Tuesday, January 20, 2009

بعض مني ..يزعجني !



*أحاول دائما ان اكون الطرف الأعقل في أي علاقة ..مع اخواتي ..مع أصدقائي ..مع زملائي في العمل
أحاول أن أكون الأكثر تفهما والأكثر تغاضيا والأكثر تغابيا
خسرت الكثير ...ليس لأن الجنون أفضل ..ولكن لأن تكون نفسك هو بالتأكيد الاختيار الأصح
من قال إني الأعقل !!!!

*أتحاشى النظر الى نفسي في المريا ..ليس لأن بشكلي ما يزعجني حين رؤيته ولكن لأني لاحظت ان الكثيرين ينظرون الى انفسهم في اي مرايا تمر في طريقهم والبعض يتحين الفرصة ليرى صورته منعكسة على الزجاج..اي زجاج
كان انطباعي انهم فاقدوا الثقة في انفسهم ..وحتى لا تهتز صورتي أمام ذاتي واتهمني بأني لا اثق في نفسي اصبحت اتجنب النظر في اي مرايا وانا امر في اي مكان بل واصبحت اتعمد الا انظر الى نفسي حتى وأنا بمفردي في مرايا المنزل او في الحمام اللهم الا نظره خاطفة شاملة لمدة لا تتعدى 3 ثواني لأتأكد فقط من ان مظهري العام ليس به عيب
حتى اصبح الوضع اشبه بالمرض ..أنا حقا اتحاشى المرايا بشكل مرضي حتى اصبحت اشعر ان هروبي من المرايا هو في ذاته فقدان ثقة بالنفس !!

*حين يجرحني تصرف غير مقصود من شخص ما اتعمد اظهار اني لم انتبه لهذا التصرف حتى لا احرجه
وإن اعتذر هذا الشخص عن ما حدث ادعي اني لا اذكر الموقف اصلا !

*لا أحب الذهب ..تخنقني الاكسسوارات بشكل عام ..القرط..الخاتم ..حتى الساعة ..اشعر انها قيود تسلبني حريتي

*اكره السلام باليد واكره تبادل القبلات
اكره الافعال الروتينية الخالية من الاحساس ..وانا حقا لا اشعر اني اريد تقبيل صديقاتي او السلام على اصدقائي عند كل لقاء ...كثيرا ما اكتفي بالسلام عن بعد وابتسامة

-*مر في حياتي شخصان ..فتاة وشاب كادا أن يصيباني بالجنون لبراعتهما الشديدة في انتحال شخصيتي !
كلما تحدثت مع احدهما في موضوع وابديت رأيي اجدهم يكررون ما قلت حرفيا امام الاخرين على اعتبار انه نتاج فكرهم والادهى ان هذا التكرار يحدث في وجودي !
اهتماماتي تحولت بقدرة قادر الى اهتماماتهم التي يمارسونها منذ الازل ! حتى كلماتي !
هذا أنا ..كفوا عن انتحال شخصيتي ...ارجوكم ..سأصاب بالجنون كونوا انفسكم فأن تكونوا انتم بالتأكيد أفضل من ان تكونوا مسخ لشخصية أخرى !

* أنا بنت اللحظة ! اشعر ان كل ما املكه في هذه الدنيا هو اللحظة التي اعيشها ..افعل ما أشعر به في اللحظة ..اتناسى الماضى والمستقبل واعيش اليوم الذي بين يدي بكل احساسي وكأنه أخر يوم في عمري
هذا لا يمنع اني مصابة بداء الحنين للماضي ولا يمنع اني انتظر المسقبل بشوق كبير ولكني لا اضع في اعتباري الماضي وأنا اعيش اللحظة ولا يخطر لي على بال تأثير اللحظة على المستقبل !

*بدأت العمل خلال دراستي الجامعية ..كلما فكرت في المبالغ التي حصلت عليها كمرتب منذ بداية حياتي العملية وحتى هذه اللحظة اصاب بالفزع !!!! انه حقا مبلغ كبير ! اين ذهب ! عودة الى النقطة السابقة اني بنت اللحظة فأنا لا انكر اني استمتعت بالمال الذي كسبته من عمل يدي ولكن ماذا عن المستقبل ! المهم الصحة :)

*لم اعد عصبية كما كنت ..لم اعد معبرة كما كنت ..لم اعد عفوية كما كنت ...عندما تتمكن من الخلاص من صفة تكرهها في نفسك وتزعج الأخرين فأنت تتخلص ايضا من بعض الصفات المرتبطة بهذه الصفة فيك بالتبعية حتى وان كنت لا ترغب في الخلاص من هذه الصفات الأخرى
اريد عفويتي ..اريد قدرتي على التعبير ..حتى وان عادت لي عصبيتي مرة اخرى !
 

32 التعليقات:

romansy said...

الحمد لله
ان فيه شويه تفاؤل كده ونشكر ربنا ورضى الوالدين

بس لازم نفكر كويس فى اللى يزعجنا ونحاول نروده لصالحنا

ليث said...

بوست جميل/
هاعلق على آخر مقطع،
طبعا انتي عارفة ليه...... عشان مابطييييييقش الكدب،بيعفرتني، بحس انه الانسان اللي بيكدب ده .... ولا بلاش،
ارجو الكلام اللي هاقوله مايزعلكيش، انا ماقصدش اقولك حاجة بس ده شعوري ناحية الكدب عامة... (No Offence)

انا بعتبر الكدب خيانة حتى لو في ابسط الأشياء، خصوصا للقريبين ، انا مش عايز اعمل حاجة ، ما اقولش لحد اني هاعملها ، اقصى اللي ممكن اعمله اني اتهرب بالكلام، مش من حقي اني اوهم حد بحاجة او اعشمه وفي الآخر ماعملهاش وانا ناوي اصلا من الاول ماعملهاش،
ده في ابسط الاحوال،
اما كون الواحد يبرر لنفسه الكدب بإنه ماضرش حد بالعكس ده فيه فوايد،
فده بقى قمة الأنانية والغرور،
لأن الطرف التاني ماهوش عيل صغير ومش عارف الفايدة فين والضرر فين ،فاحضرت الكداب بيعمل اللي فيه الفايدة من ورا التاني لأنه هو اللي بيفهم لوحده ومافيش حد غيره بيفهم ،
الكدب كدب ... مافيش حاجة اسمها كدب ابيض وبيفيد وكدب اسود وبيضر وكدب اخضر بين البينين،
وربنا سبحانه وتعالى حرمه إلا في 3 حالات:
1- الحرب
2- الاصلاح بين المتخاصمين المسلمين
3- كدب الرجل على زوجته( بمعنى انه يقولها مثلا: انت اجمل واحدة شافتها عيني، ومعروف طبعا مدى كدبه، مش محتاجة كلام دي).
وواضح الفوايد اللي ممكن تعود من الكدب في ال3 حالاات دول وبس، ومش من حق حد تاني يقول ان اكتشف حالات تانية ماعرفهاش الرسول (صلى الله عليه وسلم).
باقي حاجة واحدة، اكيد اللي بيقرا بيقول الجدع ده محروق قوي كده ليه،
اقولك يا سيدي ، لأن دي حاجة بكرها طول عمري ماباطيقهاش وهي عندي كافية جدا للحكم على الاشخاص ومى الثقة اللي ممكن اديهالهم، وفوق كده ذهلت لما سمعت عن حديث للرسول (صلى الله عليه وسلم) فيما معناه انه سأل: ايسرق المؤمن ،قال بلى، فسأل ايزني المؤمن، قال بلى، فسأل ايكذب المؤمن قال لا.
ومش محتاج اكمل.
فنون.... زي ما قلتلك (No Offence

انا حرة said...

فاكرة لما قلتلك انى عمالة اكتب كمية حاجات مهولة..كان من ضمنها بوست اسمه وجهى الاخر مش عارفة اذا كنت هقدر احطه فى يوم ولا هخليه لنفسي بس هو كان اصلا عن الحاجات اللى ماحدش يعرفها عنى بس كان فيه شوية من الحاجات اللى مش بحبها فيا
و لما قريت كلامك افتكرت كام حاجة كمان

ساعات ببقى متاكدة ان وجهة نظرى فى حاجة معينة صح مليون فى المية و ساعتها شوية الشر الكتير اللى فيا بيظهروا و مش بعمل غير اللى انا عايزاه حتى لو معايا ناس تانية مشتركين معايا فى نفس الحاجة..و مش بس كده بخليهم يقتنعوا تماما ان كلامهم هو اللى مشى..بكره الحكاية دى على فكرة عشان فيها شوية manipulation مش قليلين بس ده اعتراف صغنن على الماشى كده

انا كمان زيك فى حكاية السلامات دى و لما بحاول اجامل بيبان عليا و حتى الابتسامة الصفرا اياها مش بعرف اعملها و النتيجة بتبقى face متخلف يفطس من الضحك

فى حاجة كمان صاحبتى قالتلى عليها امبارح..انى ما عنديش القدرة ولا الطاقة انى اقبل اى مجاملات من اى حد حتى صحابى القريبين لدرجة ان عزومة صغيرة على شوكولاتاية ممكن تقلب معايا بخناقة و قيسى على كده بقى فى كل حاجة..ما بحبش حد يعملى خدمات من اى نوع حتى لو كان عايز يساعدنى مع انى ببقى فى منتهى السعادة اللى فى الدنيا و انا بعمل للناس اللى بحبهم اى حاجة مهما كانت هبلة منتهى الظلم انى احرمهم هم كمان من الاحساس ده

عندى واحدة من اللى بيتقمسونى دول..بس بطلت اركز عشان اكتشفت انى انا كمان ممكن اتاثر بحد من غير ما اخد بالى لدرجة انى اعيد اراءه مش عشان انا ما عنديش اللى اقوله لكن عشان هو عرف يقنعنى..لكن للصبر حدود ساعات بتخنق بجد

بالنسبة للكذب بقى عشان انا بعمل كده كتيييييير
هو الاكيد ان اى كلام مش حقيقي كذب زى ما بيقولوا نص الحقيقة كذبة
ايا كانت مبرراته بس فى كذب فعلا مش بيضر حد بالعكس بيشيل عنه الحرج و عنى انا كمان مش هنكر
و خصوصا فى حكاية التليفون و الخروج دى لانى مش منطقى انى هقول للناس ما ردتش عشان مش طايقة اسمع صوتكم ولا ما خرجتش عشان مش قادرة اشوف خلقكم يعنى

و ان كانوا الناس القريبين بيفهموا ده لوحدهم لانهم عرفونى فبالتالى الكذب فى الحاجات دى كل دوره انه يعدى الليلة و خلاص

بحب المرايات اوى على فكرة كنت فاكرة انهم بيقولوا على الناس اللى بيحبوا المرايات مغرورين اول مرة اعرف انهم كمان ما عندهمش ثقة فى نفسهم..متشكرين جدا والله :D

كاتب مصري said...

سجدة وابتسامة وصوت عذب كصوت فيروز
إذا لا داعي للإنزعاج
مودتي لك ولهمسك

ادم المصرى said...

السلام عليكم

دى اول زياره ويؤسفنى انها تكون عن محور بيخنقنى جدا وبيزعجبنى

بوستك رائع جدا وجميل ونحمد ربنا على كل شيئ عمتا مهما كان خير او شر وندعو الله ان يجعل ايامنا خيرا بجد سعت بلقائى فى مدونتك واتمنى زيارتك

dr.lecter said...

ادييله
ايوه كده بلا عقل بلا نيله

انا باكره اتصنع اني ابقي حكيم ولا رزين باح ان دي مش شخصيتي ب غصب عني مضطر علشان بيقولوا عليا الدكتور بلا نيله مش ناقص فقع

انا بقي مجنون بالمرايات ماتتخيليش انا باقرا نفي في المرايا لازم ربع اعه كل يوم اقعد اتامل نفي ابص علي تجاعيد وشي اللي لغايه دلوقتي ماطلعتش وشعري وعينيا بتقول ايه النهارده علشان اعرف موودي هيبقي عامل ازاي

اعرف اذا كنت باضحك علي نفشي ولا باشتغلها

انت جدعه ايوه كده بلا دهب بلا نيله

مش عاغرف ايه حب البنات في الاكسسورات والهجص ده باحس انهم عاوزين يقولوا شوفوا اتفرجوا علينا

بقرف بجد يابخت اللي هيتزوجك يافنون مش هيغرم فيكي حاجه ههههههه

بس اوعي تقولي عاوزه سوليتير

وماحدش قال انده ينتقص منك ولا حاجه

كل مالبنت تبقي بسيطه تبقي انثي جذابه مش واحده ماشيه بتخشلل


كل ماحد يجييجي يبوسني او يسلم عليا بالبوس اقوله بلاش علشان عندي ايدز
هههههههه باقرف من البوس ب لو بنت ماعنديش مانع ابو ونص


هؤؤؤو بعزقتي الفلوس ياشاطره

صحه ايه الصحه محتاجه فلوس برده

بالشفا



احلي حاجه في اخر اليوم تكوني صلبيتي ركعتين فعلا وتنامي وعلي صدرك كتاب

من كتر التعب وموسيقي وفت شغاله او كلاسيك

فل عليك

Nanoz said...

البوست حلو اوى .. و انا بقراه بقيت بقول وانا كمان فى حاجات كتيير


*طب لما تبقي اصلا معروف انك الاكثر جنونا ... و برده تعمل كده لا اراديا لحد ما تتحط فى خانه انك الطبيعى انك تعمل كده و تبقي الشخص ده ... و تبقي من البديهيات و المسلم بيه انك هتفهم و تقدر و يبقي اى تصرف غير كده مصدمه مفزعه للناس ..بس انت مش حاجه واحده ... ولا حتى حد واحد ... انت
مليون حاجه و مليون حد ... عاقل احيانا الكبير فى بعض الاوقات مجنون فى باقى الوقت



* ساعات كتير ملاحظه عيوب عند الاخرين .. بتخلق رعب و خوف من اننا نبقي زيهم .. فبدون ما نحس بنتصرف على النقيض بس extreme
ومن كتر ما احنا بنحاول نهرب من حاجه .. بنلاقى نفسنا بنهرب لها ...


*ده زى اول نقطه ... بس عارفه المشكله ايه .. ان لما بتعملى كده .. اوقات اللى قدامك مش بيحس انه غلط اصلا .... عشان مفيش consequence
لما تقولى محصلش حاجه .. و تلغى حتى العقاب المعنوى بالاحساس بالذنب .. ده بيدى فرصه لبعض الناس انهم يوهموا نفسهم انهم مغلطوش وانهم زى الفل ولما تغلطى هيقيموا عليكى الحد ... عشان انتى هتحسي بالذنب و هتحسي بغلطك و هتبقي انتى غلطى و هما عمرهم ما غلطوا
الاسخف من ده كله انك تبقي عارفه ده كله و برده متعرفيش تمنعى نفسك انك برده تعملى كده :D


*لو كرهك للاشياء دى بينقص انوثتك .. يبقي انا بيلغيها :D
انا بقالى سنين ملبستش حلق ... يوم ما بقرر البس خاتم .. مش بيكمل ساعتين و بيبقي مصيره انه يترمى فى اى مكان
معنديش اى تحمل للدهب .. بيعصبنى و مش بستحمله ... ماما بتتخانق معايا بسبب الموضوع ده
بس انا مقدرش امشى من غير ساعه .. لو يوم نسيت البس ساعه بفضل كل شويه ابص فى ايدى لا اراديا و اتنرفز اما ملاقيش الساعه ... و بحب الساعات عامه ... متعه بالنسبه لى انى اتفرج على الساعات و اشوف كل شويه الجديد منها



*وانا كمااااااااااان ... بتعصب من موضوع البوس ... خصوصا الستات الكبار ... من بتوع ازيك يا حبيبتشى .... كمان معنديش قدره على تحمل الشخصيات اللى واقعه من بوجى و طمطم و عالم سمسم ... الناس اللى بتلاقيها متحمسه و بتضحك و بتتكلم معاكى اكنك طفل فى برنامج اطفال على القناه الثالثه او حتى التامنه... بمسك نفسي و احاول افضل مبتسمه و اقول اه ممممم اه بالعافيه .... و لو حد منهم حاول يتعامل بحشريه و يتدخل فى حياتى و يعمل ابو لعريف و ينتقد حاجات ميعرفش عنها ... ممكن يخلينى اعدى مرحله قله الذوق :D عشان بيبقي نفسي ارتكب جريمه
كم من الجرائم ترتكب باسم الاجتماعيه و لمفروض تحطى ابتسامه على وشك و تستحملى



* ممرش فى حياتى حد بيحاول ينتحل شخصيتى ... مره واحده وانا فى المدرسه بنت كانت بتغش منى امتحان انجليزى تقريبا و نقلت كل حاجه حتى اسمى :D:D:D
بس دى متتحسبش :D
لا بس زى فله ما بتقول ... ساعات اما بقتنع او بتاثر بحاجه .. بقفش نفسي بقول نفس الكلام عشان بقيت قتنعه به و بقي كلامى و جزء منى انا كمان و بيعبر عنى



* مكنتش كده خالص بس دلوقتى بحاول اكون كده ... عشان اللى فات مات و اللى جاى لسه متولدش ... فنقطه و من اول السطر ... و مينفعش اضيع اللى فى ايدى عشان اللى ضاع قبل كده ولا عشان اللى لسه مجاش ... فبقيت بحاول اعيش اللحظه ... و من ساعه ما عملت كده و انا اسعد و مرتاحه اكتر الحمد لله


* انا لسه مبدأتش عمل بس برده بسال نفس السؤال هى الفلوس بتروح فين ... دلوقتى عندى شبه يقين انها بتطير


* انا لسه عندى عصبيتى و جنونى ... بيخسرنى كتير بس مش عارفه مستعده اتخلص منها على حساب ايه ... او ايه الاهم
مش عارفه ... بس على قد ما العفويه بتخسر .. معتقدش ان اى مكسب هيبقي له طعم من غيرها .. بيتهيألى هى اللى بتدى الحياه طعم ... وانا معرفش اكل اكل دلع من غير ملح


* كلنا بنكدب .. بطرق مختلفه ...
ساعات بعتبره خوف من المواجهه بس اما اواجه كل حاجه اقابلها هلاقي نفسي بدخل طول الوقت فى صراعات و مشاكل و مش كل الناس هتقدر تفهم و ناس هتتجرح .. فبيبقي موازنه .. فكفه الكدب بتبقي اريح للجميع
المشكله لما تبقي بتكدبى ... و فى نفس الوقت مش بتقدرى تستحملى الكدب
و عندك رادار ناحيته :D بتعرفى على طول اما حد يكدب عليكى .. بس يا اما بتحسسيه انك فاهمه يا بتسبيه يكمل للاخر و تخليكى مع الكداب لباب الدار ... عشان الحقيقه دايما بتظهر فى الاخر

Superman said...

ياله من بوست رائع يا فاطمة..من اول العنوان لحد اخر حرف :D


- انا دايما بحب اكون نفسي في اى علاقة..و غالبآ نفسي بتدفعني اكون الاعقل..بس مش عارف ليه الاعقل دايمآ بيتلام لما يعمل حاجة مجنونة..و المجنون محدش بيعبره لان ده العادي بتاعه..الناس عايزين دايمآ الطرف الاعقل يكون متسامح و مكبر دماغه..و عيب عليك يا عم ده انت عاقل!


- انا و المرايا..دايمآ بتشدني المرايا من و انا طفل..ان الواحد يشوف انعكاسه مازال بيبهرني رغم كل السنين دي!
بعدين بحب اقابل شخصيات مميزة..و مش هلاقي اميز مني اقف اتكلم معاه في المرايا :D

- انا من النوع المندفع..لما تصرف بيزعجني بقول علي طول..السكوت بيجيب للواحد امراض في عز شبابه!

- انا فخور ان في بنات مابيحبوش الدهب..هو ده التفكير المثالي بجد!
بس عمري ما بشوف انه ينتقص من انوثة البنت..

- انا برضه مابحبش السلام بالايد..خاصة لو الناس اللي قاعدين كتير..كفاية اوى إزيكم..لكن هسلم علي 5 او 6..و ياسلام لو كل واحد حضن و بوستين..ده قمة القرف بجد!

- مامريتش بحالة إنتحال شخصية..بس مريت بحالة انتحال عقلية..يعني حد يدخل جوه دماغي و يقولي انت بتفكر في كذا و كذا..و انا مفيش اصلا علي بالي حاجة من اللي بيقولها!

- انا عشت فترة كبيرة من حياتي تحت شعار "عيش اللحظة"..بعدين فقدت الاحساس بالزمن فمبقتش عارف اعيش اللحظة..و ده احد الاعطال اللي بحاول اصلحها في حياتي..الساعة البيولوجية!

- انا عارف كل فلوسي راحت فين..شكولاتة..سينما..قهوة..مجلات و كتب..مواصلات للتنقل بين الاماكن دي :D

- انا بقي معدتش بارد زي ما كنت..بقيت عصبي او بمعني ادق مشدود و متوتر خاصة في التعامل مع الأغراب..دايما ماشي في الشارع و علي وشي تكشيرة مجرم عتيد خرج للتو من محبسه بسجن الحضرة!

- بكره الكذب..بيعصبني جدآ..بحس انه خيانة و استهانة بذكائي و عدم إحترام لي..بحسه تحقير كمان!
بقرف بجد لما اكتشف كذبة!
و لو حد فكر يقول لي كداب يبقي لازم يجيب حاجة يدافع عن نفسه بها..لانني مش هسيبه الا لما يوقع اقرار انه عمل اغبي حاجة في حياته!

- بداية اليوم اللي قلتيها دي..هي البداية المثالية ليومي..
و هي بداية مثالية مفتقدها من حوالي 3 او 4 سنين..حاجة تانية بحاول اصحلها في حياتي!

Founoon said...

رومانسي

اشكرك على ردك

Founoon said...

فلة

انا عايزةاشوف وجهك الاخر دا

Manipulation كنت كدا وبطلت لا مش كدا بس انا كنت بستمتع بقدرتي على اقناع الناس انهم يعملوا اللي انا شايفاه صح وبنبسط جدا لما ينفذوه بالظبط ويجيب نتيجة كويسة معاهم كنت فرحانه حقيقي وبعدين ادركت ان قد ايه دا غلط
كل واحد لازم يتصرف في حياته بطريقته الخاصة مايمنعش ياخد أراء بس مش معقول يبقى في حد بيمشيه في حياته دا شيئ مرضي
بلاش انتي والمجاملات انا شوفت بعيني ماحدش قالي مش ممكن الانهيار العصبي اللي بيجيلك لا بجد رهيبة

صدقيني التقمص اللي بحكي عليه مالوش دعوة خالص بالتأثر بشخصية اوفكرها او ارائها الموضوع غير كدا خالص انا نفسي بتأثر بناس وبعجب بفكر ناس وبقتنع بأراء ناس لا هما مش كدا الحكايةاكبر بكتير
هقولك مثال
مرة في عزومة واحد كاتب مشهور موجود ...احد متقمصي شخصيتي ماقرالوش ولا حاجة ابدا نهائي قبل كدا
اتكلمنا انا وهو وقولتله رأيي في كتاباته وفي شخصيته وفي فكره وايه اللي بيعجبني في الكاتب وايه اللي ما بيعجبنيش
بعدها بنص ساعةلاقيت كلامي كوبي بيست بيتقال للكاتب شخصيا من اللي متقمصني على اساس انه كلامه !
في كدا في الدنيا ؟!!!
عرفتي انا منهارة ليه
المرايات
الطبيعي ان الناس تحب المراية ...انا اللي بقيت مريضة وهحاول اتعالج بجد اكيد دا مرض معين هحاول افهم هو ايه

Founoon said...

كاتب مصري

اتشرفت بزيارتك :)

ادم المصري

اشكرك واكيد هزور مدونتك

Founoon said...

لكتر

فعلا بلا عقل بلا نيلة ..عارف لو عاقلة طبيعي يعني كان يبقى يا اهلا بالعقل بس انا مش عاقلة عاملة فيها العاقلة ليه ؟
نفسي ارجع طبيعية في علاقتي بالمرايا انا فعلا خوفت على نفسي كدا وهحاول افهم دا من ايه :(

مش يا بخت اللي هيتجوزني ولا حاجة انا مسرفة جدا في نواحي تانية الدهب مش كل حاجة :)))

صباح الفل

Founoon said...

نونزييييي عندنا يا مرحبا يا مرحبا

ساعات كتير ملاحظه عيوب عند الاخرين .. بتخلق رعب و خوف من اننا نبقي زيهم .. فبدون ما نحس بنتصرف على النقيض بس extreme
ومن كتر ما احنا بنحاول نهرب من حاجه .. بنلاقى نفسنا بنهرب لها ...

عجبني اوي اوي التحليل دا ..فعلا

ردك جميل يا نانسي مكمل لموضوعي بجد

Founoon said...

سلطان

احرجتني والله

موتني من الضحك مش هلاقي حد امييزمن اللي في المرايا
واضح ان للمراية متعة معينة انا مفتقداها انا فعلا هعالج نفسي

حلوة حالة انتحال عقلية ...دول بقى الناس اللي فاكرين نفسهم بيجيبوا الديب من ديله وبيحملوا الامور اكبر مما تحتمله وبيفترضوا فيك اعماااق وانت اساسا سطحييييييييييي جدا في الناحية اللي بيتكلموا فيها ولا خطرتلك على بال اساسا انا بمر بالحالة دي كتير ههههههههههه

كفاية لوم على الكذب مش عارفه ابطل مش عارفه ابطل :(

ليث said...

فنون
لا يا فندم انا ما اقدرش ،
اوعي تكوني فهمت كده بجد،
انا فعلا مااقصدش ... بس ها اقولك حاجة،

انا اكيد برده في اوقات ماببقاش طايق ارد على اشخاص بعينهم، وساعات ماببقاش طايق ارد على حد اصلا، ولكن قدامي اختيارات ممكن اعملها( مش من ضمنها الكدب) يعني ممكن اقوله كنت مشغول وانا فعلا مشغول حتى لو بحاجة تافهة، ممكن كمان اقوله كنت تعبان فعلا ومصدع وقلت هاكلمك بعدين ولو ماقدرش حالتي وزعل يبقى يستاهل اني اقوله كده تاني ويزعل ما انا مش هاراعي مشاعره وهو مابيراعيش مشاعري، وممكن لو زنقت خالص ارد واستحمل الغتاتة عشان ما اضطرش اعمل الاختيار المرفوض بالنسبة لي،
مش عايز ابوخ لكن هي العملية قرار ونثبت على تنفيذه واكيد في تنفيذه حاجات هاتدايقنا، بس ده الطبيعي بتاع الدنيا ،كل حاجة لازم يبقى فيها مهموز صغير او كبير يضايق
احنا مش في الجنة :)

arsenalwy said...

حين يجرحني تصرف غير مقصود من شخص ما اتعمد اظهار اني لم انتبه لهذا التصرف حتى لا احرجه
وإن اعتذر هذا الشخص عن ما حدث ادعي اني لا اذكر الموقف اصلا !

كم انت مثاليه فى تصرفك هذا؟؟

بوست جميل دل على مكنون شخصيتك

blackcairorose said...

الصح فى رأيى هو أن ندرك متى يجب أن نكون أنفسنا ومتى يجب أن لا نكون

ليس الهروب من المرآة دلالة على عدم الثقة، ولكن التشبث بشىء خارجي ونحن نظن أن هذا التشبث يمنحنا الثقة هو فى رأيي ليس السليم، وذلك سواء كان هذا الشىء هو النظر فى المرآة أو تحاشي النظر فيها

عرفت زميل تماما مثل الشاب والفتاة اللذين تتحدثين عنهما، ولكني وصلت لقناعة أنه يفعل ذلك غير متعمد بل أنه فى الحقيقة ينسى أنى كنت صاحبة الرأى الذى يعلنه الآن ويدافع عنه كأنه رأيه الأول فى حين أنني فى واقع الامر من أقنعته به، الدليل أنه كان أيضا يحاول أحيانا أن يقنعني بتنبي الرأي الذى سبق وأقنعته أنا به!!!!

أفهمك فليس هناك آفة الا وفي ذيلها حسنة قد تبدو غير مرئية والعكس أيضا صالح

عزيزتي

شكرا جزيلا لمرورك عندي والكلمات الأكثر من جميلة التي تركتيها

soly88 said...

ثلاث ثوانى كثيره امام المرآه
نحن لا نحتاج اليها
اكره التليفون المحمول والعادى
لا أحب ان يقتحم احد خلوتى بمجرد ان يطلبنى على التليفون
نحن لا نجرح احدا وياريت محدش يجرحنا
فلبكرر الآخرين اقوالنا
نضايق فى الاول شويه ثم نكتشف انهم فارغون
نحن راضون عن انفسنا فلاشىء يهم
نحن ابناء اللحظه وليس فى هذا ما يعيب

عاقلة علي ارض الجنون said...

تشبهيني كثيرا

سمكه واحده said...

ده انا شكلي كده هبقي زي الاتنين اللي ضيقوكي
انا زيك في حكايه القبلات ولون هما بيقولوا اني شبه جدي الله يرحمه مكنش بيحب يبوس حد وانا مبحبش ابوس كتير صحابي طيب منا بشوفهم علي طول بحس بملل وبكتفي بابتسامه وبزهق من القبلات

بالنسبه للكدب فانا كدااااااااابه جدا اه وربنا الكدب العبيط بس اسمه كدب لازم اكدب
بس لما بحب حد بتأثر بيه جدا وبفكره واشخصيته غصب عني مش تقليد
بوست ممتع
تحياتي

Founoon said...

ليث

صعب عليا اوي اني اجرح او احرج حد
الاسهل عليا فعلا اني اكذب
دا غير ان في ناس تيجي تحرجهم يحرجوك اساسا 

منور

Founoon said...

arsenalwy

اسعدتني انك شوفتها مثالية ..احيانا انا بشوفها جبن
اشكرك جدا على رد

Founoon said...

blackcairorose

كلماتك اضافة قيمة للموضوع بجد
اعجبت جدا بوجهة نظرك في النقاط اللي ذكرتيها حقيقي

اشكرك

Founoon said...

soly88

كلمات مختصرة في الصميم

اشكرك بجد

Founoon said...

عاقلة علي ارض الجنون

لا حظت بقوة
انا لما بقرأ خواطرك بحس ان انا اللي بتكلم وبتصيبني حالة من الذهول فعلا :)

Founoon said...

سمكه واحده

طبيعي ان يتشابه البشر في كثير من الصفات والطباع والاراء

اللي مش طبيعي لما تلاقي حد رأيه ماكانش كدا اساسا وقرر ياخد رأيكويتعامل معاه على انه رأيه

كلنا بنتأثر بالناس بدرجات
بس انا بحس ان اللي بينتحل شخصيةحد ما بيبقاش متأثر بيه اساسا ..مش اكتر من انه شاف ان الحاجة دي بتعجب الناس فقرر يبنسبها لنفسه !

اشكرك

سمكه واحده said...

لالالا متفهمنيش غلط لا والله خالص انا بهزر انا اصلا احب لكل شخص او انسان شخصيته المنفرده طبعا انا اقصد في احيانا من كتر حبنا لشخص معين غصب عنك بتحبي كل حاجه فيه وبتالي بردو من غير ما تقصدي بتبقي زيه
بس مش قصدي حاجه انا بكره الشخصيه اللي بتقلد او تبقي تابعه
تحياتي ليكي ارجوا متفهمنيش غلط
دمت بخير

ليث said...

فنون
يبقى العملية مفاضلات
انا عن نفسي يتدايق جدا لو اضطريت احرج حدا وبحاول اتهرب بأي طريقة ماتجرحهوش ، وبنجح في اغلب الاوقات، لكن لو في حد اصر انه مايفهمنيش وفضل يضغط عليا ، هنا لازم افاضل بين امرين ، الاول اني اقوله حاجة ممكن تحرجه (ودي حاجة مكروهة جدا بالنسبة لي)، التاني اني اكدب (ودي حاجة مش موجودة في القاموس)، فاهضطر الجأ للبديل الاول رغم اني كارهه عشان مش وارد اني الجأ للبديل التاني.
كل واحد لازم يبص للبدايل الموجودة ويختار اللي هو شايف انه صح ........صح؟؟ (:

dr_samarmar said...

فنون

انتى باللى بيزعجك فيكى باللى بيعجبك فيكى كلك على بعضك كدا بجد

شخصية جميلة أوى .... بالنسبة لموضوع الكدب بقا لأنه لفت نظرى أوى و دا لأنى لسة كنت بفكر فيه قريب

فدى للأسف حقيقة ... مفيش حد مابيكذبش :(

Founoon said...

سمكة

لا يا قلبي انا مافهمتكيش غلط انا اسفه اذا كان ردي هو اللي اتفهم غلط

منوراني :)

Founoon said...

ليث


صح :)

Founoon said...

سمر

احرجتيني اوي بذوقك بجد اشكرك جدا