انا ..والعود ..و ..صبا !

بحب الموسيقى جدا من صغري

افتكر اني بداية تعلقي بالموسيقى كان السيمفونيات العالمية

كنت طفلة صغيرة عمري ما عداش ال 5 سنين

وبسمع بتركيز شديد بيتهوفن وموتسارت وباخ

وحبيت اوي Ode to joy

مقطوعة في السيمفونية التاسعة لبيتهوفن ..واستغربت جدا انه كمل السيمفونية دي بعد ما فقد سمعه نهائي !!

وبالرغم من ان اسم المقطوعه دي يدي ايحاء انها حاجة سعيدة ..الا اني كنت بحس فيها بحزن معين !!

لما كبرت اتجهت للموسيقى العربية ....ودا كان بداياته في اولى اعدادي ...وحبيت القانون والكولة الحزينة ..

والعود ...

اشتريت اول عود في حياتي وانا في السن دا تقريبا ...

وفضلت انا والعود اصحاب فترة طويلة ....لحد ما اخدتني الحياة منه

زي ما اخدتني من كل حاجة تانية حبيتها واتعلقت بيها

ونسيته خالص وبقى مصير عودي الحبيب..مصير غريب ..وحيد ..حزين ...عودي مرمي فوق الدولاب بقاله سنين

مسكته النهاردة الصبح اول ما صحيت ..وحاولت اعزف اي حاجة ...لاقيت اللحن تاه مني ...

لاقيتني مش قادرة اعزف اي حاجة ...

كل دا افتكرته ليه وايه مناسبته اساسا !!

اني امبارح كنت صاحية وقت اذان الفجر ...وسمعت الاذان ..عادي ..بتحصل كتير

امبارح يظهر في مؤذن جديد في مسجد قريب مننا ...المؤذن كان بيأذن في مقام صبا

اكتر المقامات حزنا ..دايما بيستخدموه تعبيرا عن الحزن الشديد الاقرب للبكاء ...واحب مقام لقلبي

...وقليل جدا في حياتي المرات اللي سمعت فيها حد بيأذن في المقام دا

افتكر وانا صغيرة اوي ..كل ما كان يعجبني مقطع في اغنية قديمة اجري اسأل بابا ..هيا دي مقام ايه ..يقولي صبا

واكتشفت اني اول حاجة عزفتها على العود

مقطع من اغنية لسه فاكر الحتة اللي بتبدأ ب

( كانت الايام في قلبي دموع بتجري وانت تحلالك دموعي وهيا عمري)

الحتة دي تحديدا كانت مقام صبا بردو !

غريبة ...ليه المقام دا بالذات اتعلقت بيه كدا ..ماعرفش ..وودني بقت حساسة ناحيته جدا

بقيت بعرفه هوا الوحيد من وسط مقامات الموسيقى الكتير

اللي دايما بتلخبطت فيهم وعمري ما كنت شاطرة في اني افرقهم عن بعض

ومن الاغاني اللي في مقام صبا

ام كلثوم ..هو صحيح الهوا غلاب

الاماكن لمحمد عبده

واغاني تانية يمكن مش كتير ...

بس حتى الاغاني اللي في مقام تاني وبيكون جواها كوبليه صبا بيكون الكوبليه دا احب حتة في الاغنية لقلبي

لو كنت مقام موسيقي ...لكنت بالتأكيد هتمنى اكون صبا

اللينك دا في اذان بكل المقامات ..اتمنى يعجبكم وتقولولي ايه اكتر مقام حبيتوه :)

http://www.qoranway.com/alathaan.html

يَارِيَاحاً لَيْسَ يَهْدا عَصْفُهَا .... نَضَبَ الزَّيْتُ وَمِصْبَاحِي انْطَفَا

يا فؤادي لا تسل اين الهوى .....كان صرح من خيال فهوى

اسقني واشرب على اطلاله.....واروي عني طالما الدمع روى

من اروع ما غنت ام كلثوم ومن اروع ماكتب ابراهيم ناجي

والقصيدة الاصليه على طولها الا انها احلى بكتير من الاغنية

لحظة بيقف فيها الزمن ...

لحظة بتخليك تفتكر كل اللي راح ...واولهم عمرك


ذَهَبَ العُمْرُ هَبَاءً فَاذْهَبي ........... لَمْ يَكُنْ وَعْدُكِ إلاَ شَبَحَا

صَفْحَةً قَدْ ذَهَبَ الدَّهْرُ بِهَا .......... أَثْبَتَ الحُبَّ عَلَيْهَا وَمَحَا

اُنْظُري ضِحْكِي وَرَقْصي فَرِحاً........ وَأَنَا أَحْمِلُ قَلْباً ذُبِحَا

وَيَرَاني النَّاسُ رُوحَاً طَائِراً .... وَالجَوَى يَطْحَنُنِي طَحْنَ الرَّحَى

لحظة بتخليك تفكر في كل اللي جاي ...وانت رافع حواجبك

ومش مستوعب وبتتسائل كأنك طفل تايه

اعمل ايه ....

عِنْدَ أَقْدَامِكَ دُنْيَا تَنْتَهي.................... وَعَلَى بَابِكَ آمَالٌ تَمُوتْ

وتلاقي روحك بتصرخ بكل مافيها من قوة ...قوة ضعيفه مكسورة مجروحة

صرخة عالية مدفونة ...بتوهم نفسك بيها انك قادر تقف على رجلك تاني

وانك هتنسى وهتعيش ..

أَعْطِني حُرِّيَتي اَطْلِقْ يَدَيَّ........ إِنَّني أَعْطَيْتُ مَا اسْتَبْقَيْتُ شَيَّ

آهِ مِنْ قَيْدِكَ أَدْمَى مِعْصَمي............... لِمَ اُبْقِيْهِ وَمَا أَبْقَى عَلَيَّا

احْتِفَاظي بِعُهُودٍ لَمْ تَصُنْهَا........... وَإِلاَمَ اللأَسْرُ وَالدُّنْيا لَدَيَّ

حقيقي قصيدة رائعة واغنية في منتهى الجمال ..

كبرياء مجروح وقلب عصره الالم ..

ومحاولة لتجميع اشلاء احساس ولملمت بقايا انسان ...

والوقوف مرة تانية ..وتحدي للنفس قبل اي حاجة تانية ...

لكل حد انكسر...

لكل حد حس في لحظة ان الزمن وقف..

لكل حد حس انه عمره راح ع الفاضي ..

إلام الاسر والدنيا لديَ ....:)

صديقي العزيز ...كفاية حزن ...

انا بحبك اوي يا صديقي ..ونفسي من قلبي قلبك يفرح :)

ممكن يا احمد ؟!!

عمار يا مصر 1

ممكن حد يقولي ليه الناس بترمي حاجات في الشارع ..طول مانت ماشي تلاقي حاجات بتتحدف عليك ..من عربيات ...من عمارات ...من اللي ماشي جنبك ..اي حاجة

كنت قريب عند ناس اصحابي ..وبناكل ايس كريم ..

واحدة من اللي قاعدين ( مش صاحبتي ولا اعرفها ولا عايزة اعرفها ) بتاكل ايس كريم بالشوكلاته البيضة

فجأة قررت انها تقيلة ومش قادرة تكملها ..وقعدت تدلل عليها ..يا جماعة حد ياكل ..

لا

طيب

وبمنتهى اللاشيئ ...رمت الكون بتاعت الايس كريم من الشباك من الدور ال 11 عشان تقع على صاحب نصيبها !!!

يالهوي يانا ياما

لو انا اللي تحت ولاقيت ايس كريم واقع عليا من السما زي القضا المستعجل ...تفتكروا كنت هعمل ايه .؟

تصدقوا مش قادرة اتخيل رد فعلي

شيئ كمان عجيب بيذهلني في سلوكيات البشر ...ليه دايما الرجالة بيلبوا نداء الطبيعة جنب الاسوار ووراء الاشجار في شوارع القاهرة المزدحمة في وضح النهار ؟!!

بمنتهى البساطة....
تلاقي واحد كان ماشي في حاله وبدون اي مقدمات

يقف ويدي وشه للحيطه زي مايكون بيعاقب نفسه عشان عمل شقاوة

ايه دا بجد

انا ببقى عايزة انزل اضربه على قفاه في اللحظة دي لولا الملامة بس

من اكتر بقى الحاجات اللي حقيقي بتفرسني ...ابقى ماشية بالعربية ( عفوا قصدي واقفة لاننا غالبا في شوارع مصر بنبقى واقفين ) والاقي عربية جنبي الاب المحترم مقعد ابنه اللي لا يتعدى عمره 3 سنين بالكتير على حجره قدام ديريكسيون العربية

نعم بقى ...نعم بجد ...ايه الاستهتار دا

مرة المنظر استفزني اكتر من اللازم وقلت لااااا مش قادرة اسكت ..فتحت الشباك وعملت نفسي لطيفة

مساء الخير حضرتك ( وابتسامة بلهاء مرسومة على ملامحي ) هوا حضرتك يعني كدا خطر اوي على البيبي ممكن لا قدر الله حضرتك لو فرملت فجأة البيبي يتخبط في وشه ولا حاجة ( نفس الابتسامة الهبلة)

مش قادرة احكيلكوا على رد الفعل ...عينكو ما تشوف الا النور

حرمت من يومها وقررت اكتم جوايا !

شيئ تاني عجيب بردو ..بيضحكني احيانا وبيشلني غالبا

لو سمحت ...شارع ( مش فاكرة اسم الشارع بصراحة ) فين .؟

قالك فين ؟

( يا فتاح يا عليم ) قالي هنا

هنا فين ؟

طيب خلاص شكرا

لا استنى بس ...قالك جنب ايه طيب

قالي جنب سوبر ماركت الفا

مممم طيب في سوبر ماركت الرحمة ع اليمين قدام شوية !!!

خير ؟! لا خير بجد ؟! دا على اساس اني كنت بدور على سوبر ماركت تايه يا ولاد الحلال عشان اجيب باكو لبان !!!

مرة كنت عمالة الف زي لفة الكونافة وهيا على الصاج بتتعمل ..ومش عارفه اوصل من كتر فتي البشر

لاقيت عسكري مرور ...سألته تاني على العنوان اللي عذبني كتير ...شرحلي وصفه على رأي عمنا صلاح جاهين ..

دي وصفه سهلة !

بصيتله وملئ عيني شك رهيب ...وقولتله طيب هما قالولي ان العنوان جنب سفارة مصر ..هيا سفارة مصر هناك

قالي اه اه لا كدا يبقى بدل ما تدخلي اخر شمال ابقى اكسري يمين !!!!!!!

للعلم ...انا كنت في قلب مصر ...في قلب القاهرة ...في قلب وسط البلد

كفاية كدا ..

جوايا كتير كتير .....

جوايا كتير كتير

جوايا حزن وفرح

جوايا الم وسعادة

جوايا طاقة وكسل

عايزة اصرخ ...عايزة اضحك ...عايزة ابكي ...عايزة اقول

اقول كتير لناس كتير

اقول كلام يفرح ...واقول كلام يجرح

هقول ...وكل سطر من اللي هقوله بيقول كلام كتير ...لناس كتير...نفسي ...امي وابويا ...اخواتي وحبايبي ...صحابي واللي عاملين صحابي

لناس عدت ومابقتش موجودة ....لناس عايشة حواليا وناس عايشة جوايا ...ولناس لما بفتكرهم بحس الدنيا ضلمت وابقى عايزة اقول مين طفى النور !!

ولناس لما لاقوا دنيتي ضلمت بسبب الناس دي ..نورولي شمعه

اقول شكرا على الحلوة والمرة

اقول بدعيلك بظهر الغيب

واقول لقائنا يوم الحساب لاني مش مسامحة في حقي

اقول ليه كدا

اقول الله ...قد ايه انت جميل

واقول اخس ...قد ايه انت وحش

اقول ازاي انت ابيض اوي من جواك في وسط الدنيا السودا

واقول ازاي جواك كل الحقد والغل والكره دا وانت ما شوفتش مني غير كل خير

اقول ليه انت منافق عامل صاحبي قدامي وهوحشك ...ومن ورايا بتتكلم عليا

واقول ليه انت محترم كدا ومن ورايا بتتكلم عني احسن ما بتتكلم عني قدامي

اقول زهقت

اقول تعبت

اقول انا لسه قادرة اكمل المشوار الطويل

اقول انا يأست

اقول انا مليانه امل

اقول انا حياتي بتتمرجح بين الجنة والجحيم

اقول انا طفلة جدا

اقول انا عجوزة اوي

اقول قلبي نونو .....بس شاخ وهوا في اللفة

اقول اتخنقت

اقول انا بتنفس طول مانت جنبي

اقول خايفة اوي اصحى من النوم الاقيك مشيت

اقول ربنا يجعل يومي قبل يومك

اقول انا حاسة اني هموت قريب اوي

اقول انا حاسة اني هعيش يجي 100 سنة

اقول ليه البلد بتاخد مني كل شهر مبلغ وقدره ومش لاقية اي حاجة بتتعمل بفلوسي دي

لسه الشوارع مكسرة

لسه المستشفيات شبه المشرحة

لسه بناكل لحم حمير وبنشرب بدرة سيراميك

فلوسي بتروح فين يا جدعان !!!!!!

نفسي ارجع تاني :(

على مسرح كبير ...وقفت لابسة روب التخرج ...وعلى راسي البتاعة الغريبة دي

وحواليا الدفعه كلها

بينادوا اسم ورا اسم ....والناس مبتسمة ومبسوطة ...

اسمي اتنادى ...بصوت عالي

القاعة كلها بتصقف ...وصحابي قاعدين في القاعة بيصفروا ويهللوا..... شعبتي جامدة في المدرسة انا

مشيت ورجلي بتترعش ...خطوة هادية ...ابتسامة ظريفة .وعنين مليانة دموع

وقفت قدام مديرة المدرسة ...بصتلها وبصتلي ...لقيت نفسي بترمي في حضنها

عمري كله كان في المدرسة دي..

الست دي بعتبرها امي التانية ....هيا اكيد لسه فاكرة اول يوم لما انا جيتلها المدرسة وانا عندي 3 سنين

لما دخلت مع ماما وانا مذهولة من العالم الكبير الغريب اللي انا رايحاله

ودخلوني الفصل ولاقيت ناس كتير من سني قاعدين

وقعدوني قدام عشان انا قصيرة

اكيد هيا فاكرة اني اول ماكتشفت ان في حاجة اسمها فسحة ...بقيت كل ما ازهأ من الحصة اقول للعيال في الفصل

يالا فسحة

وافتح الباب واخرج والعيال ورايا والمدرسة واقفة مش مصدقة نفسها وبتصرخ ...كانت المديرة تيجي تضحك

وتقول للمدرسة معلش سيبيهم

تفتكروا هيا فاكرة لما كنت في تانية ابتدائي ....ولاقوني متشعلقة على نخلة جوا المدرسة بجيب بلح للعيال

وعملولي استدعاء ولي امر

او فاكرة لما كنت بصر اني انزل من الفصل اللي في الدور الاول من البلكونة مش من الباب

ولما كبرت و اتنقلت الدور التاني كنت بنزل متزحلقة على الترابزين وما بستعملش السلم

طيب هيا فاكرة لما اكتشفت في مرة اني بزرع بيبسي في جنينة المدرسة

كل كان بيبسي اخلصها ادفنها واسقيها بيبسي على امل اني الاقي شجرة البيسبسي طلعت في يوم من الايام

طيب هيا فاكرة حرب المايه اللي كنا بنعملها في اعدادي وثانوي

لما نتجمع كلنا ونرش بعض بالميه باي وسيلة ... نملى قزايز ..ونملي بلالين ونملى بوقنا واحيانا نستعمل خرطوم الزرع

على الرغم من دا كله كانت بتحبني اوي ...كانت بتقول عليا بالرغم من الشقاوة اللا معقولة الا اني مؤدبة

ومتربية وشخصية قوية وقيادية ومحبوبة من صغري

وكمان كنت شاطرة جدا ...كل مسابقات المدرسة مع المدارس التانية كانت بتصدرني فيها

كل الذكريات دي عدت على بالي في لحظة وانا حضناها على المسرح ....لقيت اني طولت اوي كد وعيب لسه في بقيت الدفعة

اتعدلت واستملت الشهادة وبصيت في عينيها لاقيت دموع

يبقى هيا بردو افتكرت كل دا

رجعت مكاني وانا بغالب دموعي

كل دا خلاص راح

كل الايام دي مش هترجع تاني ...حفلات المدرسة ...رحلات المدرسة ....الاذاعة ...الطابور ...النشيد الوطني

المريلة والجزمة السودا والشراب الابيض

الشنطة اللي مليانة على اخرها اللي تقطم الوسط

اصحاب العمر ...يااااه ...احنا كبرنا سوا ....كلنا نفس العمر كأننا توائم

همشي من الحفلة دي مخلصة مرحلة من حياتي وببتدي مرحلة تانية خالص

عندي حماس اكيد للمرحلة التانية ....بس عندي حنين كبير للمدرسة

بعد سنين....دلوقتي ....ومن موقعي هذا على مكتبي في الشغل ...بعد ماخلصت المرحلة اللي بعد المدرسة وبعيش مرحلة تالتة اوي يمكن رابعة

لسه شايفه ان احلى ايام حياتي على الاطلاق ايام المدرسة

وان حنيني للايام دي بيزيد مع الوقت مش بيقل

نفسي ارجع تاني البس المريلة واعمل الضفيرة وامسك الشنطة واحضر الحصص واذاكر وانجح واطلع الاولى

نفسي ارجع اتشاقى واجري واصرخ واضحك من قلبي لحد ما عيني تدمع من كتر الضحك

نفسي ارجع اكبر همومي اني نقصت نص درجة في النحو ....واني مش طايقة مدرسة الفيزيا

بجد نفسي اوي

ياتقول كلام في محله ...يا تقول حـالو يــا حـــالو!!

ايوان ايوان ...هوا كدا بالظبط

عارف لما تكلم حد في حاجة وتلاقيه بيرد في حتة تانية خالص

تبقى مش عارف العيب من مين بالظبط

انت اللي مش عرف توصل المعلومة ولا هوا اللي مش عايز يستقبل

ولا هوا فاهم وعامل عبيط ولا ايه

ساعتها ببقى عايزة اصرخ بصوت عاااااااااااااااااالي واقول



حـــــــــــالـــــو يــــــــا حـــــــــــالــــــــــو

تخاريف مخنوق !؟

عارف لما تبقى مخنوق ...مخنوق بجد ...مش قادر خلاص
عارف لما احساس الخنقة النفسي دا يبتدي يتحول لاحساس ملموس
لما تحس زي ما يكون في حد ماسكك من زمارة رقبتك
او زي ما يكون حد شفط الهوا من حواليك
لما تحس انك فعلا عاجز عن التنفس
وانك هيجرالك حاجة
عارف لما دموعك تغرقك من جوا
وانت مش قادر تطلعها برا عشان مش هينفع انت ماتبقاش قوي لانك كنت كتير اوي رمز للقوة
عارف اللحظة دي
عارف لما تقول لنفسك انا قوي الايمان ومافيش حاجة هتهزني لانه مهما حصل دا قضاء ربنا
عارف لما من كتر ما بتقول الكلمة دي لنفسك قربت تصاب بلا مبالاة
وقربت توصل لمرحلة ماعادش شيئ فارق وكله محصل بعضه
عارف كل دا
طيب كويس
اصل انا خلاص يظهر ما بقتش عارفه حاجة