Thursday, September 18, 2008

اي كلام ....

ان تكون من مواليد اواخر السبعينات واوائل التمنينات ..دا بيعني ان طفولتك وبداية مراهقتك كانت في التمنينات ..

من اهم ما يميز فترة التمنينات البشاعة والشناعة في ازياء اللبس ..ابتدائا من الإبوليت ( السفنج اللي بيتحط في كتاف الجاكت )



مرورا بالقصة الطايرة (واوعوا حد يقولي ماكنتش بعملها ) والشعر الكيرلي والالوان الكتير (تكني كلرز) وظهور الفسفوري
والتيشرت اللي من جوا البنطلون ونطلع حتة منها كدا برا ونتني البنطلون من تحت برمتين تلاتة على ضيق شوية :)
بشع بشع بشع ..وفاكرة ايامها كمان كان الريس هارينا بدل سفاري ...

من اهم ما يميز الحقبة الجميلة دي كمان ..المزيكا ..بس بأمانة ..المزيكا وقتها كانت حلوة اوي

اول واكتر حد اثر فيا


مادونا ..يا خرااااااااااااااااشي ع الحب اللي كنت بحبه للست دي ..اي حاجة تلبسها لزمن ولابدن اني البسها فورا
نفس تسريحة الشعر ...نفس الاكسسوارات ..نفس الستريتش اللي فوقه جوب ..
وطبعا كل اغانيها حافظاهم اكتر من اسمي ..كنت بقعد بالساعات حاطة حفلاتها في الفيديو وبقلدها بالحركة والهمسة
وخصوصا الحفلة اللي انا حاطه صورة منها دي ..كان نفسي في يوم ابقى مغنية مشهورة زيها واقف على مسرح فيه مليون متفرج واغني وارقص واتنطط كدا
كنت بحس باحساس حلو اوي وانا متقمصة شخصية مادونا في مراهقتي :)))
وكنت بتفشخر فشخرة رهيبة لما حد يقولي مادونا او انتي شبه مادونا ( مع اني لا امت ليها بصلة بس الناس تحب كدا جبر الخواطر) او انتي لابسة زي مادونا ...يااااه ..احس وقتها بانشكاح مرعب..واحس اني نجحت نجاح منقطع النظير

حبيت كمان فرقة مش عارفه ليه ماحدش فاكرها خالص :) يمكن عشان كانوا فشلة باين ولا ايه

New kids o the block



وانا بدور على صورة ليهم لاقيت واحدة ما بعد التمنينات ..واضح انها في نص التسعينات مثلا ..شكلهم نضف اوي :)



كنا عاملين انا واصحابي فرقة وبنقلدهم وكنا بنقعد نتدرب على الرقصات بتاعتهم ..كنا بنقلدهم بالظبط
وغيرهم كتير زي مايكل جاكسون وجورج مايكل وبون جوفي وكيلي مينوج وديبي جيبسون و مودرن توكنج ووووو...
وشريهان

حبيبة قلبي ربنا يشفيها ..الفوازير وياشي ياشي والف ليلة وليلة وشارع محمد على وعلشان خاطر عيونك
شريهان كانت بالنسبة ليا حلم ..

بحب ايام مراهقتي جدا جدا ..بتضحكني بجد ..لما بتفرج ع الصور بموت من الضحك :)
منظر عاااار ما ينفعش حد يشوفه ..ومش عارفه ليه واثقة من نفسي اوي كدا في الصور ..مش لاقية امارة ع الثقة دي :)

كنت بكتب مذكراتي :) النهاردة الصبح وانا بدور على حاجة لاقيت مذكراتي وقعدت اقرا شوية مت من الضحك
يااااه ...معقولة دي كانت اكبر همومي ..معقولة انا مخنوقة اوي كدا من كدا ...

ايام رايقة وحلوة ..اسمع اغاني واقرا واذاكر وارقص زي شريهان والبس زي مادونا واروح النادي واكل ومبي ونعمل حفلات انا وصحابي اجري والعب ..واحلم واتكسف.. واعيط واضحك و....اعيش..
انا كنت حرة ..كنت حرة بجد ..
وحشتني حريتي ...انا بجد متضايقة اني كبرت



11 التعليقات:

... amr said...

ههههههههههههههههههه . . . لووول

طب فاكرة منى عبد الغني و هي عاملة شعرها بنك و لابسة اللبس العجيب اللي بتقولي علية دة :)) .... و لا مايكل جاكسون و القصص اللي كانت بتقول انة كان اسود و عمل عمليات تجميل كتييييييييييرة عشان يبقى ابيض و الاشاعات اللي كانت علية و اللي معظمها كان عبارة عن حاجات مبالغ فيها اوي الايام دي انا فاكر اني بدات اهتم بالكورة و الاهلي و الكلام دة :)))) و ماتشات مصر في تصفيات كاس العالم 90 ... و ماتشات كاس العالم 90 ووووووو ..... سيبك انتي فاكرة باند كان اسمة nana ؟؟ :))) .
فكرتيني بايام حلوة

Yasmine said...

ههههههههههه موتينى من الضحك بجد
مين دول يختى انا ماعرفش غير مادونا و حتى ماعرفش بتغنى تقول ايه:D:D
انا مراهقتى كانت تموت من الضحك بدءا بالoldies الفرنساوى و الانجليزى اللى ما كنتش بسمع غيرها و لحد دلوقتى ماعرفش اسامى مغنيين بس قوليلى اسم اى اغنية فى الفترة دى تلاقينى عارفها هوا و تقريبا ماحدش كان بيسمع الاغانى دى غيرى
ولا مصطفى قمر و ايهاب توفيق و محمد فؤاد يا خراااشى على دى اغانى D:

الغريب بقى انى فى الفترة دى كانت اهتماماتى بعيدة تماما عن اهتمامات البنات العادية يعنى اللى كانت مصاحبة و اللى بتحب ابن الجيران و اللى بتحب على روحها لحد ما تلاقى ابن الجيران اللى تحبه و انا دماغى كلها فى الخروج و اللبس اللى كان ابشع من البشاعة ذات نفسها كانت هواية عندى انى انزل اختار هدوم و مش عارفة هى الموضة اللى كانت وحشة ولا انا اللى ذوقى كان مهبب بس صورى فى الفترى دى تموت من الضحك بدءا من شعرى المنكوش عشان الكيرلى كان موضة وقتها مرورا بهدوم اقل حتة فيهم كانت سبع الوان فى بعض:D

فكرتينى بالذى مضى..بس ايه حكاية كبرت اللى انتى ماسكالنا فيها دى؟قال كبرتى قال خلينى ساكتة احسن:D

Fatma said...

منى عبد الغني ههههههههههههههههههههههه

هموت من الضحك

يلا يا اصحاب ..يالهوي ع الضحك مش قادرة

وكاس العالم 90 ..مش فاكرة الفرقة اللي انت بتقول عليها بس بجد انت فكرتني بحاجات حلوة اوي يا عمرو

Fatma said...

بنوتي

انا طبعا والاولديز بس انا حبيت اتكلم هنا عن تاثير حقبة التمنينات عليا

انا كنت متأثرة جاهزة ومستعدة لوحدي اني اتأثر بالتمنينات من كتر مانا سبعيناتية في نفسي

انا لحد دلوقتي قالبة على سبعينات

تقدري تنكري :))

بس انا بردو كنت بحب ايهاب توفيق ومصطفى قمر ههههههههههههههههههههههه

اهتماماتنا شبه بعضها

انا كمان ماكنش ليا في قصص الحب الهبلة

كنت مركزة جدا في لبسي وشعري والاغاني والرقص وازاي ابقى كول واثبت اني الاكول في الشلة هههههههههههههههههههههههههههههههههههههههههههههههههههه

هموت من الضحك مش قادرة

Yasmine said...

:))))))))) حلوة الاكول دى
استنى استنى افتكرت ناس مهمين اوى..فاكرة سيمون و حميد الشاعرى و ما تقولش لحد:D:D
و انوشكا و ديل الحصان اللى مسحوب على الجنب ده
و انغام زمان قبل التجميل و شيرين و خالد عجاج:D:D

و الفقرة الزراعية بتاعت صباح الخير يا مصر و عايزينها تبقى خضرا الارض اللى فى الصحرا
الاغنية دى مأثرة فيا لحد دلوقتى لدرجة انى حفظتها لبنت خالى فى الصيف هى و اغنية الارض لو عطشانة علما بان المسكينة عندها 4 سنين
ولا القدير على حميدة فى لولاكى بس دى كانت زمان قبل المراهقة
يا لهوى فكرتينى بشوية حاجات مسخرة:D

... amr said...

banouta
لالالالالالا .... اوعي حد يجيب سيرة المذيع الجاااااااااااااااامد بتاع الفقرة الزراعية في صباح الخير يا مصر .



الاستاذ ... عيد حواش .. . .

عزيزي المزارع ... و كلامنا النهاردة عن دودة القز ... و كلام عجييييب كدة


..... انتي اية اللي فكرك بالحاجات دي بس !!! :))))

Fatma said...

ايام لولاكي انا كنت طفلة وانتي كنت لسه ماتولدتيش على فكرة :)))))

ردودكم ضحتني اوي بجد

ياااااه ..ايام

مش عارفه اللي مراهقين دلوقتي ماعندهمش ذكريات حلوة يفتكروها بالشكل دا

صعبانين عليا

احنا في ايام مالهاش لا طعم ولا لون وريحتها وحشة

Anonymous said...

:D

Anonymous said...

بالحب اتجمعنا والدنيا هتجمعنا والليلة أول أعيادنا :D

آدي تاريخ أمجادنا وآدي السمر ولادنا وآدي القاهرة وآدي بلدنا :D

أفريقيااا..نقولها تاني :D


في ابتدائي :D

Anonymous said...

فنون..بصي..علشان أنا بحب أتكلم معاكي

هي فترة المراهقة دي انت قريبة..كانت امبارح تعتبر يعني

بس دلوقتي..كل واحدة تقولي يا طنت


في التاكسي كنت راكبة مع بنت صغيرة..بتقولي أنا في كي جي تو..وبعدين بتقولي..طنت هي فين بنتك..

قلت لها..مش عندي بنت :S


طيب وابنك راح فين


قلت لها مش عندي ابن :(


اممم..هو الواحد شكله كبر..وهو من جواه مش مستوعب غير انه لسة صغير :D


كل شوية بقوا بيقولوا سن أكبر


أنا شايفة السن ده صغير قوي

دي المراهقة كانت لسة امبارح


مش دي لما كنا في ثانوي؟!

Anonymous said...

:D

أقولك.مش مهم على فكرة :D ده أي حاجة..طنشي :D