Sunday, February 08, 2009

الســــاحرة !


أكون سعيدة فقط عندما أفكر أن الله موجود ويصغي إلي...لكن ذلك لا يكفي للإستمرار في الحياة ..عندما يبدو كل شيئ بلا معنى .أنا أدعي سعادة لا أشعر بها .استر حزني لكي لا أقلق من يحبوني ويهتمون بأمري..مؤخرا فكرت في الانتحار....في الليل قبل أن اخلد الى النوم ..أطيل الحديث مع نفسي ..أصلي عسى أن تجلو هذه الفكرة عني ..إذ ستكون نكرانا وهروبا ..

تعلمت أن اتعذب في صمت ...

أما أنا فلا شريك لي لذلك أفضل تقبل وحدتي... إذا حاولت الفرار منها الآن فلن أجد شريكا ثانية وإذا تقبلتها بدل مواجهتها قد تتبدل الامور .
لاحظت أن الوحدة تزداد شدة عندما نحاول الوقوف أمامها وجها لوجه ولكنها تضعف عندما نتجاهلها ببساطة

هل التعلم هووضع الأشياء على الرف ..أم أنه التخلص من كل ما لم يعد مفيدا ومتابعة الحياة من ثم ونحن نشعر بأننا أخف ؟

إذا تحدثت مع الأخرين عن ما أعرف لن اكتشف أبدا ما أجهله

هذه ماهية الحياة لأشخاص مثلي ..نحن ندمر ذواتنا ونبنيها باستمرار ..كل مافي حياتي قد تبع النمط نفسه ..من مفقود إلى مولود ..

تحصل التغيرات فقط عندما نسير عكس ما تعودنا القيام به

ما تعطيه يرجع اليك ..مع أنه قد يأتيك أحيانا من المكان الذي لا تتوقعه أبدا
جائت هذه الكلمات على لسان" أثينا" او ساحرة بورتوبيللو كما اطلق عليها باولو كويلو في القصة
رأيت في "أثينا" روح حبيبتي ..جان دارك

أحببتها ..... أضائت بداخلي شيئ ما
!

40 التعليقات:

Empress appy said...

عحبنى الايمان بتاعها فى الكلام عن الانتحار وانها برضه تغلبت على نفسها بالصلاه بصرف النظر عن اي شئ هبقى اجيبها واقراها ميرسي يا فنون على اللمحات اللى بتدي قوه على الاقل فى نظري انا بجد ممكن ناس تانيه تشوفها سلبيه بس انا بشوف الجانب الكويس

Fatma said...

انا متأكدة من قدرتك يا آبي على انك تشوفي الجانب الكويس

ومتأكدة انك لو قريتي الروايات هتطلعي منها بحاجات غيرك كتير مش هيعرفوا يشوفوها ابدا

هتلاقي شوية تخريف في الرواية اوعي تضربيني :) بس بجد لو قدرتي تكييفي معتقداتها على معتقداتك الشخصية هتستمتعي جدا بيها

Empress appy said...

اممممم موعدكيش مضربكيش بس راح احاول يعنى
ميرسي على ثقتك يا قمر بجد وعلى ذوقك كمان

soly88 said...

لم اقرأ الروايه ولكن اعجبتنى الأقوال
التى ذكرتيها على لسان اثينا
هناك من يعتقد ان تجاهل الشىء أمر سلبى
ولكن هذا التجاهل يتطلب قدره ذاتيه
ليست متوفره عند الكثير منا

Fatma said...

Soly

الحقيقة ان التجاهل شيئ في غاية الصعوبة

بالذات لو انت بتحاول تتجاهل فعلا مش تمثل انك بتتجاهل خارجيا
لما تتجاهل الشيئ داخليا وبصدق بتقدر تنساه فعلا وبيصغر حجمه جواك جدا
بس هو فعلا شيئ صعب اوي

اسعدني ردك ..اشكرك

Yasmine said...

الكتاب عندى من الصيف و لسه ما قريتوش..و كويس انك جبتى منه quotes هنا عشان اعرف انه مش وقته خالص دلوقتى بالنسبالى :)

اول واحدة دى من غير الجزء بتاع الانتحار هى انا فى معظم الاوقات ان ما كانش كلها..

تانى واحدة دى مش عارفة اتفق معاها ولا لأ..مش كل احساس سلبى بيختفى بمجرد التجاهل..فى حاجات لازم تقفى و تعندى قدامها و فى احاسيس اقوى من انك تعندى معاها و فى الحالة دى بس بتنطبق المقولة..بمعنى انه تجاهلها لحد ما تعدى بيكون الحل الوحيد المتاح حتى لو كان صعب فى تنفيذه

التعلم هو معرفة الفرق بين ما يجب وضعه على الرف ليكون ظاهرا معظم الوقت ولا يغيب عن البال و ما يجب دلقه فى اقرب زبالة لانه ما يستاهلش وقتك ولا مجهودك
شوفتينى و انا بتفلسف باللغة العربية العامية فى نفس واحد :D

Fatma said...

هههههههههههههههه

اقولك السبب في ال quote بتاعت التعلم
هي كانت بتزور صديق صحفي ليها في البيت فلاقت عنده اكتر من الف كتاب في المكتبة فكانت بتقترح عليه يوزعهم ويتصدق ويتبرع بيهم:)
فقالها لا فقالتله ليه قالها هشعر بالعري قالتله قصدك بالجهل قالها هحس اني مش مثقف قالتله يبقى الثقافة مش في قلبك دي على الرفوف :)

تاني واحدةبتاعت التجاهل ..كل ما كان الاحساس مؤلم اكتر كل ما بيكون التجاهل هو الحل الامثل :)دا تجربتي الشخصية الحقيقة

Fatma said...

على فكرة يا فلة الرواية على قد ما البطلةعندها حزن عميق وتخريف كتير :) بس شيقة ولطيفة انا شدتني وقريتها كلها سحبةواحدة ماقمتش غير لما خلصتها
وما سببتليش اي نوع من انواع الحزن الحقيقة بالعكس خلصت الرواية وانا مبتسمة

Tamer Diab said...

آخر جملتين في البوست فكروني بمصر
بنحبها رغم تحفظاتنا علي بلاوي فيها
ما علينا مليش نفس اتخنق في السياسة دلوقتي
بوست جميل يا أستاذه

dr.lecter said...

اول ماقريته بجد حسييت انه عني مش عارف ازاي خاصه اليومين دول

كل كلمه بتعبر عني الراجل ده بيكتب حاجات دقيقه جدا زي مايكون عارفني بالظبط

انا كان المفروض اجيبها بس الميزانيه خسعت معايا ان شالله بعد اسبوعين كده هاخلص اللي ورايا واجيبها لان بقالي كتيير ماقرتلوش حاجه من ايام روايه الزهير

مواطن مصري said...

انا مقرأتش الرواية بس هنزلها مع world war z و الكلامات دي بجد بتتكلم عن نفسي

تعلمت أن اتعذب في صمت ...

أما أنا فلا شريك لي لذلك أفضل تقبل وحدتي... إذا حاولت الفرار منها الآن فلن أجد شريكا ثانية وإذا تقبلتها بدل مواجهتها قد تتبدل الامور .لاحظت أن الوحدة تزداد شدة عندما نحاول الوقوف أمامها وجها لوجه ولكنها تضعف عندما نتجاهلها ببساطة

Fatma said...

تامر دياب

لما تحب حد مش عاجبك ! هو صح كدا
احساس صعب
اشكرك

Fatma said...

لكتر

باولو كويلو بياخدني في رواياته لمناطق عجيبة جوا نفسي
رواياته مش الافضل على الاطلاق ..بس بتلمس حاجة انسانيه جوانا وبتصيبني بحالة من الراحة والامل وبتولد جوايا قوةوعزيمة
بكرر تاني الرواية فيها تخريف ..بس لو كييفت معتقداتها على معتقداتك هتستمتع جدا
اقصد بكيفت يعني ان هي كل ما تتكلم عن الكون افترض انت في دماغك ربنا
عموما انا واثقة في دماغك يا دوك :)

Fatma said...

مواطن

اقراها مع مراعاة تحفظاتي السابقة ارجوك :)
وياريت لو تقولي رأيك فيها بعد ما تقراها
لوماكنتش قريت حاجة قبل كدا ل باولو كويلو اعتقد يكون الافضل انك تبتدي ب the alchemist
اللي هي ساخر الصحراء بترجمة بهاء طاهر افضل ترجمة للرواية لان بقيت الترجمات كانت وحشة

ساحر االصحراء بتعرض الفكرة اللي بتتعرضلها الرواية بشكل اوضح وابسط كأنها مقدمة للفكرة اللي في الرواية دي

Anonymous said...

تذكرنى بحالى وقت نوبات الاكتئاب

Fatma said...

اسامة

انا مش عايزة اقول كدا من بدري بس هي بتفكرني بحالي في كل حال الحقيقة :)

اتشرفت بزيارتك

الميكروباص said...

لما قرات الموضوع للنهايه عرفت ان عندك تحفظات على الكلام


الحقيقه افتكرت ان الافكار كلها بتاعتك وانتي اللي كتباها



اترعبت!!!

Fatma said...

لورنس العرب

ممممم

لا الافكار مش بتاعتي بس الحاجات اللي انا ناقلاها مواقفة عليها وحسيتها

اللي عندي تحفظات عليه موجود جوا الرواية نفسها مانقلتوش اكيد :)

ممكن اعرف اترعبت ليه

leeno said...

انا ايه اللي جابني هنا؟؟؟

ارحمني يارب




حرام عليكي يا فنون اللي بتعمليه دة


على العموم يا ستي انا اكتشفت ان الوحدة قادرة تهزمني كل مرة و بضراوة قررت ابقى انا و هي اصحاب صديقتي اللدودة زي ما بيقولوا مقدرتش اجابها و لا احاربها كانت كل مرة بتغلبني و تقعد في ارابيزي !!! قلت اصاحبها و اتاريها صحوبيتها مطلعتش وحشة اقله مبتغدرش انتي عارفة وحاشتها و قادرة تفهميها !!!

اما اروح حبقى اوريكي كنت كاتبالها ايه فصداقنا القصرية دي


لما بتقري باولو كويلو بتقري ترجمات مين ؟؟ انا بحب اقرا بالعربي اكتر بحس ان في روح للكلام

اصلي مرة قريت لواحد جابلي شلل من الترجمة الغبية اللي كان عاملها !!

ghorBty said...

السلام عليكم

زي ما قلتي فيه بعض التحفظات ولكن اعجبي تلك المقوله

تحصل التغيرات فقط عندما نسير عكس ما تعودنا القيام به


فعلا لاننا لما بنقوم بنفس الاشياء هي هي كل يوم بيكون ملل وروتين ولا بنحس باي تغير

لكن هقولك شئ من وجهة نظري انا لو سمعنا قول رسولنا الكريم وجددنا نوايانا في كل عمل بنعمله اكيد هنحس بطعم جديد للتصرف دا حتي ولو كل يوم بنقوم به وبنعمله هو هو بس الفرق اكيد هيكون بركة من الله علي هذا العمل

جزيت خيرا

غربتي

Fatma said...

ياريت توريني اللي كتبتيه
انا كمان بشكل عام بحب اقرأ بالعربي بيمتعني اكتر بكتير الحقيقة
شوفي the alchemist ترجمة بهاء طاهر كانت الاأفضل الباقي كان ممل جدا
ساحرة بورتوبيللو والزهير وفرونيكا تقرر ان تموت قريت ترجمة رنا الياس الصيفي مش بطالة
الجبل الخامس قريت ترجمة ماريا طوق
الباقي قريته بالانجليزي لسه بدور على ترجمة حلوة

Fatma said...

غربتي

كلامك مظبوط وورد شيئ يشبهه جدا في الرواية

اتشرفت بزيارتك

محمد فوزي said...

آآآآهٍ من إدعاء السعاده !!!!
أصعب شيء هو أن لا تملك حرية التعبير عن كونك حزينا إما كي لا تزعج من يحبونك أو لأن الناس لا يحبون الأشخاص الحزينين فتضطر إلى إرتداء قناع القناعه وتمارس كل شيء بلا لذه حقيقيه ومن ثم تتعلم أن تتعذب في صمت

والوحده الأقسى هي الشعور بالوحده بين الناس وكتير عانيت منها ومكنتش عارف انا السبب ولا الناس لكن عموما انا اليومين دول بعاني من الوحده بمعناها وبغير معناها هههههههه
وبحاول اتجاهلها فعلا

والتعلم الحقيقي هو التطبيق من وجهة نظري

( ما تعطيه يرجع اليك ..مع أنه قد يأتيك أحيانا من المكان الذي لا تتوقعه أبدا )
صح جدا جدا جدا

بوست جميل وكفايه اني آخد بنصيحتك لمواطن مصري لما آجي اقرا لكويلو

تحياتي

محمد فوزي said...

على فكره هو ليث مجاش ؟
طب على ما ييجي انا هسيبله التعليق ده هنا بعد إذنك :

كده يا باشا يبقى احنا متفقين وكفايه المثال بتاع ريتشارد قلب الأسد عشان يثبت ده , اممم بس انا مش عارف ليه عاوز اعمل هجمه مرتده
طب لو واحد متجوز واحده اوروبيه أو امريكيه يحبها ولا ميحبهاش ؟!!! D:

متهيألي اتخاذهم اولياء في الآيه مش معناها بالضروره الحب والكره؟

وانا طبعا يشرفني اتواصل معاك انا مقيم بره مصر دلوأت لكن ميلي هو
m_f_taha80@yahoo.com

يسعدني نتواصل من خلاله
كل التحيه

Fatma said...

فوزي


طب بتعاني من الوحدة بمعناها وفهمنا انما بغير معناها ازاي حضرتك :)

التعلم الحقيقي هو التطبيق ..وهو دا بالظبط اللي قصدته أثينا في الرواية
ايه الفايدةانك ترص كتب على الرف او ترص معلومات في مخك وانت ما بتعملش بيها حاجة !

بالنسبة للجملةدي ما تعطيه يرجع اليك ..مع أنه قد يأتيك أحيانا من المكان الذي لا تتوقعه أبدا
انا بقى بيحصل معايا كدا دايما مش احيانا

ليث مختفي بقاله فترة مش بس من المدونة عموما اساسا معلش الحياة بتاخد الناس
هبلغه انك رديت عليه :)

محمد فوزي said...

ههههههههه
بمعناها يا ستي يعني اني فعلا لوحدي اليومين دول وبغير معناها يعني الأشخاص اللي المفترض يكونوا معايا او اللي بيكونوا معايا فعلا مش بيضيفوا ولا بيغيروا اي شيء من احساس الوحده ده !!! فهمتي ؟

مش مشكله انا نفسي مش فاهم

Fatma said...

ههههههههههه

اها فهمت

بغير معناها احساس اصعب بكتير من اللي بمعناها

Superman said...

- عذاب في صمت..
تدمير ذاتي و اعادة بناء للنفس!

أثينا دي غاوية تتعب نفسها و تشيل هموم و مصعبة الحياة علي نفسها!
أقدر اقول انها مستسلمة..مش عايزة تواجه واقعها ولا عارفة تهرب منه!

- "إذا تحدثت مع الأخرين عن ما أعرف لن اكتشف أبدا ما أجهله"

دي بتتلكك عشان تفضل تتعذب في صمت!


و فضلت كده لحد جملة "من مفقود الي مولود"..وقتها أثينا كانت ساحرة شريرة و كانت مضلمة الدنيا..

- بعد ما قلبتها ضلمة قالت..

"تحصل التغيرات فقط عندما نسير عكس ما تعودنا القيام به
ما تعطيه يرجع اليك ..مع أنه قد يأتيك أحيانا من المكان الذي لا تتوقعه أبدا"

صلحت غلطتها بعد ما جابت للقاريء اكتئاب..و بالنظر للجملتين دول احب افهم ايه لازمة الكام سطر اللي قبلهم؟
مجرد تزويد حيرة القاريء و ان الواحد عقله يروح و ييجي!

أمثال باولو كويلو بيشجعوني انني اكتب روايات عشان انقذ القاريء العربي من براثن رواياتهم! :D

Fatma said...

تصدق اهانتك لأثينا اخدتها بشكل شخصي وحسيت كأنك بتتريق عليا انا هههههههههه

انا مش عارفه انت قريت الرواية ولا لا بس من الواضح انك قريت لباولو ومش مقتنع بيه :)

انا بحس في كتاباته لمحة قوية للتفاؤل والسعي ورا الحلم والايمان بقدرتك وبوجود قوةاكبر منك لازم تكون في انسجام معاها
رواياته فيها روحانيه ببساطة شديدة وفيها اعماق بلا فلسفة معقدة

انا بحبه بصراحه :)

leeno said...

مش لاقية الهباب اللي كتبته

Superman said...

خلينا متفقين انك شايفة ان افكارها مجنونة و انك مش متفقة معاها..
يبقي بالتالي انا ماتريقتش علي كلامك :D

انا كل اللي اقصده ان باولو كويلو قعد يلف و يدور و يحير القاريء و بعدين في الاخر قال فكرة في اتجاه غير الاتجاه اللي حوارها مع نفسها كان بيمشي فيه..
ازاى أثينا مستسلمة و راضية بعذابها و مش عايزة تواجه مشاكلها و في الاخر ناوية تواجه و تتصرف عكس المتوقع!

جربت افكر مع كل جملة قالها حسيت نفسي في دوامة كئيبة و في الاخر بيرمي سطر يتيم يطلعني من الدوامة..طب ليه؟

انا ماقريتلوش كتير..تقريبآ ربع رواية..
بس نفس الانطباع عندي..انه غاوى يطرح افكار كتير متناقضة في مساحة قليلة..فالواحد يبقي مش عارف..يقرا ولا يركن بعد كل سطرين شوية و يفكر؟

ماله نبيل فاروق و روايات عبير..دي حتي قصص رومانسية :D

Rania Lelah said...

تعرفى انا كمان عجبتنى اوى الاقوال بتعها دى و خصوصوا التجاهل
لانه فعلا حقيقه لو برعنا فى تجاهل الاحاسيس اللعينه و الذكريات المؤلمه
اكيد هتتنسى و مش هتاخد مننا كتير

تحياتى يا جميله

Unknown said...

كلمتين وبس
لا للاكتئاب نعم للحياه
كل عيد حب وانت بخير
تحياتي لك..والى الامام

Fatma said...

سلطان

ربع رواية قليل اوي عشان تفهم ستايل كويلو
هو فعلا بيطرح مليون فكرة في السطر الواحد وبيركز على الصراع النفسي الداخلي لبطل الرواية وتخبطه بين اليأس والامل وازاي بيكون في اول الرواية انسان يائس جدا وسلبي وبيتحول خلال القصة من اليأس للامل تدريجيا لحد ما تخلص الرواية والبطل او البطلةوصل لحمله واتعلم كتير في رحلته

ملاحظة في مكانها تماما ان اقوالها اللي في الاول متسمة باليأس واللي في الاخر مليانه امل وقوة
وهو دا المقصود بالظبط
التطور الطبيعي لنفسية الشخصية نتيجة لرحلتها في البحث عن حلمها والناس اللي بتقابلهم وبتتعلم من كل حد حاجة بتساعدها اكتر انها تلاقي نفسها

هي مش افكار متناقضة قد ماهو بيدخل اوي جوا نفسية البطل وبينقل صراعه الداخلي

النتيجة انه بعدما تخلص الرواية بتحس انك مبسوط :) وعندك حالة من الراحة ما بتحصليش انا شخصيا غير مع كويلو
بالرغم من اني بتعب نفسيا جدا لما بقرأ لكاتب شاطر بيدخل جوا نفسية البطل او البطلة لاني من النوع اللي بيعيش احداث الرواية تماما الا ان كويلو ما بيتعبنيش بالعكس بيديني دفعه امل وحكمة بسيطة

عبير مين يا سطان :)

Fatma said...

رانيا

معاكي حق ..نورتيني

Fatma said...

Medus

وانت طيب :) شكرا

ليث said...

فوزي باشا/
ان اهو .....:)
معلش كنت مشغول شوية،
فعلا هجمة مرتدة خطيرة جدا...
ومع ذلك احنا مستعدين
بص ياسيدي...
الحتة دي معقدة شوية ويا رب اعرف اوصلها صح
مبدأيا دي حالة مركبة،
فيها الكثير من اختلاط المشاعر،
و قبل ما اشرحها عايز اديك نموزج صغير،
طبيعي جدا ان يحب الرجل امرأة أو العكس وهو مع حبه له يبغض فيه صفات معينة او يبغضه ويحب فيه صفات اخرى،
يعني مثلا ممكن واحد يكون بيحب مراته جدا بس مابيطيقش فيها انها بتكدب او انها مش بتربي اولاده كويس او اي شيء من هذا القبيل،
وهي دي حالتنا، فهو ممكن يحب فيها جمالها او تدبيرها او صفات كتيرة جميلة موجودة فيها بتعجبه ولكن يجب عليه ان يبغض فيها كفرها ونظرتها لرسوله (صلى الله عليه وسلم)،
والحالة دي فيها تعقيد كبير لأن الإنسان لما يفضل يروح ويجي بين مشاعر حب وكره لإنسان تاني العلاقة غالبا بتتذبب هي كمان وتصبح الحياة فيها صعوبة،
ولذلك فإن الزواج من كتابية ليس مفضلا ولكنه جائز، يعني الأفضل ألا تفعل ذلك رغم كونه مباحا،
والدليل ترجيح الرسول (صلى الله عليه وسلم) لذات الدين في اختيار الزوجة في الحديث الشهير،
اللي عايز اقوله انه مش معنى انه اتجوز غير مسلمة انه ينسى كفرها، وانما يظل يبغض هذه الصفة فيها ويحاول ان يهديها ويخرجها من كفرها إلى الإيمان .

مش عارف انا وصلتها ولا توهتها ، في انتظار تعليقك وسنتواصل على الميل بإذن الله

blackcairorose said...

مقطع ليس كبير ولكنه ملىء بالحكمة وكل جملة تستحق التأمل والفهم والتطبيق

سأبحث عن الرواية لقرائتها

شكرا فنون

Fatma said...

روز

أنا اللي بشكرك :) استيعابك للكلمات واحساسك انها تحمل حكم اسعدني فعلا

leeno said...

اشتريتها النهاردة و حقراها علينا و عليكي على خير بقى حبقى اجي اقللك رأيي ههههه