Friday, September 12, 2008

لخبطة !!!!!

مصر يعني ايه

هل مصر هي الاثار ...والمباني والشوارع .يعني جماد !

ولا الذكريات واللي عدى واللي فات ..يعني وهم !!

ولا مصر يعني شعب ..يعني المصريين اللي كلنا بننتقد فيهم طول النهار مع اننا منهم وهما منا واحنا زييهم وهما زيينا يعني احنا واحد !

ولا مصر يعني حكومات ...

ولو حكومات ..فأنهي نوع من الحكومات ...هل الفراعنة ...ولا الهكسوس ..ولا الرومان ..ولا الدولة القبطية المسيحية ..ولا العربية المسلمة بعد الفتح الاسلامي

ولا الاموية ولا العباسية ولا الفاطمية ولا المماليك ولا العثمانيين ولا محمد على ولا فؤاد وفاروق ولا الجمهورية لما حكمنا حد منا بدئا بجمال مرورا بالسادات وانتهائا بمبارك ؟!!!

ولا مصر سحابة سودا وحريق في الاوبرا وقصر الثقافة ومجلس الشورى ..وحوادث القطر ..والعبارة والدويقة والمسجونين عشان قالوا لأ

ولا مصر اقطاع ..ولا اشتراكية ولا ملكية ولا جمهورية

مصر هي رقاصة وطبال وميلودي تتحدى الملل...ولا شيوخ بدقون وستات منتقبة ...ولا الله حي ومولد وصاحبه غايب ..ولا مارجرجس بيظهر في الازمات ولا شالله يا ام العواجز !!!

مصر هي ابن الجنايني بقى ظابط يا انجي ...ولا ابن الريس لازم يبقى ريس يا رشا !

ولا جواز عتريس من فؤادة باطل ..... ولا هي دي مصر يا عبلة !!!

ماهو ابن الجنايني لما بقى ظابط يا انجي ...جاب صحابه الظباط واحتلوا البلد وعملوا في ولاد الجنايني الجديد زي ماتعمل فيهم بالظبط !!!

وعتريس على فكرة كان بيحب فؤادة ...وفؤادة بردو حبت عتريس بس كرهته !!!

دلوقتي حاتم بيحب نور ..بس نور بتكره حاتم ...حاتم من كتر حبه لنور عايز يجيب ولد منها بالعافية ...ونور مش عايزة
لك الله يا بلد ...بجد صعبانه عليا

*******

لما الدنيا بتقفل قدام عنيا ..بقفل عنيا واقنع نفسي انها كويسة بس انا اللي مغمضة
لحد ما يجي النور يخبط على كتفي ويقولي افتحي عنيكي خلاص فرجت ..

مش هروب ولا استسلام ...بس انا تعبت من المقاوحة والمعافرة ...وايقنت ان كل حاجة بتعدي
الدنيا شخصيا هتعدي ..وزي ماعدت باللي قبلنا هتعدي بينا ...

لو وقفت عند كل حاجة مش هعرف اكمل طريقي ...في حاجات لازم نعديها ونمشي من غير ما نقف عندها

ايقنت كمان ان مافيش نص فاضي ونص مليان ..لأن مافيش كوبايه اساسا :)

هي الحاجة كدا بتيجي على بعضها باكدج ..نقبلها على بعضها ومانحاولش ننقي
لأن جمال الحاجات كتير بيكون في امتزاج الفرح بالحزن ..والمعاناه بالنجاح ..والسعادة والالم

******

أنا كنت شىء... وصبحت شىء ...ثم شىء... شوف ربنا قادر على كل شىء...هز الشجر شواشيه ووشوشنى ...لابد مايموت شىء علشان يحيا شىء...

أنا بتغيير ...او يمكن أتغيرت خلاص وأنا مش حاسة ...

*******
كتير حسيت اني عندي شيزوفرينيا
عندي فصام
انا 3 في بعض فعلا ...
انا ...وانا ..وانا ...

18 التعليقات:

Yasmine said...

بصى عشان انا مخضوضة جدا دلوقتى و انا بقرا كلامك و ابتديت اخاف فعلا:D

بالنسبة لمصر فانا ما بقتش فاهمة احنا فين ولا مين..بلد cosmopolitan زى ما بيقولوا الاخوة المثقفين..حضارات و ديانات و ثقافات ولا بلد السلبية و الاهمال و القذارة و الهوس الجنسى اللى يخلى نزولة عادية للحسين تقلب بفيلم رعب على اكشن على تراجيدى

اللى خضنى بقى ان انا امبارح تحديدا قعدت كتبت جواب لنفسي..شوفتى جنان اكتر من كده:D:D
من كتر مانا حاسة انى بقى عندى انفصام فى الشخصية..و اخترت امبارح تحديدا عشان اخيرا خدت قرار مهم فى حياتى و حسيت انى لقيتنى..و بالرغم من كده حسيت انى برضه مش فاهمانى..فصام فصام يعنى مش بهرج
و مضمون الجواب كان شبه اللى انتى كاتبته اوى مع شوية اختلافات بسيطة لكن بعد ما وصلت لنصه ما عرفتش اكمل و ماجاتليش الجرأة احطه على البلوج خليته لنفسي عشان يفكرنى انى فى وقت من اوقات حياتى اتجننت رسمى و كان لازم اتعالج المهم انى لسه مش عارفة انا مين فيهم و احمدى ربنا انك عندك تلاتة بس :D
مش لوحدك يا فنونتى الظاهر انها حالة عامة
بس عجبتنى اوى حتة الكاريزما العالية دى..بحب الثقة فى النفس:))

... amr said...

تعرفي بقى ... ان مصر بالنسبة ليا هي كلمة واحدة بس ... تراب البلد دي .

مش لاقي حاجة تانية اقولها . .

Maga said...

واحد راح لدكتور نفسانى
الدكتور كشف عليه وقال له عندك انفصام فى الشخصية
قال له يعنى ايه يا دكتور
قال له يعنى انت عندك شخصيتين
الدكتور كتب له علاج
المريض سأله الكشف بكام
قال له 40 جنيه
المريض عطاه 20
الدكتور قال له بس دول 20 بس
قال له ابقى خد ال باقى من الشخصية التانية

Anonymous said...

انتي عارفة

ان انا..كنت هسيب مصر..وأشوف شغل برة


استغربت نفسي

انا مش كنت بقول

مصر ومصر

ومحدش يسيب مصر

ولما اخويا اتغرب برة مصر

وحبايبنا جوة مصر


.........


لقيتني

فكرت..أسافر برة مصر..وأشتغل


وأسيب العالم..إللي عشت فيه


أسيبه بكل اللي اعرفهم

وأعيش في مكان بعيد..هو..برة مصر :)



وعشت في الحلم شوية


وبابا مش وافق :D


أصل..صديقة اقترحت عليا الاقتراح..وانا قلت لها..لا اقدم في ايه..


ولما فكرت..عشت في الحلم :)



وبابا..مش وافق..على الفكرة أو الحلم يعني طبعا :D



تصدقي..كنت هسيبها..واستغربت نفسي..أنا بقول كلام ايه..وكنت هعمل ايه


..........


بس عارفة..بغير عليها :)

متهيألي:)

Anonymous said...

إيه ده..أنا مخدتش بالي غير عن مصر


انتي كاتبة حاجات كتيرة


أنا آسفة :)


..........


ربنا يسعدك :)


ربنا يكتبلك راحة القلب والبال :)

mony said...

لما بقول مبحبش مصر..الناس تتهمنى انى متطرفة ومعنديش انتماء:)
رغم انى ما صرحتش بانتمائى لمكان تانى..بس قالوا البت دى مخها لاسع ورايح ف داهية..

بس حقيقى انا مش عارفة مبحبش مصر ليه
ساعات بيكون فيه مبررات من سوء الحكم او سوء تخطيط او همجية ف تنفيذ
حاكمى مصر حاليا يحسسوكى انهم مسيطرين ع كل حاجة..وهما اساسا مش حاكمين مصر:)
هما حاكمين فلوس ومال وسلطة ونفوذ..
انما الشعب نفسه...له الله

بالنسبة للفصام..:)
تصدقى مفكرتش قبل كده انا كام واحدة..بس انا بلاقينى كتير ف اليوم..ومجاش ف بالى انه فصام..من نيتى الكويسة طبعا مبحبش اشك ف نفسى:)
انتى بتقلبيلى حالى يا بت ع فكرة بكلامك ده وتخلينى افكر ف نفسى بطريقة تانية روحى يا شيخة روحى:)

Anonymous said...

على فكرة..ممكن أقولك حاجة :)


O0oإنتي جميلة..بجد جميلة قوي :)o0O

dr.lecter said...

لاكتئاب هو لعنه المثقفين باختصار شديد علشان الناس دي بتشوف اوضح وادق من اي شخص عادي

اطمني كلنا هنتعالج عند طبيب نفسي زي مااحمد قال وهندفع نص الفيزيته

Fatma said...

فلة

مانا قولتلك بقى طلعت مش شيزوفرينيا طلع اكتئاب باين :)

الله يسامح الولية الدكتورة اللي قعدت اتكلم معاها

كنت هتجنن في الاخر

انا بفكر اكتب بوت عن الكلام اللي سمعته منها :)

نفسي اشوف جوابك اللي كتبتيه دا اوي

شيلت انا الرغي الهستيري اللي كتبته عن نفسي ..بعد ما كتبته وقريت حسيت اني مجنونة فعلا :))) حد يتكلم عن نفسه كدا :)

عموما اتطمني زي ماقولتلك ..اكتر مرض بيتعالج منه المصريين هو الشيزوفرينيا

الظاهر حاجة في الجو ولا ايه

وانا اقول فيلم اسف ع الازعاج اثر في الناس كلها ليه :)

منورة يا فلة

Fatma said...

عمرو

معقولة مصر عبارة عن شوية تراب ..

مش عارفه ..

بس انا حاسة ان مصر كلمة اكبر من كدا

Fatma said...

موجة

اتريق ياخويا اتريق :)

مانت ماعندكش شيزوفرينيا

انت عندك مرض نادر بس مصيري هعرفه واقولك عليه :)

Fatma said...

ايمان

انا مذهولة

انتي عايزة تسيبي مصر !!!

امال مين اللي هيقعد

دانتي اكتر واحدة بتديني امل على فكرة

صدمتيني

Fatma said...

موني

ههههههههههههههههههههههه

موتيني من الضحك

نتك كويسة ما بتحبيش تشكي في نفسك

اه يا قلبي هموت من الضحك

لا شكي واتأكدي وانضمي للمجموعة :)

Fatma said...

لكتر

جحبتش انا حاجة من عندي

اهو انت بتقول اكتئاب اهو

بردو الدكتور دكتور :)

اصل انا كنت فاكرة عندي فصام ..طلع قالك خير اللهم اجعله خير اكتئاب

:)

منور يا دوك

Anonymous said...

:D


بأمانة :)

أول ما قالت لي :)


حلمت اني في بلد تانية :)

بكلم أصدقائي من على النت :)


وعايشة حياتي لكن مع نفسي..وببعد عن احلامي هنا..اللي مش عارفة اطولها..


يمكن كدة كان بعد عن العالم



عالم تاني بعيد



وعموما..بابا قالي لا طبعا :D

Anonymous said...
This comment has been removed by the author.
Anonymous said...

بغير عليها :)

... amr said...

لالالالالالالالالالالالالالالالالالالا .... انا مش قصدي اللي وصللك دة خالص .....

انا قصدي الارض ....

مصر الارض مش الاشخاص .....

تراب البلد .... ترابها اللي عارفين قيمتة .... مش اكتر من كدة ....


انا عمري ما قصدت اللي بتقولي علية دة يا فنون :((((((((((( .........

مش انا اللي اقول كدة ..

متاسف