Saturday, March 21, 2009

ماعييش أجيب هدية يا ماما



ماما
صباح الخير ..كل سنة وانتي طيبة
زي ماقولتلك النهاردة الصبح لما صحيتك على صوتي الرائع وادائي المتميز " ماعيش أجيب هدية يا ماما ان شا الله أعدم عنيا يا ماما "
وطبعا السبب معروف يا حبيبتي ..انك اخدتي مرتبي أول الشهر عنوة وغصب واقتدار عشان تسدديلي ديوني غصب عني وسيبتيلي فتات
فكانت النتيجة الطبيعية اننا النهاردة يوم 21 في الشهر وانا على وشك التسول
بس حقيقي حقيقي اثرتي فيا أوي وانتي بتقولي( ايه أعدم عنيا دي بعد الشر ) بس كالعادة الفرحة عمرها قصير ولاقيت الجملة اللي بعدها ( طيب مش مشكلة هستنى لأول الشهر بس هتعزميني على الغدا فين )
والله ياماما ماكنش يتعز ..أنا النهاردة أخري فول وطعمية

مامي

متهيألي انك لسه فاكراني بحب بابا أكتر منك ..ودي مش حقيقة على فكرة بس أنا مش عارفه اصحح لك المعلومة دي نهائي
الظروف كلها ضدي ..والماضي الاسود بتاعي معاكي بيطاردني مش مديني فرصة اني أقولك اني زمان كنت بفضل بابا أكتر مش بحبه أكتر وأن السبب في التفضيل دا انك كنتي الطرف اللي بيعاقبني وبيزعقلي وكان شاهد على كل كوارثي فكرد فعل مضاد أصبح بابا هو " المفضل " لأنه "فضل" فترة من الزمن مش عارف حقيقتي المرة اللي أكتشفتيها انتي بدري ب " قلب الأم " سبحان الله

أمي

في معلومات لازم تعرفيها
1- وأنا في ابتدائي كنتي بتصري تدخليني السرير الساعة 7 ! ولازمن ولابدن انام على انغام بيتهوفن وباخ وإخواتهم
أنا كنت بنام من كتر الزهق مش عشان هما مريحيين للأعصاب زي ماكنتي فاكرة

2- أنا كنت بتضايق جدا لما يعملوا استدعاء ولي أمر في المدرسة وتيجي وأبقى فاكراكي جاية تاخديلي حقي وأتفاجئ انك واخدة صف المدرسة ! ليه يا ماما كدا ؟! حصل ايه يعني لما اتسلق نخلة ولا لما احط صمغ على كرسي المدرسة ؟! في حكاية النخلة انا مش أكتر من إني بجيب بلح للعيال
والصمغ على كرسي المدرسة عشان تلزق وماتقومش ودا لأني بحبها ومش عايزة المدرسة اللي بعدها تيجي لما الحصة تخلص لأني ماكنتش بحب مدرسة الحصة اللي بعدها
يعني الصمغ دا تعبير عن حبي مش زي ما كلكم كنتوا فاكرين

3- أنا أسفة جدا بجد إني ضيعتلك شبكتك ..كل ما بفتكر اني عملت كدا بزعل من نفسي بجد اوي أنا ماكنش قصدي
4- أنا عارفه إني كنت شقية بشكل مخيف وإني تعبتك أوي ..بس ما تقدريش تنكري اني كنت مسلياكي تسالي رهيبة ..مش عارفه ليه كل ما بقولك كدا بتنكري ولما أقولك اني نفسي ربنا يرزقني ببنت زيي تقوليلي ما تدعيش على نفسك الدعوة دي
أعترفي يا مامي ...أنا كنت مسلياكي صح !

5- أنا بتضايق أوي لما بضايقك ..بزعل من نفسي أوي بجد لأنك حقيقي ما تستاهليش اني ازعلك ولا لحظة
انتي جميلة اوي يا ماما وطيبة وحنينة وضحكتك بتحسسني ان الدنيا كلها بتضحك وأنا من غيرك مش عارفه ممكن أعمل ايه في حياتي ربنا يخليكي ليا ويبارك في عمرك ويديكي الصحة ويجزيك خير عن كل حاجة عملتيها معايا طول حياتي
انتي بجد أم عظيمة والله مش عشان انتي أمي ..أنت فعلا أم عظيمة

وسيبك بقى من الأغنية الهبلة اللي غنيتهالك الصبح ..أنا لما أروح هغنيلك ست الحبايب :)

ملحوظة 1 : كل سنة وكل الأمهات بخير وعلى رأسهم أختي اللي بقت أم مؤخرا عقبال كل البنات يارب :)

ملحوظة 2 : الموضوع دا فاصل ومازلنا مستمرين في سلسلة " الوحدة أهون " والتعليقات في الموضوع السابق ما زالت متاحة للي يحب

7 التعليقات:

samamasr said...

:D

~ Heba ~ said...

كل سنة وماما طيبة وبخير يافنون

وربنا يديها الصحة وطول العمر وتشوفك عروسة جميلة في الكوشة

وتشوف كمان ولادك في الكوشة :)

leeno said...

كل سنة و ماما طيبة يا قلبي

ربنا يخليهالك و ما يحرمكوش من بعض


تصدقي و تآمني بايه و لا انا معايا اجيب هدية ههههههههه

و ماما قالتلي اول الشهر بقى و ابقي كمان اعزميني

Superman said...

الازمة الاقتصادية العالمية مأثرة جدآ علي الهدايا السنة دي.. :D

ده انتي كنتي طفلة هادية جدآ :D
بس بصراحة اكيد كنتي مسلية مامتك..
تسلق نخل..و صمغ علي الكرسي..مش اى حد يعمل كده :D

انا كنت لطيف..الـ13 سنة بتوعي في المدرسة عدوا هوا بالنسبة لاهلي..

كل سنةو كل الامهات طيبين و بييجي لهم هدايا :D

Tamer Diab said...

كويس أن ماما لسه متبرتش منك بعد البلاوي الي قلتيها دي :)
ربنا يخليهالك وتستحملك اكتر

Founoon said...

كل سنة وكل امهاتكم طيبين :)

Frequent Reader said...
This comment has been removed by a blog administrator.