Wednesday, December 31, 2008

Screw it ....Let's do it


قبل أي حاجة : آبي ورئيس جمهورية نفسي جزاهم الله خير حضروا ايميل يتبعت بخصوص غزة بالانجليزي والفرنساوي عشان يتبعت لهيئات ومنظمات عالمية
المطلوب حاجة بسيطة خالص ..انكم تاخدوا الصيغة وتبعتوها ع الايميلات المحطوطة و ..بس
التفاصيل
هــنــــــــــا

عايزةاكتب حاجة عن ال New year
بس التوقيت الحقيقة والاحداث اللي بتحصل تقفل نفس اي حد عن اي حاجة

دا غير اني أكتشفت ان اي حاجة تخصني هقولها مش هتبقى مهمةلأي حد بيقرأ الموضوع دا نوهائي الحقيقة

دا غير اني ابتديت اقتنع ان اللي عايز يبتتدي بداية جديدة مش لازم يستنى سنة جديدة على غرار هبتدي دايت من يوم السبت الجاي

او أنا جاي اخطبك بعد العيد ( دي جملة واحدة صاحبتي بتسمعها بقالها 4 سنين ) ماعلينا

المهم...اللي عايز يبتدي بيبتدي واللي مستني حدث عشان يعمل حاجة مش هيعمل حاجة خالص

دا غير بقى اني قررت ابقى اكثر واقعية ...سنة جديدة ...مممممم

لا الكسلان هيبطل كسل ولا اللي بيشرب سجاير هيبطل من اول يناير ولا هنروح الجيم ولا هنخس ولا هنسيب شغلنا اللي مش طايقينهولا هنعمل حاجة نفسنا فيها وعمرنا ماعملناها بمجرد ما تدق الساعة 12 يوم 31 ديسمبر معلنة بداية السنة الجديدة زي ماتكون السنة الجديدة دي جاية وجايبة المعجزات معاها
فكرةال New year بالنسبة لي بقت فكرةمستهلكة مضيعة للوقت وبتحسسني بالفشل ( فشلي أنا شخصيا)
فابالتالي ...أنا هتكلم عن السنة الجديدة بفكر جديد :)


فكروا في كل الحاجات اللي مستنيين السنة الجديدة تيجي عشان تعملوها وقولوا بصوت عااااالي

وايه يعني


شغلك قارفك ومخنوق ...قول وايه يعني غيري مش لاقي شغل ووظيفتي بالنسبة لغيري ممكن تكون اشبه بالحلم

اعز صحابك طلع ندل ...في داهية ..وايه يعني

مستقبلك مضلم وعليه سحابةسودا ...وايه يعني ..المهم انك عايش الحاضر لو دلوقتي بنيت بكرا تلاقي

بيتك مش عاجبك ..وايه يعني ..غيرك مش لاقي سقف واربع حيطان



الأكل مش عاجبك ..وايه يعني ..غيرك مش لاقي اللقمة

في نهاية سنة طويلة صعبة شبه اللي قبلها بردو واللي جاية بعدها as well

أنا محتاجة ارمي شوية حاجات ورا ضهري واشم نفسي وابطل اضغط على روحي واصدق قلبي شوية واسمع كلامه حتى لو كل حاجة تانية فيا بتقول ( يحرقك بتعملي كدا ليه ؟!!)

ماحدش يستنى سبب ولا حدث ولا مناسبة

انا قررت حالا اني استبدل كلمة ليه اللي تعبتني كتير بكلمة ليه لأ!!!

*********
 


Wednesday, December 17, 2008

Law of attraction




الخوف من الالم مؤلم اكتر من الالم نفسه ومهم جدا انك تعرف ان الحاجة جابت اخرها لما تجيب اخرها وماتعيشش مغيب ولا بتضحك على نفسك سيب اللحظات دي تبقى ماضي وماتحاولش تفسر احساسك المطلوب منك انك تعيشه بس
الاحساس نعمة محروم منها كتير ....فعلا في ناس فقدت القدرة انها تحس !
ماتخافش من غلطاتك ..ماتخليش خوفك من الغلط يخليك ما تعملش حاجة خوفا من انك تغلط تعمل وتغلط احسن ما تفضل كدا مالكش لازمة
ما تستكبرش تسمع تجارب الغير وتتعلم منها ..مهما كنت حاسس انك متميز ومختلف كان في حد قبلك حس كدا بردو وحلم نفس حلمك ومشي في مشواره ووقع في غلطات وعدى حاجات لو عرفتها ممكن تخلي رحلتك في الحياة اسهل
تجارب الاخرين بتنفع كتير
وفي المقابل احكي حكايتك للناس ..خلي نفسك مثال يمكن كلمة صغيرة تقولها تفرق كتير في مشوار حد تاني !
Law of attraction
الكلمة دي او النظرية دي جننتني ..لسبب بسيط اني عيشتها قبل ماعرفها
في ثانوية عامة قعدت طول السنة في مخي حاجة واحدة بس ..اني عايزة اجيب اكتر من 98 % وعايزة اطلع من ال 5 الاوائل على المدرسة
طول السنة بذاكر وادعي وكلي يقين اني هعمل كدا واني هقدر واني هوصل لحلمي الصغير ( اللي اكتشفت بعد كدا قد ايه كان حلم تافه بس مشكلة ) واخر السنة نجحت وطلعت الخامسة ع المدرسة وكان مجموعي 98.2% بالظبط !
if you really want something and truly believe it's possible, you'll get itلو عايز حاجة بجد ومؤمن تماما انه حلم مشروع وممكن تنفيذه هيجيلك وهتوصله
بعد كدا النظرية دي اتألف عليها كتب كتير وانتشرت وناس كتير اقتنعت بيها واستخدمت بسخافة وتم تتفيهها جدا بس ببساطة  تفكيرك بيتحكم في الاحداث اللي بتحصل في حياتك ..لو بتفكر بايجابية هتجذب ناحيتك كل الحاجات الايجابية وبتفكر بسلبية هتجذب ناحيتك كل واي حاجة سلبية وانك لوفكرت كتير في حاجة كويسة وركزت وعملت كل اللي تقدر عليه هتحصل عليها في الاخر ..ولو فكرت كتير في حاجة وحشة هتحصلك بردو !
خاف من تفكيرك بجد ..لانه بيحدد كتير من احداث حياتك ..

( أنا عند ظن عبدي بي ، وأنا معه إذا ذكرني ، فإن ذكرني في نفسه ذكرته في نفسي ، وإن ذكرني في ملإ ذكرته في ملإ خير منهم ، وإن تقرب إلي بشبر تقربت إليه ذراعا ، وإن تقرب إلي ذراعا تقربت إليه باعا ، وإن أتاني يمشي أتيته هرولة )
(الظانين بالله ظن السوء عليهم دائرة السوء)-قرآن

( لا يموتن أحدكم إلا وهو يحسن الظن بالله ) -حديث
 ( إذا أحب عبدي لقائي أحببت لقاءه ، وإذا كره لقائي كرهت لقاءه) - قدسي
 حياة الانسان مش قدر ومكتوب ومش هيتغير ..لا بيتغير لو انت عايز

خد وقت لنفسك مع نفسك ابعد عن اصوات الناس عشان تعرف تسمع صوتك الداخلي بوضوح من غير تشويش..صفي قلبك وروحك وعقلك ..ركز في كل حاجة حلوة نفسك فيها وخليها تسيطر عليك ..انسى كل حاجة وحشة وابعد تفكيرك عنها ..تأمل ...وادعي ..وابتسم
وافتكر ...
Nothing is excluded from the law of attraction. Your life is a mirror of the dominant thoughts you think








Friday, November 21, 2008

fairy tale


The world's shortest fairy tale



Once upon a time , a guy asked a girl

will you marry me

The girl said

NO

and she lived happily ever after ..



went shopping , had fun with friends, always had a clean house

never had to cook

had a wardrop full of shoes and handbags, stayed skinny



The end

 

Wednesday, November 12, 2008

اخر حاجة تعلق عليها في البنت شخصيتها !!! استرجل

دي جملة اتقالت في اعلان بيجي في التيليفيزيون
يبدأ الاعلان ببنت مالهاش لازمة معدية على 4 شباب
( هاي يا مرسييييييييي) يقوم مرسي يرد يقولها هاااااي
بعدين يبص لاصحابه ويقولهم (شخصيتها جميلة جدا ) او حاجة زي كدا مش فاكرة
يقوم يطلعلك صوت كدا من حيث لا تعلم يقولك
أخر حاجة تعلق عليها في البنت شخصيتها !!!
استرجل !!
اشرب بتنجان ازرق ( اسم المشروب اللي مش هقول اسمه عشان ماعملهمش دعاية)
ايوا خير بقى !! نعم !!
بالنسبة لان الاعلان بيطلب من الراجل انه يسترجل وما يعلقش على شخصية البنت !!
حيث ان مش من الرجولة طبعا وقطعا انه يلفت نظره شخصية البنت !!
طيب مش كانوا يقولولنا المفروض الراجل يلفت نظره ايه بالظبط عشان يعلق عليه ويبقى راجل !!!
هو يعني ايه راجل من وجهة نظر صناع الاعلان !
أنا هتشل من ساعة ما شوفت الاعلان دا على فكرة ومش عارفه اعمل ايه بس انا عايزة ابهدلهم وعايزة الاعلان دا يتوقف فورا
انا حسيت بالاهانة بجد لما شوفته
ايه التفكير الافقي دا !!!!
هما الناس دول عايزين ايه بالظبط !
حد يقولي اروح فين ولا اعمل ايه انا مش قادرة الاعلان ضاغط على اعصابي لدرجة فوق احتمالي
همووووووووووووووووووت

كفاية تعامل مع المرأة على انها حاجة حلوة معدية
احنا عندنا مخ على فكرة وعندنا شخصية
وعندنا احساس
يعني الخلاصة بني ادمين !!

Saturday, November 01, 2008

حالة


شؤون صغيرة


تمر بها أنت .. دون التفات

تساوي لدي حياتي جميع حياتي..

حوادث .. قد لا تثير اهتمامك أعمر منها قصور وأحيا عليها شهور

وأغزل منها حكايا كثيرة وألف سماء.. وألف جزيرة..

شؤون .. شؤونك تلك الصغيرة

فحين تدخن أجثو أمامك كقطتك الطيبة وكلي أمان

ألاحق مزهوة معجبة خيوط الدخان

توزعها في زوايا المكان دوائر.. دوائر

وترحل في آخر الليل عني كنجم، كطير مهاجر

وتتركني يا صديق حياتي

لرائحة التبغ والذكريات وأبقي أنا ..

في صقيع انفرادي

وزادي أنا .. كل زادي

حطام السجائر وصحن .. يضم رمادا يضم رمادي..

***

وحين أكون مريضة وتحمل أزهارك الغالية صديقي.. إلي

وتجعل بين يديك يدي

يعود لي اللون والعافية

وتلتصق الشمس في وجنتي

وأبكي .. وأبكي.. بغير إرادة

وأنت ترد غطائي علي

وتجعل رأسي فوق الوسادة..

تمنيت كل التمني

صديقي .. لو أني
أظل .. أظل عليلة

لتسأل عني

لتحمل لي كل يوم

ورودا جميلة..

وإن رن في بيتنا الهاتف

إليه أطير

أنا .. يا صديقي الأثير

بفرحة طفل صغير

بشوق سنونوة شاردة

وأحتضن الآلة الجامدة وأعصر أسلاكها الباردة وأنتظر الصوت ..

صوتك يهمي علي دفيئا .. مليئا .. قوي كصوت نبي كصوت وارتطام النجوم كصوت سقوط الحلي

وأبكي .. وأبكي .. لأنك فكرت في لأنك من شرفات الغيوب هتفت إلي..

***

ويوم أجيء إليك لكي أستعير كتاب

لأزعم أني أتيت لكي أستعير كتاب

تمد أصابعك المتعبة إلى المكتبة..

وأبقي أنا .. في ضباب الضباب كأني سؤال بغير جواب..

أحدق فيك وفي المكتبة كما تفعل القطة الطيبة

تراك اكتشفت؟ تراك عرفت؟ بأني جئت لغير الكتاب

وأني لست سوى كاذبة ..

وأمضى سريعا إلى مخدعي أضم الكتاب إلى أضلعي

كأني حملت الوجود معي

وأشعل ضوئي .. وأسدل حولي الستور وأنبش بين السطور .. وخلف السطور وأعدو وراء الفواصل .. أعدو وراء نقاط تدور

ورأسي يدور ..

كأني عصفورة جائعة تفتش عن فضلات البذور

لعلك .. يا .. يا صديقي الأثير

تركت بإحدى الزوايا .. عبارة حب قصيرة ..

جنينة شوق صغيرة لعلك بين الصحائف خبأت شيا

سلاما صغيرا .. يعيد السلام إليا ..

***

وحين نكون معا في الطريق وتأخذ - من غير قصد - ذراعي

أحس أنا يا صديق ..

بشيء عميق

بشيء يشابه طعم الحريق على مرفقي ..

وأرفع كفي نحو السماء لتجعل دربي بغير انتهاء

وأبكي .. وأبكي بغير انقطاع

لكي يستمر ضياعي

وحين أعود مساء إلى غرفتي

وأنزع عن كتفي الرداء أحس - وما أنت في غرفتي -

بأن يديك تلفان في رحمة مرفقي

وأبقي لأعبد يا مرهقي

مكان أصابعك الدافئات

على كم فستاني الأزرق ..

وأبكي .. وأبكي .. بغير انقطاع

كأن ذراعي ليست ذراعي..


مش ممكن يكون حد عرف يوصف حالة بالشكل اللي عمله نزار في القصيدة دي

احساس مهلك

Sunday, October 26, 2008

كلمات



ليه؟؟
اكتر سؤال بكرهه .
يمكن عشان بسأله لنفسي ولغيري وللدنيا وبتسئله كتير ودايما ما بلاقيلوش اجابة
او احيانا بتكون الاجابة كلمتين في منتهى البساطة بس بين سطورهم حكايات

وحدة
حاولت اكتب عن عروستي التانية زي ما كتبت عن عروستي الاولانية ...لاقيتني لسه واقعة تحت تأثير الصدمة ومحتاجة سنة تعدي على الاقل عشان اقدر اقول اي حاجة
انا حاسة بالوحدة
ثورة:)


حريةفي كلمة احلى من دي من الدنيا !!! كلمة لما بقولها بحس اني بتنفس ...بشوفني واقفه على قمة جبل وتحتي بحر ثائر وشعري بيطير حواليا وراسي مرفوعة وفاردة ايديا كأني طايرة في الهوا
انا كل يوم بيعدي عليا بفقد جزء من احساسي بالحرية



ناس
في ناس تقابلهم تحزن انك ما قابلتهمش من زمان ...
وفي ناس تقابلهم تحزن انك حتى لمحت طيفهم من بعيد



كذبة
بقيت بخاف اطلع احمد حلمي في اسف ع الازعاج..خايفة بجد اطلع عايشة في كذبة من صنع خيالي
بس انا مبسوطة ..حتى لو طلعت كذبة على الاقل انا عشت احساسي بصدق



تعوداتعودت اني ما تعودش على حاجة..في اشخاص واشياء كسروا القاعدة .... للأسف



الم
بخاف اتألم ..بخاف من فكرة الالم يمكن اكتر من خوفي من الالم نفسه شخصيا ...



حزن
ليه مش راضي يفارقني بقى ...هو دا قلة رضا ولا ايه ! انا حاسة اني مكركبة ومتلخبطة وخايفة اوي ..بكرا ما بقاش باينله ملامح ...عندي فوبيا من ان حاجة وحشة تحصل لحد بحبه ..انا عايشة الم الفكرة بجنون
موجوعة من الاحساس دا



فراق
انك تصحى في يوم تلاقي اللي كان معاك امبارح مابقاش موجود النهاردة ..وان اللي معاك دلوقتي بكرا ممكن ما تلاقيهوش
انا ما بفهمش الفراق ..الفراق اكبر بكتير من قدرتي على الاستيعاب !



لو
ياااااااااااااااااه ...لو !

Wednesday, October 22, 2008

بنت جدعة



انا فرحانه بيكي اوي

فرحانه بجد وحاسة انك اخدتي حقي وحق امي واختي وبنتي وصاحبتي وحق كل بنت او ست ماشية فحالها في الشارع وبتتبهدل من طوب الارض سواء بنظرة او كلمة او لمسه

انتي بنت جدعه..وعشان انتي جدعه ..لازم يتعملك بدل الموضوع الف ...وكل الناس تعرف حكايتك ..يمكن يتعظوا

الحكاية هنا

ماتسكتوش يا بنات ..بجد ما تسكتوش ..من هنا ورايح ماحدش يسكت على حقه

اما نشوف اخرتها ايه ..

Saturday, October 18, 2008

مفـــارقــــات




انك تعيش عمرك كله نفسك تكسب في اليانصيب ..ويوم عيد ميلادك ال 98 تكسب اخيرا ..وتموت تاني يوم



ان يكون محكوم عليك بالاعدام ...ويصدر عفو عنك ..بعد تنفيذ الحكم بدقيقتين



ان الدنيا تمطر جامد يوم فرحك وانت عاملاه في جنينه



ان يجيلك توصيله ببلاش بعد ما تكون دفعت تمن التذكرة



انك تكون دايما بتلعب في المضمون ...حتى دور البرد بتعمل احتياطاتك عشان ما يجيلكش ...وتجيلك سفرية استنيتها بقالك سنين ..تسلم على مراتك وعيالك وتاخد شنطك وتركب الطيارة...تطلع الطيارة دي هي اللي دخلت في البرجين يوم 11 سبتمبر



ان السكة تكون زحمة جدا وانت مستعجلة جدا جدا



انك تفتح دولابك كل يوم تلاقي قميص معين قدامك وعمرك ما حبيت تلبسه ..ويوم ما تقرر تلبسه ما تلاقيهوش في الدولاب وتكتشف ان مامتك وزعته عشان انت ما بتلبسوش



ان مديرك يكون مسافر بقاله شهر ..وانت بتروح الشغل كل يوم في معادك ...يوم ما يوصل من السفر كاوتش عربيتك يضرب وتوصل متأخر ساعتين


ان يكون حواليك الف معلقة وانت كل اللي محتاجه سكينه واحدة بس


لما تفتكر ان كل حاجة هايلة وماشية تمام ..تلاقي نفسك في مصيبة غير متوقعة
ولما تفتكر ان كل حاجة متقفلة في وشك ...تلاقيها فرجت من غير ما تعرف ازاي ومنين

غريبة الحياة




* ..الموضوع مستوحى من الأغنية دي

Sunday, October 05, 2008

6 اكتوبر



ايام فاروق كان اللي بيحكم مصر واحد بيحبها بالرغم من عيوبه

ايام ناصر كان اللي بيحكم مصر واحد عنده ضمير بالرغم بردو من عيوبه

ايام السادات كان اللي بيحكم مصر واحد عنده مخ بالرغم من كل شيئ

دلوقتي ايه !!! لا حب ولا ضمير ولا مخ ...ايه بقى !!!

Monday, September 29, 2008

في بلادي ....

التاريخ يعيد نفسه


ما اشبه اليوم بالامس !!!

من مدونة يساري مصري





Saturday, September 20, 2008

Bits and pieces

هاجم قراصنة مئات المواقع التابعة لكبار رجال الدين الشيعة حول العالم
فقد اخترق القراصنة اكثر من 300 موقع من المواقع الشيعية ونشروا عليها شعارات معادية للشيعة وللمذهب الشيعي
وجاء في بيان نشرته وكالة فارس الايرانية ان "مجموعة وهابية هاجمت اكبر كمبيوتر مركزي يستضيف العديد من المواقع الالكترونية التابعة للمراجع الشيعية على شبكة الانترنت" وقالت ان هذه الجماعة تمتلك اكثر من 300 مليون دولار للقيام بهذه المهمة

على اساس انهم كدا مثلا هيوقفوا المد الشيعي في البلاد السنية !!!
300 مليون دولار !!! عشان مواقع !! اصحاب العقول واخدين Break

*******

قتل 40 شخصا على الاقل واصيب حوالي المائة بجراح في هجوم انتحاري بشاحنة مفخخة على فندق ماريوت الذي يخضع لاجراءات امنية مشددة في العاصمة الباكستانية اسلام آباد يوم السبت

واعلن السفير السعودي في اسلام آباد ان ما بين اربعة الى ستة سعوديين ما زالو في عداد المفقودين مشيرا الى ان 16 سعوديا كانوا من نزلاء الفندق

لا تعليق !

*******

نكر رجل الاعمال المصري هشام طلعت مصطفى، من سجنه في القاهرة، اي صلة له بمقتل المغنية اللبنانية سوزان تميم.

وقال مصطفى، في رسالة بعث بها الى رئيس تحرير صحيفة اخبار اليوم المصرية، وهي اول تعليقاته منذ اتهامه بالقضية، انه برئ من دم سوزان تميم، وان القضية لفقها له من وصفهم بانهم خصومه.

معقولة في كدا !!!! يا خوفي يا بدران لا يطلع برائة ..مش عارفه ليه ابتدى الشك يساورني !!

*******

قال مسؤولون فلسطينيون إن معبر رفح الذي يصل قطاع غزة بمصر يعمل مؤقتا بعد قرار مصر فتحه لتمكين الطلبة في الخارج والمرضى والمعتمرين من الخروج من القطاع.

وقالت وزارة الداخلية في الحكومة المقالة إن 3 آلاف شخص قد سجلوا أسماءهم لمغادرة القطاع، وإن 650 شخصا منهم سيسافرون إلى المملكة العربية السعودية لأداء العمرة، بينما يغادر القطاع أيضاعدد غير محدد من المرضى والطلبة وحملة جوازات السفر الأجنبية

فيهم الخير والله ..

*******

حكم بالسجن على ستة أشخاص في الدنمارك بتهمة "جمع تبرعات لمنظمات متطرفة" من خلال بيع قمصان تحمل شعاراتها.

وقد حكم على اثنين من المتهمين الستة بالسجن ستة أشهر بينما كان السجن مع وقف التنفيذ من نصيب البقية.

وكانت شركة "مقاتلون وعشاق" قد صنعت قمصان عليها شعارات الجبهة الشعبية لتحرير فلسطين ومنظمة "فارك" اليسارية الكولومبية، ويذهب جزء من ريع المبيعات للمنظمات المذكورة التي يعتبرها الاتحاد الأوروبي "منظمات إرهابية".

بالنسبة لحرية التعبير !! راحت فين ؟! حتى في الدنمارك في خيار وفقوس !!



Thursday, September 18, 2008

اي كلام ....

ان تكون من مواليد اواخر السبعينات واوائل التمنينات ..دا بيعني ان طفولتك وبداية مراهقتك كانت في التمنينات ..

من اهم ما يميز فترة التمنينات البشاعة والشناعة في ازياء اللبس ..ابتدائا من الإبوليت ( السفنج اللي بيتحط في كتاف الجاكت )



مرورا بالقصة الطايرة (واوعوا حد يقولي ماكنتش بعملها ) والشعر الكيرلي والالوان الكتير (تكني كلرز) وظهور الفسفوري
والتيشرت اللي من جوا البنطلون ونطلع حتة منها كدا برا ونتني البنطلون من تحت برمتين تلاتة على ضيق شوية :)
بشع بشع بشع ..وفاكرة ايامها كمان كان الريس هارينا بدل سفاري ...

من اهم ما يميز الحقبة الجميلة دي كمان ..المزيكا ..بس بأمانة ..المزيكا وقتها كانت حلوة اوي

اول واكتر حد اثر فيا


مادونا ..يا خرااااااااااااااااشي ع الحب اللي كنت بحبه للست دي ..اي حاجة تلبسها لزمن ولابدن اني البسها فورا
نفس تسريحة الشعر ...نفس الاكسسوارات ..نفس الستريتش اللي فوقه جوب ..
وطبعا كل اغانيها حافظاهم اكتر من اسمي ..كنت بقعد بالساعات حاطة حفلاتها في الفيديو وبقلدها بالحركة والهمسة
وخصوصا الحفلة اللي انا حاطه صورة منها دي ..كان نفسي في يوم ابقى مغنية مشهورة زيها واقف على مسرح فيه مليون متفرج واغني وارقص واتنطط كدا
كنت بحس باحساس حلو اوي وانا متقمصة شخصية مادونا في مراهقتي :)))
وكنت بتفشخر فشخرة رهيبة لما حد يقولي مادونا او انتي شبه مادونا ( مع اني لا امت ليها بصلة بس الناس تحب كدا جبر الخواطر) او انتي لابسة زي مادونا ...يااااه ..احس وقتها بانشكاح مرعب..واحس اني نجحت نجاح منقطع النظير

حبيت كمان فرقة مش عارفه ليه ماحدش فاكرها خالص :) يمكن عشان كانوا فشلة باين ولا ايه

New kids o the block



وانا بدور على صورة ليهم لاقيت واحدة ما بعد التمنينات ..واضح انها في نص التسعينات مثلا ..شكلهم نضف اوي :)



كنا عاملين انا واصحابي فرقة وبنقلدهم وكنا بنقعد نتدرب على الرقصات بتاعتهم ..كنا بنقلدهم بالظبط
وغيرهم كتير زي مايكل جاكسون وجورج مايكل وبون جوفي وكيلي مينوج وديبي جيبسون و مودرن توكنج ووووو...
وشريهان

حبيبة قلبي ربنا يشفيها ..الفوازير وياشي ياشي والف ليلة وليلة وشارع محمد على وعلشان خاطر عيونك
شريهان كانت بالنسبة ليا حلم ..

بحب ايام مراهقتي جدا جدا ..بتضحكني بجد ..لما بتفرج ع الصور بموت من الضحك :)
منظر عاااار ما ينفعش حد يشوفه ..ومش عارفه ليه واثقة من نفسي اوي كدا في الصور ..مش لاقية امارة ع الثقة دي :)

كنت بكتب مذكراتي :) النهاردة الصبح وانا بدور على حاجة لاقيت مذكراتي وقعدت اقرا شوية مت من الضحك
يااااه ...معقولة دي كانت اكبر همومي ..معقولة انا مخنوقة اوي كدا من كدا ...

ايام رايقة وحلوة ..اسمع اغاني واقرا واذاكر وارقص زي شريهان والبس زي مادونا واروح النادي واكل ومبي ونعمل حفلات انا وصحابي اجري والعب ..واحلم واتكسف.. واعيط واضحك و....اعيش..
انا كنت حرة ..كنت حرة بجد ..
وحشتني حريتي ...انا بجد متضايقة اني كبرت



Friday, September 12, 2008

لخبطة !!!!!

مصر يعني ايه

هل مصر هي الاثار ...والمباني والشوارع .يعني جماد !

ولا الذكريات واللي عدى واللي فات ..يعني وهم !!

ولا مصر يعني شعب ..يعني المصريين اللي كلنا بننتقد فيهم طول النهار مع اننا منهم وهما منا واحنا زييهم وهما زيينا يعني احنا واحد !

ولا مصر يعني حكومات ...

ولو حكومات ..فأنهي نوع من الحكومات ...هل الفراعنة ...ولا الهكسوس ..ولا الرومان ..ولا الدولة القبطية المسيحية ..ولا العربية المسلمة بعد الفتح الاسلامي

ولا الاموية ولا العباسية ولا الفاطمية ولا المماليك ولا العثمانيين ولا محمد على ولا فؤاد وفاروق ولا الجمهورية لما حكمنا حد منا بدئا بجمال مرورا بالسادات وانتهائا بمبارك ؟!!!

ولا مصر سحابة سودا وحريق في الاوبرا وقصر الثقافة ومجلس الشورى ..وحوادث القطر ..والعبارة والدويقة والمسجونين عشان قالوا لأ

ولا مصر اقطاع ..ولا اشتراكية ولا ملكية ولا جمهورية

مصر هي رقاصة وطبال وميلودي تتحدى الملل...ولا شيوخ بدقون وستات منتقبة ...ولا الله حي ومولد وصاحبه غايب ..ولا مارجرجس بيظهر في الازمات ولا شالله يا ام العواجز !!!

مصر هي ابن الجنايني بقى ظابط يا انجي ...ولا ابن الريس لازم يبقى ريس يا رشا !

ولا جواز عتريس من فؤادة باطل ..... ولا هي دي مصر يا عبلة !!!

ماهو ابن الجنايني لما بقى ظابط يا انجي ...جاب صحابه الظباط واحتلوا البلد وعملوا في ولاد الجنايني الجديد زي ماتعمل فيهم بالظبط !!!

وعتريس على فكرة كان بيحب فؤادة ...وفؤادة بردو حبت عتريس بس كرهته !!!

دلوقتي حاتم بيحب نور ..بس نور بتكره حاتم ...حاتم من كتر حبه لنور عايز يجيب ولد منها بالعافية ...ونور مش عايزة
لك الله يا بلد ...بجد صعبانه عليا

*******

لما الدنيا بتقفل قدام عنيا ..بقفل عنيا واقنع نفسي انها كويسة بس انا اللي مغمضة
لحد ما يجي النور يخبط على كتفي ويقولي افتحي عنيكي خلاص فرجت ..

مش هروب ولا استسلام ...بس انا تعبت من المقاوحة والمعافرة ...وايقنت ان كل حاجة بتعدي
الدنيا شخصيا هتعدي ..وزي ماعدت باللي قبلنا هتعدي بينا ...

لو وقفت عند كل حاجة مش هعرف اكمل طريقي ...في حاجات لازم نعديها ونمشي من غير ما نقف عندها

ايقنت كمان ان مافيش نص فاضي ونص مليان ..لأن مافيش كوبايه اساسا :)

هي الحاجة كدا بتيجي على بعضها باكدج ..نقبلها على بعضها ومانحاولش ننقي
لأن جمال الحاجات كتير بيكون في امتزاج الفرح بالحزن ..والمعاناه بالنجاح ..والسعادة والالم

******

أنا كنت شىء... وصبحت شىء ...ثم شىء... شوف ربنا قادر على كل شىء...هز الشجر شواشيه ووشوشنى ...لابد مايموت شىء علشان يحيا شىء...

أنا بتغيير ...او يمكن أتغيرت خلاص وأنا مش حاسة ...

*******
كتير حسيت اني عندي شيزوفرينيا
عندي فصام
انا 3 في بعض فعلا ...
انا ...وانا ..وانا ...

Saturday, September 06, 2008

مصر على صفيح ساخن!!!

برائة ممدوح اسماعيل
القبض على هشام طلعت مصطفى
طراطيش كلام عن تورط محمد فريد خميس في قضية رشوة
مجلس الشورى اتحرق
المقطم وقع ع البني ادمين وفي 500 واحد تحت الانقاض
في ايه يا بلد !؟

Monday, August 25, 2008

سألت نفسي كتير ..مارستش يوم على بر..
أنا اللي فيا الخير ..ولا اللي فيا الشر؟!
مليان عيوب ولا ...
خالي من الذنوب ولا !
ولا ايه ؟!!
ولا انا جوايا ومش داري الإتنين في بعض !
وخمسمية حاجة مالهمش دعوة ببعض ؟!
أنا مين ..وفين ..أنا إيه
مفروش طريقي بورد !
ولا الزمان دا أنا فيه اضعف واحد ع الأرض !!

Saturday, August 09, 2008

عندما تحترق الفانيليا ...


بعض الاشياء عند تعرضها للنار تنتج رائحة شدية الكراهه
والبعض الاخر يبقى كما هو يحمل نفس الرائحة
وبعض قليل تفوح منه رائحة زكية جميلة


حقا ..بالنار تختبر الاشياء ليتكشف معدنها الاصلي
وبنار الصعاب والأزمات والشدائد يختبر البشر ..

يارب..اجعلني كالفانيليا عندما تحترق :)

Monday, August 04, 2008

كلام أنا ...


صدفك كترت اوي يا انا
هيا صدفة ولا قدر
انا بتحب تسميها قدر ..بس هوانا كل اقدارها صدف ؟!


**************************************

انا حاجات كتيرة اوي بسيطة بتسعدها
انا عارفه الحاجات دي كويس
بس مش دايما بتعملها
يمكن بتكسل ..يمكن بتأجل .
طيب واخرة التأجيل ايه ؟!! هيعدي العمر وانا ما نبسطتش عشان عايشة سعادة مؤجلة!


**************************************
فرحتك بتفرحني ..خليك فرحان على طول ..
عارف
انا حاسة ان الدنيا ابتدت تضحك ..مش عارفه انا بتضحك على نفسها ولا هي ابتدت تضحك فعلا
يارب تكون ابتدت تضحك بجد وضهر انا ما يتكسرش تاني بحاجة فوق طاقتها


**************************************
كبرتي يا انا اوي ..هو العمر عدى امتى
كبرتي وانتي لسه صغيرة


*************************************
فاكرة يا انا مسلسل الهروب الكبير اللي كنتي معيشه فيه ماما وبابا طول عمرك
على طول هربانه وبتجري
في المطارات والشوارع وحتى في الحرم هربتي
طول عمرك بيلحقوكي في اخر لحظة وانتي بتنطي من الشبابيك والبلكونات

كان نفسك تبقى عصفورة ..كان حلم حياتك الطيران
انا عمرك ماكنتي طفلة مقهورة ..يمكن انتي يا انا كنتي اكتر طفلة بتمتع بقدر كبير من الحرية سواء الفكرية او في التصرفات..بس بردو كنتي حاسة بقيود ودايما رفضتيها
فاكرة لما ماما كانت تختارلك حاجة تلبسيها كنتي بتقوليلها ايه ؟!
كل طفل ربنا خلقه حر ..انا مابقولكيش تلبسي ايه ..انتي كمان ماتقوليليش البس ايه
كان عندك وقتها 3 سنين وفكه..مش عارفه منين وصلتي للقناعة دي ان الاطفال ربنا خلقهم احرار
مين قالك كدا !!!
عمرك ما رضيتي ان حد يفرض عليكي قيود
بعد ما تخلصت انا من كل القيود الممكنة في الدنيا
لاقيتها بتفرض قيود ذاتيه على نفسها
اكتشفت انا ان مايفعش تعيش في الدنيا من غير قيود



************************************

كل مرة بفتكر انا سنة 98 بنفس الالم والمرار والسعادة
كتير بتقول لو يشيلوها السنة دي ..وترجع تقول ماكنتش هبقى انا انا لولا السنة دي
مفارقة هايلة ان اسوأ سنة في حياة انا تكون في نفس اللحظة سنة انطلاقتها الحقيقية
والسنة اللي عرفت فيها اناتبقى مين وايه وليه وفين
السنة دي بتمر الذكرى العاشرة
كل سنة وانا طيبة :)

Saturday, July 19, 2008

checkmate


هو: مشكلتك معايا انك مش قادرة تشوفيني زي ما الناس كلها شايفاني

هي : مش ذنبي اننا عايشين في مجتمع معتوه معاييره مقلوبة
بيشوفك انت وامثالك حاجة كبيرة

Sunday, June 15, 2008

I saw the sign ....


It's a sign

كتير لاقيتني بردد الكلمة دي في حياتي مواقف كتير اوي حسيت اني اللي بشوفه قدامي رسالة ليا ..عشان اعرف طريقي ...عشان افتح عنيا اشارات حياتي تضمنت اشخاص عابرون ....كلمات ....ايات من القران ..احاديث ...حكايات ...نظرات...مواقف على صغرها كانت كبيرة جدا في المعاني ...واحيانا اغاني
ممكن ناس تعتبرها صدف ...ولكن لاني لا أؤمن بالصدفه نهائي انا اعتبرتها اشارة من الخالق عز وجل رسالة بيلحقني بيها وبيقولي الحقي نفسك ....
اذكر مرة في لحظة يأس اخدتني رجليا بعد صلاة الفجر للبلكونة ...ودي حاجة ما بعملهاش خالص وشفت الشروق ... لحظة الشروق كانت لحظة عشقتها عمري كله ..ونسيتها في زحمة الحياة اللحظة دي صحتني ...وصحت جوايا امل جديد ...رجعتني سنين لورا ...افتكرت حبيت اللحظة دي قد ايه وافتكرت ان اللحظة د كانت طول عمرها مصدر الهام ليا ولروحي يمكن صدفة اني اطلع البلكونة اليوم دا في اللحظة دي بالذات بس انا بعتبره قدر ....

اصحابي عارفين حكايتي مع الاشارات حصل كتير اننا نكون سوا ويحصل حاجة تخطفني ...الاقيهم بيبصولي ويضحكوا ويقولولي كلمتي
It's a sign
احيانا بنسد ودانا ونغمض عنينا ونرفض نستقبل الاشارة ونرجع نندم ونقول انا كنت عارف اللي هيحصل ...انا ليه عملت كدا
وفي ناس فشلت انها تستوعب حكاية الاشارات اساسا ...عجزوا انهم يصفوا روحهم ويسمعوا صوتهم الداخلي ويستقبلوا الاشارة لان الاشارة دي لازم تستقبلها بقلبك وباحساسك ربنا بينبهنا بدل المرة الف ...واحنا احيانا بنرفض نستجيب التأمل بيساعدني كتير اني اكتشف نفسي ...واسمع الاشارات المبعوتة ليا كل حاجة حوالينا اشارة لينا ...كل حاجة حوالينا بتعملنا حاجة..وبتلفت نظرنا لحاجة ...بس مش دايما احنا بنسمع وبنستوعب
انت بتسمع وبتشوف وبتستوعب وبتحس بالاشارات ؟!....

Sunday, June 08, 2008



يا بنـت يـا ام المريلـة كحلـي....
يا شمس هالة و طالة من الكولة
لـو قلـت عنـك فـى الغـزل قـولـة
ممـنـوع علـيـا ولا مسموحـلـي
انا احب اقول الشعر فى الحلوين
و الحلو اقولة يا حلو فى عيونـة
و لـو ابتديـت بشفايفـك النـونـو
ما يكفنيـش فيهـم سبـع دواويـن
يا ملاك يا جنية يا سـت الحسـن
يعجبنـى توهـانـك فــى أحـلامـك
يعجبنـى شـد الخـصـر بحـزامـك
يعجبنـى اخـدك للكتـب بالحضـن
راحـوا الصبـايـا والصبـايـا جــم
أجمل مـا فيهـم ميـن غيـر بنتـي
و اجمل ما فيك يا بنتـي ان انـت
فــى عينـيـك لمحة من حـنـان الأم
....
نفسي ارجع البس المريلة تاني

Wednesday, May 28, 2008

انا ..والعود ..و ..صبا !


بحب الموسيقى جدا من صغري

افتكر اني بداية تعلقي بالموسيقى كان السيمفونيات العالمية

كنت طفلة صغيرة عمري ما عداش ال 5 سنين

وبسمع بتركيز شديد بيتهوفن وموتسارت وباخ

وحبيت اوي Ode to joy

مقطوعة في السيمفونية التاسعة لبيتهوفن ..واستغربت جدا انه كمل السيمفونية دي بعد ما فقد سمعه نهائي !!

وبالرغم من ان اسم المقطوعه دي يدي ايحاء انها حاجة سعيدة ..الا اني كنت بحس فيها بحزن معين !!

لما كبرت اتجهت للموسيقى العربية ....ودا كان بداياته في اولى اعدادي ...وحبيت القانون والكولة الحزينة ..

والعود ...

اشتريت اول عود في حياتي وانا في السن دا تقريبا ...

وفضلت انا والعود اصحاب فترة طويلة ....لحد ما اخدتني الحياة منه



زي ما اخدتني من كل حاجة تانية حبيتها واتعلقت بيها

ونسيته خالص وبقى مصير عودي الحبيب..مصير غريب ..وحيد ..حزين ...عودي مرمي فوق الدولاب بقاله سنين

مسكته النهاردة الصبح اول ما صحيت ..وحاولت اعزف اي حاجة ...لاقيت اللحن تاه مني ...



لاقيتني مش قادرة اعزف اي حاجة ...

كل دا افتكرته ليه وايه مناسبته اساسا !!

اني امبارح كنت صاحية وقت اذان الفجر ...وسمعت الاذان ..عادي ..بتحصل كتير

امبارح يظهر في مؤذن جديد في مسجد قريب مننا ...المؤذن كان بيأذن في مقام صبا

اكتر المقامات حزنا ..دايما بيستخدموه تعبيرا عن الحزن الشديد الاقرب للبكاء ...واحب مقام لقلبي



...وقليل جدا في حياتي المرات اللي سمعت فيها حد بيأذن في المقام دا

افتكر وانا صغيرة اوي ..كل ما كان يعجبني مقطع في اغنية قديمة اجري اسأل بابا ..هيا دي مقام ايه ..يقولي صبا

واكتشفت اني اول حاجة عزفتها على العود


مقطع من اغنية لسه فاكر الحتة اللي بتبدأ ب

( كانت الايام في قلبي دموع بتجري وانت تحلالك دموعي وهيا عمري)


الحتة دي تحديدا كانت مقام صبا بردو !

غريبة ...ليه المقام دا بالذات اتعلقت بيه كدا ..ماعرفش ..وودني بقت حساسة ناحيته جدا

بقيت بعرفه هوا الوحيد من وسط مقامات الموسيقى الكتير


اللي دايما بتلخبطت فيهم وعمري ما كنت شاطرة في اني افرقهم عن بعض

ومن الاغاني اللي في مقام صبا

ام كلثوم ..هو صحيح الهوا غلاب

الاماكن لمحمد عبده


واغاني تانية يمكن مش كتير ...

بس حتى الاغاني اللي في مقام تاني وبيكون جواها كوبليه صبا بيكون الكوبليه دا احب حتة في الاغنية لقلبي

لو كنت مقام موسيقي ...لكنت بالتأكيد هتمنى اكون صبا

اللينك دا في اذان بكل المقامات ..اتمنى يعجبكم وتقولولي ايه اكتر مقام حبيتوه :)



http://www.qoranway.com/alathaan.html


يَارِيَاحاً لَيْسَ يَهْدا عَصْفُهَا .... نَضَبَ الزَّيْتُ وَمِصْبَاحِي انْطَفَا



يا فؤادي لا تسل اين الهوى .....كان صرح من خيال فهوى

اسقني واشرب على اطلاله.....واروي عني طالما الدمع روى



من اروع ما غنت ام كلثوم ومن اروع ماكتب ابراهيم ناجي

والقصيدة الاصليه على طولها الا انها احلى بكتير من الاغنية

لحظة بيقف فيها الزمن ...

لحظة بتخليك تفتكر كل اللي راح ...واولهم عمرك


ذَهَبَ العُمْرُ هَبَاءً فَاذْهَبي ........... لَمْ يَكُنْ وَعْدُكِ إلاَ شَبَحَا


صَفْحَةً قَدْ ذَهَبَ الدَّهْرُ بِهَا .......... أَثْبَتَ الحُبَّ عَلَيْهَا وَمَحَا


اُنْظُري ضِحْكِي وَرَقْصي فَرِحاً........ وَأَنَا أَحْمِلُ قَلْباً ذُبِحَا


وَيَرَاني النَّاسُ رُوحَاً طَائِراً .... وَالجَوَى يَطْحَنُنِي طَحْنَ الرَّحَى


لحظة بتخليك تفكر في كل اللي جاي ...وانت رافع حواجبك
ومش مستوعب وبتتسائل كأنك طفل تايه

اعمل ايه ....

عِنْدَ أَقْدَامِكَ دُنْيَا تَنْتَهي.................... وَعَلَى بَابِكَ آمَالٌ تَمُوتْ

وتلاقي روحك بتصرخ بكل مافيها من قوة ...قوة ضعيفه مكسورة مجروحة

صرخة عالية مدفونة ...بتوهم نفسك بيها انك قادر تقف على رجلك تاني

وانك هتنسى وهتعيش ..


أَعْطِني حُرِّيَتي اَطْلِقْ يَدَيَّ........ إِنَّني أَعْطَيْتُ مَا اسْتَبْقَيْتُ شَيَّ


آهِ مِنْ قَيْدِكَ أَدْمَى مِعْصَمي............... لِمَ اُبْقِيْهِ وَمَا أَبْقَى عَلَيَّا


احْتِفَاظي بِعُهُودٍ لَمْ تَصُنْهَا........... وَإِلاَمَ اللأَسْرُ وَالدُّنْيا لَدَيَّ


حقيقي قصيدة رائعة واغنية في منتهى الجمال ..

كبرياء مجروح وقلب عصره الالم ..

ومحاولة لتجميع اشلاء احساس ولملمت بقايا انسان ...

والوقوف مرة تانية ..وتحدي للنفس قبل اي حاجة تانية ...

لكل حد انكسر...
لكل حد حس في لحظة ان الزمن وقف..
لكل حد حس انه عمره راح ع الفاضي ..


إلام الاسر والدنيا لديَ ....:)

Monday, May 26, 2008

صديقي العزيز ...كفاية حزن ...



انا بحبك اوي يا صديقي ..ونفسي من قلبي قلبك يفرح :)

ممكن يا احمد ؟!!

Monday, May 05, 2008

عمار يا مصر 1


ممكن حد يقولي ليه الناس بترمي حاجات في الشارع ..طول مانت ماشي تلاقي حاجات بتتحدف عليك ..من عربيات ...من عمارات ...من اللي ماشي جنبك ..اي حاجة

كنت قريب عند ناس اصحابي ..وبناكل ايس كريم ..

واحدة من اللي قاعدين ( مش صاحبتي ولا اعرفها ولا عايزة اعرفها ) بتاكل ايس كريم بالشوكلاته البيضة

فجأة قررت انها تقيلة ومش قادرة تكملها ..وقعدت تدلل عليها ..يا جماعة حد ياكل ..


لا

طيب

وبمنتهى اللاشيئ ...رمت الكون بتاعت الايس كريم من الشباك من الدور ال 11 عشان تقع على صاحب نصيبها !!!

يالهوي يانا ياما

لو انا اللي تحت ولاقيت ايس كريم واقع عليا من السما زي القضا المستعجل ...تفتكروا كنت هعمل ايه .؟

تصدقوا مش قادرة اتخيل رد فعلي

شيئ كمان عجيب بيذهلني في سلوكيات البشر ...ليه دايما الرجالة بيلبوا نداء الطبيعة جنب الاسوار ووراء الاشجار في شوارع القاهرة المزدحمة في وضح النهار ؟!!

بمنتهى البساطة....
تلاقي واحد كان ماشي في حاله وبدون اي مقدمات

يقف ويدي وشه للحيطه زي مايكون بيعاقب نفسه عشان عمل شقاوة

ايه دا بجد

انا ببقى عايزة انزل اضربه على قفاه في اللحظة دي لولا الملامة بس

من اكتر بقى الحاجات اللي حقيقي بتفرسني ...ابقى ماشية بالعربية ( عفوا قصدي واقفة لاننا غالبا في شوارع مصر بنبقى واقفين ) والاقي عربية جنبي الاب المحترم مقعد ابنه اللي لا يتعدى عمره 3 سنين بالكتير على حجره قدام ديريكسيون العربية

نعم بقى ...نعم بجد ...ايه الاستهتار دا

مرة المنظر استفزني اكتر من اللازم وقلت لااااا مش قادرة اسكت ..فتحت الشباك وعملت نفسي لطيفة

مساء الخير حضرتك ( وابتسامة بلهاء مرسومة على ملامحي ) هوا حضرتك يعني كدا خطر اوي على البيبي ممكن لا قدر الله حضرتك لو فرملت فجأة البيبي يتخبط في وشه ولا حاجة ( نفس الابتسامة الهبلة)

مش قادرة احكيلكوا على رد الفعل ...عينكو ما تشوف الا النور

حرمت من يومها وقررت اكتم جوايا !

شيئ تاني عجيب بردو ..بيضحكني احيانا وبيشلني غالبا

لو سمحت ...شارع ( مش فاكرة اسم الشارع بصراحة ) فين .؟

قالك فين ؟

( يا فتاح يا عليم ) قالي هنا

هنا فين ؟

طيب خلاص شكرا

لا استنى بس ...قالك جنب ايه طيب

قالي جنب سوبر ماركت الفا

مممم طيب في سوبر ماركت الرحمة ع اليمين قدام شوية !!!

خير ؟! لا خير بجد ؟! دا على اساس اني كنت بدور على سوبر ماركت تايه يا ولاد الحلال عشان اجيب باكو لبان !!!

مرة كنت عمالة الف زي لفة الكونافة وهيا على الصاج بتتعمل ..ومش عارفه اوصل من كتر فتي البشر

لاقيت عسكري مرور ...سألته تاني على العنوان اللي عذبني كتير ...شرحلي وصفه على رأي عمنا صلاح جاهين ..


دي وصفه سهلة !

بصيتله وملئ عيني شك رهيب ...وقولتله طيب هما قالولي ان العنوان جنب سفارة مصر ..هيا سفارة مصر هناك

قالي اه اه لا كدا يبقى بدل ما تدخلي اخر شمال ابقى اكسري يمين !!!!!!!

للعلم ...انا كنت في قلب مصر ...في قلب القاهرة ...في قلب وسط البلد

كفاية كدا ..




Wednesday, April 30, 2008

جوايا كتير كتير .....




جوايا كتير كتير

جوايا حزن وفرح

جوايا الم وسعادة

جوايا طاقة وكسل

عايزة اصرخ ...عايزة اضحك ...عايزة ابكي ...عايزة اقول

اقول كتير لناس كتير

اقول كلام يفرح ...واقول كلام يجرح

هقول ...وكل سطر من اللي هقوله بيقول كلام كتير ...لناس كتير...نفسي ...امي وابويا ...اخواتي وحبايبي ...صحابي واللي عاملين صحابي

لناس عدت ومابقتش موجودة ....لناس عايشة حواليا وناس عايشة جوايا ...ولناس لما بفتكرهم بحس الدنيا ضلمت وابقى عايزة اقول مين طفى النور !!

ولناس لما لاقوا دنيتي ضلمت بسبب الناس دي ..نورولي شمعه

اقول شكرا على الحلوة والمرة

اقول بدعيلك بظهر الغيب

واقول لقائنا يوم الحساب لاني مش مسامحة في حقي

اقول ليه كدا

اقول الله ...قد ايه انت جميل

واقول اخس ...قد ايه انت وحش

اقول ازاي انت ابيض اوي من جواك في وسط الدنيا السودا

واقول ازاي جواك كل الحقد والغل والكره دا وانت ما شوفتش مني غير كل خير

اقول ليه انت منافق عامل صاحبي قدامي وهوحشك ...ومن ورايا بتتكلم عليا

واقول ليه انت محترم كدا ومن ورايا بتتكلم عني احسن ما بتتكلم عني قدامي

اقول زهقت

اقول تعبت

اقول انا لسه قادرة اكمل المشوار الطويل

اقول انا يأست

اقول انا مليانه امل

اقول انا حياتي بتتمرجح بين الجنة والجحيم

اقول انا طفلة جدا

اقول انا عجوزة اوي

اقول قلبي نونو .....بس شاخ وهوا في اللفة

اقول اتخنقت

اقول انا بتنفس طول مانت جنبي

اقول خايفة اوي اصحى من النوم الاقيك مشيت

اقول ربنا يجعل يومي قبل يومك

اقول انا حاسة اني هموت قريب اوي

اقول انا حاسة اني هعيش يجي 100 سنة

اقول ليه البلد بتاخد مني كل شهر مبلغ وقدره ومش لاقية اي حاجة بتتعمل بفلوسي دي

لسه الشوارع مكسرة

لسه المستشفيات شبه المشرحة

لسه بناكل لحم حمير وبنشرب بدرة سيراميك

فلوسي بتروح فين يا جدعان !!!!!!

نفسي ارجع تاني :(


على مسرح كبير ...وقفت لابسة روب التخرج ...وعلى راسي البتاعة الغريبة دي

وحواليا الدفعه كلها

بينادوا اسم ورا اسم ....والناس مبتسمة ومبسوطة ...

اسمي اتنادى ...بصوت عالي

القاعة كلها بتصقف ...وصحابي قاعدين في القاعة بيصفروا ويهللوا..... شعبتي جامدة في المدرسة انا

مشيت ورجلي بتترعش ...خطوة هادية ...ابتسامة ظريفة .وعنين مليانة دموع

وقفت قدام مديرة المدرسة ...بصتلها وبصتلي ...لقيت نفسي بترمي في حضنها

عمري كله كان في المدرسة دي..

الست دي بعتبرها امي التانية ....هيا اكيد لسه فاكرة اول يوم لما انا جيتلها المدرسة وانا عندي 3 سنين

لما دخلت مع ماما وانا مذهولة من العالم الكبير الغريب اللي انا رايحاله

ودخلوني الفصل ولاقيت ناس كتير من سني قاعدين

وقعدوني قدام عشان انا قصيرة

اكيد هيا فاكرة اني اول ماكتشفت ان في حاجة اسمها فسحة ...بقيت كل ما ازهأ من الحصة اقول للعيال في الفصل

يالا فسحة

وافتح الباب واخرج والعيال ورايا والمدرسة واقفة مش مصدقة نفسها وبتصرخ ...كانت المديرة تيجي تضحك

وتقول للمدرسة معلش سيبيهم

تفتكروا هيا فاكرة لما كنت في تانية ابتدائي ....ولاقوني متشعلقة على نخلة جوا المدرسة بجيب بلح للعيال

وعملولي استدعاء ولي امر

او فاكرة لما كنت بصر اني انزل من الفصل اللي في الدور الاول من البلكونة مش من الباب

ولما كبرت و اتنقلت الدور التاني كنت بنزل متزحلقة على الترابزين وما بستعملش السلم

طيب هيا فاكرة لما اكتشفت في مرة اني بزرع بيبسي في جنينة المدرسة

كل كان بيبسي اخلصها ادفنها واسقيها بيبسي على امل اني الاقي شجرة البيسبسي طلعت في يوم من الايام

طيب هيا فاكرة حرب المايه اللي كنا بنعملها في اعدادي وثانوي

لما نتجمع كلنا ونرش بعض بالميه باي وسيلة ... نملى قزايز ..ونملي بلالين ونملى بوقنا واحيانا نستعمل خرطوم الزرع

على الرغم من دا كله كانت بتحبني اوي ...كانت بتقول عليا بالرغم من الشقاوة اللا معقولة الا اني مؤدبة

ومتربية وشخصية قوية وقيادية ومحبوبة من صغري

وكمان كنت شاطرة جدا ...كل مسابقات المدرسة مع المدارس التانية كانت بتصدرني فيها

كل الذكريات دي عدت على بالي في لحظة وانا حضناها على المسرح ....لقيت اني طولت اوي كد وعيب لسه في بقيت الدفعة

اتعدلت واستملت الشهادة وبصيت في عينيها لاقيت دموع

يبقى هيا بردو افتكرت كل دا

رجعت مكاني وانا بغالب دموعي

كل دا خلاص راح

كل الايام دي مش هترجع تاني ...حفلات المدرسة ...رحلات المدرسة ....الاذاعة ...الطابور ...النشيد الوطني

المريلة والجزمة السودا والشراب الابيض

الشنطة اللي مليانة على اخرها اللي تقطم الوسط

اصحاب العمر ...يااااه ...احنا كبرنا سوا ....كلنا نفس العمر كأننا توائم

همشي من الحفلة دي مخلصة مرحلة من حياتي وببتدي مرحلة تانية خالص

عندي حماس اكيد للمرحلة التانية ....بس عندي حنين كبير للمدرسة

بعد سنين....دلوقتي ....ومن موقعي هذا على مكتبي في الشغل ...بعد ماخلصت المرحلة اللي بعد المدرسة وبعيش مرحلة تالتة اوي يمكن رابعة

لسه شايفه ان احلى ايام حياتي على الاطلاق ايام المدرسة

وان حنيني للايام دي بيزيد مع الوقت مش بيقل

نفسي ارجع تاني البس المريلة واعمل الضفيرة وامسك الشنطة واحضر الحصص واذاكر وانجح واطلع الاولى

نفسي ارجع اتشاقى واجري واصرخ واضحك من قلبي لحد ما عيني تدمع من كتر الضحك

نفسي ارجع اكبر همومي اني نقصت نص درجة في النحو ....واني مش طايقة مدرسة الفيزيا

بجد نفسي اوي

ياتقول كلام في محله ...يا تقول حـالو يــا حـــالو!!




ايوان ايوان ...هوا كدا بالظبط

عارف لما تكلم حد في حاجة وتلاقيه بيرد في حتة تانية خالص

تبقى مش عارف العيب من مين بالظبط

انت اللي مش عرف توصل المعلومة ولا هوا اللي مش عايز يستقبل

ولا هوا فاهم وعامل عبيط ولا ايه

ساعتها ببقى عايزة اصرخ بصوت عاااااااااااااااااالي واقول



حـــــــــــالـــــو يــــــــا حـــــــــــالــــــــــو

تخاريف مخنوق !؟




عارف لما تبقى مخنوق ...مخنوق بجد ...مش قادر خلاص
عارف لما احساس الخنقة النفسي دا يبتدي يتحول لاحساس ملموس
لما تحس زي ما يكون في حد ماسكك من زمارة رقبتك
او زي ما يكون حد شفط الهوا من حواليك
لما تحس انك فعلا عاجز عن التنفس
وانك هيجرالك حاجة
عارف لما دموعك تغرقك من جوا
وانت مش قادر تطلعها برا عشان مش هينفع انت ماتبقاش قوي لانك كنت كتير اوي رمز للقوة
عارف اللحظة دي
عارف لما تقول لنفسك انا قوي الايمان ومافيش حاجة هتهزني لانه مهما حصل دا قضاء ربنا
عارف لما من كتر ما بتقول الكلمة دي لنفسك قربت تصاب بلا مبالاة
وقربت توصل لمرحلة ماعادش شيئ فارق وكله محصل بعضه
عارف كل دا
طيب كويس
اصل انا خلاص يظهر ما بقتش عارفه حاجة

Tuesday, April 29, 2008

أيها المدَعى الفاكِس..


انت اوفر اوي على فكرة
عمر حد قالك الكلمة دي ...او حتى انت قولتها لنفسك
هل انت شخص مبالغ فيه وردود افعالك دايما اكبر مما يحتمل الموقف ؟!!!
قبل ما تقول اه ولا لأ .....اقرا الأسئلة اللي تحت ...وأسألها لنفسك
لما بتدخل في حوار ...وتختلف مع الأخرين في وجهة النظر .....بتبتدي تنهار وصوتك يعلى وتتعصب
وتتعامل مع الأخرين على انهم في منتهى الغباء وتحس نفسك اذكى من الجميع ويجيلك تشنجات
وفي الأخر يطلع الموضوع من اصله شيئ في منتهى التفاهة !!!
بتلاقي نفسك كتير بتدى وعظ ونصايح وتنتقد تصرفات البشر وفاكر نفسك الوحيد اللي صح
وان بينك وبين ادعاء النبوة ساعة الا ربع !!!!
وانت في الأصل شخصية ...اللهم احفظنا
ثورجي وعندك حماس ودايما الرفض للرفض .....خطب وشعارات ....لسانك ممتاز
ونيجي للتطبيق ...صفر
دايما في حاجة ورا الحاجة ...مافيش حاجة عندك زي ما بتظهر او بتبان .....تحلل وتستنبط ...وتصدر احكام
نظرية المؤامرة مسيطرة على تفكيرك ......وفي الأخر كل دا اوهام في خيالك لوحدك
خسارتي في البلد دي ...لا خسارتي في الدنيا ....انا ماحدش مقدرني ...انا ومن بعدي الطوفان
وانت اصلا ولا حاجة !!! ومشكلتك بس انك ما شفتش ناس عدله وبتقارن نفسك بناس اسوأ منك
فاعتقدت للأسف انك افضل ما خلق ربي !!
لما يبقى عندك دايما تصنيف للبشر ....اي شخص لازم تصنفه
لما تزيط في الزيطة ...وما تصدق تلاقي جنازة عشان تشبع فيها لطم
...يؤسفني اقولك انك مدعى فاكِس واوفر كمان !!

أنا من الجيل اللي..




انا من الجيل اللي حضر حرب الخليج
انا من الجيل اللي شهد مذبحة الحرم الابراهيمي واتفاضة الاقصى واطفال الحجارة
انا من الجيل اللي شهد سقوط الاتحاد السوفيتي
انا من الجيل اللي انتهى في عهده جيل كامل من القادة العرب السابقين الا قليل
السادات ... عرفات ...الملك فهد ...الملك حسين ...حافظ الاسد ...صدام حسين ...
انا من الجيل اللي كان بيتفرج على فوازير نيللي ويقلد شيريهان
انا من الجيل اللي حضر مصر للتأمين ...المسلسل هيبدأ امتى
واكل بيمبو وجيرسي وسامبا اللون الموف
انا من الجيل اللي اتربى على صوت فيروز وام كلثوم
وحب على اغاني فؤاد وعمرو دياب وعرفهم من ايام في السكة في السكة والشمس تجمعنا وبتغني لمين يا حمام وهلا يا هلا
واتعلم العمق البسيط على ايدين منير ومنيب وصلاح جاهين
انا من جيل رافضك يا زماني يا مكاني انا عايز اعيش في كوكب تاني
انا من الجيل اللي حضر طفرة في عالم الموسيقى اسمها حميد الشاعري
انا من الجيل اللي عاصر 3 مصريين اخدوا نوبل
وقرأ من صغر سنه لنجيب محفوظ واحسان عبد القدوس ويوسف السباعي وعباس العقاد وغيرهم
واستمتع بملف المستقبل ورجل المستحيل
انا من الجيل اللي رقص على اغاني مادونا وياللي وسطك وسط كمنجة وحفظ كل اغاني جورج مايكل
انا من الجيل اللي قالوله في مغنين جداد اسمهم مصطفى قمر وايهاب توفيق ومغني شعبي اسمه حكيم
وفيلم جديد مكسر الدنيا اسمه Pretty women
انا من الجيل اللي لما كانوا بيقولوله وهوا صغير ان هيجي يوم هيبقى فيه تيليفون محمول
وممكن تشوف الشخص اللي بتكلمه
كان بيعتبر دا حلقة خيال علمي وماتصورش ابدا انه يحصل في الحقيقة
انا من الجيل اللي صدمته التكنولوجيا والانترنت
وماكانش فاهمها في الاول خالص !
انا من الجيل اللي شهد ايام ماكان التيليفيزيون قناة اولى وتانية وبيفكروا يفتحوا التالتة
غير كدا ماتلاقيش
انا من الجيل اللي كان بيستنى حلقة العلم والايمان بفارغ الصبر ويجيله حزن وشجن وخوف من موسيقته
انا من الجيل اللي كان بيقولوا عليه في برنامج العالم يغني ( اما لهواة التسجيلات فبنقولهم يستعدوا عشان جايبنلهم النهاردة مفاجأة)
انا من الجيل اللي ارتبط معاه يوم الجمعة بالشيخ الشعراوي
انا من الجيل اللي مادخلش سينما غير على كبر لما فتحوا سينمات ممكن الانسان الطبيعي يدخلها
وعملوا افلام ممكن الواحد يشوفها
انا من الجيل اللي شهد صحوة السينما الجديدة بعد ماكانت الافلام عبارة عن (كلمة السر ..خالتي بتسلم عليك)
في فيلم المفروض انه مخابرات وقضية واسرائيل وحاجة مهمة
ياااااه
الكلام مش هيخلص

شكرا لعمر طاهر :)

عنق الزجاجة ...



طالت الرحلة حتى اصل الى عنق الزجاجة
وها انا محشورة فيها
طالت مدة حشرتي في هذا العنق حتى ظننت ان الزجاجة كلها باتت عنق !!
اصبح يراودني شعورقوي بالرغبة في العودة الى قاع الزجاجة مرة اخرى
فعلى ضيقها كانت اوسع من هذا العنق الذي علقت فيه
ولكني اصبر نفسي بانها النقطة الفاصلة بين ان اكون او لااكون
بعد ان اعبر هذا العنق
سأخرج من الزجاجة التي طالما حلمت بكسرها

Monday, April 28, 2008

الحزن ...صديقي


حينما لا تعرف العيون الا طعمه المر

عندما يرتجف القلب

وترتعش الشفاه

وتحفر الدموع طريقا لها على الوجنتين

ويسألك الجميع باستنكار أأنت حزين...تبدو حزينا ...صوتك حزين ...نظرتك حزينه

فيرد قلبك وتعجز شفتاك عن النطق

نعم انا جزين

بكائي حزين ...ضحكي حزين ...صمتي حزين ...وكلامي حزين


انظر لنفسي في المرآة ...غريب حقا هذا الحزن ...اصبح جزء من ملامحي

او ترى قد ضاعت ملامح وجهي وحل محلها هذا اللعين

بالرغم من ايماني

بالرغم من رضا حقيقي في نفسي

بالرغم من تفاؤلي واملي

بالرغم من اني اسعى

وبالرغم من كل شيئ

عجزت عن الهروب من هذا الحزن

وكانه بات جزءا من حياتي

يا ساكنا قلبي .....لقد تعبت ...ارجوك ارحل


عندما اشعر بالحزن

اصلي...اناجي ربي فمن لي سواه

اكتب

ابكي

وقد ابتسم

استمع لاغنيه احبها لفيروز او ام كلثوم

اتصفح مذكراتي ...اقلب البوم صوري القديم

اتأمل

ما أجمل التأمل

وجه القمر


وجه القمر

منذ ايام قليلة انتصف الشهر العربي ورأيت وجه القمر

تذكرت اياما مرت في حياتي

كنت طفلة صغيرة امتلأت عيونها بالدهشة والفضول والشقاوة

ومزجت هذه الاشياء بذكاء وبرائة

كنت احب وجه القمر ...احبه بحق

كنت انتظر منتصف الشهر العربي كحدث مهم في حياتي

لانظر الى وجهه ...وأتأمله بتركيز شديد...من نافذة حجرتي ولساعات طويلة

اذكر حينما كنت اخرج مع العائلة ...ما ان نركب السيارة

حتى يلتصق وجهي في الشباك وارفع حاجبي وافتح عيني بتركيز شديد

باحثة عن القمر

وما ان اراه حتى اصرخ فرحة

يا بابا القمر جه

يا بابا القمر ماشي معايا

ولو قرر ابي ان يسلك شارع غير الذي نسير فيه وفقدت اثر القمر

احزن بشدة

كان رفيقي ....افتقده كثيرا ...زائر عزيز لا يظهر الا 3 ليال في الشهر

كنت ارى له وجها

كانت عيناه حزينة وتتطلع لاعلى

وفمه مفتوح كانه ينادي ...نعم كانه ينادي عزيزا فقده

كنت احزن لحزن القمر ....واكلمه كثيرا ...كان عندي فضول لمعرفة من الذي تجرأ واحزن القمر

وكنت في كل مناسبة اصور القمر ..نعتني البعض بالهبل

حد يا بنتي يصور القمر ....الناس كلها بتصور الشمس بالذات في الغروب

اول مرة نشوف حد بيصور القمر

ودائما كانت صور قمري بعيدة غريبة ولم يظهر فيها وجهه

مما اصابني باحباط شديد

ما لهذا القمر ...مالك يا قمري ...لما انت حزين ووحيد وبعيد

كبرت ونسيت قمري

صرت اذكره على فترات ...لم اعد انتظره كل شهر كما كنت افعل في طفولتي

ومنذ ايام قليلة رأيته صدفة

تسمرت في مكاني وهاجمتني الذكريات

نظرت له وملئ عيني دهشة و حزن و....عتب ...ليس له بل لذاتي

كيف انساك يا قمري ...سامحني

انت رفيق العمر يا قمر ...ولكنك كما كنت ...وحيد ..بعيد ...حزين ...

بحثت عن وجهه لعلي ارى حزنه قد زال

ولكني وجدته مازال .....

مازال وجهك يا قمر... حزين ينادي غائبا طال انتظاره

عروستي...


لسه فاكرة اليوم اللي رجعت فيه ماما من المستشفى شايلاكي في ايدها

بصيتلك وعيني مليانه دهشة وحواجبي مرفوعة

مين دي يا ماما .............دي اختك

يعني ايه اختي ....يعني دي انتي جيبتهالي عشان العب بيها

مين دي .....هما مهتمين بيها ليه ....هيا اصلا ما بتتكلمش

ولا بتضحكهم زيي....ولا شاطرة وبتروح الحضانة زيي

وبتعيط كتير ...وماما قالتلي ان اللي بيعيط كتير بيبقى وحش

يبقى انتي وحشة .......

ليه بتنامي عند ماما وبابا في اوضتهم ......انتي هتنامي عندي انا في اوضتي

مش انتي عروستي .....

تعدي سنين ....وتبتدي تمشى ...وتتكلمي

الظاهر ان انا بحبك على فكرة

شعرك الناعم وحواجبك المرفوعة اللي بتعبر عن الدهشة الدائمة

وعينيكي اللي مليانة برائة ونظرة خوف ...هوا انتي ليه خايفة كدا

بس انتي عروستي ...بلعب بيكي على طول

وانتي مستسلمة ومستمتعة ...ودايما بشوف في عنيكي نفس النظرة

نظرة بريئة مليانة خوف وضحكة كانت بتخطفني

سنة ورا سنة كنتي بتكبري

لحد ما بقيتي طولي ...لا انتي بقيتي اطول مني

انتي كبرتي امتى

مش انتي اللي لسه كانو جايبينك من المستشفى


فرحك قرب ......دوشة وزحمة وفستانك وبيتك وجهازك والمعازيم

وانتي متوترة وقلقانة.......ولسه نفس النظرة البريئة الخايفة في عنيكي

واليوم جه ........


مين دا اللي جاي ياخد عروستي وبيقول عليها عروسته

انتي عروستي انا

انتي ناسية ان ماما جابتك ليا وقالتلي دي اختك

طلبتي من كل الناس انها تمشي من الاوضة ...وقررتي اني الوحيدة اللي افضل معاكي

لبستك الفستان الابيض .....ووطيت على رجلك البسك الجزمة

عروستي كبرت اوي .....كنت بلبسها فساتينها وجزمها زمان من غير ما اوطي ولا اتشعلق

بصيتلك .....سألتيني شكلي ايه .....

ونفس النظرة البريئة الخايفة في عنيكي

مسكت دموعي بالعافية ...وقلتلك ...انت عروستي ....انت احلى عروسة في الدنيا

حضنتك ....وقرأت عليكي ادعية التحصين

...اخدتك من ايدك ونزلنا

قبل ما تطلعي على الناس ......ناديت بابا عشان ياخدك ويسلمك لعريسك

بابا مسك ايدك ...وانا غطيتلك وشك بالطرحة

ولمحت في عنيكي نفس النظرة

دخلتي على الناس زي الملاك ......عصر يوم هادي ونسمه هوا ناعمه في الجو

في جنينة خضرا ..........وبابا سلمك للعريس

اسفه ...انا مش قادرة امسك دموعي اكتر من كدا .......بعدت بعيد عنك في اللحظة دي

وافتكرت اليوم اللي ماما رجعت بيه من المستشفى شايلاكي

لمحت من بعيد المأذون بيطلب من الشهود البطايق

وبابا وعريسك ايدهم في ايدين بعض

وبابا بيقوله زوجتك ابنتي

خلاص كدا ...انتي ما بقيتيش عروستي خلاص

بقيتي عروسته هوا ........

ولحد النهاردة .....انا بفتقدك ...مش عارفه انام في الاوضة من غيرك

انتي معايا في الاوضة من يوم ما قررت اخدك من اوضة ماما وبابا

فاكرة ......

انتي بعنيكي البريئة الخايفة ...اغلى هديه بعتهالي ربنا

الله يحميكي

أنا......


انا ....

من الذين يطلقون عليهم ( المهمشين) ..واذا كنت لا تعرف عزيزي من هم المهمشون خليني اقولك

بيقولوا ان نسبتنا في مصر 15 % وبيطلقوا علينا من هم تحت حد الفقر

لما نحن مهمشون ؟؟؟؟ يقولون لانهم لا يعرفون لنا دخل محدد ...ولا تعرف لنا الدولة وضع قانوني

وليس لنا تأمين صحي او اجتماعي

لسنا مسجلين في اوراق الحكومة ...لا عندنا شهادات ميلاد ولا بطايق ....لا صحيح ...في مننا مسجلين

بس مسجلين خطر !

تقول الحكومة انهم يحتاجون مليارات ليدخلوا لنا المرافق الاساسية ....هيا مليارات دي يعني كام؟!!!

هل عرفتم من انا ...انا من سكان العشوائيات !

اسمحولي ان اصطحبكم في رحلة قصيرة لعالمي الذي لا اجد له وصفا

ما ان تدخل المنطقة ...حتى ترى عششا متلاصقة بحيث تعجز عن الفصل بينهم ...فلا تدري من يسكن اين

انفجار لحمي ....كم هائل من البشر ...يجعلك تشعر بالاختناق وكأنهم شفطوا الهوا كله

اصوات وضجيج ....اطفال تركض ...وسيدات تصرخ ...ورجال يتعاركون

اه ...نسيت ان اقول لكم ...اطفالنا هم من تسموهم ..اطفال الشوارع

في كل صباح ...يجتمع الاطفال ليذهبوا الى العمل ....الشحاته ....ولكن ما العمل !

اما رجالنا ....فنوعين ...نوع اكل عليه الزمان وشرب فلم يعد يقوى حتى على الكلام

تراه فاقد لمعنى الحياة ....فاقد الامل فيها ....عيناه لم تعرف غير الحزن ....وشكل العشوائيات

اما النوع الاخر ...فهم الارزقية .....بالبلدي يعني ...اللي بيقلبوا عيشهم في اي حتة باي حاجة

فمنهم من يعمل في تجارة المخدرات لحساب حد كبير ومسنود .....عشان يكون هوا اللي في وش المدفع لما

تحصل كبسة ! وطبعا طباخ السم بيدوقوا ! ومنهم الهجام ...ومنهم النشال ...ومنهم البلطجية بالاجرة ..

.يعني لو احتجتوا ناس في خناقة احنا رقبتنا سدادة !

لسه عايزين تسمعوا كمان !!!!!! ماشي

التعليم بالنسبة لينا حلم لا نجرأ ان نحلمه ......المستشفيات بنروحها لما بتوصل الحالة لمسألة حياة او موت

كل خمس عشش او اكتر ...بيشتركوا في حمام واحد .....ما يجيش في بالكوا ان حمام ببانيو وسيراميك والحاجات

دي زي اللي بنشوفها في التيليفيزيون !

نسيت ان اخبركم .....في خلية ارهابية مستخبية عندنا ...! وابتديت احس ان الانضمام ليهم فكرة هايلة ...اهو

الواحد يفجر نفسه ويخلص من العيشة دي ! الواد محمد جارنا انضملهم ..بعد ما كان عيل بيتضرب على قفاه

من اي حد في الرايحة والجاية ...بقت المنطقة بتعملوا الف حساب ...بقى ليه هيبة كدا ...والقرش جري في ايده

ماهو اصله بيموت عساكر ويسرق سلاحهم ! ويبيعوا للتنظيم

وبما ان عيشتنا كلها هوان في هوان ...هانت على الكثيرين انفسهم

ولم يعد للانسانية في حياتنا اي معنى .....

ما اكثر انتشار الزنا في منطقتنا ! هتقولولي في كل حتة! ممممم

ما اقصده هوا زنا المحارم

دا غير طبعا ان في سن 15 سنة ….ممكن.تلاقي الواد عنده البت بتاعته ….والبت بتاعته تحمل …..وتجيب

كارثة تانية تقرف بيها الدنيا وتقرف اللي خلفته شخصيا …جاتهم القرف …

….انتوا بتسألوا على اهل البنت ؟؟؟؟؟ لا ماهيا كمان جات غلطة …ماحدش عارفلها ام ولا اب

ماهم رموها من زمان على جنب …جنب اي عشة ! ممكن البنت تعدي من قدام ابوها ما يبقاش عارف انها بنته

اصل اوقات كتير …لما الام ما بتعرفش تتصرف وتخلص من العيل عشان مافيش فلوس تعمل عملية اجهاض

تضطر تخلفه وخلاص ….يمكن يتباع ! ولو ما تباعش ….بترميه وتتطفش …واحدة عندنا في المنطقة طفشت

من فترة .....بيقولوا بقت رقاصة ….

يأتينا على فترات ومواسم ...شباب...في مقتبل العمر ....لابسين هدوم سليمة مش مقطعة ...ومستحميين وريحتهم

حلوة في سيارات ...وتعلوا وجوههم ابتسامة جميلة ...وكيف لا يبتسمون !

يحملون في ايديهم اكياس امتلأت بالخيرات ....تموين البيت يعني....وفي جيوبهم اظرف اكتظت بالأموال

حين يأتون ...تحدث في منطقتنا ثورة الجياع ...حتى اكاد اشعر ان جيراني سوف يجردوهم من ملابسهم

الشخصية ...ولما لا ...اكيد عندهم غيرها كتير !

كم اكرههم ....كم اكره اليوم الذي يأتون فيه ......أتأملهم من بعيد ....ماهذا الحماس ....ولما كل هذا الحنان

ولم تفعلون كل هذا .....لوجه الله !!!! يعني عايزين الاخرة كمان !!! مش كفاية عليكو الدنيا ! ايه الطمع دا

بعدين على فكرة انتوا مش بتمنوا علينا ...دا حقنا ....لو البلد عدلة كان زمانها مديانا حقنا دا ....وما كنتوش جيتوا

يا محسنين توزعوا علينا الارزاق !!!!!

واحدة معاكوا اهي بتعيط ...يا عين امك ياختي ...اتأثرتي اوي بعيشتنا .....ليه بتيجوا من اصله !!!!

ليه بتيجوا تعرفونا اننا مش عاشين ....ليه بتيجوا تحسسونا اننا مش بني ادمين ...!

بقولكوا ايه ....كفاية عليكوا كدا

الحكاية اللي فوق مش انا ...دي من تأليفي .... بس كل اللي ذكر فيها حقيقي ...بيحصل ....واحساس بطل حكايتي

احساس بشوفه في عيون الناس دي ....

دلوقتي سؤالي ....ايه العمل ؟؟؟؟

الناس دي قنبلة موقوته ....هتنفجر قريبا جدا !!!!!!!!

اسفه على الاطالة ....ويمكن يعتبر البعض ان الموضوع ممل ...او يقول في نفسه واحنا مالنا نعملهم ايه ؟؟!!!

هوا دا سؤالي ...نعمل ايه ......؟؟؟؟






في رحم العالم ....








انا في مكان غريب ...ضلمة ...لوحدي ...بيفكرني بمكان كنت فيه من زمااااااان اوي

بيفكرني برحم امي ....بس انا دلوقتي في رحم العالم ....انا في قبري

وشتان الفرق بين رحمك يا امي وبين القبر

بس فيه شبه ...هما الاتنين مضلمين ...هما الاتين هخرج منهم على دنيا تانية

يارب تكون الدنيا الجديدة احن عليا من الدنيا اللي طلعت من جواكي يا امي عليها


خرجت ...خايفة ...مستغربة ...مسكني راجل غريب وشقلبني في الهوا وضربني على ضهري

الظاهر كان بيقولي بطريقة غير مباشرة ..ان الحياة كلها شقلبة وضرب من الضهر

بس يظهر ماستوعبتش الدرس في وقتها ...

بكيت ..بكيت كتير اوي ...ما ادركتش سبب بكائي دا غير بعد كدا


لما بكيت وقتها لاقيت شخص حنين جدا اخدني في حضنه وعينيه اتملت دموع ...شخص بيقولو اسمه بابا

بابا دا طلع حاجة جميلة جدا ...انا حبيته اوي ...احيانا بعدها حسيت اني بحبه اكتر من ماما

مع اني طالعة من جواها هيا ...بس كل اللي بيشوفني بيقول عليا حتة منه ...وهوا كمان بيقول اني حتة منه

بابا دا احلى حاجة في الدنيا دي ...كويس اني جيت هنا عشان اشوفه

بس بابا دا ماقعدتش معايا كتير ...مشي ...قالولي وقتها راح عند ربنا ...اتألمت كتير

...وافتكرت ضربة الدكتور على ضهري اول ماجيت الدنيا

وقولت دي تاني ضربه في الضهر اخدها في حياتي ...وماكنتش عارفه ان الضربات هتبقى كتير اوي

بعدها حياتي اتشقلبت ...زي الشقلبة اللي اتشقلبتها وانا عمري ثواني ...

عافرت في الدنيا كتير ...تعبت كتير ...اخدت ضربات كتير على ضهري

كل مرة كنت بقوم من جديد اقف على رجلي ...واكمل الحرب

وكتير قولت لبابا اللي مش معايا...ياريتك قولتلي قبل ماتمشي اني جيت غابة ....وياريتك علمتني ازاي اعيش مع الذئاب

احيانا كانت الدنيا بتضحك لي ...وكتير كنت بشوف الناس اللي حواليا وهمومهم واقول يااااه الحمد لله

ربنا يجعل مشكلتي دي اكبر همومي ...

بس في اوقات تانية الدنيا كانت بتكشر ...اهي على كدا طول الوقت

...حبة فوق وحبة تحت

اول درس اخدته في الدنيا دي الشقلبة

اتعلمت اضحك ودموعي حيرانه في عيوني ...اتعلمت احمد ربنا في الهم قبل الفرح

سابتني ماما بردو في نص الطريق

....وفي الطريق قابلت ناس وفارقت ناس

حبيت ناس وكرهت ناس

ناس قلوبهم صافية وبيضا واقرب لانها تكون شفافة

وناس قلوبهم سودا واقسى من الحجر

حسيت كتير اني نملة في وسط قطيع نمل ....حاولت اخرج من القطيع دا ....بس عرفت اني حتى لو كنت نملة كبيرة ...لوحدي مش هقدر اكمل من غير حد معايا

واتعلمت كمان اني لو كنت صخرة كبيرة او كنت ذرة رمل ...مش فارقة كتير ...لان الاتنين بيغرقوا في البحر

بحر الحياة

من لحظات قليلة كنت قاعدة لوحدي تماما ...بتأمل حياتي ...بصيت في المراية وشفت شعري اللي شاب ووقع

وشفت عجزي ...وشفت خطوط الزمن اللي اترسمت على وشي ...ياااااااااه

الرحلة كانت طويلة ...كنت مستنية النهاية بقالي كتير ....

كنت مستنية الاقي كنز في اخر الرحلة على غرار افلام الكرتون ومالاقيتش حاجة

بس اكتشفت ان الكنز الحقيقي كان في الرحلة نفسها

كلنا بدأنا رحلة الحياة بالبكاء

يمكن في خلال الرحلة بيتضح لنا بعض اسباب بكائنا

بس مش هنشوف الصورة كاملة الا في اخر لقطة من لقطات حياتنا

انا دلوقتي في رحم العالم ...وهتولد في دنيا تانية ...اتمنى انها تكون احلى ....انا استعدت للدنيا التانية دي كويس

على الاقل كان عندي فرصة استعدلها ...مش هتفاجئ زي المرة اللي فاتت على ما اظن