Wednesday, May 28, 2008

انا ..والعود ..و ..صبا !


بحب الموسيقى جدا من صغري

افتكر اني بداية تعلقي بالموسيقى كان السيمفونيات العالمية

كنت طفلة صغيرة عمري ما عداش ال 5 سنين

وبسمع بتركيز شديد بيتهوفن وموتسارت وباخ

وحبيت اوي Ode to joy

مقطوعة في السيمفونية التاسعة لبيتهوفن ..واستغربت جدا انه كمل السيمفونية دي بعد ما فقد سمعه نهائي !!

وبالرغم من ان اسم المقطوعه دي يدي ايحاء انها حاجة سعيدة ..الا اني كنت بحس فيها بحزن معين !!

لما كبرت اتجهت للموسيقى العربية ....ودا كان بداياته في اولى اعدادي ...وحبيت القانون والكولة الحزينة ..

والعود ...

اشتريت اول عود في حياتي وانا في السن دا تقريبا ...

وفضلت انا والعود اصحاب فترة طويلة ....لحد ما اخدتني الحياة منه



زي ما اخدتني من كل حاجة تانية حبيتها واتعلقت بيها

ونسيته خالص وبقى مصير عودي الحبيب..مصير غريب ..وحيد ..حزين ...عودي مرمي فوق الدولاب بقاله سنين

مسكته النهاردة الصبح اول ما صحيت ..وحاولت اعزف اي حاجة ...لاقيت اللحن تاه مني ...



لاقيتني مش قادرة اعزف اي حاجة ...

كل دا افتكرته ليه وايه مناسبته اساسا !!

اني امبارح كنت صاحية وقت اذان الفجر ...وسمعت الاذان ..عادي ..بتحصل كتير

امبارح يظهر في مؤذن جديد في مسجد قريب مننا ...المؤذن كان بيأذن في مقام صبا

اكتر المقامات حزنا ..دايما بيستخدموه تعبيرا عن الحزن الشديد الاقرب للبكاء ...واحب مقام لقلبي



...وقليل جدا في حياتي المرات اللي سمعت فيها حد بيأذن في المقام دا

افتكر وانا صغيرة اوي ..كل ما كان يعجبني مقطع في اغنية قديمة اجري اسأل بابا ..هيا دي مقام ايه ..يقولي صبا

واكتشفت اني اول حاجة عزفتها على العود


مقطع من اغنية لسه فاكر الحتة اللي بتبدأ ب

( كانت الايام في قلبي دموع بتجري وانت تحلالك دموعي وهيا عمري)


الحتة دي تحديدا كانت مقام صبا بردو !

غريبة ...ليه المقام دا بالذات اتعلقت بيه كدا ..ماعرفش ..وودني بقت حساسة ناحيته جدا

بقيت بعرفه هوا الوحيد من وسط مقامات الموسيقى الكتير


اللي دايما بتلخبطت فيهم وعمري ما كنت شاطرة في اني افرقهم عن بعض

ومن الاغاني اللي في مقام صبا

ام كلثوم ..هو صحيح الهوا غلاب

الاماكن لمحمد عبده


واغاني تانية يمكن مش كتير ...

بس حتى الاغاني اللي في مقام تاني وبيكون جواها كوبليه صبا بيكون الكوبليه دا احب حتة في الاغنية لقلبي

لو كنت مقام موسيقي ...لكنت بالتأكيد هتمنى اكون صبا

اللينك دا في اذان بكل المقامات ..اتمنى يعجبكم وتقولولي ايه اكتر مقام حبيتوه :)



http://www.qoranway.com/alathaan.html


4 التعليقات:

leeno said...

اولا

انا بس اللي اقول صبوتشي ههههههههههههههههههههههههههههههههه

تانيا

اا ن مبارح بحاول ادخل اعمل تعليقات في مدونتك و الن بيفصل كل ما اجي اع التعليق لحد ما اتنقطت

تالتا

انا اول مر اركز في موضوع المقمات
عشان محسوبك جاهلة موسقيا معلش

الادان بمقام الصب بيوجع القلب بجد!!!

حتى الاجزاءمن الاغاني اللي قلتيها فلا رااااائعة جداااااا

و كنت بحبها من غير ما اعرف ايه المقام

اكدب لو قلتلك سمعت الادان بكل المقامات

انما حاولت اسمع بعضامقامات

حبيت الصبا جداا و مقام اسمع العاشق المصري تقريبا

انتي ملكيش حليا بنتي

صبري سراج said...

يا ناس صبروتشي بتاعنا كلنا.. العبوا مع بعض متتخانقوش loool

انا زيك يا فطوم بعشق الصبا وفروعه..زمزمة والنوةوجنس الصبا.. بعشق حزنه وخصوصا لما تسمعي الناي وهو بيلعب من الصبا ببقى بموت معاه.. اتعلمت افرق بين اكتر من مقام وبقيت اعرفهم بسهولة عشان كده للصبا عندي سحر خاص يمكن كمان لأنه مش من المقامات المستهلكة واللي بيغنوا منه قليلين أوي.. ارجعي العبي عود تاني بقى.. انا كان نفسي اتعلمه بس قالولي مذاكرتك أهم:@

Founoon said...

لينوتشي :(

اخس عليكي

خلاص من هنا ورايح هناديه صبورتشك مش صبورتشي :)))

في مقامات كتير حلوة

الاذان بمقام عجم حلو

وبمقام حجاز هوا الاكتر انتشارا

وفي الاغاني كمان في مقامات منتشرة جدا وفي مقامات جميلة

بس بردو الصبا فيه حزن غريب

بيسموه المقام الباكي

ويقال ان الواحد لو حاول يغني حاجة بمقام صبا غصب عنه ملامحه كلها بتتحول لشكل حزين جدا اقرب للبكاء

جربي كدا غني وانتي واقفة قدام المرايا وقوليلي :))))

Founoon said...

صبري

لسه الفرصة ماراحتش على فكرة

العزف ممكن الواحد يتعلمه في اي سن

اكيد في الصغر اسهل واحسن

بس مادام ودنك موسيقية كدا وعارف تفرق بين المقامات هتتعلم بسهولة فوق ما تتخيل على فكرة

دا غير ان العود الة سهلة اوي

العود والجيتار التين سهلين فهلا في التعلم مع اني ما جربتش الجيتار بصراحة بس اعتقد كدا

والبيانو والاوج كمان سهلين

اللي صعبين اوي اوي اوي

الناي والقانون والكمان

دول جربتهم كدا مرة ولاقيت ان مستحيل يكون في امل اساسا :))))