Saturday, August 09, 2008

عندما تحترق الفانيليا ...


بعض الاشياء عند تعرضها للنار تنتج رائحة شدية الكراهه
والبعض الاخر يبقى كما هو يحمل نفس الرائحة
وبعض قليل تفوح منه رائحة زكية جميلة


حقا ..بالنار تختبر الاشياء ليتكشف معدنها الاصلي
وبنار الصعاب والأزمات والشدائد يختبر البشر ..

يارب..اجعلني كالفانيليا عندما تحترق :)

38 التعليقات:

samamasr said...

طيب هي ريحتها ايه لما بتتحرق

حلوة صح؟

Founoon said...

حلوة اويييييي يا ايمان :)

وحشتيني جدا على فكرة

اشتري بربع جنيه كيس فانيلياصغير وفضيها في طفاية وولعي فيها وادعيلي :)

بس حاسبي تحرقي حاجة تانية الله يخليكي :)

amr said...

اعتقد ان ساعتها رسحتك هتكون احلى من ريحة الفانيليا .... :))

بعد الشر طبعا عليكي من النار :)

amr said...

بس تعرفي .... في مواقف كتيييييير ممكن الواح يتحط فيها و ساعتها بيبان معدنة الحقيقي .... صدقيني بتكون اشد فتكا من النار ... اسالي مجرب ...

samamasr said...

ههه.طيب تتحرق ليه :D

samamasr said...

طيب بصي..

هي دي شمعة بالفانيليا علشان تعمل ريحة حلوة :D

Founoon said...

اللي في الصورة يا ايمان شمعة بالفانيليا ايوا

بس هيا الفانيليا عموما لما بتتحرق بتطلع ريحة حلوة

مش لما بتعملي كيكة وتحطي فيها فانيليا وتحطيها في الفرن بتطلع ريحة حلوة :)

Founoon said...

عمرو

يعني احرجتني جدا بزوقك والله اشكرك جدا

ومعاك ان في بعض الاحيان بنمر بحاجات اصعب من حرق النار

اسعدني ردك

samamasr said...

امم

طيب هو معنى الموضوع ايه؟!!

amr said...

موضوع اية !!!

banouta masreya said...

تصدقى ان الفانيليا دى اكتر ريحة بحبها فى الدنيا و بيتريقوا عليا على طول و على بافرانات ال"baking powder" اللى بحطها:D
انتى ايه حكايتك معايا يا بنتى :))

بعيدا عن الفانيليا عايزة تعرفى اللى جوه البنى ادمين شوفى بيبتسموا ازاى
مش بيقولوا العيون بتبين اللى جوه الناس؟
الابتسامات بتبين اكتر بكتير..لو ركزتى فيها مش هتحتاجى مواقف عشان تعرفى اللى قدامك عامل ازاى من جواه
المنافق له ابتسامة..الكذاب له ابتسامة..المدعى له ابتسامة..الندل له ابتسامة

بس عموما خليكى فاللى جواكى انتى اللى جوه الناس متعب اوى و بيوجع القلب فى اوقات كتير..تصدقى الواحد ما يعرفوش احسن

samamasr said...

لا كان قصدي موضوعها

عندما تحترق الفانيليا

كنت دلوقتي بس هقولها


""""

انتي قصدك يعني لما الحياة تنتهي تسيبي أثر طيب بإذن الله


صح ؟

""""""


هو ده الموضوع :)


تحترق إزاي بس :)

كنت بس بسأل عن الموضوع ده :)

The Seagull said...

انتي طول عمرك زي الفانيليـا لمـا بتتحرق يا فنون :)

ربنا يوفقك في حياتك و ينولك مرادك :)

dr_samarmar said...

موضوعك جميل أوى أوى يا فنون معناه رائع و جبتيه فى سياق تحفة

تسلم ايديكى بجد

فعلا الناس مش بيبان معدنها الا فى الشدائد .... عمرك ماتقدرى تميزى حد الا لما تشوفيه فى موقف حقيقى


بجد بوست جامد ;)

Mohamed Hamdy said...

بوست جميل اوى وتشبيهاته بجد رائعه

ربنا يحققلك امنيتك وتبقى زى الفانيليا لما بتتحرق .. وطبعا سلامتك من النار

تحياتى ليكى .. وابقى شوفى مدونتى

Here i'm said...

و بعد ما تتحرق الفانيليا أيه اللى بيحصل ؟؟!!!!!

و لا حاجة .. راحت الفانيليا و أتنست الريحة و هيا كمان اتنست

Founoon said...

بنوتة مصرية

انا بحب ريحتها بجنون

انا زيك كل بارفاناتي لازم فانيليا

عجبتني فكرة الابتسامة مع اني من انصار العيون

بس هبقى اركز في الابتسامات كمان

Founoon said...

سمامصر

اقصد ان لما تمر بيا مواقف صعبة وتبان حقيقتي تكون حقيقتي حلوة وما كونش انا اول المصدومين في نفسي لما يتضحلي ان حقيقتي وحشة

دا خلاصة الموضوع

الاحتراق= مواقف صعبة تظهر الانسان على حقيقته

Founoon said...

سي جل

الله يكرمك دانتي على رأي اللي قال احلى من الشكولاته :)

ربنا يسعدك يارب

Founoon said...

د سمرمر

اها

في ناس ما بتعرفيش حقيقتها الا في الشدائد

اشكرك على ردك بد بيسعدني جدا كل مرة :)

Founoon said...

محمد حمدي

اشكرك جدا ورايحة مدونتك حالا :)

نورتني

Founoon said...

يادي النيلة يا كوبري :)

الفكرة من الموضوع مش الاثر اللي بتتركه الفانيليا وبس

الفكرة ان عند الاحتراق تظهر الحقيقة غالبا

اتمنى ان تكون حقيقتي ذات رائحة جميلة كرائحة الفانيليا عندما تحترق والا تكون رائحة كريهة

اتمنى ان لا اصدم او يصدم احد في حقيتي في حال تعرضي للشدائد او المواقف الصعبة

وصلت يا حاج ؟؟!!

موضوع الاثر الذي اتركه دا حاجة تانية خالص بعيدة عن موضوعي

Here i'm said...

أنا مش ذنبى انك مفهمتيش تعليقى يا هانم :D

أنا قصدى .. طيب أتحرقى و طلعتى ريحة جميلة .. و بعدين .. أيه اللى حصل

أنتى روحتى و راحت ريحتك ..


الشدائد و المواقف الصعبة مبتحرقش .. الشدائد بتبنى اللى عايز يبنى .. و بتحرق اللى عايز يتحرق ..



حقيقتك .. مش كل الناس حتشوفها أو حتشمها حلوة .. دا بالعكس فى الزمن اللذيذ دا .. الناس الوحشة هيا اللى صوتها عالى و واصل .. يعنى حتى لو رحتك حلوة برضه حتلاقى اللى بيكب عليها بيروسول ..


مين دا اللى كاره دنيتك و حياته فى سكوتك

مين دا الموته بكلمتك و بيشتهى موتك

samamasr said...

آه..فهمت :D

Founoon said...

ممممم

لو لاحظت

في ردي انا قولت مش عايزة اكون اول المصدومين في نفسي لما اشم ريحتي والاقي حقيقتي وحشة

لا يعنيني عجز البعض عن رؤية الحقيقة لو كانت حقيقتي حلوة

ولا يعنيني حقد الحاقدين اللي بيحاولوا يشوهوا حقيقتي ان كانت حلوة

يعنيني فقط ان تكون حقيقتي فعلا حلوة

لمواقف والشدائد بتحرق الانسان من داخله وبتخليه يبان على حقيقته

نتيجة للحرق اما يكون البناء او الهدم

بس في البداية الاحتراق

نورت يا حاج :)

momken said...

الف سلامه وبعد الشر عنك

انتى بتطلقى احلى الروئح بروحك الجميله
وربنا ميجبش نار

فانت كزهره جميله لا تحتاج الى دافع لتمنحنا احلى العطور

بوست حلو
تحياتى

كاتب مصري said...

ليه هي الفانيليا بتتحرق ازاي
ههههههههه
كل ودي ويارب تكوني زي الفانيليا وكمان تشرفينا

Founoon said...

ممكن

اشكرك على كلامك الحلو في حقي

وشكرك على الزيارة :)

Founoon said...

كاتب مصري

الفانيليا بتتحرق عادي زي اي حاجة بتتحرق :)

ناتج الاحتراق هو المهم

نتاج احتراق الفانيليا رائحة جميلة

اتشرفت بردك واكيد هزورك دا شرف ليا

اشكرك

Cold air said...

ازيك يا فنون

فكرة البوست حقيقي تحفة و مميزة
لكن بعد الشر عليك من النار مهما كانت شكلها من هموم و احزان او حتي إختبار

مع تحياتي

relove said...

ربنا يجعلك ممن تفوح منهم رائحة المسك

dr.lecter said...

اه فعلا نفسي اعرف مين قال احلي من البشوكولاته جرررررررررررررررر

Founoon said...

كولد اير


اشكرك جدا على كلامك الجميل وزوقك :)

Founoon said...

ريلوف

اااااامين يا رب

جزاكم الله خير ا على الدعوة الرائعة دي وجعلك منهم انت كمان :)

Founoon said...

لكتر

ههههههههههههههههههه

اه صحيح

مين يا تري :)

الشارده said...

النار زى ما بتحرق بتطهر
شفتى مسلسل عصفور النار؟
اطهر قلوب الدنيا قلب اللهيب
اصدق لسان كان لسان اللهب
جنون غضب بعده السكون الرهيب
تصفى النيران وتبان حقيقة الدهب

Ahmed EL Masry said...

طب يا فننس , وبمناسبة الروايح يعنى , دلوقتى انتى بتشتهى ريحة الفانيليا دى لما بتتحرق, انا عندى بنى ادمين بيركبوا معايا العربيه وبعيدا عن جو اشعال الحرائق دا , ما شاء الله بتطلع منهم روايح , تقوليش فلورا برائحة الياسمين - مع الاعتذار للياسمين D:- ! ,فا الواحد دلوقتى مش محتاج انه يحرق الى قدامه عشان يعرف هايطلع ريحه ايه , الناس دى بتنزل بروايحها اصلا S:

بس سيبك انتى , حضرتك حتة جاتوه مزينه بالفانيليا وعليها حبايه كريز من فوق ومش من عند اى جاتوهاتى , لا من لابوم شخصيا .. واحشانى والله D:

Founoon said...

ايمان

بتقولي حكم والله :)

المصري

دانت بتعاكسني بقى :)))))

دوعابة ...ربنا يكرمك يا احمد يارب كلك ذوق والله