Monday, August 03, 2009

لماذيــــات

لماذا نقابل الأشخاص " الصح "في الوقت الخطأ ؟ والأشخاص " الغلط" في الوقت الصحيح

ولماذا نقابل ناس مالهاش لازمة اشبه بالذباب وظيفتهم في حياتك زززززز وبس

لماذا نقيب الممثلين ممثل فاشل

ولماذا وزير الثقافة جاهل

ولماذا حاميها حراميها

ولماذا يطلب أحدهم فتوى من الأزهر في حكم تزغيط البط

ولماذا بعد مقتل مروة الشربيني أصبح الشغل الشاغل هل هي شهيدة الحجاب أم ضحية العنصرية ؟ (على أساس المسمى يفرق وهيرجعها للحياة أو هيقلل من بشاعة الجريمة )

ولماذا يحقق فيلم ( عمر وسلمى) أعلى الإيرادات في سباق أفلام الصيف !

لماذا هناك من يعتقد أن الأهرامات مقابر ولا يجوز زياراتها وأبو الهول أوثان !

ولماذا هناك من يرى ان ( رمضان السنة دي بوظلنا الصيف )!

ولماذا يوجد أشكال نمطية مكررة بشكل جنوني في الحياة حتى أصبحت أرى كل مجموعة أشخاص شخص واحد فقط يحمل وجوهاً مختلفة ؟

شكل نمطي 1 : السلااام عالايكووووووووم بنغمة معينة وميلة رأس الى اليمين قليلا وابتسامة لا معنى لها نتحدث اللغة العربية الفصحى والاطفال يرددون : أبي أمي كما لو أننا في فيلم كارتون نحمل ذات الأفكار نمارس ذات السلوك نكرر نفس الكلمات مصابين بداء عضال اسمه ضيق الأفق اللامحدود

شكل نمطي 2: هاي يا بنتي عاملة ايه أخبارك ايه كله تمام أنا تمام انتي ايه الأخبار تمام هكذا الكلمات متلاحقة لا تترك مجالا للأخر كي يرد ..الجملة تقال بنغمة معينة أخرى لا تحمل أي احساس يتم تبادلها في نفس ذات اللحظة بنفس التون وبابتسامة مصطنعة شيئ مذهل الحقيقة!

وايضا نفس الكلمات نفس الأفكار كلهم ذاكروا من نفس المقرر مصابين بداء آخر وهو السطحية المريعة والجهل التام والمنظرة الخانقة والفتي اللامعقول!

وانماط اخرى ربما أتحدث عنها في مرة قادمة

ولماذا هناك " ناس بجحة"

قالك اوعوا تظلموا حد وخلوا بالكم بتقولوا ايه عشان الكلمة امانة وهتتحاسبوا عليها يوم القيامة

ياااه ياااه كم انت انسان ملائكي !!

فقط لو يعرفون الحقيقة !

الصمت الذي لا يحوى كلاما هو صمت غبي

ومن لا يدرك الفرق ولا يفهم لغة السكوت هو الأكثر غباءا


لماذا !!!!!!!!!!



40 التعليقات:

انا حرة said...

يووووه دا انا لو هرد هكتب عريضة مش تعليق

ليه الواحد يبقى مضطر انه يبتسم كل يوم الصبح فى وش مدير مش طايق يبص فى خلقته عشان الاتيكيت بيقول كدا

و ليه واحد يطلب من مراته انها تكون محجبة و هو اساسا ما بيصليش و ليه واحدة كل كلامها يبقى ان شاء الله و باذن الله و هى ماشية توقع امة لا اله الا الله فى بعض

و ليه ماحدش بقى بيعرف يحط لسانه فى بقه الا لما يدلدق كل اللى يعرفه و اللى ما يعرفوش عن الناس حتى لو ما كانوش يهموا اللى بيسمعه ولا حتى يكونوا من معارفه..و قال بيقولولك ان الواحد لازم يكون عنده ناس بيثق فيهم عشان يحكيلهم..تقريبا كان قصدهم يحكيلهم عشان يسهلوا عليه مهمة ان مصر كلها تعرف ادق اسرار حياته

و ليه تمثيل دور الاهتمام الغير مبرر اطلاقا مع ان كل واحد عارف ان ماحدش هيهتم بيه اكتر من نفسه

و ليه الجبن بقى صفة مشتركة بين تلت
تربع الناس خصوصا انه ممكن يكون مقبول من بنت لكن ايه مبرر اى راجل فى انه يكون جبان؟

و ليه لما تقررى تغيرى حاجة مدايقة الكل حتى لو كانت بسيطة يقفوا قدامك عشان هم اجبن من انهم يخدوا اول خطوة

و ليه صعب اوى كدا ان الواحد يعمل الحاجة اللى هو عايزها
و ليه اللى عايزينه بنبقى اجبن من اننا نعمله و اللى مش عايزينه بنروحله بالمشوار

و ليه واحد كل الناس شايفاه قليل الذوق يصحى كل يوم الصبح يلوم الزمن و الدنيا و الناس اللى ظالمينه و مش فاهمينه صح

و ليه الناس تديكى اكبر من حجمك و يفضلوا طول عمرهم شايفينك كائن هلامى عنده صفات اسطورية مع انك اول واحدة بتاكديلهم انك مش كدا خالص
و ليه يقرروا انك لازم تسمعى و تهتمى و تتفاعلى و تحلى العقد حتى لو انتى بتقوليلهم بكل الطرق الممكنة انك فى الارض

و ليه المشاعر النضيفة ما بقاش ليها مكان دلوقتى و ليه القصص المحترمة ما بتخلصش بنهايات محترمة زيها

و ليه الدنيا ما بتديش حد فرصة انه يقف على رجله الا لما تكون اديتله الضربة المتينة فوق دماغه كانها بتعانده و بتطلعله لسانها نظام و اهى دقنى لو عرفت تقف تانى

و ليه كل الناس عايشة فى دور خضرا الشريفة مع ان معظمهم عارفين انهم ابعد ما يكون عن الخضار و ابعد ما يكون عن عن الشرف

و ليه توصل درجة القرف من الناس انى بقيت بشك ان حتى كلمة صباح الخير بقت وراها مصلحة

و ليه تليفونى يقطع فى اللحظة الحاسمة اللى كنت هقولك فيها اننا محتاجين سويت فى مستشفى المجانين عشان حالتنا بقت بجد مستعصية :D

معلش يا اوختشى على الرغى بس كنت محتاجة اطلع الكلمتين دول دلوقتى حالا قبل ما اطق

Founoon said...

ههههههههههههههههههههههههههههههه يخرب عقلك دانتي ما صدقتي وقال انا اللي فاكرة نفسي هنفجر

كان في باقي هموت وانزله والواد احمد المحبط قعد يقول لا وليه ومالوش لازمة وابصر ايه
سخنتيني على الباقي اللي عندي هموت واعمل كمالة
اهدي يا خالتي وروقي :)

samamasr said...

:)


:)

samamasr said...

ّ شدة:)

dr.lecter said...

فاكره كنت عملت موضصوع هلس زي ده زمان اسمه لييه؟
نقابل الاشخاص الغلط في الوقت الصح
علشان دي اسمها خوازيق القدر ببساطه
وماكترها بصراحه


ونقابل الاشخاص الصح في الغلط علشان نعرف قيمتهم ونتحسر ونبكي الندم ونبوس القدم


لما ذا فاروق حسني جاهل؟
مين قال انه جاهل
ده خبير درجه اولي في الثقافه بس مش الثقافه بتاعتنا ثقافه تانيه مقززه ومخجله وواخد لقب فنان فيها

لقب مروه الشربيني

تصدقي بالله انا مارضيتش ارد في ولا موضوع من اللي اتكبوا عنها علشان كنت عارف انها هوجه حماسيه متعصبه وبس وهتروح لوقتها كعاده الشعب الزياط الهياص العظيم
جتنا نيله في تفاهتنا بجد

اظن لو مروه دي مسلمه ومش محجبه ووحصل نفس المنوقف مكانتش القيامه قامت
لكن تقولي ايه بقي للامخاخ الصغيره المكسينه
بجد انا اشعر بالشفقه علي شعبنا علشان كده مش زعلان اننا هننقرض بسهوله زي الديناصورات


لما ذا عمر وسالمي اعلي الايرادات

لان الناس مش عاوزه تشوف مستقبل مخيف في دكان شحاته
ولا خوف وعنف العشوائيات
ولا واقع قاسي في احكي ياشهرزاد
ولا كئابه الفرح


بس عامه عندك طير انت وحلمي هيوصلول لنفس ايرادات تيمو


رمضان بوظ الصيف؟ ازاي بقه

ده العاللم كلها زايطه وعايشه حياتها ولا كان رمضان علي الابواب
انت شكلك مرحتيش مارينا الفتره الاخيره


اه طبعا الاهرمات اوثان ومعبد ابو سمبل اوثان ووادي الكباش اوثان
ياللا بقي نعمل زي طالبان وندمر تامثيل بوذا

ونتفرج علي سقوط الحضاره


ليه تبقي متاكده ان شغلك حلو وتمشي وانت مطنه ورايقه وفجاه في يوم تلاقي كل حاجه اتقلبت عليكي وكل اللي عملتيه اتبخر مره واحده لمجرد انك عملتي هفوه مالهاش دعوه بالشغل بس زي مابيقولوا بره

نظريه الكارما الاخلاقيه
وماكثر توابعها بجد ياااه علي كده الواحد لازم يمشي بيحسس في الدنيا علشان مايغلطش


الصمت الذي لا يحوى كلاما هو صمت غبي

ومن لا يدرك الفرق ولا يفهم لغة السكوت هو الأكثر غباءا





لماذا !!!!!!!!!!




لو كنت اعرف الاجابه طكنت قولتلك


ياللاا علشان ماظولش زي فله

The Seagull said...

بطلت أسـأل من زمـااااان أوووووي لأني مالقتش أي إجابات تشفي غليلي الحقيقة :))

بلا وجع دماغ بلا وجع قلب :D

Appy said...

سيبك من كل اللى فوق معنديش اجابات هى كده المذيعه دى كارثه دى تترمى من فوق الهرم علشان يدفنوها فيه وتبقى مزار سياحى بجد هههههههههههه انتى جبتيها منين

ســـــاره said...
This comment has been removed by the author.
ســـــاره said...

ههههههههههههههههههههههههه
لا والله مش قادره ايه الفيديو ده
ههههههههههههههههههههههههه
والمذيعه بتتكلم بكل ثقة كده ازاي
لالالا فظيعه والله ولا المدرب كل شوية يقولها فرانساوي وهي مستمرة هههههههههههههه

فكرتيني بوحده صاحبتي هنا في كندا
هي منقبه فبتحكيلنا على موقف حصلها
بتقول كانت ماشية في الشارع ووقفت قدامها وحده عجوزة فرنسية قعدت تشارو على نقابها وتشتم فبسألها بتشتم ازاي؟ قالت لي بتشتمني بالفرنسي عشان منقبه بتقولي يا كذا كذا كذا.. استغربت وقلتلها وانتي ايه عرفك انها قالت لك كده.. هو انتي بتعرفي فرنسي؟ قالت لاء بس عرفت انها بتشتمني :D

والله احراااج بجد لما حد يعمل نفسه ابو العُرّيف :D

بالنسبة للماذا فأنا حقيقي مابوجعش راسي باللي يدور حواليا تحسيني مسالمه كده والله عايشة لنفسي واسرتي وبس ماليش بقى في الدنيا .. بس بطرح ( لماذا) وكبيييرة اوووي وجنبها الف علامة استفهام للناس اللي بحبهم لأن حقيقي اكتر حاجه تأثر فيا لما يحصل موقف من حد بعزه اوووي

momken said...

اه صحيح لماذا؟؟؟

قولى انتى بقى



تحياتى

محمد فوزي said...

عشان عمر الحياه من يوم ما اتخلقت ولحد ما تنتهي ما هتكون مكان مثالي , ده مكان احنا كل يوم بنختبر فيه وحياتنا ما هي إلا معالجات يوميه لمشاكل طارئه

بس انا عندي ليكي نصيحه بدل لماذا خلي سؤالك الدائم كيف , كيف اتعامل مع .... , وكيف استقبل من الآخرين ....
بجد جربي تبقي راكبه عربيتك وحد سايق جنبك بيستفزك , جربي مره تذعقي أو تديله إهتمام وجربي مره تانيه تعتبريه هوا , هتلاقي ان المره التانيه انتي مرتاحه فيها اكتر بكتير

اللي فات ده مثلاً نموذج لكيف تستقبل من الآخرين

حطي نموذج سؤال كيف ده على شوية شجاعه وجرأه في تغيير اللي مش قادره تتحمليه بجد هتلاقي نفسك اسعد بكتير ( نصيحه متجربه )

وبس عشان انا برضه مش عاوز اطول زي كل اللي علقوا هنا قبلي هههههههه

تحياتي

المعلم محمد صاحب المطعم - طعمية سخنة said...

عادي جدا جدا جدا
اولا الجهل متفشي في بلدنا فطبيعي تلاقي ناس بتطلب فتاوي
ثانيا احنا سبنا المطالبة بحق دكتورة مروة و قعدنا نتجادل
ثالثا حل الموضوع ده كله انك تسيبي مصر و تروحي بلد تانية ! و تبدأي تتعلمي هناك من اول و جديد هتلاقي كل حاجة اتظبطت !!!

leeno said...

مش عارفة اعمل ايه فمواضيعك حرام عليكي يا بنتي و الله !

على فكرة انا نفسي ارد رد معتبر بس و الله جاية هنا اخد نفس من خنقة الشغل و من خنقة الماذيات (بجد)

قلت اتنفس شوية و ارجع و معنديش وقت ارد دلوقتي بس لازم ارجع تاني و مقدرتش مقولكيش انتي يا بنتي فيكي حاجة غريبة و الله !

وحشتييييني

Nanoz said...

لو فضلت اسأل نفسي ليه على حاجات كتييييييييير اوى حاسه انى هتشل يا هتنقط يا هيجيلي اى حاجه و انا لسه صغيره على الحاجات دى

فبطلت اسأل .. ولا افكر فأسباب
عشان غالبا مش بيبقى فيه اصلا اسباب
الناس بتتصرف بعشوائيه ... بيعملوا تصرفات و هما مش عارفين ليه
مع انهم لو فكروا لحظه هيلاقوا نفسهم بيضروا نفسهم قبل اى حد تانى

بس تقولى ايه بقى
فعشان كده بجد بطلت احاول امنطق اى حاجه تحصل عشان ميبقاش مصيري مستشفى الامراض العقليه

Jannah said...

ههههههه
والله البارحة كنت مصطرة أقعد بالبيت لأنه ضيوفي ما كينتهوش
و للأسف كنت مضطرة أحط القنوات العربية طول النهار
أقصد البرامج الفنية و الحوارية و الحاجات هاذي اللي تقطر غباءا
و لقيت نفسي في الكم دقيقة اللي كنت أشارك فيها المشاهدة يتجمع في راسي مليون ليش و ليش

حتى قلت أعمل موضوع بهذا المعنى في المدونة الكئيبة حقتي
و لما دخلت هنا لقيتك عاملة الموضوع هذا
و رد ياسمين بعد ما شاء الله كله لماذيات
اتضح بالنهاية انه مهرجان لماذا
أو اليوم العالمي للماذا
;D

ليش الناس صاروا شبه بعض بيختلفوا في الملامح بس؟
لأنه المصنع اللي بيصنع فيه عقلهم مصنع واحد
المدرسة الجميلة! و الاعلام العظيم! و المجتمع اللي كله عقد عمرها قرون

ليش فاروق حسني جاهل؟
صراحة ماعندي فكرة هم جاهل و لا لا
بس الأكيد انه مطول في هذه الوزارة و أكيد أيضا انه فيه ناس أقدر منه

ليش تامر حسني محقق ايرادات؟
لأنه زمن الرداءة

ليش ناس معتقدة انه رمضان بوظ الصيف؟
امممم
على الأقل هنا الناس أوضح شوية لحد الآن اللي بيصوم بيعرف انه رمضان فرض و قبل أي شي
و اللي ما بيصومش ما بيتكلمش عن رمضان أساسا و لا يؤمن به و لا يحطه في مقارنة مع أي شي تاني

الشكل التالت اللي هو معتقد انه رمضان بوظ غير موجود على حد علمي

فيه شكل رابع حق العشوائيات و ..و.. معتبرين انه الصيف بوظ رمضان بسبب لبس الناس يعني
ومعصبين على الموضوع
و هؤلاء منتوج جديد ربحناه بفضل القنوات الفضائية
مع العلم انه أصلا أغلب الناس في المغرب بيلبسو لباس تقليدي في رمضان بحكم العادات في الصيف أو الشتا
باستثناء الناس اللي عندهم طبيعة عمل معينة
يعني مافي داعي يثيرو هذه النقطة كل واحد يخليه في نفسه لو فكر فنفسه بس ما راح ينتهي ...بس الأجندة تقتضي

الرحمة من الله

بخصوص الأهرام و مروة الشربيني و القائمة طويلة انت حصرتيها بس
أقول كلمة واحدة
ألف خسارة على مصر

بس
طولت عفوا

يومك سعيد و رمضان مبارك عليك و على الجميع

Jannah said...

انا كا من شفت الفيديو ظنيت انها مذيعة ضعيفة فطريقة تقديمها و اسئلتها
اتضح انها من أصحاب الشخصيات القوية


لو كانت الوظيفة بالكفاءة كان فيه مليون واحد فمصر ممكن يعمل الحوار بالفرنساوي و لا بالألماني و لا و لا..بس لأنه القصة وسايط فممكن تلاقي مثل هاذي النماذج كتيييير

Nanoz said...

سيبك من ده كله :@

قولى لى انتى لماذا يحددوا النت
يعنى لو اشتراكك محدود هتاخدى سعه محدوده

ولو اشتراكك غير محدود هتاخدى سعه محدوده برده ... بس اكبر شويه :S

مش فاهمه بجد يعنى ايه البلاد كلها تبقى بترخص النت ... و هنا بيغلوه و يبوظوه

و يقولك سياسه الاستخدام الرشيد
رشدوا استخدام الميا و الكهربا و المواصلات و كل حاجه
ووقفت معاهم على النت اللى كان ناقص ترشيدهم

Founoon said...

اهلا يا ايمان :)

Founoon said...

لكتر

تفتكر خوزايق القدر فعلا ولا في حاجة خفية احنا مش قادرين نفهمها ؟ اصل لازم يكون في سبب منطقي والا انا هتجنن
فاروق حسني شيء مؤسف
مارينا مارحتهاش لا انا قاطعتها بقالي بتاع 3 سنين بتضغط على اعصابي جدا ماقدرش استحملها
واي سقوط حضارة يا محمد بجد دي نهاية الحضارة احنا بنعيش عصر نهاية الحضارة

Founoon said...

يويو
والله معاكي حق :)

Founoon said...

ابي

شوفتي

انا انهرت لما شوفتها انهرت
مش معقولة بجد لا والثقة اللي في ملامحها مش معقول بجد

Founoon said...

سارة
الا الثقة انا ماجننيش غير الثقة والاستهبال
والله اريح ان الواحد ينشغل بعالمه الخاص بس يمكن احنا هنا عندنا صعب لان اي حاجة بتحصل في العام بتأثر بشكل مباشر في حياتك الشخصية بشكل او بأخر فبتلاقي نفسك غصب عنك حاشرة نفسك في العام

Founoon said...

ممكن

عاش من شافك يا اهلا يا اهلا
مانا لواعرف اقول على طول امال انا بسألكم ليه
:)

Founoon said...

فوزي
مثالي مثالي ! انت طماع اوي انا لا اطمح ولا اطمع للمثالية انا عايزة عيشة عادية زي ما باقي خلق الله عايشنها مصر مابقتش مكان طبيعي يصلح للمعيشة الادمية الطبيعية
هجرب نصيحتك بس هي مش اكتر من مسكن يا دكتور لازم علاج
:)

Founoon said...

المعلم محمد

كلامك صح بس انا مش عايزة امشي انا عايزة بلدي تتغير او بالاصح ترجع طبيعية ما ينفعش ؟

Founoon said...

لين

وانتي وحشتيني جدا انت مش جاية قريب ؟ لسهانا وفلة كنا بنقول لازم لين تنزل مصر بقى حاولي بجد

في انتظار عودتك

Founoon said...

نانسي

اهلا بكم في مصر
حيث العشوائية المنظمة
او النظام العشوائي

الاتنين صح

Founoon said...

جنة
التيليفيزيون في اغلب برامجه بيجيب ذهول وبيخلي الواحد يفقد النطق من كتر ماهو مش مصدق اللي بيحصل
اعملي الموضوع بتاع لماذياتك اكيد شوفتي حاجات رهيبة

مش عارفه والله يا جنة هو الاعلام ولا الموروثات ولا ايه بالظبط اللي حصل في حاجة عجيبة الناس مقسمة مجموعات ومن اول 3 دقايق تقدري تصنفي اللي قدامك يتبع اي مجموعة شي عجيب والله نادر لما تقابلي شخص مميز او مختلف حتى لو سيئ بس مختلف نادر والله

فاروق حسني لو اتفرجتي ليه على حوار واحد هتشوفي كم جهل لا يليق ابدا بوزير بشكل عام فما بالك بوزير ثقافة؟ من اول اركان الاسلام الاربعة والتي لم تكن زلة لسان زي ماحاولوا يظهروها لاقتراحه حرق كتب الادب اليهودي الموجودة في مصر على اساس انه كدا واخد موقف من اسرائيل مثلا لاشياء كتير عجيبة وبعدين الاشياء تعرف من اثارها كلميني لو سمحتي عن حال الثقافة في مصر ؟!!!

زمن ردائة بشكل فوق الوصف شوفتي كليبه الاخير ؟ تحرش جنسي صريح وقال اسم الاغنية يا تاعبة كل الناس ودا ليه معنى مسف عندنا في مصر والناس عاجبها جدا !!

انت اتكلمتي عن الناس اللي شايفة ان الصيف بوظ رمضان ودولموجودين عندنا طبعا بس انا اللي قصدته الناس اللي شايفة ان رمضان بوظ الصيف اللي هو الشكل التالت دا موجود عندنا سواء ناس بتصوم او لا شايفين ان الصيف انخرب بسبب ان رمضان جه فيه الشواطئ هتقفل واماكن السهر هتقفل والناس هترجع من الساحل والصيف بقى قصير مش لاحقين ينبسطوا :)

والله الف خسارة عليكي يا مصر الف الف خسارة انا لما بسمع من اهلي بحس بمرارة جوايا والله على البلد دي واللي جرالها الله يسامحهم اللي كانوا السبب

العجيب في المذيعة الثقة المصحوبة بالاستهبال وكله كووووم ولما سألته انت بتتكلم فرنساوي كوم تاني
البجحة !

Founoon said...

نانسي

انا مش فاهمه ايه نصابية النت اللي احنا عايشين فيها

مش فاهمه فعلا

بس متأكدة ان انا بيتنصب عليا

micheal said...

الخلاصة بنيجي في الهايفة ونتصدر..فيه أزمة في التفكير بجد
البوست لامم حاجات كتير أوي..عاجبني
أما فيديو الست المذيعة فده بيدل قد ايه الواسطة بقت في كل حاجة في حياتنا
تحياتي

Jannah said...

فاروق حسني لو اتفرجتي ليه على حوار واحد هتشوفي كم جهل لا يليق ابدا بوزير بشكل عام فما بالك بوزير ثقافة؟ من اول اركان الاسلام الاربعة
....
فيه ناس ما لا تعترف بأنه الحج ركن
فممكن يكون منهم
يعني بيعتبروه وثنيات و كلام غير منطقي لا يهمنا
المهم انه مو شرط يكون ما يعرفش الأركان بمعنى المعرفة
أصلا أشك انه ما يكونش عارفها
لأنه مصري و عايش في مصر و كل شي
فصعبة
....
زمن ردائة بشكل فوق الوصف شوفتي كليبه الاخير ؟ تحرش جنسي صريح وقال اسم الاغنية يا تاعبة كل الناس ودا ليه معنى مسف عندنا في مصر والناس عاجبها جدا !!

....
اه نفس المعنى فكل مكان
أنا ماعنديش اعتراض انه هو يكون انسان بذيء و عنده معجبينه اللي من مستواه
أصلا كل الظروف مساعداه
ما يستحقش نتوقف عنده كتير..ممكن نتوقف عند الظروف أكتر

أنا بعترض عليه لما بيطلع يقول" أنا ربنا بيساعدني الحمد لله و ربنا عارف انه فيه ناس ظلمتني و الحمد لله بعت لي الناس الجميلة و الجمهور الحميل اللي بيدافع عني الحمد لله"

يستهبل؟
اعمل اللي يعجبك بس لا تقولنا الله بيساعدني ووقف جنبي .حتى أعمل كليب التحرش
الا ااذا كان يعبد اله آخر غير الاهنا
أما اله الكون كما نعرفه فما بيشجع البذاءات و السفالة و الانحطاط

أوووف
أقول أبعد عن التيليفزيون شوي أحسن

Founoon said...

مايكل

هي الحياة حوالينا بقت هيافة متحركة ! لما بلاقي حد مش هايف بقول يااااه اخيرا
اتشرفت بتعليقك

Founoon said...

جنة
طيب تبرري بايه انه طلع بعد كدا وأكد انها خطأ غير مقصود ؟
يعني واضح انه سامع المعلومة بتاعت اركان الاسلام 5 من زمان ومش مركز فيها اساسا
انا مش بعيب عليه عدم معرفته باركان الاسلام لو هو انسان طبيعي يمكن ما يكونش يهمه بس باعتبار انه وزير ثقافة والله لو ملحد المفترض انه يكون قاري الحاجات دي ومركز في معلوماته كويس

انا ماعنديش مشكلة انه يكون انسان بذئ بس عندي مشكلة كبيرة جدا انه يكون ليه كم المعجبين دا
دا معناه ايه ؟ الذوق العام رايح فين ؟ دا نجم الجيل ؟ جيل مهبب اللي دا رمز ليه
زمان كان في اغاني شعبية واغاني سوقية كان في فئات معينة اللي بتسمعها وكان الغالب بيسمع الاغاني الراقية
اقصد ان النخبة كان ذوقها راقي وقدرت تأثر في الطبقات اللي تحتها فكان الغالبية من المجتمع ذوقها راقي حتى لو هما من طبقات اجتماعية مش عالية يعني المتوسط والمتوسط المنخفض بردو كان ذوقه راقي

انما دلوقتي بلاقي ناس المفترض ولاد ناس و تيمو بيمثل لهم حاجة عظيمة ما بفهمش والله في ايه
هههه انتي مضايقك تيمو وهو بيقول ربنا طيب كان لازم تشوفي فيفي عبده ودينا وهما بيقولوا نفس الكلام عن قد ايه ربنا بيوفقهم وبيقف جنبهم !!
راجعي الجملة الاخيرة في الموضوع انا بتكلم فيها عن النقطة دي تحديدا انه يكون انسان صفيق ويقولك الكلمة امانة واتقوا الله !!!!

الكلمة نور said...

هما دول الناس
وهى دى طريقة تفكيرهم الغبية
وهى دى الدنيا يا عبلة

leeno said...

اهو انا حكتبلك لستة من اللماذيات

لماذا يلعن الرجال المرأة المومس و يقصدها جميعهم ! جملة بتتردد فبالي من ساعة ما شفت فيلم عن محظيات فينيسيا !

لماذا يجب أن ندعي التدين أمام الناس و إلا تعرضنا لهجمة من الأحكام المطلقة على أخلاقياتنا من مجرد مظاهر لا دليل عليها ؟!

لماذا ينتشر ما بيننا الفكر الحكمي على الناس بمعنى ان اطلق أحكامي الخاصة على كل شخص اقابله من مجموعة من المعلومات العامة التي قد لا تعني شيئا ؟

لماذا ينتشر بين الفتيات (قلة العقل ) بشكل مقزززززززز و اصبحت صفاتهم المشتركة ... النميمة ... اصطياد العريس ... مراقبة باقي البنات و الغيرة منهم و من ثم التجريح فيهم ... و التصرف بطريقة لا تعبر الا عن انحطاط فكري و مستوى من الرقي الاجتماعي المعدوم

لماذا تعامل الأنثى حسب تصنيفها الجمالي !


لماذا أصبح الشباب يمتون لأي شيء بصلة ما عدا الرجولة !

لماذا هناك العديد من الأخلاقيات التي عشت عمري و أنا اريد ان احافظ عليها لكنني الى الآن لم أجدها غلا في الكتب التي قرأت ؟

لماذا ليس في الحياة ادنى أنواع العدل (أقصد هنا حال فلسطين و ما حدث و مازال يحدث و كان آخر انتاجاته غزة !

لماذا نحن دوما محاطين بأناس لا نرغب في رؤيتهم و نبحث بلهاث مستمر عمن نتمناهم و لا نجدهم؟!

لماذا يطلب من البنت دوما ان تظهر للعالم مجموعة من الصفات التي يجب تواجدها فيها كنوع من قائمة للتقييم و ان نقصت إحداها تصبح هذه الفتاة دون المستوى و يلفظها المجتمع !


و الكثير من اللماذيات الحقيقة

بس بصراحة اذا بدي اكتب اكتر رح تقلب غم اكتر من اللازم

بيكفي شوية الغم اللي فوق !

و انتي وحشتيني و عايزة جداااااااااا انزل بس و الله ما عندي اجازة

الشارده said...

فكرتينى بموضوع عملته قبل كده بس انا كنت احدق منك وسميته من غير ليه لان للاسف السؤال لماذا ده ملوش جواب فبلاش تساليه من الاساس
امال لو كنتى فى الشغل عندنا وشفتى الفساد والبزرميط عينى عينك ومش عارفه تعملى حاجه تحسى انك كل يوم ماشيه بمبدا جعلوه فانجعل

بصى انا سميت الزمن بتاعنا ده زمن هيفاء وهبى وزمن تامر حسنى
مش مجرد كره فى الاتين رغم انك عارفه معزتهم المهببه عندى لا
لانهم فعلا اكبر مثال للتفاهه الى بتلاقى الى بيقدرها
السماجه الى الناس بتروحلها برجليهم
الابتذال الى الناس بتصقفله
واسالى كده نفسك لو عملوا حفله وقرروا انهم يجيبوا فيها على الحجار وتامر حسنى ولا هايفه وامال ماهر تفتكرى هيدوا لكل واحد فيهم اجر كام
يعنى هتفضلى طول عمرك تلاقى كل الى انتى قلتى عليه ده
ناس معندهاش ادنى قدر من الموهبه وبتاخد حاجه مش حقها
اناس شايفه الغلط والفساد وساكته وتحسى انها اتعودت عليه زى الى بياخد سم
يعنى عارفه المثل ابنك على ما تربيه وجوزك على ماتعوديه
المثل ابنك على ما تربيه وشعبك على ماتعوديه
وعلشان تعيشى فى الدنيا وبالتحديد فى مصر بطلى تسالى ليه وعيشى بمبدا من غير ليه وابقى اسمعى اغنية عبد الوهاب من غير ليه 33 مرت قبل بعد الاكل

Founoon said...

الكلمة نور

يعني دي طريقة تفكيرهم الغبية ؟ في ناس مش اغبية خالص
ومين المسؤول عن ان الناس تبقى طريقة تفكيرهم غبية اساسا لو فرضنا ان الناس طريقة تفكيرهم غبية ؟

ايه اللي حصل يعني

Founoon said...

لين

هههههه فكرتيني بكتاب Why Men Marry Bitches
ماعنديش رد الحقيقة على لماذياتك
واتصرفي في اجازة لازم تيجي
خدي يومين ولا حاجة وتعالى اقعدي عندي

Founoon said...

ايمان
يخرب عقلك ردك قلبني من الضحك
جعلوه فانجعل دي جامدة اوي يا ايمان جامدة بجد
طيب كنتي جيبتي امثلة الطف شوية من امال ماهر وعلى الحجار أنا بالنسبة لي لا اروح الحفلة دي ولا دي
هيفا واحدة حلوة بس عديمة الموهبة سواء في الغنا او التمثيل وتامر صوته حلو بس هو عجيييييييييييب جدا وصفيييييييق جدا سواء في اختياراته للاغاني ولا كليباته ولا البيائة الرهيبة اللي هو فيها
مش عارفه اللوم عليهم انهم بيبوظوا الذوق العام ولا هو الذوق العام بايظ اصلا ودول ماشيين بمبدأ اللي تكسب به العب به
الدايرة دي متوهاني فعلا
يعني الجمهور عايز كدا ولا هما اللي بيشكلوا ذوق الجمهور
هههههههههههههههههههههههه
حاضر هسمع من غير ليه

الكلمة نور said...

الغباء مسئولية شخصية
يعنى كل شخص مسئول عن غبائه
واللى مش غبى من دماغه
غبى من قلبه واللى مش اغبياء من دماغهم ولا من قلوبهم بيموتوا بدرى مش قصدى 6 الصبح يعنى:)
والغباء للاسف يشبه الايدز
معدى
ويورث
يعنى الغبى هايعلم ابنه ايه؟
والغبية ابنها هيبقى ايه؟
وكان لى صديق زمان هاجر كان مثله المفضل
"الحمار بيعيش حمار وبيموت حمار
عمرك شوفت حمار بقى بنى ادم؟"
ومن كل الحقائق الفائتة واللى لسه موصلهاش عقلى يتضح انه كلما زادت الحضارة الانسانية زاد الطلب على الاغبياء واصبح سوق اللطفاء بائرا واصبح رميهم فى اقرب كنيف الرياضة الشعبية العالمية الاولى