Sunday, June 07, 2009

ماذا حدث للبني آدمين

ماشية في الاتوستراد من ناحية سيتي ستارز متوجهة الى شارع الطيران الساعة حوالي11 بالليل
الاتوستراد زحمة جدا فوق الوصف
والعربيات كلها بتمارس هوايتها في الحك والتزنيق
انا واقفة في الصف بتاعي سرحانه تماما وفي فراغ صغير بيني وبين العربية اللي قدامي
اذ بي افوجأ بواحد داخل من يميني ومصر يحشر نفسه عشان يملى الفراغ اللي قدامي
طبعا عربيتي وعربيته حكوا في بعض
مجرد حكة بسيطة عادية
زمرت ورحت موسعة وطلعت قدامه
لاقيت بني ادم منهار ..لا منهار دي كلمة تافهة
زي ماكون شتمته بالأم مثلا
كلاكسات وتشويح وصريخ واللي فهمته يعني انه عايزني اقف على جنب !
تجاهلته تماما وكملت طريقي ..طلع يجري ورايا والشارع اساسا مش متحمل جري لأنه زحمة جدااااااا
وبيحاول بجهد جهيد يكسر عليا بأي شكل وانا بنفس برودي وتجاهلي بطلع منه واكمل طريقي
شباكي مقفول واللوك بتاع العربية مقفول لأن دي احتياطات امنية لازم اي واحدة بنت تتبعها وهي ماشية في شوارع القاهرة
المهم ..فكرت اخلص منه فاديت اشارة شمال وقلت ادخل عباس العقاد
لاقيته مدي اشارة شمال ولازق فيا وداخل ورايا !!
وبردو نفس الانهيار اللي في ملامحه شايفاه من مراية العربية
غيرت رأيي وقررت اكمل على طول
في اللحظة دي واضح انه فقد اعصابه تماما
الشارع بيوسع شوية في المنطقة دي والعربيات بتقل نظرا لان الاغلبية بيلفوا عشان يدخلوا عباس العقاد
لاقيت فجأة واحد بيقف بعرض الشارع قدامي وبينزلي وبمنتهى الانهيار بيفتح باب عربيتي
زي ما قلت ..انا قافلة اللوك فباب العربية ماتفتحش معاه
رجعت ورا شوية عشان اعرف اطلع منه
لاقيته بكل القوة اللي ادهاله ربنا بيرزع بايديه الاتنين على شباك عربيتي من ناحيتي وبيصرخ بهستريا
اقفي بقولك اقفي
مشيت وسبته
وفضل يجري ورايا بنفس ذات الانهيار العصبي
لحد ما فجأة بردو مالاقتوش ورايا ! ماعرفش فعلا ايه اللي حصل ولا غير رأيه ليه ولا ناوي على ايه

أنا فعلا اعصابي تعبانة من ساعتها .. دا هو الغلطان اصلا وأنا مافرقليش
يعني لو مثلا الباب اتفتح معاه وانا ماكنتش قافلة اللوك كان هيعمل فيا ايه ؟
طب لو القزاز اتكسر وهو بيرزع عليه بالشكل الهستيري دا وأنا شباك عربيتي اصلا مش شباك دا بلكونة
يعني لو اتكسر في ايده كان زمانه قاعد معايا جوا العربية او شايلني مطلعني براها بمنتهى السهولة
ازاي واحد يفكر يعمل كدا في الشارع ! ومع واحدة بنت !!
وزي ما ذكرت بردو دا شارع كبير وزحمة
هو ليه ماحدش حاول يتدخل ؟
ايه اللي كان مطلوب مني اعمله ؟
انا من كتر الصدمة ما بصيتش في وشه ولا شفت نمرة عربيته
أنا فعلا عندي ذهول
نسيت اقول انه كان معاه بنتين في العربية ! طيب مش خايف عى منظره قدامهم ..
أنا لو راكبة مع واحد وعمل كدا في واحدة هسيب العربية وانزل ومش هعرفه تاني
إيه البلطجة دي
أنا فعلا حاسة ان أعصابي مهزوزة جدا من ساعتها
الناس دي مطلوقة في الشوارع ليه ..دول مكانهم مستشفى الأمراض العقلية أوعلى الأقل مصحة للأمراض النفسية
دا لا يمكن يكون انسان طبيعي سوي ايه كمية الفراسترايشن دي ..لا يمكن يكون بني ادم اصلا في اللحظة دي فكرني بجد بمصارعة التيران

لا حول ولا قوة الا بالله ! الناس جرالها ايه

42 التعليقات:

... amr said...

انتي رعبتيني و الله .. بس لما وصلت للجملة اللي بتقول ان كان معاة بنتين في العربية فهمت هو عمل كل دة لية
اللي عملتية صح .. عارف ان حد ممكن يعترض عليا و يقوللي لآ المفروض ان انتي كنتي رديتي علية و الكلام دة .. بس من وصفك يبقى اللي عملتية صح

الرجولة مش كدة .. حتى لو الموقف دة حصل مع شاب زية .. مش دي الرجولة

ربنا يحميكي

مش عارف اقولك اية تاني

تفتكري اوبابا لية دعوة بالموضوع ؟
:)

Fatma said...

طب فهمني هوعمل كدا ليه
ايه علاقة البنتين
انا في رأيي ان بالذات عشان معاه بنات ماكانش المفروض يعمل كدا

منظره كان وحش اوي بجد

رديت عليه مين أنا فقدت النطق في اللحظات دي اصلا من هول الصدمة

كان ممكن لو رد فعله طبيعي من الاول وهادي كان ممكن جدا افتح شباك العربية ونتناقش في مين غلطان والله لو انا اللي غلطانة كنت اعتذرت

بس هو من الاول مش طبيعي ابدا ابدا بجد
انا مافكرتش لحظة اني اقف انا كنت حاسة اني لو وقفت هيمد ايده عليا وانا ممكن اموت فيها بجد لو جرالي حاجة كدا

انا لسه واقعة تحت تأثير الصدمة

Empress appy said...

اولا حمد لله على السلامه بسيطه جدا عمل كده علشان كسرتى عليه احرجتيه قدام البنات
انتى بس اللى بسكوته فيه ظابط الناحية التانيه فى عباس العقاد متلقح كنت نزلتى روحتى
بس انا معاكى فى الموقف ده اعصابك لازم تفك

Fatma said...

يارحاب انا فعلا كنت بدور على اي ظابط طول مانا ماشية مع اني ثقتي في الظباط معدومة بس قلت اهو اي حد يسندني

مالاقتش غير عسكري مرور اغلب من الغلب ياعيني طبعا لا فكرت اقف ولا اقوله حاجة
نزلتي مين

دا انا خايفة امشي على رجليا في الشارع بعد كدا
كان ممكن الف بس انا لما لاقيته بيلف ورايا قلت خليني على طول يمكن الاقي ظباط عند تقاطع الطيران ناحية رابعة غالبا بيبقى فيه
وبردو مالاقتش

يابنتي والله مش بسكوته هو فعلا كان مخيف
مش حاسة اني احرجته قدام البنات كان ممكن الموقف يعدي عادي

ايه يا اوختشي العقد النفسية دي
معقوله الفراغ الدماغي دا

انا اقتنعت بوجة نظرك في موضوع النافورة
ماجاتش على العيال اللي بتلعب بسلام
عندنا حاجات اهم بكتير لازم تتغير

Yasmine said...

طيب بالنوسبة للبني ادمة اللي كانت معاكي دي مش تكلميها تلحقك؟ :@ كنت صوت معاكي ولا عملتلي اي منظر.. عشان بس يبطلوا يقولوا اننا بنبالغ دا انا الخطوتين من بيتي للعربية بتبقي عيني في وسط راسي.. عندكو الناس بتبقي سكرانة تقريبا و عندنا جربي تحاولي تركني من غير ما تلافي عربيتين تلاته بيقفوا يشوفوا ايه النظام..حاجة تقرف بجد

Fatma said...

اسكتي يا فلة بجد انا اعصابي لسه مهزوزة والله

الناس سكرانه ليه ؟
دا حتى مافيش ولا
pub
ولا ديسكو ولا اي حاجة ناحيتنا اساسا
والحشيش ما بيعملش كدا

دا اكيد كان مستعطي حاجة جديدة يا اوختشي

والله يا ياسمين انا صعبانة على نفسي بجد

Empress appy said...

يا حبيبة قلبى
انا مقدره الموقف وازاى الظابط ميقفش فى عباس العقاد
بصى لما تشوفى اى واحد منهم هات ليه رقم الرتب بتاعته والنياشين وانا اروح اضربه لكى واقوله ازاى كده البنت تتخض وانت مش موجود
ولا يهمك يا قمر معلش المرضى كتير نسيت اقولك انا بقفل زيك كده بالظبط
بس انا لو عمل كده معايا
امممممممممم
مش هقولك هنزل ابطحه بقى
مش عارفه ممكن اعمل فيه يالا ربنا يستر

Fatma said...

والله يا رحاب انتي ما متخيلة منظره وهو بيرزع على قزاز العربية وبيقولي اوقفي بقولك اوقفي

يعني انا بسوق بقالي 11 سنة ما حصليش موقف شبه دا قبل كدا حتى في حوادث

الناس بتبقى منفعله وبتزعق آه بس دا فعلا حسسني انه هيمسكني يضربني بجد

يالا الحمد لله ربنا ستر

ربنا ما يحطك في اي موقف وحش يارب

TAFATEFO said...

!!!! هو عربية حضرتك شيفروليه؟

Fatma said...

يا سلام يا مصطفى

هو دا كل اللي هامك في الحكاية

لا مش شيفروليه يا عم

:)
ليه
؟

هو انت كنت في موقع الحدث ؟

Fatma said...

عربيته هو تقريبا والله اعلم هي اللي شيفروليه افيو

او يمكن حاجة شبهها
اكسنت او لانوس او فيرنا

من الصدمة ماخدش بالي غير انها حاجة في الكاتيجوري دي سيدان سودا

Jannah said...

لا حووووول
الحمد الله ع السلامة
مرة لما كان عندي 19 سنة تقريبا كنا طالعين من الامتحانات و تقريبا كانت الساعة 6 و الدنيا بدأت تظلم
و كنت سايقة و أتكلم مع رفيقتي اللي كانت معي عن الأسئلة و الخ و نسيت نفسي و ما فرملت عن الاشارة الحمرا و ضربت السيارة القدامي ضربة خفيفة
شقول بس: الرجل طلع و قام يصارخ و أنا أقوله نتفاهم يقولي جايبينلك سيارة كان مفروض يجيبولك مصاصة
و مراته معاه تسخنه
و لما أقوله سوي كوستا و جيب البوليس خلنا نخلص يقولي لا أبغى فلوس
و من سوء الحظ انه موبايلي كان فاصل شحن
وماعرفت أتصل و البنت اللي معي ما جابت موبايلها
و اللي يمر علينا يقوله سوي كوستا و خلي البنت تروح الشارع خطر و الدنيا ظلمت عيب
وهو مايسمع لأحد
منتظر أطلع فلوس من جيبي يمكن و لا مادري
و في الأخير تطوعت واحدة و عطيتني موبايلها اتصلت بأهلي و بس جا الوالد رحت
بس أعصابي خربت من الموقف
تصوري ليل و من غير موبايل و انسان عصبي يصارخ و يصعد في الموضوع

المهم انك بخير الحين الحمد لله و زين سويتي انك كنت مقفلة كل شي وواخدة احتياطاتك
أما الأمن مشغولين بحماية النظام مو بحماية المواطنين
يعني لا ترتجي منهم شي أصلا اذا ما عرفت تحمي نفسك ماحد بيحميك

Jannah said...

نسيت أقولك انه كان طالب فلوس ماكان طالب تصليح لانه عيد الأضحى كان على الأبواب و شكله عليه ديون أو مادري
فعملي ارهاب أنا
:D

Yasmine said...

يا بنتي كنتي كلمتيني بجد..ولا تصعب عليكي نفسك ولا حاجة من اسبوع تقريبا كنت عند المصل و اللقاح و لقيتلك سواق تاكسي قرر يلف فجاة و متوقع اني هخاف و اقف و طبعا دا ما حصلش عند اشارة بي تي ام لقيته نزل و عينك ما تشوف الا النور يختي بلاعة و اتفتحت بس ولا همني وحياتك..اساسا المفروض تكوني اتعودتي

TAFATEFO said...

أصل في حكاية اتحكتلي .. وافتكرت حضرتك صاحبتها

عموماً .. الحمد لله ربنا سلم

أنا في أ(و)سوان

عايزه كركديه؟

TAFATEFO said...

هو أنا عايز أسأل سؤال بس كنت متردد .. هو حضرتك مش شايله سيلف ديفينس؟؟

حنــان said...

السلام عليكم

حمدلله على سلامتك ..
الحمد لله مرت على خير و ربنا ستر..

هالضاهرة اصبحت موجودة بكل المجتمعات العربية..
و الغريب انها قاعدة تصير في وضح النهار وامام الجميع..
العنف الشديد.. و الامبالاة ولاّ ممكن الخوف و لا موش فاهمة انا .. الناس تعدي و لا ما تحاولش تساعد..

من ايام قليلة واحد اتهجم على مُدرّسة وسط المدرسة و وسط التلاميذ و اعتدى عليها بالعنف حتى قتلها .. و لا احد تدخل.. او حتى فكر يساعد ..
هي الناس مالها؟؟؟؟

كنت اتمنى اول تعليق ليا في مدونتك يكون في ظروف احسن .. على فكرة انا متابعتك و معجبة باللي تكتبيه..

حمد لله على السلامة مرة اخرى..
تحياتي ..
حنان من تونس..

Fatma said...

جنة
مريت بموقف شبه اللي بتحكيه ونزلنا واختلفنا وكلمت اهلي والموضوع انتهى
بس في فرق بين انفعال وهستيريا
دا بجد كان مصاب بالهستريا
انتي مش متخيلة منظره كان عامل ازاي والله فعلا انا متأكدة انه لو كان طالني كان ضربني
فعلا بجد مش ببالغ
يعني انا في الغالب جريئة وماعنديش مشكلة انزل واتفاهم
بس اصلا حتى هو اللي غلطان وانا مش عايزة منه حاجة
مافهمتوش بجد
في موقفك واضح طبعا هو عايز فلوس وخلاص اصلا ضربة خفيفة ورافض يروح البوليس يبقى عايز يستغلك وخلاص

صحيح كلامك اذا ماعرفتيش تحمي نفسك ماحدش هيحميكي

Fatma said...

فلة

انا اتعودت فعلا على قلة الادب والصريخ والشتيمة واللذي منه

بس تعدي بالضرب ماعداش عليا قبل كدا
لوتشوفي الرزع اللي رزعه على قزاز العربية
والله يا ياسمين كان هيتكسر في ايده بجد

اكلمك ايه بس دا رحاب بتقول عليا بسكوته امال لو شافتك
خلي الطابق مستور

Fatma said...

مصطفى

اولا بطل تقولي حضرتك
احكيلي لحكاية يمكن هي حكايتي بس اتحورت مانت عارف النظام
الحكاية على ما بتوصل بتبقى حكاية تانية اساسا

هات كركديه اه بحبه اوي مع ان ضغطي بيوطى اول ما اشوفه حتى من غير ماشربه بس بحبه
والكركديه الاسواني لا يعلى عليه ولا يقاوم
ترجع بالسلامة ان شاء الله

لا مش شايلة سيلف ديفينس
شيلته زمان فترة وبعدين لاقيت انه مالوش داعي اوي ما بمشيش على رجلي في الشارع كتير
وبعدين اعتقدت ان الدار امان والواحد طول ماهو في حاله مافيش حاجة هتحصل
وقلت بيني وبيني اني مش هتجيلي الجرأة استخدمه واحس اني بأذي حد بيه

بس وحياتك انا من هنا ورايح همشي بساطور مش سيلف ديفينس

Fatma said...

حنان

اشكرك على ذوقك والله بجد من قلبي
العنف عمال بينتشر بشكل مريع في مجتمعاتنا
الناس على صفيح ساخن زيادة عن اللزوم
واصبح في استسهال في استخدام العنف البدني بشكل فعلا مخيف

The Seagull said...

ماذا حدث للبني آدمين؟

ببساطة ماعادوش بني آدمين :))

الله يكون في عونك فعلاً في الموقف ده .. مش عارفة أنا لو كنت مكانك كنت عملت ايه بجد .. مش بعيد كان يغمى عليـا الحمد لله إني مش باسوق السيارة ولا عايزة بصراحة :D

ReEm said...

يا بنتي انتي الحمدلله على سلامتك بجد

ده موقف لايمكن ايه ده الله يلوم اللي يلومك لازم نفسيتك تكون سيئة الوحدة من معاكسة زايدة بتخاف و نفسيتها تتعب كيف واحد مجنون بالطريقة دي
اذا انا اللي بقرأ الموضوع والله اتخضيت و مش مستوعبة عالم زي دي امال انتي اللي حصلك الموقف ازاي

تصدقي اتمنى اليوم قبل بكرة يعتقونا و نسوق بس خوفتيني اذا السواقة بتكون كدة مش عايزها تغور

حمدلله على سلامتك و الله يحمي بنات الناس من الاشكال دي يا ساتر

nA3'oUm HaNeM said...

فنونتي سلامتك يا بطتي :$

اقلك حاجه انا اموت و لا حد يقطع قدامي دماغي بتبقى جزمه و لازم ارد كرامتي و اقطع قدام الي جه قدامي
مره و انا سايقه و السراعه 40 و انا اول مره اسوق ببطئ مش عارفه ليه
مش لقيت لك غير واحد سايق شاحنه كبير متحمله بضاعه و قاطع قدامي
قمت اسرعت شويه و قطعت قدامه
قام ساق بسرعه و ده سايق شاحنه كبيره و محمله بضاعه
قمت سايقه بسرعه و لحسن حظي عملت اشاره يمين و داخله ع البوليس ستيشن و من غباوته لحقني
نزلت من العربيه و نزل ورايا و قعد يشتم و يقولي وحياه امي لاوريكي
جريت ع الباركين لقيت ظابط شرطه و حكيت له و الراجل شافني بكلم الظابط هرب و ساق عربيته
و الظابط لحقه و اتحبس
و على فكره الراجل كان عربي
انا عمري ما شفت امريكاني نزل يبهدل بنت
كلهم بيكونو عرب

Superman said...

هو شكله كان حابب يعمل منظر قدامهم و يتخانق

و ده اللي خلاه يستمر في مطاردتك..منظره قدامهم

يضاف له تسخينهم له انه مش لازم يسيبك تفلتي بجريمتك البشعة

بس كان ممكن تقفي من البداية و تشوفيه طالما الشارع زحمة..و طالما معاه بنتين


علي العموم هو عمل الحركتين بتوعه و قعد يخبط علي القزاز..يعني اثبت للبنتين انه مرعب و خد حقه

Unknown said...

والله مش عارفه

البني ادمين بيتفششوا في بعض شكلو
غير طبعا انو اتوقع انو وجود البنات خلى كرامتو تنهز

زكرتين بخالتي؛ من فتره دخلت بسيارتها بشارع ضيق ودخلت وراها واحده بسياره فور باي فور

بتحكيلها خالتي انها تطلع عشان يقدروا يطلعو سوا الاخت عنّدت ونزلت من السياره ومش راضيه تتزحزح

وكمان السواقين الرجال وقفوا السير وضلوا بس يتفرجوا لانو هوشه بين تنتين ستات ما بتتفوت!!!!

بس مش عارفه كل ما اقرا مدونه مصريه عم بحس الشوارع في مصر ولا شيكاغو!!!

جد كيف البنات عايشه لكان؟

أكون أو لا أكون said...

حتى لو كان الحق عليكي... مش من حقه يلحقك...!
والموقف مش محتاج إنه يعصب كده ويتجنن...
يعني هو كل واحد مش بيسمحله يعدي قبله حيلحقه كده ويعمل له مطارده...؟
كويس انك مش فتحتي الباب ولا الشباك...
يعني واحد يعملك مطارده كده كان ممكن يعتدي عليكي بالضرب أو حتى يسمعك كلمه جارحه...
باين عليه كويس انه مش طبيعي... علشان كده ما تهتميش جدا في الموضوع... وماتقهريش نفسك...

واللي عمله عيب عليه خصوصا قدام البنات سواء كانوا اخواته أو غيرهم... بكل الأشكال والأحوال اللي عمله عار عليه...

وألف حمداً لله على السلامه... وربنا يحميك...

Fatma said...

يويو

ربنا ما يوري حد
فكرة انك مهددة بالاساءة الجسدية في الشارع ومن واحد شبه مجنون فكرة مرعبة

Fatma said...

ريم

معاكي حق
بس هي الفكرة مش في السواقة
الفكرة ان استسهال العنف بقى منتشر جدا
ما بقتش فارقة بنت من ولد من بطيخ
زي ما يكون مافيش رادع ولا حد بيحاسب حد
شيئ فعلا مرعب

Fatma said...

نوغة

والله حزنتيني

يعني من صفات العرب اصلا الشهامة والرجولة
الظاهر ان على رأي احمد عز في فيلم الرهينة
احنا اتغيرنا خالص

Fatma said...

اثبت ايه بس يا سلطان
انا لو مكانهم الشيئ الوحيد اللي هيبقى اثبتلي ان دا مش راجل

الظاهر المنظومة كلها بقت مختلة

Fatma said...

مياسي

اهلين والله :)

الشوارع في مصر من سيئ لأسوأ
بصراحة
أنا شخصيا اتصدمت ولا عمري كنت اتوقع يحصلي موقف زي دا
يعني وارد خناقة او معاكسة او حادثة
بس تهديد بدني حقيقي لا

Fatma said...

أكون او لا اكون
اشكرك جدا وربنا يسترها علينا جميعا يا رب

محمد فوزي said...

أجدتي وصف الموقف لدرجة إن الراجل ده إستفذني بجد , فعلاً الراجل ده كان عاوز ينضرب !!
انا في المواقف دي بركن وأنزل من العربيه قبله وأستناه , بتلاقيه بعد ما كان منهار كده هدي ولم نفسه على طول
معلش يا فنون ثقافة التعامل مع المرأه في مجتمعنا بايظه شويه
حاسس بالخضه اللي كنت فيها يارب متقعيش في موقف زي ده تاني

Nourhan Sirag said...

وحشتيني جدا

Fatma said...

فوزي

دي مش بايظة شوية

دي معدومة

ودي القاعدة
اللي بعرف يتعامل مع المرأة هو الاستثناء

Fatma said...

نورهان

يالهوي

مش مصدقة

انتي فين يا بنتي

اختفيتي اختفاء مش طبيعي

انتي كويسة

طمنيني عليكي بجد

انتي كمان وحشتيني اوي بجد

بتيجي على بالي كتير وبنجيب سيرتك ان وياسمين كتير جدا
ما بتشرقيش :)

Nourhan Sirag said...

هههههههههههه

لا مبشرقش
شكلكم بتجيبوا سيرتي في الخير :]

انا زي الفل الحمد لله
هاحاول اشوف طريقه اكلمك بيها ان شاء الله

leeno said...

!!!!!!!!!!!!!!!!!


ايه دة بجد

الباب المفتوح said...

الناس في مصر بقيت غريبة جدا بتفقد اعصابها على اهون الاسباب
ده بيخلي الحياة في مجملها اصعب
بصراحة انا بس باحسدك على حاجة واحدة بس
الزحمة اللي انتي عايشة فيها لاني من ساعة ما سبت مصر من شهرين مفتقد الزحمة جدا
بالنسبة لياسمين من امتى بقيتي جامدة كده ومابيهمكيش

صوت من مصر said...

مش عارف اقولكم ايه مليش فى السواقه خالص
عموما هو تصرف زباله وواضح جدا
بس حلو درس السواقه ده

Love-Guru said...

و هو ده الفرق بين مصر و السعودية... موقف زي ده لا يمكن ان يحدث في السعودية... طبعا علشان غير مسموح للبنات انها تسوق
LOL
I'm just kidding.
في امريكا التصرف ده جريمة يعاقب عليها القانون حتي ولو لم يعتدي عليكي و اسم الجريمة
Traffic Rage
التصرف الامثل هو تصويره بالكاميرا الديجيتال اثناء هياجه او احداثه للتلفيات او محاولة ذلك و اخذ ارقام سيارته و تقديم ببلاغ في الشرطة. و في الدول المتقدمة هناك رقم تليفون لابلاغ شرطة الطرق التي تقوم علي الفور بارسال اقرب سيارة شرطة للتحقق و القبض علي الشخص
اما الحل الآخر هو ان تدخلي في مطاردة سلبية معه بمعني ان تكوني امام عربيته دائما و لا تسمحي له بتجاوزك حتي تسنح لك الفرصة اما بالوقوف امام دورية شرطة او بالافلات منه. بس ده حل عاوز اعصاب من حديد و جرأة في القيادة قد لا تتوافر في كل الناس او في كل الاوقات.
عموما حمد لله علي سلامتك من الاولاد الوحشين دول و نصيحة مصطفي بحمل سيلف ديفنس مثل العصا الكهربائية اوبخاخ الفلفل مش فكرة وحشة.