Saturday, June 06, 2009

بعد ما أنفض مولد سيدي أوباما وطلعنا بلا حمص






حليوة وعنده كاريزما




بادي لانجويدج مافيش أحسن من كدا




ها وبعدين ؟
مش عارفه ليه ناس متضايقة من الخطاب ..وبردو مش فاهمه خالص ليه ناس مبسوطة منه


أنا
indifferent


تماما
ماكنتش مستنية منه حاجة ..وهو فعلا ما اضافش حاجة لانه ببساطة مش مطلوب منه اصلا يعملنا حاجة




الراجل امريكاني..رئيس امريكا ..شغله واكل عيشه يخدم مصالح امريكا
خطابه الموجه للعالم الاسلامي هدفه الاساسي تحسين صورة امريكا اللي دمرها بوش تماما
هدفه تبرير اللي بيحصل في العراق وافغانستان وفلسطين
في ناس بتقول على الأقل خطوة كويسة من امريكا انها تبرر افعالها لانها طول عمرها ما بيهمهاش
أهو دا بقى مجد شخصي بيبنيه معجزة زمانه باراك أوباما
كلمنا بلغتنا ..بطريقتنا ..باللي بيعجبنا ومجد في الإسلام والحضارة الإسلامية وفضلها على البشرية واستشهد بالقرآن ( ودي من اكتر الحاجات اللي مش عاجباني كانت اوفر ومبالغ فيها كان كفاية مرة واحدة على أقصى تقدير انما شحاته العواطف دي كانت مستفزة فعلا )
وواضح انه عجب ناس كتير
وفي ناس بتقول اما نشوف ايه اللي هيحصل ؟ ايه اللي هيحصل مثلا ؟ هو قال ايه اصلا احنا مستنيينه يتحقق
الراجل ماقالش حاجة ..ماقالش حاجة خالص ..دا لعب السنيورة
طيب لو كان قال حد يقولي قال ايه معجزة مثلا ومستنينه يتحقق ويتحول من اقوال لافعال ؟
واللي متضايقين ..متضايقين ليه ؟! الراجل قال اللي عنده وشكرا ومشي ..ايه اللي حصل ؟! دا غير ايه من اللي احنا فيه ولا ممكن يغير ايه ؟ أضاف ايه ؟ أساء في ايه ؟ ولا حاجة ! خطابه كله ولا حاجة

ليه ردودالافعال المبالغ فيها سواء سلبا او ايجابا
يعني عايزين منه ايه ؟ ليه متصورين انه هيعملنا حاجة ..هو اصلا مش مطلوب منه يعملنا حاجة
خلينا موضوعيين شوية ..مين دا اساسا ؟وقال ايه وقاله ليه واستفادنا ايه أو خسرنا ايه
بناءا عليه نتعامل مع خطابه
بلاش العاطفية الغير مبررة المبالغ فيها
ردود الأفعال في مجملها اوفر
سواء اللي فرحانيين او اللي متضايقين
الموضوع في رأيي مش مستاهل
ليه التصفيق الحار بين كل جملة والتانية ..لا والراجل بيعمل Pause بعد كل كلمة عايز الناس تصقف فيها والناس فعلا تقوم تصقف ..كل التصفيق كوم والتصفيق اللي بعد كلامه عن القضية الفلسطينية والاسرائيليين المساكين كوم تاني
دا كان اسوأ حاجة اتقالت في الخطاب اساسا وعلى الأقل رد الفعل كان لازم يكون السكوت التام مش التصفيق بحرارة
وليه الهتاف اللي في الأخر ؟ هي الناس فاكرين نفسهم في حفلة تامر حسني ؟!!!!
على النت ردود الافعال في مجملها ضد الخطاب
في الواقع اللي قدامي ردود الأفعال في مجملها منبهرة بالخطاب
وبين دول ودول أنا


indifferent

سؤال جانبي : الفنانيين دول كلهم كانوا بيعملوا ايه هناك ؟ يعني سفراء النوايا الحسنة مفهوم ..انما ابطال عيال حبيبة وخليج نعمة والشياطين الخمسة وفنانيين لا عندهم قضية ولا موقف ولا حاجة راحوا يعملوا ايه ؟




19 التعليقات:

Unknown said...

اللي متضايقين متضايقين من ردود افعال الناس اللي، لا مؤاخذة، هايجة بطريقة مرضية
وييييييييييييي لاف يوووو اوباماااااا

وفي الاخر يصوتوا: اوباما اوباما اوباما

مذيعة امريكية بتقول: انا مافهمتش هم بيعملوا كده ليه؟

وواحد تاني طلع يعلق ويقول: نصب عليهم زي ما نابليون نصب عليهم قبل كده

كده
وش

Fatma said...

انا كمان من الناس اللي متضايقين من ردود افعال الناس

وي لاف يو اوباما دي خرا خرا مالهاش اي معنى حسسوني انهم في حفلة مطرب بجد

انا بتكلم على الناس اللي متضايقين من الخطاب ذات نفسه
هما كانوا مستنيين ايه ؟
مين قالهم ان دا صلاح الدين الايوبي

ليه مستنيين منه حاجة اصلا
هو مش مطلوب منه حاجة عشان نستناها اساسا

انما الضيقة من ردود الفعل دا لازم لان ردود الافعال كانت فعلا اوفر جدا

منوراني يا نوراة :)

Romaya said...

حوالي 30 تصقيفه
العدد في اللمون يعني
كأن اوباما بيخطب شوية ويقول اللي بيحب النبي يصقف
او واحد شايل يافطة وبين كل فقرة وفقرة في الخطاب يرفعها وتصفيييييق
شعب يهيص في الهيصة فعلآ !

زيارة اوباما لينا أو –تشريفه زي مابيقولوا- ماهي الإ مجرد كلمتين حلوين متغلفين في خطاب مرتب
وشيك ومعروف محتواه إيه

الفكرة هي الراجل حّب يعيد فكرة إن أمريكا هي السلام وبتحب السلام وطوبه للسلام –يا سلام-
وخصوصا بعد اللخبطة اللي حصلت قبله وتقديم أمريكا على يد بوش على طبق من صفيح من حيث اقتصادها
وصورتها قصاد الاعلام – ودا اللي اتركز عليه في خطاب اوباما-

فا حّب يبتدي بمصر ام الدنيا ومنها
ونكمل المسيره ..
وأهو منها برده يبقى الراجل اتبع اسلوب ادينا قدمنا السبت ....

اللي فاقع مرارتي اوي اللي يقولي دا استشهد بأيأت من القرأن !
طيب افهم بس الرجل جاي يخاطب العالم الاسلامي يعني افتكر انه مقالش هيخاطب شوية يهود
فا أكيد يعني هيذكر جزء ولو بسيط من دين الناس اللي هيخاطبهم!!

ولا الإ الامن ... المكان اللي ساكنه فيه كانت متحاصره حدوده كلها اللي يخرج براها يتقفش من قفاه
ويتفتش .. صدقوا فعلا لما قالوا المكان كله محاصر واللي هيتحرك من مكانه هنضرب في المليان !

بالنسبالي مش فارق اوباما من غيره
سواء هو او غيره ميهموش غير مصلحة بلده ورجوع قوى بلاده واقتصادها للأحسن من جديد
قصاد شعبه والميديا كلها

لكن احنا بقى كل مدى وبننهار وننزل لتحت اكتر وفرحانين اوي باللي احنا فيه بل كمان ومنتظرين مين يشدنا لفوق ويدينا المعونه بتاعة كل سنة

وبالنسبة لسؤالك يا فاطمة ليه الفنانين دول بالتحديد كانوا هناك ؟
عشان زي ماقولت احنا شعب نموت في الهيصة
ومنها برده انها لفتة جميلة وعظيمة منهم انهم في استقبال الرئيس الامريكي والصورة تطلع حلوة :D

وبعدين هي جات على دول يعني
ما الكل كان مدعو من شيوخ لمعارضه لوطنيين الا الشعب هو الوحيد اللي مجاش

Maga said...

يا جماعة شعبولا لخصلكم الحكاية وبسطها اوى انا مش عارف انتوا ليه معقدنها كدة
شوفوا شعبولا قال ايه

من جامعة القاهرة ومهد الحضارة مصر، سمعنا باراك أوباما بيقول خطاب العصر.

علشان مصر الزعيمة اختارها لكلمته، وفاهم قيمة مبارك ومقدّر خبرته.

الكل قاعد منتظر أوباما هيعمل إيه، عايزين تفاؤل حذر منتكلش عليه.

الناس فى كل الأماكن بيقولوا أحسن من بوش، وباينه كويس لكن أنا برضه مضمنوش.

كويس مش كويس عايزين يبقالنا دور، وبلدنا فيها ريس فاهم كل الأمور.

يا عربى لم شملك يا عربى كفاية نوم، دى فرصة مش هتيجى ولا تحصل كل يوم.

متفتكروش أوباما ويّاه خاتم سليمان، هيقول افتح يا سمسم تتفتح البيبان.

لا نبالغ ولا بنقل من حبة السلام، ويا ريت يقدر يحل ميكنش بس كلام.

أصل الكلام كويس والناس بتقول جميل، بس إحنا اللى بيعجبنا بيتعب إسرائيل.

لو كان فعلاً كويس أكيد هيكرهوه، دول شر وكان عاجبهم سياسة بوش وأبوه.

عاملين زى الشيطان بيزِنِوا كتير كتير، ملهمش أمان وعالم مبيحترموش كبير.

أوباما كان خطابه للعالم أجمعين، للأمة الإسلامية ولصاحب أى دين.

بكرة الأيام هتثبت النية فيها إيه، لو خير كله هيدعيله ولو شر هندعى عليه.

فيه ناس مالهمش سيرة بيقولوا اشمعنى مصر، علشان مصر الكبيرة وصاحبة أغلى نصر".


العندليب الاسمر

شعبان عبد الرحيم

Jannah said...

اسكتي أنا بالمصري متغااااااظة

أولا فين مراته ؟راحت فرنسا و ما راحت مصر

ثانيا
الفنانين مافهمتش أنا فعلا و عندي نفس ملاحظتك
الظاهر انهم جايين بدعوات من وزارة الثقافة فاروق حسني عمره ما خلى حد نفسه فحاجة لدرجة اني طمعت أشوف شعبان عبد الرحيم باعتباره صاحب أشعار و أغاني سياسية أوفيفي عبده باعتبارها ذات شخصية عنيفة تشبه العنف الأمريكي
!!!!!!

عادل امام بصرف النظر عن نوايا حسنة و مادري ايش ليش قاعد في الصف السادس
!!!!!!!!!

الراجل اللي كان ينظف مناخيره و ظهر في الكاميرا و هو شكله شخصية يعني

الناس اللي لابسين بدل على كل لون و فيه ناس لابسين بلوزات و تي شيرتات
!!!!!!!!!!!!!
ناس خارج التاريخ يمكن

ولا الفوضى اللي حصلت في الخروج
الناس العاديين خارجين مع أعضا ء الحكومة مع الفنانين مع المشايخ و رجال الدين المسيحيين و بيرزعوهم كتف و زحمة عند الباب كأنه الحي الشعبي
مع انه المفروض في هذه المناسبات بيكون ترتيت في الدخول و الجلوس و ايضا في
الخروج

منظر مو بحلو بالمررررررة


أما محتوى الخطاب بالنسبة لي أنا أيضا فهو فارغ و تقليدي الفرق الوحيد انه أوباما استخدم لغة أمريكي مثقف مو بالأمريكي العادي الجاهل يعني يعرف يعطيك الكلام اللي يعجبك حتى يجعلك تسمعه في حين انه ما تسمع ليس جديد و لا أي شي

وفعلا مثل ما انت قلت مو مطلوب منه شي أصلا شغلته أمريكا و هو قايم بها

Here i'm said...

على فكرة .. مراته قالت أنها مش حتقدر تيجى مصر و انها كانت متشوقة لزيارة الاهرامات بس ظروف امتحانات البنات خلتها متقدرش تسافر مع اوباما :D

بالنسبة لترتيب الصفوف .. منظمين الحفل كانوا مرتبين المقاعد و كل دعوة عليها رقم المقعد .. بس السفارة الأمريكية طلبت أن الدخول يكون من غير أرقام و اللى يجى بدرى يقعد قدام ... علشان التيارت المختلفة متعملش شاكل لما يبقوا جنب بعض ..


مصر شرفتنا اليوم دا .. القاعة تحفة .. و الحمد لله لم تبنى حصيصا لأوباما :D
الامن شرفنا كمان .. كان فى ناس كتير قاعدة بتاكل فى ضوافرها و بتتمنى حاجة تحصل فى اليوم دا ..

الحاجة الوحيدة اللى عرتنى .. ان الريس مرحش أستقبله و كان باين جدا انه تعبان خالص

الرد التانى حيبقى عن الخطاب :D

Here i'm said...

مش ذنب أوباما بيه ان فى ناس قاعدة مستنية منه أنه فى خطابه حيقولهم يا حلوين يا طاعمين خدوا القدس .. و كمان حضربلكاو أسرائيل .. انتوا ولاد حلال و تستاهلوا كل خير ..

ما تيجى نفتكر زمان ..

زمان السادات قال حروح أخر العالم .. و راح اخر العالم .. و أوباما قال حروح العالم الأسلامى .. و راح العالم الأسلامى .. فى خطابه السادات دغدغ المشاعر و العواطف بكلامته الرنانة .. و كامن اوباما عمل كده .. السادات أستشهد بأيات و أستشهد من الانحجيل و التوراة .. و أوباما عمل كده

السادات لما راح و قال سلام .. كان لسه ضارب أسرائيل بالجزمة .. أسرائيل قالت .. دا كلام فارغ و كلها شعارات .. الخطوة اللى بعد كده كان كامب ديفيد

أوباما لما جاه و قال سلام و عدل و حقوق .. المسلمين قالوا كلام فارغ و شعارات .. تفتكروا القصة حتنتهى نهاية السادات

ولا المشهد الاخير هوا اللى حيسبق مشهد كامب ديفيد .. أفتكر اللى حيغتال أوباما هوا أمريكى خالص .. و حيكون مشهد الموت سابق مشهد الأتفاق

Here i'm said...

أمثال أوباما و السادات .. بيقتحموا مشاكلهم .. أوباما لو مكنش جاه و الله ما كان حد شتمه ولا حد قال عنه كلمة وحشة زى اللى سمعها و هوا هنا :D

أحنا بنتفاجأ و رد فعلنا بيبقى بايخ جدا لما نلاقى اللى بيقتحم مشاكله و بيواجها و بيروحلها لغاية عندها .. احنا اخدين على اللى يسيب المشكلة للى بعده و مش بنعمله حاجة .. زيه زى غيره ..

أوباما قال و عاد و دغدغ المشاعر .. بس كده احسن ولا أنه يطنش أحسن ؟؟؟


تفتكروا لو أبو مازن و لا لو كان عرفات .. ذهبوا لأسرائيل كان حيستمر الوضع على ما هوا عليه .. ؟؟

تفتكروا لو كان عرفات أيام زيارة السادات كان عنده بعد نظر .. كان زمان الحال هوا الحال ؟؟؟


اللى متأكد منه .. أننا حنزهق أوباما .. و لو أوباما ضغط على نتنياهو علشان يقعد فى طاولة مفاوضات .. النتن حيتحجج بأن مفيش طرف فلسطينى أقعد معاه ..

قولولى صحيح .. لما أحب أكلم شعب فلسطين أكلم مين ؟؟

Yasmine said...

i'am home :D
انا بقى من اللى جالهم احباط من ام الخطاب..مش عشان كنت مستنية حقن ديمقراطية ولا معلقتين حرية و مفتاح المسجد الاقصى..بس عشان كنت متخيلة انه بذكائه و كاريزمته هيقدر يضحك علينا بطريقة اذكى من كدا شويتين

على اى اساس يطلع رئيس اقوى دولة فى العالم يقول خطاب للعالم الاسلامى يقعد اول ربع ساعة فيه بيسمع كلام خدناه فى تانية ابتدائى؟!

و على اى اساس يقول ان دوره انه يغير الsyereotype المتاخد عن الاسلام؟ نعم بقى..على اساس انه قاعد مع هنادوة مثلا؟؟دوره بامارة ايه يعنى مش فاهمة بجد

و قال ايه بيتكلم عن الاقليات المضطهدة فى مصر..كان مش كفاية علينا اقباط المهجر يعنى

انا كنت مستنية اسمع خطبة شبه خطبة السادات فى الكنيست كدا..او على الاقل كلام يدخل العقل عن حاجات ناوى يعملها بجداول زمنية متحددة..حتى لو ما اتعملتش بس يبقى على الاقل قال هيعمل ايه مش ساعة الا خمسة من اللوك لوك المتواصل و تلوين الكلام و اللعب على مشاعر الناس بكام اية من القران

اخر حاجة كنت اتخيلها ان افتتاح زارا فى مصر يكون حدث افيد من اول زيارة لرئيس امريكا الجديد..بلا وكسة

بس شعبولا دا بيقول كلام زى الفل والله :D

Here i'm said...

يا جدعان .. انا غلبت مع البنت دى .. جمع هندى .. هنوووووووووووووود يا حاجة

مش هنادوة :D

سيبك سيبك .. you are home :D

و بعدين انا شايف الراجل عمل اللى عليه .. مكنش ينفع يقول خطاب شبه السادات علشان السادات راح علشان قضية واحدة و بس

أوباما جاى و الملف العربى الأسلامى طويل ... و بان فى خطابه .. بيتكلم عن الأسلام و الأديان و باكستان و أفغانستان و عن الديمقراطية و الأضطهاد و الحجاب .. و بالتالى لازم يكون عام و مش مركز

لو حد سألنى تقييمك ايه لخطاب اوباما .. حديله 9 من 10 ..

لأنه ببساة فى حاجات كتير على هامش الزيارة بتدل على أنه ناوى خير

الرئيس الامريكى الوحيد اللى جاه المنطقة و معداش على أسرائيل .. الريس الامريكى الوحيد اللى جاه عندنا و أسرائيل كانت بتسمع الخطاب و مهتمة أكتر مننا بسبب انها مش عارفة المصيبة دا حيعمل ايه

الرئيس الأمريكى الوحيد اللى جاه عندنا و أحترمنا .. دا بوش أخر مرة لما طلع يقول خطابه فى دافوس .. مبارك مشى قبل الخطاب علشان عارف انه سمج و جلياط

انا شايف ان الكرة فى ملعبنا .. كنت اتمنى ان يتم عقد قمة عربية طارئة لبحث سب تفعيل الخطاب .. أوباما جاه عندنا و قالنا انا شوطت الكورة .. المفروض نجتمع كلنا على رجل واحدة و نحدد مطالبنا و توجهتنا و نبعت وفود لطرق الأبواب و فتح صفحات جديدة و نشوط فى وشه الكرة تانى و نجيب 22 جون بعدد الدول العربية

بس للأسف طول ما فى أمثال قطر فى اللعبة و امثال بشار بتاع المقاومة و هوا عنده 2 متر مش عارف يحررهم .. يبقى لا قمة ولا بتاع و نقضيها كل واحد يقول رأيه


داليا مجاهد .. قالت لعمرو أديب .. ان مفيش ولا حد بيسأل فيها من الخارجيات العربية و لا بيتواصل معاها و لا أى بتاع و أنها بتتمنى يكون فى تواصل

Fatma said...

مروة

انا مش تاعبني غير ان في ناس انبهرت ب ال ولا حاجة اللي قالها

هننسحب من العراق هييييييييييييييييييييه تصفيق رهييييييييب

في 2012

لا والنبي ؟!

والناس تصقف

افغانستان كخة وضربت برجين وانا عارف الاسلام الكويس ودول تشويه للاسلام

لا يا راجل
هتنضف الاسلام مما علق به من شوائب يعني

والناس تصقف

لازم نوقف الاستيطان
هييييييييييييييييييييييييه

واعو حد يفتكر ان علاقة امريكا واسرائيل هتتأثر واليهود غلابة وياما عانوا وكفاية الهولوكوست وحماس لازم تفهم ان قتل الاطفال والعجائز غلط

والناس تصقف !!!!!!!!!!!!

هما افتركوه بيتكلم بالعكس ولا ايه

اسكتي يا مروة انا فعلا مفقوعة

قال ايه الراجل اصلا

والناس تقولك نستنى نشوف

نشوف ايه

هو قال ايه عشان نشوفه اصلا

Fatma said...

احمد
هئ هئ هئ هئ

ما اتعزمش ليه ؟

على الاقل عنده مواقف سياسية

مش احسن من شريف منير بتاع
وي لااااااف يو اوبااااااماااااااااااا

Fatma said...

جنة

مراتع قاعدة بالعيال :)

انا ضحكت ضحك يا شيخة

لعلمك شعبان يمكن وجوده يكون مبرر اكتر من اللاشيئ اللي اتعزموا

شريف منير وغادة عادل ولبلبة وعزت العلايلي وليلى علوي ووووو

مين دول

يالهوي انا ماشوفتش اللي كان بينضف مناخيره

اخس

لاحظت موضوع اللبس مش فاهمه هل الدعوةماكانش مكتوب فيها درس كود ولا ايه

دا حفلات الاوبرا الناس بتبقى لابسة احسن من كدا

!!!


الخطاب زي ما قولتي فارغ

Fatma said...

كوبري

مصر شرفتنا آه الى حد كبير من انجح الحاجات اللي اتعملت عندنا ونسبة المهازل فيها كانت اقل من المعتاد بالتأكيد

القاعة حلوة ومتوضبة كويس

انا ما تضايقتش ان الريس مارحش استقبله في المطار واكتفى باستقباله في القصر عادي ماشوفتهاش عيبة بصراحة

سادات ايه بس يا محمد لا في فرق وفرق كبير كمان
اقرى مقال ابراهيم عيسى بتاع اسمرنا اجمل من اسمرهم
هو اي نعم السادات بردو كان نصاب وبتاع 3 ورقات وفين السنيورة زي اوباما بس كان اصيع بكتييييير
دا غير ان رد فعل الاسرائيليين على خطاب السادات ماكانش حب وغرام وهيام زي ردود الافعال على خطاب اوباما
يعني الاسرائيليين ماكالوش بالكلام ..مش زيينا

لما تحب تكلم شعب فلسطين تكلم العائلات اللي مافيش واحدة فيهم ماعندهش شهيد
تكلم امهات الاطفال اللي بيموتوا كل يوم
تكلم شباب زي الورد بالرغم من كل الظروف بيقازم ولسه عنده امل
هما دول اللي تكلمهم

Fatma said...

فلة

لا ما تقلقيش قدر يأثر في ناس كتير
انا لولا اني تجاهلت الكاريزما بتاعته وركزت في الكلام كان زماني بردو بقول وي لاف يو اوبااااما

انا ضايقني جدا حكاية الاقليات دي
طلعت اوت منه
انا ماتوقعتش ابدا يتكلم عن مشاريعه للمستقبل بجداول زمنية
كنت عارفه ان الكلام كان هيبقى رغي فارغ وكلام حلو وخلاص
مش هيلزم نفسه بأي حاجة
ولا هيوعد
زارا اكيد افيد

Fatma said...

كوبري

مقال ابراهيم عيسى بتاع اسمرنا اجمل من اسمرهم عند نوارة جبهة التهييس الشعبية

اقراه

leeno said...

من فترة و انا عايزة ارد في الموضوع دة و بجد مطحونة في الشغل جداااااااااااااااا

عزمي بشارة بعد الخطاب قال جملة حبيتها اووووي

هو اوباما خلفنا و نسينا؟ ؟

الصراحة عنده حق

يعني اوباما رئيس الولايات المتحدة الامريكية اللي بعييدة عنا كتييييييييييييييير

مش رئيس حكومة العالم و احنا مسؤولين منه

ممكن نكون متوافقين معاه في بعض وجهات النظر و مختلفين فبعضها

ممكن نرضى عن سياساته الخارجية او نرفضها

لكن مش مطلوب منه يحللنا مشاكلنا لا الداخلية و لا الخارجية

كل الموضوع انه بيتبع سياسة حضارية عن العاهة البشرية بوش اللي مبيفهمش غير الغطرسة و الحرب و دة ميخليش اوباما ملاك و لا الحارس المنقذ للعرب و العروبة و الاسلام

كل اللي عجبني في الخطاب فكرته
انه فكر ياخد خطوه في طريق تغيير اسلوب تعامل امريكا مع العالم العربي و الاسلامي

و انا بحترم فيه انه بيآمن بالخطاب و الحوار (هل بنتفق او بنختلف على مضمون الحوار و اهدافه و نتايجه مش موصوعنا مع انه وارد )

كل اللي غاظني بقى
التوقعات المهوووووووووولة من سيدي الشيخ اوباما (على اساس ايه طيب؟)

و اللي فرحانين و مهللين اووووووووووي (على اساس ايه طيب؟)

و اللي عملوا منه عدو الاعداء على اساس ايييه برضه؟

كان متوقع منه يستشهد بالقرآن و كان متوقع منه انه يستخدم الاسلوب اللي استخدمه

لكن الخطاب بكل ما فيه مجرد خطاب ...كلام

كان في منه كتير كلام كويس بس في الاخر كلام

و على العموم اهو تغير في سياية امريكا في الكلام

اخبار الفعل اييه الله اعلم

و لو اني حتى الكلام مش شايفة فيه حاجة اتغيرت غير التزويق يعني

بس هما الناس اللي كانوا بيسقفوا كانوا عاملين بروفا حيسقفوا ايتا و لا انا بيتهيألي


وحشتيني

leeno said...

نسيت اقللك على حاجة تهلس من الضحك اكتر

بعد خطاب اوباما في صحفي امريكي يميني

جنابه اكتشف اكتشاف مهوول الخطورة الا و هو ان اوباما مسلم و يخفي اسلامه و انه مؤمن بالاسلام

و انه كمان تصريحاته موافقة لمبادئ الاخوان المسلمين و ليس مستبعدا انه واحد منهم

مدسوس يعني
هههههههه

Anonymous said...

بس أنا كنت فرحانة بيه قوي :)

إنتي عاملة ايه :)