبنلي بنزين وجايين دلوقتي "وانا راكنة على جنب وعاملة دابل فلاشر "
طب كدا يبقى في غرامة
غرامة !!! تحت مسمى ايه الغرامة بالظبط ؟! غرامة بنزين خلصان !
(وفي نص الحوار اذ بي افوجأ ب بيتش باجي بيخبط العربية من ورا سايقه واحد عسكري مرور)
ايييييييييييييييييييييييييه داااااااااااااااااااا انت بتعمل اييييييييييييييييييييييييييييييه
بنزقلك العربية !!!
حضرتك مش بتزق العربية حضرتك بتخبطني وانا اساسا شادة البريك يعني العربية مش هتمشي من مكانها !
انتي بتزعقي ليه الحق علينا يا انسة اللي عايزين نساعدك !! ..."فاصل من قلة ادب رهيبة من عسكري المرور "
قفلت الشباك ونزلت الهاند بريك واستسلمت لل بيتش باجي وهو بيرزع في العربية على كوبري 6 اكتوبر

*****************************************

في نفس ذات الوقت اللي انا واقفة فيه على الكوبري كان واقف قدامي واحد راجل لابس بدلة كاملة بالكرافات ونضارة شمس في عز الحر مابيتحركش ولا كأنه تمثال رمسيس ..انا الحقيقة افتكرته مخبر سري او امن قومي او امن دولة اي حاجة
بعد مدة مش قليلة لاقيت عربية جيب سودا وقزازها اسود وقفت ونزل منها بادي جارد وست شكلها كدا فنانة في نفسها اوي مختفية في نضارة شمس اكبر منها وبدلوا الاماكن في صمت وسرعة وجدية والاخ اللي كنت فاكراه مخبر ركب معاهم !
انا كنت فاكرة الحاجات دي بتحصل بس في افلام المقاولات في حقبة التمنينات المجيدة

****************************************
أنا عندي واحد صاحبي من مقيدين الفكرة دي
مقيدين ايه ؟! تقصد انه يعني ضد الفكرة ولا معاها
لا معاها من مقيدين اللي هي مؤيدين يعني
آآآآه ...انت كنت مزوغ في كل حصص العربي ايام المدرسة بقى
يا سلااااام لعلمك بقى انا كنت شاطر جدا في النحو ...انتي اللي شكلك كنتي خايبة في العربي قوليلي تعريب الفاعل كدا

؟*&%$#@@@!*&&%

شكررررررررررررررررا

فالنكتفي بهذا القدر