مصابي الثورة

تحديث :

تقريبا قدرنا نوفر كل كمية الدوا المطلوبة ..هنروح يوم الاربع الساعة 12 الضهر مركز تأهيل القوات المسلحة بالعجوزة خلف مستشفى العجوزة عشان نزور المصابين ونسلم المستشفى الدوا اللي جبناه ..لو في اطباء يحبوا يجوا معانا يتطلعوا على حالة المصابين يكون عظيم ...اشوفكم كلكم هناك :) اشكركم جدا جميعا بجد

بدون مقدمات عاطفية وهدخل في الموضوع على طول

مصابي الثورة احنا مقصرين في حقهم بدرجة كبيرة جدا الا قلة قليلة لسه بتسأل عليهم وبتشوف احتياجاتهم وبتدور عليهم على قد ما يقدروا

كان نفسي مانحتاجش نعمل مبادرة او نستنى مبادرة وكل واحد فينا من نفسه كان يخصص نص ساعة كل اسبوعين لمصاب من مصابي الثورة ..بس واضح ان الدنيا تلاهي والمشاكل كتير والناس مشغولة في حاجات لا تقل اهمية عن الموضوع دا

انا بشكل شخصي مش شايفة ان ليا دور في الفترة القادمة وموضوع الانتخابات اللي داخلين عليه ..وبما اني فاضية نسبيا دلوقتي فمش شايفة حاجة اهم من مصابي الثورة

في مركز تأهيل العجوزة ..دا مركز تأهيل تابع للقوات المسلحة خلف مستشفى العجوزة .في مركز التأهيل دا في 10 من مصابي الثورة المصابين بشلل بدرجات مختلفة

بيتعاجلوا على نفقة القوات المسلحة في الحقيقة بس في استشاري مهم زارهم من فترة ووصى بدوا اسمه cerebrolysin

الدوا دا بيعمل حاجة اسمها nerve regeneration

وبيفرق جدا جدا في حالة المريض

في ناس تبرعت بعدد من علب الدوا قبل كدا وبعد شهرين من العلاج حصل الاتي :

محمد سمير بدأ يحرك رجليه

تامر بدأ يمشي على عكاز

محمد ربيع داخل يعمل عملية قريبا وفرصه في الشفا ارتفعت جدا بسبب الدوا

رندا ابتدت تتحرك

رشا ابتدت تحس برجلها

الموضوع ايه بقى..ان المستشفى لا تتكفل بتمن الدوا وخارج ميزانية العلاج المخصصة .اعتقد معتبرينه دوا رفاهية مادام هما بيعملوا العمليات اللازمة وبيعملولهم التأهيل

الدوا تكلفته مرتفعة جدا ..زي ما قلنا هم 10 مصابين..كورس العلاج 8 اسابيع ..كل مريض بيحتاج 6 علب في الاسبوع وعلبة الدوا ب 150 جنيه ..اعملوا انتو الحسبة :)

عندي امل نقدر نوفرلهم علب الدوا ..احنا مش قليليين لو كل مجموعة اشتركت في علبة واحدة اعتقد اننا هنقدر

المجموع 480 علبة بس بسببهم ممكن ناس مش قادرة تمشي تقدر ترجع طبيعية

العلب نقدر نسلمها في ادارة المستشفى ..عند مدام اميرة مديرة مكتب مدير المستشفى دكتور رضا ويتم تبليغهم ان دا لمصابي الثورة

الاهم بقى من دا كله ..مصابي الثورة بيسألوا ..هو الناس فين !ماحدش بيزورنا ليه!

شهادة المشير

خرقا لقرار حظر النشر وتضامنا مع اول ناشر للشهادة : شهادة المشير

س١ : حصل اجتماع يوم 22 يناير، هل ورد إلي رئيس الجمهورية السابق ما دار في هذا الاجتماع وما أسفر عنه وما كان مردوده ؟

ج1 : الاجتماع كان برئاسة رئيس الوزراء واعتقد أننه بلغ

س2 : بداية من أحداث 25 يناير وحتي 11 فبراير هل تم اجتماع بينك وبين الرئيس السابق حسني مبارك ؟

ج2 : ليست اجتماعات مباشرة ولكن يوم 28 يناير لما أخذنا الأمر من السيد رئيس الجمهورية كان هناك اتصالات بيني وبين السيد

الرئيس ؟

س3: ما الذي أبداه رئيس الجمهورية في هذه اللقاءءات ؟

ج٣-4 : أعطي الرئيس الأمر لقائد القوات المسلحة اللي هي نزول القوات المسلحة لتأمين المنشآت الحيوية وهذا ما حدث

ج٣-3: القوات المسلحة بتنزل لما الشرطة بتكون محتاجة المساعدة وعدم قدرتها علي تنفيذ مهامها وأعطي الرئيس الأمر لقائد القوات المسلحة - يتبع

ج٣-2: كان هناك تخطيط مسبق للقوات المسلحة وهذا التخطيط يهدف لنزول القوات المسلحة مع الشرطة وهذه الخطة تتدرب عليها القوات المسلحة يتبع

ج3: اللقاءات بيننا كانت تتم لمعرفة موقف القوات المسلحة خاصة يوم 28 وعندما كلفت القوات المسلحة للنزول للبلد ومساعدة الشرطة لتنفيذ مهامها يتبع

س٤-2: استعمال قوات الشرطة القوة ضد المتزاهرين بما فيها استخدام الاسلحة الخرطوش والنارية من 25 يناير حتي 28 يناير ؟

س4 : هل وجه رئيس الجمهورية السابق المتهم محمد حسني مبارك أوامر إلي وزير الداخلية حبيب العادلي باستعمال قوات الشرطة القوة ضد المتظاهرين؟ يتبع

ج4 : ليس لدي معلومات عن هذا واعتقد ان هذا لم يحدث

س5: هل ترك رئيس الجمهورية السابق للمتهمين المذكورين من أساليب لمواجهة الموقف ؟

ج5 : ليس لدي معلومات

س6: هل ورد أو وصل إلي علم سيادتك معلومات أو تقارير عن كيفية معاملة رجال الشرطة ؟

ج6 : هذا ما يخص الشرطة وتدريبها ولكني أعلم ان فض المظاهرات بدون استخدام النيران

س7 : هل رصدت الجهات المعنية بالقوات المسلحة وجود قناصة استعانت بها قوات الشرطة في الأحداث التي جرت؟

ج7 : ليس لدي معلومات

س8 : تبين من التحقيقات إصابة ووفاة العديد من المتظاهرين بطلقات خرطوش أحدثت إصابات ووفيات..هل وصل ذلك الأمر لعلم سيادتك وبم تفسر ؟

ج8: إنا معنديش معلومات بكده.. الاحتمالات كتير لكن مفيش معلومة عندي

س9 : هل تعد قوات الشرطة بمفردها هي المسئولة دون غيرها عن إحداث إصابات ووفيات بعض المتظاهرين ؟

ج9 : إنا معرفش ايه اللي حصل

س10 : هل تستطيع سيادتك تحديد هل كانت هناك عناصر أخري تدخلت ؟

ج10 : هيا معلومات غير مؤكدة بس اعتقد ان هناك عناصر تدخلت

س11 : وما هي تلك العناصر ؟

ج11 : ممكن تكون عناصر خارجة عن القانون

س12 : هل ورد لمعلومات سيادتك ان هناك عناصر اجنبية قد تدخلت ؟

ج12 : ليس لدي معلومات مؤكدة ولكن ده احتمال موجود

س13 : وعلي وجه العموم هل يتدخل الرئيس وفقا لسلطته في ان يحافظ علي أمن وسلامة الوطن في إصدار أوامر

أو تكليفات في كيفية التعامل ؟

ج13 : رئيس الجمهورية ممكن يكون أصدر أوامر - طبعا من حقه ولكن كل شئ له تقييده المسبق وكل واحد عارف مهامه

س14 : ولمن يصدر رئيس الجمهورية علي وجه العموم هذه الأوامر ؟

ج 14 : التكليفات معروف مين ينفذها ولكن من الممكن ان رئيس الجمهورية يعطي تكليفات مفيش شك

س15 : وهل يجب قطعا علي من تلقي أمر تنفيذه مهما كانت العواقب ؟

ج15 : طبعا يتم النقاش والمنفذ يتناقش مع رئيس الجمهورية وإذا كانت الأوامر مصيرية لازم يناقشه

س16: هل يعد رئيس الجمهورية السابق المتهم محمد حسني مبارك مسئول مسئولية مباشرة أو منفردة مع من نفذ أمر التعامل مع المتظاهرين الصادر منه شخصيا

ج16 : إذا كان أصدر هذا الأمر وهو التعامل باستخدام النيران أنا اعتقد ان المسئولية تكون مشتركة وأنا معرفش ان كان أعطي هذا الأمر أم لا

س17: وهل تعلم ان رئيس الجمهورية السابق كان علي علم من مصادره بقتل المتظاهرين ؟

ج17: يسأل في ذلك مساعديه الذين ابلغوه هل هو علي علم أم لا

س18: وهل تعلم سيادتكم ان رئيس الجمهورية السابق قد تدخل بأي صورة كانت لوقف نزيف المصابين ؟

ج18 : اعتقد انه تدخل وأعطي قرار بالتحقيق فيما حدث وعملية القتل وطلب تقرير وهذه معلومات

هل تستطيع علي سبيل القطع والجزم واليقين تحديد مدي مسئولية رئيس الجمهورية السابق عن التداعيات التي أدت إلي إصابة وقتل المتظاهرين ؟

ج19 : هذه مسئولية جهات التحقيق

س20: هل يحق وفقا لخبرة سيادتكم ان يتخذ وزير الداخلية وعلي وجه العموم ما يراه هو منفردا من اجراءات ووسائل وخطط لمواجهة التظاهرات دون العرض على رئيس الجمهورية ؟؟

ج20: اتخاذ الاجراءات تكون مخططة ومعروف لدي الكل في وزارة الداخلية ولكن في جميع الحالات يعطيه خبر بما يخص المظاهرات ولكن التظاهر وفضه هي خطة و تدريب موجود في وزارة الداخلية

س21 : وهل اتخذ حبيب العادلي قرار مواجهة التظاهر بما نجم عنه من إصابات ووفيات بمفرده بمساعدة المتهمين الاخرين في الدعوى المنظورة و ذلك من منظور ما وصل لعلم سيادتك ؟؟

ج 21 : معنديش علم بذلك

س22 : علي فرض إذا ما وصلك تداعيات التظاهرات يوم 28 يناير إلي استخدام قوات الشرطة آليات مثل اطلاق مقذوفات نارية أو استخدام السيارت لدهس المتظاهرين..هل كان أمر استعمالها يصدر من حبيب العادلى يصدر من حبيب العادلى ومساعديه بمفردهم ؟

ج 22 : ما أقدرش أحدد اللي حصل أيه ولكن ممكن هو اللى اتخذها وأنا ما أعرفش واللى اتخذها مسئول عنها

س23: هل يصدق القول تحديداً وبما لا يدع مجالاً للشك أو الريبة أن رئيس الجمهورية السابق لا يعلم شيئاً أو معلومات أيا كانت عن تعامل الشرطة بمختلف قواتها أو أنه لم يوجه إلى الأول سمة أوامر أو تعليمات بشأن التعامل والغرض أنه هو الموكل إليه شئون مصر والحفاظ على أمنها ؟

ج23 : أنا ما أعرفش اللى حصل أيه لكن أعتقد إن وزير الداخلية بيبلغ وممكن ما يكونش مش عارف بس أنا ما أعرفش

س24 : هل هناك اصابات أو وفيات لضباط الجيش ؟

ج 24 : نعم هناك شهداء

س25 : هل تعاون وزير الداخلية مع القوات المسلحة لتأمين المظاهرات ؟

ج 25 : لأ

س26 : هل أبلغت بفقد ذخائر خاصة بالقوات المسلحة؟

ج26: مفيش حاجة ضاعت لكن هناك بعض الخسائر في المعدات واتصلحت ومفيش مشكلة

س27: هل أبلغت بدخول عناصر من حماس أو حزب الله عبر الأنفاق أو غيرها لإحداث إضرابات ؟

ج27 : هذا الموضوع لم يحدث أثناء المظاهرات واحنا بنقاوم الموضوع ده واللي بنكتشفه بندمره وإذا كان فيه حد محول لمحكمة فهذا ليس أثناء المظاهرات

س28: هل تم القبض على عناصر أجنبية في ميدان التحرير وتم إحالتهم للنيابة العسكرية ؟

ج28: لا ..لم يتم القاء القبض على أى أحد

س29: فى الاجتماع الذي تم يوم 20 يناير هل تم اتخاذ قرار بقطع الاتصالات؟

ج29 : لم يحدث

س30: بعض اللواءات قالوا طلب منا فض المظاهرات بالقوة..هل طلب من القوات المسلحة التدخل لذلك ؟

ج30: أنا قلت فى كلية الشرطة في تخريج الدفعة إن أنا بأقول للتاريخ إن أي أحد من القوات المسلحة لن يستخدم النيران ضد الشعب

انتهى

بيان أسر شهداء ومصابي الثورة- احنا ليه في التحرير

نظرا لما نشهده من تعتيم اعلامي وتضليل متعمد تجاه كل ما يتعلق بقضية شهداء ومصابي الثورة – وهي القضية التي فجرت الثورة المصرية – ولأن حتى الآن لم يحاسب القتلة بل تتم ترقيتهم ومكافأتهم وليس هذا فحسب بل وتطلق يديهم للممارسة الضغوط والتهديدات بشتى الطرق والأساليب مرورا بأحداث البالون وثلاثاء الغاز.. لذلك كله نحن معتمصون منذ ٢٤ يونيو وحتى الآن على أمل أن نجد من شرفاء مصر من يحمينا من البلطجية الذين يمارسون بلطجتهم في ثياب العمل الرسمي.

إن محاولة تصدير قضية دم شهداء هذه الثورة المباركة باعتبارها قضية مادية نسعى من خلالها لتحقيق بعض المكاسب أو تشويه ملامحها عبر إلصاق تهمة البلطجة بالشهداء وترويج أن الضباط القتلة كانوا يدافعون عن أنفسهم وعن مقار عملهم، هو تضليل وتزييف للحقائق التي تشهد عليها الكاميرات والوثائق. وعليه فإننا نؤكد نحن أهالي شهداء ٢٥ يناير على أن مطالبنا هي التالية:

١- حبس الضباط المسئولين والقيادات المتهمين بقتل خيرة أبنائنا وأخوتنا وذلك لمنعهم من الاستمرار في التأثير علي الشهود وطمس الأدلة وترويع أهالي الشهداء والشهود

٢- الاسراع في إحالة بقية قضايا قتل المتظاهرين التي لم تحال الي المحاكم الجنائية وتقصير مدة تأجيلات القضايا المنظورة بالفعل وسرعة تفريغ الدوائر

٣- تكوين فريق متفرغ من أكفأ رجال النيابة العامة يختص بالتحري وجمع الأدلة والمعلومات المتعلقة بالقضايا التي أحيلت من قبل

٤- اصدار بيان رسمي من وزارة الداخلية يتضمن اعتذارا رسميا للشعب المصري عامة ولأهالي الشهداء خاصة عن الممارسات التي حدثت تجاه هذا الشعب ويقر بأن شهداء ٢٥ يناير ليسوا بلطجية

٥- تشكيل لجنة دائمة من أهالي الشهداء ومحامييهم ورئاسة الوزراء وأعضاء من فريق النيابة العامة تكون مهمتها تذليل كافة العقبات التي تحول دون سرعة الفصل في هذه القضايا

٦- بث محاكمات المتهمين بقتل الثوار على محطات التليفزيون بثا مباشرا دون تعليق ذلك علي إذن القاضي أو أي جهة أخرى

٧- تكريم شهداء الثورة والمصابين ومساواتهم بشهداء الحرب وإعطائهم وسام الدولة

٨- إقالة وزير الداخلية والنائب العام لعدم قيامهما بواجبهما نحو دماء الشهداء وملاحقة قاتليهم

أخيرا، نؤكد أن مطالبنا ليست مستحيلة وليست مخالفة للقانون فأصل القانون هو إقامة العدل وأداء الحقوق ونحن فقط نطالب بحق دماء أبنائنا

أسر شهداء ومصابي ٢٥ يناير

٢٢-٧-٢٠١١

http://egyleftparty.org/?p=1535

سؤال ورد غطاه

في اسأله كتير بتتسأل وتعليقات كتير بتتقال من اول يوم في الثورة ولحد النهاردة مصدرها الناس اللي اتفرجت على الثورة في التيليفيزيون وتابعت تفاصيلها لحظة بلحظة من الجرايد

لذا وجب توضيح ما يلي على قد اللي انا شفته بنفسي والله على ما اقوله شهيد

1- الثورة سلمية :

بالتأكيد الثورة سلمية لان الشعب مش مسلح ومارحش رفع ار بي جيه في وش الشرطة ولا الجيش لو من المنطلق دا فهي بالتأكيد سلمية انما على ارض الواقع الثورة دي اتقل فيها اكتر من الف شخص في اقل من 10 ساعات يوم 28 يناير !مما دعى الثوار في اماكن عديدة للرمي بالحجارة وصناعة قنابل مولتوف بسيطة وحرق مدرعات الشرطة دفاعا عن النفس

2- اللي مات قدام اقسام الشرطة مش شهيد :

فعلا هو مش شهيد وبس دا فدائي !ضحى بنفسه عشان الاف يعيشوا!اقسام الشرطة ووزارة الداخلية كان على اسطحها القناصة وافراد مسلحين بيقتلوا اي حد معدي في المظاهرات غدر حتى لو هو بعيد عنهم واللي راح هجم على الاقسام كان بيحاول يوقف شلال الدم الطاهر مضحي بنفسه في سبيل الاخرين

3- مش دول ثوار 25 يناير:

وكأن ثوار 25 يناير اخدوا ختم معين او تم عمل كشف ثورة عليهم او طلعلهم كارنيهات او اتعمل قوائم باسمائهم! ساهم الاعلام بشكل كبير في الصورة المغلوطة دي بتصوير الثوار على انهم الشباب المستحمي الامور المتعلم !الثورة كان فيها كل طوائف الشعب بكل اشكالهم بكل انواعهم بكل طبقاتهم بكل توجهاتهم بنفس النسب اللي موجودة في الحياة الواقعية ..عزيزي انظر حولك هما دول المصريين لو مش عاجبينك تبقى دي مشكلتك والناس مش مسؤولة عن هلاوسك الشخصية

4- يا جماعة عجلة الانتاج !

هي كانت فين "عجلة الانتاج"دي طول عمرها في التلاتين سنة اللي فاتوا!المصانع اللي اضربت كانت مصانع حكومة المصانع دي عمرها انتجت ايه اي حد طبيعي من اللي بيشتكوا من عجلة الانتاج عمره استخدم اي من منتجات المصانع الحكومية!

عمال المصانع طول عمرهم بيضربوا ولا عمرنا سمعنا عن حد داري بيهم اصلا وعمر حد جاب سيرة عجلة الانتاج اللي واقفة

5- الجيش حمى الثورة

الجملة دي دايما بتتقال وما ببقاش فاهمه ايه المقصود بيها بالضبط! الجيش ظهر اول مرة يوم 28 يناير بالليل في صورة الحرس الجمهوري واللي كان دوره امداد الامن المركزي بسلاح بعد ما سلاحهم خلص علينا ! وسكتوا 3 ايام ويوم موقعة الجمل كانوا واقفين عل كل مداخل التحرير اللي دخل منها البلطجية اللي دخلوا ع الناس بالجمال والاحصنة والمولوتوف ولما كنا بنستنجد بيهم كانوا بيردوا يقولوا الجيش محايد !مش عارفه ايه الحياد في موقف زي دا ناس قاعدة في حالها بدون سلاح وناس داخلة عليها بسلاح يموتوهم والجيش شايف انه لازم ياخد موقف محايد الا المدخل اللي كان واقف عليه الضابط ماجد بولس "مش متذكرة رتبته" اللي رفض يدخل البلطجية وضرب نار في الهوا ونزل على ركبه يبكي وباس رجل احد الثوار في مشهد مؤلم ابكى كل اللي حضروه

دا غير هجوم الجيش على المتظاهرين يوم 25 فبراير في التحرير وعند مجلس الوزرا ونزلوا فيهم ضرب بالعصيان وبعصيان الكهربا وهجومهم يوم 9 مارس ويوم 9 ابريل ويوم ماكان الثوار عايزين يدخلوا لاظوغلي لما حشروا الثوار في شارع مالوش مخارج وضربوا نار من ناحية والبلطجية بيحدفوا مولوتوف وداخلين على المتظاهرين بالسنج والمطاوي من الناحية التانية ! دا غير المحاكمات العسكرية الظالمة اللي لما بيتعاد اي واحدة فيهم امام قاضي مدني اللي المحكوم عليه ب 5 سنين بياخد براءة !

وحدث ولا حرج على اننا بعد مرور 6 شهور مافيش اي انجاز يذكر بخصوص الداخلية او محاكمة القتلة او محاكمة حسني مبارك وعصابته ولسه الثوار في السجون والفاسدين بياخدوا براءات والعادلي محاكمته بتتأجل

6- انتوا لولا الاخوان كنتوا موتوا يوم موقعة الجمل

مش حقيقي بالمرة ..الاخوان نزولهم الرسمي كان بعد موقعة الجمل اصلا ..وممكن الرجوع لتصريحات العريان قبل وبعد يوم 25 يناير للتأكد

بس دا ما ينفيش ان كان في شباب من الاخوان معانا في التحرير وفي كل مدن مصر من اول يوم في الثورة بس بصفتهم مصريين

والفضل كل الفضل في انتصار الثوار يوم موقعة الجمل يعود لرجالة المناطق الشعبية وشباب التراس الزمالك والسلفيين الخارجين على شيوخهم الداعيين بحرمة الخروج على الحاكم والنشطاء السياسيين اللي كانوا حاضرين الموقعة واطفال الشوارع ومن الوجوه المعروفة اعلاميا الشيخ صفوت حجازي كان في الصفوف الاولى مع كل من سبق ذكرهم

7- الثوار كل ما يحققولهم مطلب سقف مطالبهم بيعلى

الثوار مطالبهم ثابتة من اول لحظة ..مش هنكر دور وسائل الاعلامية الرسمية في تضليل الناس بتصوير المطالب بغير حقيقتها ولما الحكومة تعمل اي حاجة يقولوا اهم عملولكم اللي انتوا عايزينه قاعدين ليه! في حين ان اللي اتعمل ماحدش طلبه في الواقع

اكبر مثال على كدا اننا يوم 25 يناير هتفنا الشعب يريد اسقاط النظام ولما المخلوع عبرنا وعمل شوية تغييرات واقال حكومة نظيف وشكل لجنة لتعديل الدستور وقال لم اكن انتوي الترشح طلعوا علينا الناس يقولوا ماكفاية كدا اهو عمل اللي انتوا عايزينه! لا مش دا اللي احنا كنا عازيزينه !لو كان عمل الاصلاحات دي قبل يوم 25 يناير قبل العنف والقتل يمكن كنا فرحنا ورضينا بس هو عملها بعد فوات الاوان تماما وبعد ما المطلب بقى واضح وصريح "ارحل" !

8- المعتصمين في التحرير بلطجية وبينادوا بتطهير الداخلية هما بيعملوا زيهم فرقوا ايه عن الداخلية

تساؤل اخر سببه في الاساس الاعلام الضلالي ..المعتصمين حاليا في التحرير هم اهالي الشهداء وبعض المتضامنين معهم وقلة قليلة من القوى السياسية اللي بتحاول تاخد مكاسب على قفا الاعتصام والكثير الكثير من الامن !

ايوا الاعتصام الموجود حاليا مخترق بدرجة كبيرة جدا والعناصر المدسوسة هي اللي بتقصد تعمل كل المشاكل لتصوير الاعتصام والمعتصمين وكانهم ناس مجنونة مفترية بلطجية في حين ان المعتصمين بيعانوا معاناة الله العليم بيها لمحاولة السيطرة على العناصر المدسوسة وايقاف المهازل اللي بيعملوها

ناخد الشاب اللي اتعلق على الشجرة كمثال:الشاب دا بلطجي طبعا حاول اقتحام الميدان هو و 25 بلطجي اخر وقاموا بطعن 7 بنات وشباب واقفين عند احد اللجان الشعبية واصابوهم اصابات بالغة وجري كل المعتصمين وراهم وماعرفوش يمسكوا غير اتنين طبعا اتضربوا ودا رد فعل طبيعي انا شخصيا مش معترضة عليه !اما التعذيب اللي حصل فبكل تأكيد مش محتاجة اقول اني ضده واني وناس تانية كتير انهاروا واللي انقذ البلطجي اللي كان على النخلة هما ناس مننا واللي كانوا معلقينه هم العناصر المدسوسة من الامن ...دا غير ان باستجواب البلطجي دا بعد ما انقذناه مين اللي باعتك قال مأمور قسم عابدين :) يعني حتى الداخلية مش عارفه تنسق مع بعضها او بيضحوا بالبلطجية في سبيل تثبيت فكرة ان المعتصمين ناس واطية!

مشكلة الشاب دا مش اول ولا اخر مشكلة بيواجهها المعتصمين..كل 5 دقايق في افتعال لمشكلة جديدة ..والقدر وحده اللي خلى يسري فودة يفضح الفضالي ويطلع فيديو يبين تورطه في موقعة الجمل في نفس اليوم اللي كان الفضالي فيه عندنا في التحرير عامل نفسه من الثوار وجايب واحد بلطجي معاه وبيحاول يقنعنا ان البلطجي بتاعه وبلطجيته هيجوا في 14 عربية نص نقل عشان يأمنوا الميدان مادام امن الميدان عندنا مخترق!الناس ماوفقتش بس ماكناش عارفين دا مين لولا القدر فعلا انه في نفس اليوم يتفضح مع يسري فودة وتاني يوم بلطجيته افتعلوا مشكلة كبيرة جدا مع الباعة الجائلين وضربوهم بالشوم وضربوا اي حد بيصور وطردوا كل الصحفيين والكاميرات من الميدان

المعتصمين حاليا بيواجهوا اكتر من مشكلة !التشويه الاعلامي ..الاختراق الامني الكامل للاعتصام...غضب الناس اللي في بيوتهم ...احتمالات هجوم بلطجية مأجورين مبعوتين من اقسام الشرطة..هجوم الجيش او الشرطة ..

الناس دي سايبة بيتها وحالها بقالهم اكتر من اسبوعين عشان حق الشهدا ومش بيتاجروا بيه زي ما بعض الناس والاعلام بيوصفهم !حق الشهيد يعني تطهير واعادة هيكلة الداخلية يعني تطهير القضاء يعني تطهير الاعلام يعني القصاص من القتلة وايقافهم عن العمل ومحاكمتهم فورا بدون تحايل يعني اقالة النائب العام ..حق الشهيد مطلب انساني شامل

لو اتحقق المطلب دا اضمن برقبتي ان الاعتصام في التحرير هيتفض

لو افتكرت اسأله تانية هكتبها بعدين كفاية كدا دلوقتي عليكم وعليا

سلام

قـــهــر

التاريخ : 1-1-2011

المكان : دوران شبرا

وقفت سيدة في العقد الخامس من العمر تبكي بحرقة صارخة (اهتف اهتف علىَ الصوت الكنيسة مش هتموت) ظلت ترددها بهستريا وبحماس تصاعدي تقشعر له الأبدان ..لم نتحمل أنا وصديقتي مريم الموقف ..بكت مريم بحرقة بينما حاولت أنا التماسك قدر المستطاع ...التفتت السيدة باتجاهنا قائلة بانفعال ودموعها تغطي وجهها (ماتعيطوش ..اهتفوا ماتعيطوش ..اهتفوا )

فلاش باك سريع ..شهداء نجع حمادي...مشهد قتل محمد الدرة ..مروة الشربيني ....فلاش باك ابعد ...هولوكوست...هيباتيا...بلال ..آل ياسر..جان دارك ...تتكاثر الصور وتتسارع حتى لما أعد قادرة على تمييز الوجوه .

كدت اخبر المرأة ان اسمي فاطمة ....واني فعليا لا تعنيني الكنيسة الا في كونها رمزا يمثل بشرا ..نعم ..فالأهم عندي البشر وليس الرموز ...

لم أرغب أن أخبرها اني واقعيا لا أحب الصليب..ليس لأسباب دينية ..أو تأثرا بخطاب تحريضي ..لم يتم تلويث عقلي وحشو نفسيتي بأي كراهية ..ببساطة لا أحب الصليب لأنه رمز للتعذيب ...وأنا ليس عندي قدرة على تحمل الألم سواء البدني أو النفسي ..لا ألمي ولا الآم الأخرين .

لكني وودت لو أخبرها أن في صدري صرخة ..وعلى طرف لساني آه كبيرة ...حرقتها موجعة ..والقهر الذي تشعر به يكاد يسحق قلبي ...لماذا يقتل انسان فقط لانه يؤمن بدين دون آخر ! او لا يؤمن بأي دين أصلا ! لما يالله يقتل البشر بعضهم بعضا باسمك ؟!

فلاش باك مرة أخرى ...وثني يقتل مسلم ...مسيحي يقتل وثني ...يهودي يقتل مسلم ...مسيحي يقتل يهودي ...مسلم يقتل مسيحي ..كلهم باسم الإله !

تركتها وابتعدت قليلا في محاولة يائسة مني للهرب من الالم ..واقول محاولة يائسة لان الالم كان محيطا بالمكان من كل الاتجاهات ..

وقفت بجوار سالي ..التي كانت تقف بدورها مع آخرين امام مجندي الأمن المركزي في محاولة منهم لمنعهم من تضييق الدائرة المحيطة بنا ..أخبرتني سالي أن مجند الأمن المركزي الذي يقف خلفها مباشرة قبطي ..نظرت باتجاهه كرد فعلي فوري ..لمحت وشم الصليب على يده ..ورأيت دموعه ..رآني هو ..اشاح بوجهه بعيدا عني وهو يهمس بكلمات لم اتبين منها غير "الواحد في النص ..مش عارف اعمل ايه " جاء صوت الضابط بغيضا غليظا من خلف المجند .." زق يا عسكري زق " صرخنا جمعيا " كفاية.. مافيش مكان " محاولين دفعهم حتى لا يضيقوا الدائرة حول المتظاهريين ...اخترق الصوت البغيض مرة اخرى اذني قائلا .." زق يا عسكري ..واضرب كمان "

في صباح اليوم التالي طالعتنا جريدة الأهرام الحكومية بمانشيت في الصفحة الأولى يشيد بمظاهرة شبرا مؤكدا على الوحدة الوطنية

انتهى