تحديث :
تقريبا قدرنا نوفر كل كمية الدوا المطلوبة ..هنروح يوم الاربع الساعة 12 الضهر مركز تأهيل القوات المسلحة بالعجوزة خلف مستشفى العجوزة عشان نزور المصابين ونسلم المستشفى الدوا اللي جبناه ..لو في اطباء يحبوا يجوا معانا يتطلعوا على حالة المصابين يكون عظيم ...اشوفكم كلكم هناك :) اشكركم جدا جميعا بجد
بدون مقدمات عاطفية وهدخل في الموضوع على طول
مصابي الثورة احنا مقصرين في حقهم بدرجة كبيرة جدا الا قلة قليلة لسه بتسأل عليهم وبتشوف احتياجاتهم وبتدور عليهم على قد ما يقدروا
كان نفسي مانحتاجش نعمل مبادرة او نستنى مبادرة وكل واحد فينا من نفسه كان يخصص نص ساعة كل اسبوعين لمصاب من مصابي الثورة ..بس واضح ان الدنيا تلاهي والمشاكل كتير والناس مشغولة في حاجات لا تقل اهمية عن الموضوع دا
انا بشكل شخصي مش شايفة ان ليا دور في الفترة القادمة وموضوع الانتخابات اللي داخلين عليه ..وبما اني فاضية نسبيا دلوقتي فمش شايفة حاجة اهم من مصابي الثورة
في مركز تأهيل العجوزة ..دا مركز تأهيل تابع للقوات المسلحة خلف مستشفى العجوزة .في مركز التأهيل دا في 10 من مصابي الثورة المصابين بشلل بدرجات مختلفة
بيتعاجلوا على نفقة القوات المسلحة في الحقيقة بس في استشاري مهم زارهم من فترة ووصى بدوا اسمه cerebrolysin
الدوا دا بيعمل حاجة اسمها nerve regeneration
وبيفرق جدا جدا في حالة المريض
في ناس تبرعت بعدد من علب الدوا قبل كدا وبعد شهرين من العلاج حصل الاتي :
محمد سمير بدأ يحرك رجليه
تامر بدأ يمشي على عكاز
محمد ربيع داخل يعمل عملية قريبا وفرصه في الشفا ارتفعت جدا بسبب الدوا
رندا ابتدت تتحرك
رشا ابتدت تحس برجلها
الموضوع ايه بقى..ان المستشفى لا تتكفل بتمن الدوا وخارج ميزانية العلاج المخصصة .اعتقد معتبرينه دوا رفاهية مادام هما بيعملوا العمليات اللازمة وبيعملولهم التأهيل
الدوا تكلفته مرتفعة جدا ..زي ما قلنا هم 10 مصابين..كورس العلاج 8 اسابيع ..كل مريض بيحتاج 6 علب في الاسبوع وعلبة الدوا ب 150 جنيه ..اعملوا انتو الحسبة :)
عندي امل نقدر نوفرلهم علب الدوا ..احنا مش قليليين لو كل مجموعة اشتركت في علبة واحدة اعتقد اننا هنقدر
المجموع 480 علبة بس بسببهم ممكن ناس مش قادرة تمشي تقدر ترجع طبيعية
العلب نقدر نسلمها في ادارة المستشفى ..عند مدام اميرة مديرة مكتب مدير المستشفى دكتور رضا ويتم تبليغهم ان دا لمصابي الثورة
الاهم بقى من دا كله ..مصابي الثورة بيسألوا ..هو الناس فين !ماحدش بيزورنا ليه!
22 التعليقات:
السلام عليكم و جزاكي الله الف خير انا ممكن اتبرع بثمن ١٢ علبه بس اتواصل ازاي معاكي او مع اي مستشفي او اعمل ايه علي الاصح
اشكرك جدا بجد انا سعيدة جدا :) انا كتبت التفاصيل في الموضوع ممكن تسلم العلب مباشرة لادارة المستشفة مدام اميرة مديرة مكتب مدير المستشفى دكتور رضا ..وتبلغهم ان دا لمصابي الثورة المستشفى في العجوزة خلف مستشفى العجوزة مستشفى تاهيل القوات المسلحة اشكرك جدا جدا فعلا
ان شاء الله سأتكفل بعدد 48 علبه اى كورس كامل لواحد من المصابين
بس انا عندى اقتراح ان يتطوع احد بتجميع العلب وايصالها للمستشفى حتى نعرف الكميه الباقيه المطلوب توفيرها
اشكرك جدا جدا جدا التبرع للمستشفى منعا لاي تشكك وعشان الناس تكون متطمنة اضمن وافضل وانا متابعة مع المستشفى على طول واول ما نقرب نوصل للعدد هبلغكم هنا عشان نتوقف :) اشكرك جدا
ممكن يا فاطمة ننسق لزيارات جماعية كل مجموعة تعمل زيارة فى يوم مختلف أنا ممكن أروح أى يوم فى أى وقت بس هاكون محرجة لو رحت لوحدى على الأقل أول مرة
انا ناوية نعمل كدا ان شاء الله ..اعتقد اني كتبت دا في الموضوع ! نسيت اكتبه يظهر! عموما ان شاء الله هنعمل كدا :)
طيب انا ممكن اتبرع ب 12 علبة بس انا برة مصر وهحتاج حد يروح لصيدلي معرفة في الجزية ش الصناديلي ياخد منه الدوا لما يجهزه
بلغيني اول ما يجهز وانا هروح اخده وابعتيلي العنوان بالتفصيل ..اشكرك جدا جدا جدا بجد :)
جزاكى الله خيرا بجد :) طب انا ممكن اتبرع بفلوس لوجودى خارج مصر؟؟
انا اسفه انا عارفه اني بصعبها علي اللي برا مصر بس انا فعلا ما باخدش تبرعات منعا لاي تشكك اواحراج عشان كدا التبرع بالدوا يعني عيني مش فلوس وفي المستشفى عشان الناس تكون متاكدة ان فلوسها راحت لمستحقيها ..لو في حد في مصر تقدر تكلفه بالمهمة اكون شاكرة جدا
''ان شاء الله اظبطها و ابعت لك ..شكرا يا فاطمه:)
اعملى حسابنا فى 3 علب باذن الله يوم الأربع هيوصلوا المستشفى
فاطمه انا ان شاء الله حااوصل ال 48 علبه للمستشفى بكره باذن الله ينفع والا لازم استنى ليوم الاربعاء؟
من فضلك لو فيه مصابين آخرين محتاجين اى ادويه او اجهزة او مساهمات فى جراحات ياريت تعرفينا
جزاكى الله كل خير
الله يكرمك يا ليليان بجد :) مش لازم تستني للاربع بس انا افضل لو ينفع تستني للاربع :) يعني عشان نتقابل في المستشفى ونسلم على المصابين ..في اكتر من حد جاي وهتبقى حاجة كويسة ومبهجة بالنسبة ليهم ..لو مش مناسبك الاربع يبقى وديهم وقت ما تحبي ..متشكرة جدا ليكي بجد
انا مش حا اقدر اروح غير يوم السبت انشاء الله يوم الاجازه جزاكم اللهكل خير و كان نفسي اكون معاكم انشاء الله المره الجايه
الزيارة في كل وقت حلوة ..ربنا معاكم جميعا ..اشكركم جدا :)
ليليان انا مارديتش انشر رسالتك الاخيرة عشان فيها رقم تيليفونك بس بجد انا بشكرك جدا جدا جدا على الدوا الله يكرمك يارب وان شاء الله نتقابل قريب في زيارة تانية انا فعلا احب اتعرف عليكي :) اشكرك فعلا من قلبي مرة تانية
مينفعش التبرع بطريقة تانية. .. اصل الصراحة مش واثق فى بتوع المستشفى!
يا نهار أبيض...دا أنا لميت من زمايلى فى الشغل 4000 جنيه و كنت ناوى اروح بكرة و دلوقتى إنتى بتقولى إن كميات الأدوية إتوفرت
دلوقتى أنا لميت من زمايلى فى الشغل 4000 جنيه عشان نشترى الأدوية و حضرتك بتقولى إن خلاص كل العلب إتوفرت أعمل إيه!!!!!
السلام عليكم النهارده انا رحت وديت الادويه ال١٢ عليه لمدام اميره بس قالت لنا ان المصابين في جلسه العلاج الطبيعي فمعرفناش نقابلهم كان نفسي اقابلهم و نسلم عليهم احنا رحنا الساعه ١١ الصبح ، مره ثانيه انشاء الله . كان نفسي اكون معاكم يوم الاربعاء اللي فات علشان اتعرف عليكي نفسي كنت اعرف الانسانه المحترمه اللي زيك . يا ريت لو فيه ادويه او حاجات ثانيه تقوليهالنا
Post a Comment