Statutes for life

ماذا حدث للبني آدمين

ماشية في الاتوستراد من ناحية سيتي ستارز متوجهة الى شارع الطيران الساعة حوالي11 بالليل
الاتوستراد زحمة جدا فوق الوصف
والعربيات كلها بتمارس هوايتها في الحك والتزنيق
انا واقفة في الصف بتاعي سرحانه تماما وفي فراغ صغير بيني وبين العربية اللي قدامي
اذ بي افوجأ بواحد داخل من يميني ومصر يحشر نفسه عشان يملى الفراغ اللي قدامي
طبعا عربيتي وعربيته حكوا في بعض
مجرد حكة بسيطة عادية
زمرت ورحت موسعة وطلعت قدامه
لاقيت بني ادم منهار ..لا منهار دي كلمة تافهة
زي ماكون شتمته بالأم مثلا
كلاكسات وتشويح وصريخ واللي فهمته يعني انه عايزني اقف على جنب !
تجاهلته تماما وكملت طريقي ..طلع يجري ورايا والشارع اساسا مش متحمل جري لأنه زحمة جدااااااا
وبيحاول بجهد جهيد يكسر عليا بأي شكل وانا بنفس برودي وتجاهلي بطلع منه واكمل طريقي
شباكي مقفول واللوك بتاع العربية مقفول لأن دي احتياطات امنية لازم اي واحدة بنت تتبعها وهي ماشية في شوارع القاهرة
المهم ..فكرت اخلص منه فاديت اشارة شمال وقلت ادخل عباس العقاد
لاقيته مدي اشارة شمال ولازق فيا وداخل ورايا !!
وبردو نفس الانهيار اللي في ملامحه شايفاه من مراية العربية
غيرت رأيي وقررت اكمل على طول
في اللحظة دي واضح انه فقد اعصابه تماما
الشارع بيوسع شوية في المنطقة دي والعربيات بتقل نظرا لان الاغلبية بيلفوا عشان يدخلوا عباس العقاد
لاقيت فجأة واحد بيقف بعرض الشارع قدامي وبينزلي وبمنتهى الانهيار بيفتح باب عربيتي
زي ما قلت ..انا قافلة اللوك فباب العربية ماتفتحش معاه
رجعت ورا شوية عشان اعرف اطلع منه
لاقيته بكل القوة اللي ادهاله ربنا بيرزع بايديه الاتنين على شباك عربيتي من ناحيتي وبيصرخ بهستريا

اقفي بقولك اقفي
مشيت وسبته
وفضل يجري ورايا بنفس ذات الانهيار العصبي
لحد ما فجأة بردو مالاقتوش ورايا ! ماعرفش فعلا ايه اللي حصل ولا غير رأيه ليه ولا ناوي على ايه

أنا فعلا اعصابي تعبانة من ساعتها .. دا هو الغلطان اصلا وأنا مافرقليش
يعني لو مثلا الباب اتفتح معاه وانا ماكنتش قافلة اللوك كان هيعمل فيا ايه ؟
طب لو القزاز اتكسر وهو بيرزع عليه بالشكل الهستيري دا وأنا شباك عربيتي اصلا مش شباك دا بلكونة
يعني لو اتكسر في ايده كان زمانه قاعد معايا جوا العربية او شايلني مطلعني براها بمنتهى السهولة
ازاي واحد يفكر يعمل كدا في الشارع ! ومع واحدة بنت !!
وزي ما ذكرت بردو دا شارع كبير وزحمة
هو ليه ماحدش حاول يتدخل ؟
ايه اللي كان مطلوب مني اعمله ؟
انا من كتر الصدمة ما بصيتش في وشه ولا شفت نمرة عربيته
أنا فعلا عندي ذهول
نسيت اقول انه كان معاه بنتين في العربية ! طيب مش خايف عى منظره قدامهم ..
أنا لو راكبة مع واحد وعمل كدا في واحدة هسيب العربية وانزل ومش هعرفه تاني
إيه البلطجة دي
أنا فعلا حاسة ان أعصابي مهزوزة جدا من ساعتها
الناس دي مطلوقة في الشوارع ليه ..دول مكانهم مستشفى الأمراض العقلية أوعلى الأقل مصحة للأمراض النفسية
دا لا يمكن يكون انسان طبيعي سوي ايه كمية الفراسترايشن دي ..لا يمكن يكون بني ادم اصلا في اللحظة دي فكرني بجد بمصارعة التيران

لا حول ولا قوة الا بالله ! الناس جرالها ايه

بعد ما أنفض مولد سيدي أوباما وطلعنا بلا حمص

حليوة وعنده كاريزما

بادي لانجويدج مافيش أحسن من كدا

ها وبعدين ؟
مش عارفه ليه ناس متضايقة من الخطاب ..وبردو مش فاهمه خالص ليه ناس مبسوطة منه

أنا
indifferent

تماما
ماكنتش مستنية منه حاجة ..وهو فعلا ما اضافش حاجة لانه ببساطة مش مطلوب منه اصلا يعملنا حاجة

الراجل امريكاني..رئيس امريكا ..شغله واكل عيشه يخدم مصالح امريكا
خطابه الموجه للعالم الاسلامي هدفه الاساسي تحسين صورة امريكا اللي دمرها بوش تماما
هدفه تبرير اللي بيحصل في العراق وافغانستان وفلسطين
في ناس بتقول على الأقل خطوة كويسة من امريكا انها تبرر افعالها لانها طول عمرها ما بيهمهاش
أهو دا بقى مجد شخصي بيبنيه معجزة زمانه باراك أوباما
كلمنا بلغتنا ..بطريقتنا ..باللي بيعجبنا ومجد في الإسلام والحضارة الإسلامية وفضلها على البشرية واستشهد بالقرآن ( ودي من اكتر الحاجات اللي مش عاجباني كانت اوفر ومبالغ فيها كان كفاية مرة واحدة على أقصى تقدير انما شحاته العواطف دي كانت مستفزة فعلا )
وواضح انه عجب ناس كتير
وفي ناس بتقول اما نشوف ايه اللي هيحصل ؟ ايه اللي هيحصل مثلا ؟ هو قال ايه اصلا احنا مستنيينه يتحقق
الراجل ماقالش حاجة ..ماقالش حاجة خالص ..دا لعب السنيورة
طيب لو كان قال حد يقولي قال ايه معجزة مثلا ومستنينه يتحقق ويتحول من اقوال لافعال ؟
واللي متضايقين ..متضايقين ليه ؟! الراجل قال اللي عنده وشكرا ومشي ..ايه اللي حصل ؟! دا غير ايه من اللي احنا فيه ولا ممكن يغير ايه ؟ أضاف ايه ؟ أساء في ايه ؟ ولا حاجة ! خطابه كله ولا حاجة

ليه ردودالافعال المبالغ فيها سواء سلبا او ايجابا
يعني عايزين منه ايه ؟ ليه متصورين انه هيعملنا حاجة ..هو اصلا مش مطلوب منه يعملنا حاجة
خلينا موضوعيين شوية ..مين دا اساسا ؟وقال ايه وقاله ليه واستفادنا ايه أو خسرنا ايه
بناءا عليه نتعامل مع خطابه
بلاش العاطفية الغير مبررة المبالغ فيها
ردود الأفعال في مجملها اوفر
سواء اللي فرحانيين او اللي متضايقين
الموضوع في رأيي مش مستاهل
ليه التصفيق الحار بين كل جملة والتانية ..لا والراجل بيعمل Pause بعد كل كلمة عايز الناس تصقف فيها والناس فعلا تقوم تصقف ..كل التصفيق كوم والتصفيق اللي بعد كلامه عن القضية الفلسطينية والاسرائيليين المساكين كوم تاني
دا كان اسوأ حاجة اتقالت في الخطاب اساسا وعلى الأقل رد الفعل كان لازم يكون السكوت التام مش التصفيق بحرارة
وليه الهتاف اللي في الأخر ؟ هي الناس فاكرين نفسهم في حفلة تامر حسني ؟!!!!
على النت ردود الافعال في مجملها ضد الخطاب
في الواقع اللي قدامي ردود الأفعال في مجملها منبهرة بالخطاب
وبين دول ودول أنا

indifferent

سؤال جانبي : الفنانيين دول كلهم كانوا بيعملوا ايه هناك ؟ يعني سفراء النوايا الحسنة مفهوم ..انما ابطال عيال حبيبة وخليج نعمة والشياطين الخمسة وفنانيين لا عندهم قضية ولا موقف ولا حاجة راحوا يعملوا ايه ؟

!! رد الجميل يا صاحب الفضل

اذا ما كنتش اتفرجت على فيلم دكان شحاته وفي نيتك انك تتفرج عليه ماتقراش الموضوع دا لأني هحرق الفيلم

بداية قبل ما اتكلم عن تفاصيل الفيلم ..لو ماكنتش ناصري هتتخنق ..ولو بتحب السادات هتتشل ..ولو لسه عندك امل في البلد دي هتتأكد ان مافيش امل نهائي ومش بعيد تولع في نفسك
الفيلم كئيب ..جدا ..قبل ما ادخله الناس قالتلي بعد الاستراحة مش هتبطلي عياط ..انا الحقيقة بعيط من اول التترات
التيتر بيبدأ بأغنية توجع القلب اسمها مش باقي مني غير شوية ضي في عنيا كلمات جمال بخيت وبيغنيها أحمد سعد صوت أحمد سعد حزين وفيه بحة مصري أوي بيساعدك اكتر انك تكتئب جدا
كلمات الاغنية بتقول
مش باقي منى غير شوية ضى في عنيا
انا هدهملك وامشي بصبري في الملكوت يمكن في نورهم تلمحي خطوة تفرق معاكى بين الحياة والموت
مش باقي منى غير شوية نبض في عروقي خدي وعيشي
وافتحيلي تابوت افرح بريحة ورد فرعوني وربنا في عوني
إذا دخلت الجنة ولا النار حشتاق لضحكتك وقعدتى في الدار
والقهوة متحوجه من طيبة العطار
في كل يوم الصبح اشرب حليب قبطي
وفى النهار والمسا امسك ستار الكعبة لو سبتي
واثبت اذا هربتى
اهديكى عمري وحسي وجوارحي
اهديكى جرحى هو إلى باقي في دنيتي لما خلص فرحى
مش باقي منى غير شوية لحم في كتافى
بلاش يتبعثروا في البحر
بلاش يتحرقوا في قطر الصعيد في العيد
بلاش لكلب الصيد تنوليهم
خدي إلى باقي من الأمل فيهم
وابنيلى من عظمهم في كل حارة مقام
وزورينى مرة وحيده لو كل ألفين عام
الم الجراح يتلم
مش باقي منى غير شوية دم
متلوثين بالهم مرين وفيهم سم
كانوا زمان شربات والنكتة سكرهم
شربتهم الخفافيش في قلب أوكرهم
مش باقي منى غير شوية دم مقدرش اسقيكى مواجعهم
ويرضوا مقدرش ارميكى وأبعهم
يمكن في مرة تعوز تطلبيني شهيد
حاحتاج يوميها الدم يمضى على شهدتى
مش باقي منى غير شوية قوة في إرادتي
على شوية شعر من خطى
حسبي عليهم وأنت بتخطي
وأنت في صبح الدلال بتعطري شطي
مش باقي غير شوية ضى في عنيا
انا مش عاوزهم
لو كنت يوم حالمحك وأنت بتوطى
في معركة مفيهاش ولا طيارات ولا جيش
وأنت في طابور العيش
بتبوسى أيد الزمن ينولك لقمة من حقك المشروع
مش باقي منى غير شهقة
شهقة في نفس مقطوع
بفتح لها سكة ما بين رئة وضلوع
ما بين غبار ودموع
وأنا تحت حجر المقطم في الدويقة بموت
أنا والعطش والجوع
يئن تحتي التراب
وأنا صوتي مش مسموع
يا حلمنا الموجوع من المرور ممنوع
مستني لما يمر موكب سلاطينك
مش باقي منى غير شوية رحمة من طينك
على شوية صبر من دينك
مش باقي منى غير حبة غنى تايهين
في الضلمة مش لاقين حس الفواعلية
ولا صوت مركبي عفي فوق المعدية
ولا صوت بناتي العذارى في كل صبحيه
والغنوه أمنية ياما نفسي أقابل حبيبي
وأنا على الزراعية صوتك وصوتهم غاب
وأنا تحت حجر المقطم بموت لوحدية
الليلية راحت عيوني تطل على البستان
وجناين الرمان رجعت لي توصف عناد الغل والدخان
وسحابة سوده تضلل على غُنى الغلبان
رجعت لي توصف هبوب الموت على الألوان
رجعت لي توصف خيال الذل في موائد الرحمن
مش باقي منى غير شوية كفر بشروقك
وأنا منبع الإيمان
مش باقي منى غير شوية ضى
وعنيا مش قادرة تلمحك
في وحدتي محنى
خايف أموت من الخوف والضعف يفضحني
السجن عشش في قلبي وماشى في شوارعك
نفس إلى بعني وخدعني بالرخيص بيعك
أشيل حمولى أنا ولا أشيل حملك
ماعدت املك شيء فيكى ولا فيا
ولا قيراط ولا بيت
ولا نسمة صافية تلاغى النيل بحريه
مش باقي منى غير شوية حب جرحني
ولا باقي منى غير شوية ضى في عنيا
:) دا كبداية يعني
الخليفة الموسيقية اللطيفة دي شغالة اصلا بقى على مشاهد البؤس اللي مصر عايشة فيه من 30 سنة
بيبتدي من الاخر ..من سنة 2013 ويرجع بالسنين ...كل سنة على مانشيت جرنال وصور ارشيفية وفيديوهات للأحداث ..قطار الصعيد... قصر ثقافة بني سويف..حريق الشورى ..العبارة ..ازمة العيش.. .الدويقة ...وهكذا لحد ما يوصل لتعيين حسني مبارك رئيسا للجمهورية وقبلها اغتيال السادات ويبدأ الفيلم على ميلاد شحاته-عمرو سعد
الفيلم هو حكاية شحاته ...من يوم ميلاده لوقتنا دا ..30 سنة واللي حصل لشحاته فيهم بالتوازي مع اللي حصل لمصر فيهم
في مباشرة زيادة عن اللزوم في الفيلم كأننا في درس وعظ تتجلى عظمة المباشرة في مشهد قاعد فيه والد شحاته ( محمود حميدة) بيكلم شحاته بيشاورله على صورة ناصر اللي حطينها على الحيطة وبيقوله حط صورة الريس على الشرخ عشان تداريه ..فيرد شحاته بس الشرخ كبير يا آبا الصورة هتداري ايه ولا ايه..يقوله اهو تداري اي حاجة
مباشرة فجة ...بس بتوصل وجهة نظر ناصر عبد الرحمن السناريست والمخرج خالد يوسف
أحمد متضايق جدا ان الفيلم بيعرض وجهة نظر صناعه ومش محايد ..بس انا مش متفقة معاه في الرأي ..هو مش بيكتب تاريخ عشان يبقى محايد ..هو بيعمل فيلم سينما يستعرض فيه الاحداث اللي حصلت من وجهة نظره الشخصية ودا حقه ..اللي عنده وجهة نظر غيرها يعرضها
أحمد كمان شايف ان الفيلم بيهد ما بيبنيش ..ودي وجة نظر صديقة ليا كمان ..انا متفقة معاهم في النقطة دي مع اني مش عارفه كان ممكن الفيلم دا يبني ازاي ! بس من حيث المبدأ هما معاهم حق
صاحبتي بتقول ان الواحد طالع من الفيلم حاسس بأن الدنيا سودا واللي جاي اسوأ وحتى لو كل المؤشرات بتقول كدا حكاية اننا نأكد الفكرة دي هتخلي اللي احنا خايفين منه يحصل فعلا ويبقى واقع
بالذات انه كمان مضلمها ل 4 سنين قدام وبيتنبأ بحالنا في 2013
وان برا لما بيعملوا أفلام مهما كان في مأساويات في الفيلم دايما الخير بينتصر ودا مش بيتعمل اعتباطا دا مقصود عشان يأثر نفسيا على الناس ويفضل عندهم امل ويجاهدوا عشان حياة أفضل
انما اللي عمله خالد يوسف دا تدمير تام لنفسية كل اللي شافوا الفيلم كأنه بيوصلهم رسالة ان انت لو طيب وكويس وابن حلال هيتداس عليك وهيحصلك اللي حصل لشحاته لان الخير عمره ما بينتصر والشر عمره طويل وحظه حلو
أحمد متفق مع صاحبتي في الكلام دا تماما وأنا مقتنعة انه صح بس بردو مش عارفه كان ممكن دا يحصل ازاي لسبب بسيط ..الفيلم واقعي ..لو قفل على ان الخير بينتصر في الاخر مش هيبقى واقعي ابدا لأن الواقع عندنا هنا للاسف بيقول ان الخير عمره ما بينتصر

عموما على رأيهم خالد يوسف عامل فيلم لنفسه

همه الاول والاخير نجاحه الشخصي
أكيد ماخطرش في باله لحظة حجم الضرر اللي أحمد وصاحبتي بيتكلموا عنه

كان ممكن النهاية تتغير وتبقى سعيدة ويبقى ليه تأثير ايجابي بس دا ماكانش هيحقق اللي خالد يوسف عايزه

هو حر ! بس ورحمة والديه يبطل بقى يعيش دور المناضل صاحب القضية

الفيلم في مجمله مؤلم ..بيوجع القلب..على البلد واللي حصلها واللي بيحصلها ..على الناس وقد ايه بقوا وحشين ..واكتر وجع قلب على شحاته وطيبته وسط كل دا ونقائه وبساطته واحلامه المتواضعة مشاهد كتير بتوجع زي مشهد بيع البيت لسفارة اسرائيل مثلا وطبعا مشهد النهاية هو قمة المأساة وأداء غادة عبد الرازق والأخ الكبير اللي كان اسمه في الفيلم طلبة كان مؤلم

بالرغم من المباشرة في كتير من المشاهد الا ان الفيلم فيه رمزية

يمكن كمان رموز زيادة عن اللزوم بردو بشكل مباشر ..مش عارفه خالد يوسف عمل التركيبة دي ازاي بس هي كدا ..رمزية مباشرة

شحاته في اعتقادي الشخصي رمز للمصريين وابوه رمز لعبد الناصرودا بيبان في المشهد اللي بيمسك فيه شحاته صورة عبد الناصر ويقول الله يرحمك يابا.. اما هيفا وهبي وهنا المفاجئة رمز مصر أن أن تشششش بعد بهية وفؤادة مصر بقت بيسه يا ولاد !

اما باقي الرموز فتفسر نفسها تباعا مع الاحداث اللي سياقها الأساسي قصة النبي يوسف عليه السلام مع اخوته

الرموز اللي وصلتلي ممكن تكون من محض خيالي وفي حالة تشابه الاحداث مع الواقع فهو محض صدفة مش اكتر

:)
المواويل الصعيدي اللي كاتبها جمال بخيت جميلة
عمرو سعد رائع ..لا رائع دي قليلة ..الولد فعلا فنان وحساس ومبدع الله يسامحه على اللي عمله فيا
محمود حميدة الكبير كبير بردو
غادة عبد الرازق خرافية ..مش معقولة البساطة في الاداء وعدم التكلف والاحساس العالي
عمرو عبد الجليل ..دوره مش مختلف كتير عن دوره في حين ميسرة ..بس ما يمنعش انه كان ممتاز وان افيهاته على الرغم من انها مضحكة الا انها ليها معاني كبيرة وعميقة زي مثلا عنوان الموضوع ( رد الجميل يا صاحب الفضل ) دي جملة قالها في حملة الانتخابات لما أجروه أحد الاحزاب معروف مين طبعا هو وسواقين الميكروباص عشان الحملة
الجملة دي تبان انها افيه مضحك الا انها أثرت فيا جدا وحسيتها حقيقية جدا في الزمن دا وفي الموقف دا تحديدا وهو بيطلب من الناس انها تنتخب مرشح الحزب دا بالتحديد لانه بانتخابهم ليه هيبقوا فعلا بيردو الجميل اللي مش موجود لانهم اساسا اصحاب الفضل
الاخ الاكبر لشحاته للاسف ممثل مش عارفه اسمه ..اسمه في الفيلم طلبه كان كويس جدا
الاخ الاوسط محمد كريم واسمه في الفليم سالم محدود الموهبة جدا ودوره بيساعدك جدا انك اساسا ما تتقبلوش ونقدر نقول انه نجح في دا
عبد العزيز مخيون دوره صغير جدا الا انه اختيار موفق..الشخص المناسب في المكان المناسب
هيفا وهبي ..ما ضايقتنيش خالص ..توقعت اسوأ من كدا ..كتجربة أولى ليها مش مضرة ..كان ليها مشاهد مالهاش لازمة زي مشهد الرقصة يوم قراية الفاتحة بس اعتقد ان خالد يوسف ماهانش عليه يجيب هيفا وهبي ومايرقصهاش

المشهد كله لو اتشال مش هيأثر على الاحداث غير ايجابا الحقيقة

في واحد اسمه في الفيلم البرص ! دا لا يمكن يكون ممثل !دا أكيد هو كدا

لو هومش كدا فهو اكتر من ممتاز

اجمالا حتى الناس اللي عملت ادوار صغيرة كانت حقيقة
باقي في الاخر بس اني اقول اني مابحبش خالد يوسف ..ومشاكله باينه اوي في الفيلم ..بس الموضوع والاحداث وحرفية الممثلين شفيع ليه في الفيلم دا
خالد يوسف كمخرج لا يميزه غير توجيه الممثل هو دا اللي هو شاطر فيه وبس
عموما دكان شحاته فيلم لازم يتشاف ! على الأقل هو فيلم ممكن تتناقش فيه وتاخد وتدي وتنقد وتفكر وتتفق وتختلف يعجبك أو ما يعجبكش ...كدا يعني
! حظي السيئ او يمكن حظ أحمد السقا السيئ إني دخلت في نفس اليوم فيلم إبراهيم الأبيض

لو حد يعرف يحكيلي قصة فيلم ابراهيم الأبيض ينوبه فيا ثواب ويحكي لأني غلبت أدور على القصة طول مانا بتفرج على الفليم ما لاقيتش !!
خسارة والله شركة انتاج ضخمة وميزانية على ما سمعت عدت ال 30 مليون وأحمد السقا وهند صبري ومحمود عبد العزيز وعمرو واكد يعني كاست ممتاز وموسيقى تصويرة لهشام نزيه خرافية ومواقع تصوير رهيبة وحركة كاميرا اكتر من ممتازة ومخرج مش بطال أبدا ..ليه النتيجة تطلع كدا !! ليه سكتشات غير مترابطة وفيلم مفكك من بعضه ! بس الحق يقال كل سكتش في حد ذاته حلو :) ليه فيلم كامل مافيهوش ولا شخصية واحدة طيبة أو نضيفة ممكن اتعاطف معاها ! يادوبك هي حنان ترك اللي طلعت مشهدين ومالحقتش أحس بيها أصلا ومالهاش أي تأثير في الأحداث

أنا بصراحة ماحستش ب ولا شخصية في الفيلم مع ان شخصية عمرو واكد عجبتني وأدائه كان هايل الا إني بردو ماحستش بيها

ليه في مشهد النهاية اسخسخ من الضحك والمطلوب إني اعيط
تيمة روميو وجولييت دي عفا عليها الزمن بصراحة مش وقته خالص في اللي احنا فيه دلوقتي
!قال روميو وجولييت قال