Monday, June 01, 2009

!! رد الجميل يا صاحب الفضل


اذا ما كنتش اتفرجت على فيلم دكان شحاته وفي نيتك انك تتفرج عليه ماتقراش الموضوع دا لأني هحرق الفيلم

بداية قبل ما اتكلم عن تفاصيل الفيلم ..لو ماكنتش ناصري هتتخنق ..ولو بتحب السادات هتتشل ..ولو لسه عندك امل في البلد دي هتتأكد ان مافيش امل نهائي ومش بعيد تولع في نفسك
الفيلم كئيب ..جدا ..قبل ما ادخله الناس قالتلي بعد الاستراحة مش هتبطلي عياط ..انا الحقيقة بعيط من اول التترات
التيتر بيبدأ بأغنية توجع القلب اسمها مش باقي مني غير شوية ضي في عنيا كلمات جمال بخيت وبيغنيها أحمد سعد صوت أحمد سعد حزين وفيه بحة مصري أوي بيساعدك اكتر انك تكتئب جدا
كلمات الاغنية بتقول
مش باقي منى غير شوية ضى في عنيا
انا هدهملك وامشي بصبري في الملكوت يمكن في نورهم تلمحي خطوة تفرق معاكى بين الحياة والموت
مش باقي منى غير شوية نبض في عروقي خدي وعيشي
وافتحيلي تابوت افرح بريحة ورد فرعوني وربنا في عوني
إذا دخلت الجنة ولا النار حشتاق لضحكتك وقعدتى في الدار
والقهوة متحوجه من طيبة العطار
في كل يوم الصبح اشرب حليب قبطي
وفى النهار والمسا امسك ستار الكعبة لو سبتي
واثبت اذا هربتى
اهديكى عمري وحسي وجوارحي
اهديكى جرحى هو إلى باقي في دنيتي لما خلص فرحى
مش باقي منى غير شوية لحم في كتافى
بلاش يتبعثروا في البحر
بلاش يتحرقوا في قطر الصعيد في العيد
بلاش لكلب الصيد تنوليهم
خدي إلى باقي من الأمل فيهم
وابنيلى من عظمهم في كل حارة مقام
وزورينى مرة وحيده لو كل ألفين عام
الم الجراح يتلم
مش باقي منى غير شوية دم
متلوثين بالهم مرين وفيهم سم
كانوا زمان شربات والنكتة سكرهم
شربتهم الخفافيش في قلب أوكرهم
مش باقي منى غير شوية دم مقدرش اسقيكى مواجعهم
ويرضوا مقدرش ارميكى وأبعهم
يمكن في مرة تعوز تطلبيني شهيد
حاحتاج يوميها الدم يمضى على شهدتى
مش باقي منى غير شوية قوة في إرادتي
على شوية شعر من خطى
حسبي عليهم وأنت بتخطي
وأنت في صبح الدلال بتعطري شطي
مش باقي غير شوية ضى في عنيا
انا مش عاوزهم
لو كنت يوم حالمحك وأنت بتوطى
في معركة مفيهاش ولا طيارات ولا جيش
وأنت في طابور العيش
بتبوسى أيد الزمن ينولك لقمة من حقك المشروع
مش باقي منى غير شهقة
شهقة في نفس مقطوع
بفتح لها سكة ما بين رئة وضلوع
ما بين غبار ودموع
وأنا تحت حجر المقطم في الدويقة بموت
أنا والعطش والجوع
يئن تحتي التراب
وأنا صوتي مش مسموع
يا حلمنا الموجوع من المرور ممنوع
مستني لما يمر موكب سلاطينك
مش باقي منى غير شوية رحمة من طينك
على شوية صبر من دينك
مش باقي منى غير حبة غنى تايهين
في الضلمة مش لاقين حس الفواعلية
ولا صوت مركبي عفي فوق المعدية
ولا صوت بناتي العذارى في كل صبحيه
والغنوه أمنية ياما نفسي أقابل حبيبي
وأنا على الزراعية صوتك وصوتهم غاب
وأنا تحت حجر المقطم بموت لوحدية
الليلية راحت عيوني تطل على البستان
وجناين الرمان رجعت لي توصف عناد الغل والدخان
وسحابة سوده تضلل على غُنى الغلبان
رجعت لي توصف هبوب الموت على الألوان
رجعت لي توصف خيال الذل في موائد الرحمن
مش باقي منى غير شوية كفر بشروقك
وأنا منبع الإيمان
مش باقي منى غير شوية ضى
وعنيا مش قادرة تلمحك
في وحدتي محنى
خايف أموت من الخوف والضعف يفضحني
السجن عشش في قلبي وماشى في شوارعك
نفس إلى بعني وخدعني بالرخيص بيعك
أشيل حمولى أنا ولا أشيل حملك
ماعدت املك شيء فيكى ولا فيا
ولا قيراط ولا بيت
ولا نسمة صافية تلاغى النيل بحريه
مش باقي منى غير شوية حب جرحني
ولا باقي منى غير شوية ضى في عنيا
:) دا كبداية يعني
الخليفة الموسيقية اللطيفة دي شغالة اصلا بقى على مشاهد البؤس اللي مصر عايشة فيه من 30 سنة
بيبتدي من الاخر ..من سنة 2013 ويرجع بالسنين ...كل سنة على مانشيت جرنال وصور ارشيفية وفيديوهات للأحداث ..قطار الصعيد... قصر ثقافة بني سويف..حريق الشورى ..العبارة ..ازمة العيش.. .الدويقة ...وهكذا لحد ما يوصل لتعيين حسني مبارك رئيسا للجمهورية وقبلها اغتيال السادات ويبدأ الفيلم على ميلاد شحاته-عمرو سعد
الفيلم هو حكاية شحاته ...من يوم ميلاده لوقتنا دا ..30 سنة واللي حصل لشحاته فيهم بالتوازي مع اللي حصل لمصر فيهم
في مباشرة زيادة عن اللزوم في الفيلم كأننا في درس وعظ تتجلى عظمة المباشرة في مشهد قاعد فيه والد شحاته ( محمود حميدة) بيكلم شحاته بيشاورله على صورة ناصر اللي حطينها على الحيطة وبيقوله حط صورة الريس على الشرخ عشان تداريه ..فيرد شحاته بس الشرخ كبير يا آبا الصورة هتداري ايه ولا ايه..يقوله اهو تداري اي حاجة
مباشرة فجة ...بس بتوصل وجهة نظر ناصر عبد الرحمن السناريست والمخرج خالد يوسف
أحمد متضايق جدا ان الفيلم بيعرض وجهة نظر صناعه ومش محايد ..بس انا مش متفقة معاه في الرأي ..هو مش بيكتب تاريخ عشان يبقى محايد ..هو بيعمل فيلم سينما يستعرض فيه الاحداث اللي حصلت من وجهة نظره الشخصية ودا حقه ..اللي عنده وجهة نظر غيرها يعرضها
أحمد كمان شايف ان الفيلم بيهد ما بيبنيش ..ودي وجة نظر صديقة ليا كمان ..انا متفقة معاهم في النقطة دي مع اني مش عارفه كان ممكن الفيلم دا يبني ازاي ! بس من حيث المبدأ هما معاهم حق
صاحبتي بتقول ان الواحد طالع من الفيلم حاسس بأن الدنيا سودا واللي جاي اسوأ وحتى لو كل المؤشرات بتقول كدا حكاية اننا نأكد الفكرة دي هتخلي اللي احنا خايفين منه يحصل فعلا ويبقى واقع
بالذات انه كمان مضلمها ل 4 سنين قدام وبيتنبأ بحالنا في 2013
وان برا لما بيعملوا أفلام مهما كان في مأساويات في الفيلم دايما الخير بينتصر ودا مش بيتعمل اعتباطا دا مقصود عشان يأثر نفسيا على الناس ويفضل عندهم امل ويجاهدوا عشان حياة أفضل
انما اللي عمله خالد يوسف دا تدمير تام لنفسية كل اللي شافوا الفيلم كأنه بيوصلهم رسالة ان انت لو طيب وكويس وابن حلال هيتداس عليك وهيحصلك اللي حصل لشحاته لان الخير عمره ما بينتصر والشر عمره طويل وحظه حلو
أحمد متفق مع صاحبتي في الكلام دا تماما وأنا مقتنعة انه صح بس بردو مش عارفه كان ممكن دا يحصل ازاي لسبب بسيط ..الفيلم واقعي ..لو قفل على ان الخير بينتصر في الاخر مش هيبقى واقعي ابدا لأن الواقع عندنا هنا للاسف بيقول ان الخير عمره ما بينتصر
عموما على رأيهم خالد يوسف عامل فيلم لنفسه
همه الاول والاخير نجاحه الشخصي
أكيد ماخطرش في باله لحظة حجم الضرر اللي أحمد وصاحبتي بيتكلموا عنه
كان ممكن النهاية تتغير وتبقى سعيدة ويبقى ليه تأثير ايجابي بس دا ماكانش هيحقق اللي خالد يوسف عايزه
هو حر ! بس ورحمة والديه يبطل بقى يعيش دور المناضل صاحب القضية

الفيلم في مجمله مؤلم ..بيوجع القلب..على البلد واللي حصلها واللي بيحصلها ..على الناس وقد ايه بقوا وحشين ..واكتر وجع قلب على شحاته وطيبته وسط كل دا ونقائه وبساطته واحلامه المتواضعة مشاهد كتير بتوجع زي مشهد بيع البيت لسفارة اسرائيل مثلا وطبعا مشهد النهاية هو قمة المأساة وأداء غادة عبد الرازق والأخ الكبير اللي كان اسمه في الفيلم طلبة كان مؤلم
بالرغم من المباشرة في كتير من المشاهد الا ان الفيلم فيه رمزية
يمكن كمان رموز زيادة عن اللزوم بردو بشكل مباشر ..مش عارفه خالد يوسف عمل التركيبة دي ازاي بس هي كدا ..رمزية مباشرة
شحاته في اعتقادي الشخصي رمز للمصريين وابوه رمز لعبد الناصرودا بيبان في المشهد اللي بيمسك فيه شحاته صورة عبد الناصر ويقول الله يرحمك يابا.. اما هيفا وهبي وهنا المفاجئة رمز مصر أن أن تشششش بعد بهية وفؤادة مصر بقت بيسه يا ولاد !
اما باقي الرموز فتفسر نفسها تباعا مع الاحداث اللي سياقها الأساسي قصة النبي يوسف عليه السلام مع اخوته
الرموز اللي وصلتلي ممكن تكون من محض خيالي وفي حالة تشابه الاحداث مع الواقع فهو محض صدفة مش اكتر
:)
المواويل الصعيدي اللي كاتبها جمال بخيت جميلة
عمرو سعد رائع ..لا رائع دي قليلة ..الولد فعلا فنان وحساس ومبدع الله يسامحه على اللي عمله فيا
محمود حميدة الكبير كبير بردو
غادة عبد الرازق خرافية ..مش معقولة البساطة في الاداء وعدم التكلف والاحساس العالي
عمرو عبد الجليل ..دوره مش مختلف كتير عن دوره في حين ميسرة ..بس ما يمنعش انه كان ممتاز وان افيهاته على الرغم من انها مضحكة الا انها ليها معاني كبيرة وعميقة زي مثلا عنوان الموضوع ( رد الجميل يا صاحب الفضل ) دي جملة قالها في حملة الانتخابات لما أجروه أحد الاحزاب معروف مين طبعا هو وسواقين الميكروباص عشان الحملة
الجملة دي تبان انها افيه مضحك الا انها أثرت فيا جدا وحسيتها حقيقية جدا في الزمن دا وفي الموقف دا تحديدا وهو بيطلب من الناس انها تنتخب مرشح الحزب دا بالتحديد لانه بانتخابهم ليه هيبقوا فعلا بيردو الجميل اللي مش موجود لانهم اساسا اصحاب الفضل
الاخ الاكبر لشحاته للاسف ممثل مش عارفه اسمه ..اسمه في الفيلم طلبه كان كويس جدا
الاخ الاوسط محمد كريم واسمه في الفليم سالم محدود الموهبة جدا ودوره بيساعدك جدا انك اساسا ما تتقبلوش ونقدر نقول انه نجح في دا
عبد العزيز مخيون دوره صغير جدا الا انه اختيار موفق..الشخص المناسب في المكان المناسب
هيفا وهبي ..ما ضايقتنيش خالص ..توقعت اسوأ من كدا ..كتجربة أولى ليها مش مضرة ..كان ليها مشاهد مالهاش لازمة زي مشهد الرقصة يوم قراية الفاتحة بس اعتقد ان خالد يوسف ماهانش عليه يجيب هيفا وهبي ومايرقصهاش
المشهد كله لو اتشال مش هيأثر على الاحداث غير ايجابا الحقيقة
في واحد اسمه في الفيلم البرص ! دا لا يمكن يكون ممثل !دا أكيد هو كدا
لو هومش كدا فهو اكتر من ممتاز
اجمالا حتى الناس اللي عملت ادوار صغيرة كانت حقيقة
باقي في الاخر بس اني اقول اني مابحبش خالد يوسف ..ومشاكله باينه اوي في الفيلم ..بس الموضوع والاحداث وحرفية الممثلين شفيع ليه في الفيلم دا
خالد يوسف كمخرج لا يميزه غير توجيه الممثل هو دا اللي هو شاطر فيه وبس
عموما دكان شحاته فيلم لازم يتشاف ! على الأقل هو فيلم ممكن تتناقش فيه وتاخد وتدي وتنقد وتفكر وتتفق وتختلف يعجبك أو ما يعجبكش ...كدا يعني
! حظي السيئ او يمكن حظ أحمد السقا السيئ إني دخلت في نفس اليوم فيلم إبراهيم الأبيض

لو حد يعرف يحكيلي قصة فيلم ابراهيم الأبيض ينوبه فيا ثواب ويحكي لأني غلبت أدور على القصة طول مانا بتفرج على الفليم ما لاقيتش !!
خسارة والله شركة انتاج ضخمة وميزانية على ما سمعت عدت ال 30 مليون وأحمد السقا وهند صبري ومحمود عبد العزيز وعمرو واكد يعني كاست ممتاز وموسيقى تصويرة لهشام نزيه خرافية ومواقع تصوير رهيبة وحركة كاميرا اكتر من ممتازة ومخرج مش بطال أبدا ..ليه النتيجة تطلع كدا !! ليه سكتشات غير مترابطة وفيلم مفكك من بعضه ! بس الحق يقال كل سكتش في حد ذاته حلو :) ليه فيلم كامل مافيهوش ولا شخصية واحدة طيبة أو نضيفة ممكن اتعاطف
معاها ! يادوبك هي حنان ترك اللي طلعت مشهدين ومالحقتش أحس بيها أصلا ومالهاش أي تأثير في الأحداث
أنا بصراحة ماحستش ب ولا شخصية في الفيلم مع ان شخصية عمرو واكد عجبتني وأدائه كان هايل الا إني بردو ماحستش بيها
ليه في مشهد النهاية اسخسخ من الضحك والمطلوب إني اعيط
تيمة روميو وجولييت دي عفا عليها الزمن بصراحة مش وقته خالص في اللي احنا فيه دلوقتي
!قال روميو وجولييت قال

46 التعليقات:

TAFATEFO said...

هو طبعاً جمل كتير في الفيلم عن ناصر والثورة متتبلعش وفيها كلام .. لكن دي وجهة نظر

لكن مش هتتشل ولا حاجه لو بتحب السادات .. مفيش كدب .. عبدالعزيز مخيون مكدبش لما قال ان اللي عمله السادات مش هنعرف نخرج منه .. كون صورة عبدالناصر تداري الشرخ فأعمق شرخ هو اللي بدأه ناصر

أنا حبيت الفيلم .. والسواد ده نتائج منطقيه لمقدمات شايفينها .. بمعنى أصح .. السواد اللي حضرتك بتتكلمي عنه موجود بالفعل في مناطق نائية مثلاً أو عشوائية وبدون شك هينسحب علىالباقي زي ما انسحبت الظواهر اللي قبله .. ما لم --------- .. بس هل هتحصل حاجات تمنع؟؟ أعتقد آه

الاختلاف الوحيد ان خالد يوسف شايف ان احنا موصلناش لقاع المنحدر .. بس الحقيقة -كما أراها- ان احنا وصلنا لقاع المنحدر وبدأنا مرحلة الصعود

طبعاً أغفلتي محمود حميدة اللي في ملك وكتابة - آسف على الإزعاج - دكان شحاته .. رائع .. وأكثر من رائع

هيفا وهبي .. كان يوم ملوش ملامح يوم ما ابتلينا بيها غنا .. ومنه لله الحيوان خالد يوسف اللي بلانا بيها تمثيل .. هي في تعابير في وشها ؟؟ في ممثل من غير تعبيرات وجه؟؟ حد يفهمني .. وايه صوت المعزة اللي مصممه تتحفنا بيه ؟؟ نيله .. نيلة النيله كمان

دي لا ممثله ولا مغنية ولا هباب

من أكتر الحاجات اللي عاجباني في الفيلم تتر البداية

هو اسمه النص لا البرص ؟؟ علشان كنت فاكره البرص

TAFATEFO said...

أقصد كنت فاكره النص مش البرص

عل فكره هيفا شفتها اللي فوق مبتتحركش نهائياً

وعمرو سعد بايخ .. ولازم يفهم ان أحمد زكي مات

عمرو عبدالجليل كان ممتاز .. ودوره والأمثال ليها معاني عبقريه

الأخ الكبير كان حلو .. والأخ الصغير ساعات بيبقى ممثل كويس وساعات بيبقى زفت زي في الريس عمر حرب وزي دكان شحاته

البواب اللي كان معاهم معاهم معاهم عليهم عليهم ده برضه كان لذيذ

طبعاً غادة عبدالرازق كانت ممتازه

Fatma said...

منورني والله يا مصطفى :)

اقرا بقى الموضوع تاني لسببين

1- ان انا فعلا كاتبه عن محمود حميدة وماغفلتوش
2- اني كاتبه ان اسمه البرص انت جبت النص دي منين :)

تتر البداية متفقة معاك تماما رهيب وهو سبب عياطي المتواصل طول الفيلم البداية وجع قلب

هيفا مش مضرة بصراحة
هي مش اضافة بس مش مضرة
واي واحدة ممثلة حلوة شويتين كانت هتكون افضل بكتير بس بردو نرجع لمرجوعنا ونقول دا خالد يوسف

تفتكر اننا فعلا وصلنا للقاع وهنبدأ الصعود ؟ ولا لسه حبة على القاع ولا احنا وصلنا للقاع ولسه في قاع تاني داخلين عليه ؟

انا حبيت الفيلم جدا على فكرة جدا بجد فيلم ما ينفاعش ماتشوفوش ومؤثر اوي في نفسية البني ادم
والسواد موجود
اعتراض اصحابي اللي انا موافقاهم عليه هو ان النهاية كان ممكن تبقى فيها بريق امل ولو ضعيف عشان نلعب على الحتة النفسية للمشاهد ويكون في تأثير ايجابي يمكن ينفعنا من منطلق تفائلوا بالخير تجدوه وحسن الظن

متفقة معاك بردو في ان الشرخ ابتدى من عند ناصر
عشان كدا قلت اللي بيبحوا السادات هيتضايقوا لان الفيلم محمل الشرخ للسادات بالكامل وشايف ان اللي احنا فيه دا التطور الطبيعي للحاجة الساقعة اللي عملها السادات ودا في الحقيقة مش صحيح

الغلط ابتدى من قبل كدا
من بدري اوي

منظومة تردي القيم اللي بتحصلنا نتاج سنين وسنين من الكفاح في هد البني ادم المصري بشتى السبل والوسائل

اخيرا
انا فعلا سعيدة بتشريفك ليا منورني بجد :)

Fatma said...

رديت عليك قبل ماقرأ ردك التاني

كدا تقدر تتجاهل النقطة رقم 2 في ردي :)
هيفا وشها ماعندوش اكسبرشنز
مش فاهمه ليه كدا
ما غادة عبد الرازق بردو نافخة وبوتكس وكل شيئ
اشمعنى دي وشها بيتكلم لوحده وهايفة فاقدة القدرة على تحريك وشها مش فاهمه

عموما افضل مشهد لهيفا كان في السجن لما كانت بالنقاب ووشها مش باين :)

دا بجد والله مش بتريق بس هي مفارقة مضحكة فعلا

Fatma said...

مختلفة معاك تماما في عمرو سعد
الولد اثر فيا اوي اوي بجد
وكونان يجي في بالك احمد زكي وانت بتتفرج عليه دا شيئ يحسب له مش يحسب ضده
مع اني مش شايفه ان بيقلد احمد زكي
بس لبسه في النص التاني من الفيلم هو لبس منتصر في الهروب
بس دي مش مشكلة عمرو سعد بصراحة
دا عيب ملابس ومخرج

عموما اللبس اجمالا في الفيلم سيئ

كفاية لبس هيفا

فين في صعايدة بيلبسوا كدا اموت وافهم !!

... amr said...

طب يا فنون .. أنا فعلا ناوي أدخل الفيلم و ناوي أروح ابراهيم الابيض
ان شاء الله ... و بما انك شفتي دكان شحاتة .. و بما ان جبهة علماء الازهر مطلعة بيان ناشف كدة و محدش فاهم منة حاجة .. هحتاج أعرف - لو وقتك يسمح - اية محل البيان دة من الاعراب



http://www.jabhaonline.org/viewpage.php?Id=2387

Jannah said...

مع اني من الناس اللي لازم يعرفه الشيء قبل ما يحكمو عليه بس الفيلم هاذ مو نوية اعرفه لأني خبرت المخرج الفذ خالد يوسف !!!

Fatma said...

عمرو

دا بجد ولا هزار ؟

انا مش عارفه الطم ولا اضحك ولا ايه ؟
الناس دي مش هتبطل تتكلم عمياني كدا

لا بجد

انا مذهولة حقيقي

يا نهاري

لا مش معقول بجد

انا عمالة اقرا تاني ومش متخيلة اللي بيتقال

اللي حصل في الحسين مش اكتر من مشهد واحد داخلة فيها هيفا وهبي وعمرو سعد ومحمود حميدة بيدعوا عند قبر الحسين

بس

بس فعلا مش اكتر

وكانت لابسة طرحة كمان على فكرة

يا لهوي

!!!!!!!!!!!!!!!!

لا مش مصدقة بجد

دا فعلا ولا دي كذبة عشان بروباجندا للفيلم ؟

عموما يعني عشان الواحد يكون محايد
خالد يوسف لاطش شوية في الاسلاميين 3 مشاهد بالعدد

مشهد كان فيه حلقة ذكر صوفي واللي واقفين سابوا الذكر واتفرجوا على هيفا وهي بتتمرجح ودا مشهد سخيف الحقيقة مالوش لازمة

ومشهد تاني في النهاية جايبين ناس بدقون وجلاليب ماسكين سلاح وبيروعوا ست في الشارع عشان مش محجبة وهو مشهد اسخف
ومشهد تالت لما هيفا راحت تزور عمرو سعد في السجن ولابسة نقاب ودا عشان رايحة متخفية عشان ماحدش يشوفها ودا غير مسيئ ومافيهوش اي حاجة ابدا

غير كدا مافيش حاجة تمس الدين لا من قريب ولا من بعيد

لو دا بجد انا فعلا مذهولة

Fatma said...

جنة

معاكي حق في موقفك من خالد يوسف ودا تقريبا موقف الاغلبية هنا في مصر منه

خالد مدعي حنجوري عايش دور المناضل والحاية كلها كذبة كبيرة هو بس اللي مصدقها وفاكر الناس يا حرام مصدقين انه هو كدا

وكمخرج هو في التكنيك عنده مشاكل
واسلوبه فيه مباشرة كأنه بيدي درس
وافلامه مؤخرا بقت دعوة صريحة تحريضية للثورة

بس دا ما يمنعش ان حين ميسرة هو رصد لفئة تم اغفالها تماما في المجتمع

ودكان شحاته هو رصد لحال البلد والتغييرات اللي حصلت للانسان المصري شخصيا كنتيجة للي بيحصل في مصر في خلال ال 30 سنة اللي فاتوا

على الرغم من كل التحفظات على خالد يوسف
الفيلمين دول مهمين

بس اعتقد انهم مهمين للمصريين لانهم بيتكلموا عن دواخلنا اوي مش هتبقى مسلية لحد مش مصري في اعتقادي
او يمكن مش هيحسها اوي زي ماحنا حاسينها

TAFATEFO said...

فنون هانم

مشهد الجماعات الإسلامية في نهاية الفيلم في وسط مشاهد العنف والانفلات الأمني

ده مفهوم جداً .. ومبرر جداً .. ومنطقي جداً

وآسف مأخدتش بالي من محمود حميدة الكبير كبير برضو

Fatma said...

مصطفى

مبرر مممم ممكن

اصل خلاص ما بقاش في منه الكلام دا

دا قديم اوي بصراحة

امتى اخر مرة شوفت او سمعت عن جماعة ارهابية بدقون وجلاليب بيضة ماسكين سلاح !!!!

انا اساسا طول عمري مش مصدقة ان دول اصلا جماعات اسلامية
هما جماعات متسترة تحت الدين
فبالتالي اهدافهم مش هتكون ابدا توقيف واحدة مش لابسة حجاب عشان يهددوها بالسلاح !

ممكن يكون مبرر او منطقي بس بصراحة ماعجبنيش وحسيته مشهد سخيف حتى الطريقة اللي اتعمل بيها طريقة اقرب للكوميديا

وما اظنش ان دا ممكن يحصل عندنا في مصر

TAFATEFO said...

وده نورك طبعاً يا فندم

قليل الذوق أنا معلش

TAFATEFO said...

لا يا فندم .. ده حصل وبيحصل وهيحصل

العنف عموماً والطائفية نتايج طبيعية للجهل والفقر والتعصب والاحتقان

والعنف بييجي في صورة بلطجة وارهاب وعنف طائفي وتشدد وجماعات للعنف باسم الدين .. وكل ده بيظهر مع الانفلات الأمني

المشاهد كان فيها بلطجه وسرقه بالإكراه وتحرش وجماعات إسلامية وفزع وهلع عام .. كله مع بعضه

Fatma said...

ممممم

مش عارفه
يمكن انا عندي حساسية من ربط الاسلام بالصورة البشعة دي عشان كدا ما حبيتش المشهد

يجوز يكون فعلا كلامك صح بس عارف لما تتأذى كدا من لقطة معينة
انا اتأذيت من اللقطة دي كدا وقمت كشرت وانا مش حاسة :)

محمد فوزي said...

مع اني مشوفتش الفيلم ومعتقدش ان ظروفي هتسمح لي إني أشوفه قريب لكن انا استمتعت جداً لعرضك ليه وللنقاش الموجود عندك في التعليقات وليا بعض الملاحظات :
أولاً مش فاهم ايه الشرخ اللي بدأوا عبد الناصر وليه في ناس بتحملوا كل المساويء وناس بتحمله كل الإنجازات , عبد الناصر كقائد عسكري وزعيم من وجهة نظري على الأقل لم يكن هناك إختلاف على نواياه ( الطيبه طبعا ) وهو زيه زي غيره من القاده يخطيء ويصيب , وكان المفروض إن اللي ييجوا بعده يبنوا على إنجازاته ويصلحوا أوجه القصور اللي وقع فيها
كون بقى إن اللي جم بعده معملوش كده وطينوا الدنيا زياده فده مش ذنب عبد الناصر أبدا , مش معقول أبدا دوله بتاريخ وعظمة مصر ملايين البشر , وحكام ومحكومين يعيشوا أثرى لفكرة عبد الناصر عمل عبد الناصر اخطأ , طب وفين التطور فين التصحيح , فين السنييين الطويله اللي عدت دي ده لو كان أطغى الطغاه كنا قدرنا نصوب مسارنا بعده , انما انا شايف ان الكلام ده ما هو إلا عجز وقصر ديل

طبعاً يا فنون انا مبقولش إن ده رأيك لكن انا بناقش الفكره بوجه عام

ثانياً : بتفق معاكي في إن خالد يوسف مكشوف , قوي , والحمد لله ان في ناس كتير عارفاه , دي حتى جنات عرفته من المغرب اهي ههههههه
بس مع ذلك هو مخرج مميز بدماغ وفكر غير مستقيم , ده رأيي بصراحه

ثالثاً : أم الكوارث ما حدث من جبهة علماء الأزهر , شيء فعلاً مؤسف ومسيء , بالذمه ده كلام ؟ يعني ده يوريكي إحنا لما بنيجي نفكر في الدين والتدين بنفكر إزاي
إلحق دي لبست حوش دي قلعت , ده كتب , هيفاء وهبي مش عارف عملت ايه
هي الناس دي فاضيه ؟ ده في مليون حاجه يتكلموا فيها أهم من هيفاء وحسين فهمي , ده بفرض أصلا إنهم بيتكلموا في حاجه صح فما بالك انهم بيقولوا كلام عن حاجه ميعرفوش عنها حاجه
حاجه تذهق فعلا

Maga said...

اولا الفيلم من غير الحشو وفكر مخرجه حلو
لكن كالعادة وتكرار نفس الفكرة فى تمثيل طوايف الشعب المختلفة فى شخصيات افراد فى الفيلم ومش دي مشكلة الفيم
المشكلة الاساسية فى فكر خالد يوسف العفن
ناصري ودا اللى خلاه فى شتيمة علنى فى السادات
ومش كدة وبس لا بيروج للناصرية فى الفيلم عن طريق ان اللحل الوحيد فى الاصلاح الناصريين ومش دى المشكلة
المشكلة فين فكر الناصريين فين الناصريين فى المجتمع من رموزهم ايه افكارهم مش بنشوف حد منهم ولا بنسمع عنهم ليه كل اللى نعرفه عنه انهم بيغنوا على اطلال الماضي اللى بالنسبالي ماضي اسود
واللى فى نظري انا كانت اسوء فترة في تاريخ مصر
ومش كدة وبس بيقدم مشاكل ومأساة البلد كلها فى اسكتشات مكررة ومملة وعارفينها وحافظينها وزهقينا منها وعايشيين فيها ليل نهار طيب وبعد
ايه اوجه الاستفادة
انتا لا بتعرض مشكلة ولا بتطرح حلول للمشكلة
انتا بس بتهيج جماهير واقفة على شعرة بتسخنهم وتثيرهم للخروج بمظاهرات
ويتنمى دا فيهم بطريق غير مباشر بطريقة نفسية كامثال الافلام الاجنبي
بس الافلام الاجنبي بتطرح مشاكل وبتدور على حلول انتا بتطرح فكرك العفن وعايز الدنيا تقلب وتخرب
وحجتك معروفة مسبقا انك بتوعى الناس ان ممكن دا يحصل ولو حضرتك مش دارس علم نفس اسال متخصصين يقولك ع المشاهد الاخيرة اللى انتا عملتها دي ممكن تعمل فى الشعب المصري ايه لو كان فاهمك
وانتا فاهم اننا معندناش ثقافة التظاهر وبعاد كل البعد اصلا عن فكرة ثورة وتظاهر
يبقى انتا بتهد مش بتبني عايز تخرب مش عايز تصلح
كان الافضل انك تعرض حلول لمشاكل كتير اختزلتها فى الفيلم بين كل مشهد والتاني
بدل التسخين وشحن الناس اكتر ماهما مولعين
اعرض مشكلة واعرض حلها لو انتا فعلا ليك رسالة
لكن رسالتك واضحة انك بتروض لفكر عفن في دماغك
وعايزها تولع وعلشان انتا مرتاح اكيد هتخلع لغاية مالدنيا بعد ماتتهد تهدى وبعد كدة ترجع على انقاض واشلاء ناس كنت انتا السبب فى اللى حصل
وكالعادة منسيتش تسىء للدين والمتمثلة بالنسبالكم فى بتعو الموالد لما خليتهم وهما فى ذكرهم لله زي مابيقولوا يرموا بذكر الله على الارض ويتفرجوا على هيفتك وهى بتتمرجح وفستانها بيطير وبيظهر منها
ولما اتنين بيتغزلوا فى بعض وبيحبوا بعض فى مسجد سيدنا الحسين
كان ناس بس للقطة دي بوسة وكنت ظبطت مشهدك
وطبعا متنسوف تخافو من الارهابيين اللى بدقون فى الاخر هيعملوا فيكوا ايه
لو زي مابتقولوا الفن ليه هدف ورسالة اظهرلنا رسالتك مش هدفك وفكرك المعفن نحل و نصلح بيها
يا اخي دا كباريييييية فى مشهد واحد لفت انتباه ناس كتير لحجات مكنوش حسين انها غلط
وكأنها عادي بس قالهم خدوا بالكم وبسرعة يلا صلحوها
وانتا قولت يلا سخنتكوا ولعوها واولعو

Fatma said...

فوزي

النوايا الطيبة لا تكفي !
الشرخ موجود ؟ اه موجود
ابتدى من مين ؟ من ناصر
كمل مع السادات ؟ آه وكبر
كمل مع النظام الحالي ؟ آه وغوط اوي وتخلل وتشعب وطلعه جدور قوية
تحميل السادات الخطيئة كاملة واظهار نظام ناصر وكأنه نظام ملائكي دي شيئ غير مقبول
كل واحد كان ليه مميزات وعيوب ..وكل واحد عمل اللي عمله حسب وجهة نظره متاجهلا انه بيبني حاجة حتى لو صح على اساسات مش بتاعتها حتى لو الاساسات بردو كانت صح
دا لو فرضنا يعني
خالد يوسف مكشوف ومش خايل على حد اللي هو بيعمله
جبهة علماء الازهر لا تعليق مأساة

Fatma said...

أحمد

أنا اجمالا متفقة معاك في رأيك وان كان الفيلم بردو عجبني وأثر فيا تأثير كبير وابكاني من قلبي ووجعني جدا
مختلفة معاك في نقاط قليلة:
1- مش مطلوب ان فيلم سينما يعرضلك حل المخرج مش مصلح اجتماعي
2- ما حسيتش بالمشهد بتاع الحسين فيه اي شيئ مسيء نهائي

غير كدا متفقة معاك تماما بالذات في نقطة تهييج الناس ..هو فعلا عايز ثورة ودا كان باين بشكل واضح في هي فوضى ..على الاقل كان يدي اي بارقة أمل يعني
اللعب على نفسية الناس بالشكل دا غلط اعتقد انه هو شخصيا غير مدرك لابعاده
ماداهية لايكون قاصد ؟
انا متهيألي مش قاصد
مش اكتر انه بيحاول يحط نفسه في مقام الشاب المناضل الثوري جيفارا مصر والعصر الحديث

متهيألي كدا مش اكتر

بس عموما هو لا زم يطلع من الدور دا لانه خنيق اوي ومش لايق

ومتفقة معاك في اليسار المصري والناصريين الحاليين
الاشتراكية والشيوعية واليسار اجمالا اوهااام مستحيل رجوعها
بعدين مش من عدالة الاشتراكية اوي ماحنا جربناها
الناس الظاهر بس بينسوا زوار الليل والحاجات دي
احنا لو ايام عبد الناصر لا كان فيلم زي دا اتعمل ولا كان زماننا قاعدين بنكتب في بلوجات الكلام اللي احنا بنكتبه دا
الدنيا اتغيرت وزمن الاشتراكية ذهب الى الجحيم بلا رجعة ان شاء الله

dr.lecter said...

وهو مين اللي وقعنا في الورطه؟
مش عبد الناصر؟
مش هو اللي اتسبب في تكبيد مصر خسائر ماديه بسبب النكسه واستنزف طاقات الجيش
والسادات بمعجزه قدر انه يسترد الارض بس ده جه علي البنيه التحتيه لمصر مكانش ادامه الا حل واحد وهو الاقتصاد الحر والانفتاح علشان يصلح اللي حصل

هو ده ناصر اللي انتم عاوزينه؟




رحمه بينا ياعمنا مش معقوله كل مره تروج لده

طيب ايه رايك بقي خدتي بالك من اسم مساعد المخرج؟
محمد حمدين صباحي

وطبعا مش محتاجه اقولك مين هو حمدين صباحي

الراجل بيشر فكر ناصري
يعني خلاص

علشان كده افلامه كلها بتنجح مع الناس العاديه اللي شايفه انها مقهوره وغلابه وانهم محتاجين بطل زي عبد الناصر

اقسم بالله لما شتك السادات فغي الفيلم كنت هاشتم بصوت عالي في السينما
مش معقول ياراجل تفرض علينا فكرك بشكل مباشر كده
افكاره كلها مباشره

يوسف شاهين كان ناصري بس بيعمل افكاره بشكل عبقري وغير مباشر

مش يزعق بصوت عالي زي خالد



فينك يامحسنه توفيق شوفي هيفاء اللي بقت رمز لمصر

ده مصر يطلع انها رمز لمصر غصب عننا
انا مش معترض علي هيفاء لكن مش دي اللي تمثل مصر يعني

وبعهدين مشهد الدخله البلدي ده نفسي اعرف لازمته ايه

دايما كده كل مره يجيب لي مشهد مالوش لازمه


مشاهد قليله باعتبرها مشاهد عبقريه


مشهد المدرسه التحريضي

كل واحد ياخد حقه بنفسه


اظن مافيهوش جدال ومستغرب ازاي عدي من الرقابه اصلا

مشهد الموال اللي شغال وقت انتخابات الرئاسه
كلام الاغنيه لوحده رهييب

واخيرا المشهد التحريضي المتشائم اللي بيقول احنا هنبقي كده ياخواننا

مشهد الفوضي الكبيير

بس اتعمل بشكل غبي لكن وصلت رسالته

بس مش عارف ايه دخل الاسلاميين في الموضوع؟
ولا هم انضموا خلاص لثوره الحياع والبلطجيه مع انه طول الفيلم ماجابش سيره لهم خالص


فيه مشاهد كتيره متاخده من افلام يوسف زي عوده الابن الضال واسكندريه كمان وكمان

علي راي واحد صاحبي زمان الراجل بيتقلب في تربته


انا تاني يوم قعدت مع احمد اتكلم معاه عن الفيلم وكنت مستني انه يعمل موضوع عنه

الفيلم مهم طبعا وكئيبب جدا


الفيلم زي مانا كنت متخيل من سنتين بيرسم صوره بشعه لمصير البلد

ماحدش يقولليي لا ومش عارف ايه

ايوه ده اللي مستنينا

فيه ناس بتعتبره جزء تاني من حين ميسره

معاهم حق طبعا

اتلمفروض زي ماحمد قال الفيلم يكطون محايد ويعرض كل وجهات النظر بشكل موضوعي


لكنه ماجابش غير وجه نظر البيه او زي مابيحب يقول الشارع

علي نظام اغنيه الشارع لنا

لا انا مش شايف ان الفيلم بيهد

الفيلم بيحاول ينقذ مايمكن انقاذه
بيحاول يقول ياخواننا الحقوا نفسكم كفايه اللي انتم بتعملوه في بعض كفايه قهر وفساد واستغلال

ارحموا بعض واسندوا بعض
ده احنا كلنا ولاد بلد وبطن واحده


الفيلم مرثيه شاعريه في احتضار الشخصيه المصريه الطيبه

احنا للاسف اتغيرنا جدا ومتبقاش فينا حاجه من الشخصيه دي

هو ده اللي الفيلم بيحاول يقوله

الفيا



رمز لقصه سيدنا يوسف نفس الكلام انا قلت يمكن انا الوحيد اللي فهم ده غلط

هيفاء ومشهد الرقص

هههه هي جت علي كده


انت عارفغه ان متشال لها مشهدين تانيين طالعه بترقص في نص الشارع هي وعمرو سعد علي سنجه عشره

بس كويس انه شاله


اجمالا

الفيلم كصنعه سينمائيه زي الزفت مافيهوش اي ريحه تالق ولا ابداع فني

لكن كفكر ومضمون ورساله واسقاطات

انا معاكي وةمتفق في ده

الفيلم مقال طويل نقدي بيؤرخ لاهم الاحداث اللبي مرت بها البلد من وجهه نظر صناعه

بشكل كئيبب جدا وبشع

لكن ده ماحزنيش انا انبسطت من اللفيلم لكن كان نفسي يتعمل بشكل فني عبقري وده بيفتقره خالد يوسف


اصلا الفيلم ده كان سبب في خنالقه كبيره مع صديق عزيز ليا سيناريست طلع يشتم في الفيلم وقال عليه الفاظ مضحكه

معاه حق لان الفيلم فعلا مافيهوش ريحه سينما لكنه فيه ريحه سياسه ورثاء لحال مصر

هو عجب كل الناس لغايه دلوقتي وحتي اللي دخلوا معايا الفيلم
لكن انا لسه محتفظ برايي وهو محايد

ماقدرش اقول عليه وحش ولا حلو

هو مقبول وكفايه كده

dr.lecter said...

ابراهيم الابيض

العكس تماما من دكان شحاته


فيه ريحه سينما وفيه ابداع فني ورونق جمالي وصوره رائعه وشكل اسطوري ملحمي يمكن يقترب من الخيال لعالم احنا اول مره نشوفه بالبشكل ده

انا بحب الافلام اللي من النوعيه دي عن المهمشين والعوالم السفليه

الفيلم معمول بشكل انا اندمجت فيه كعاشق للسينما

حقق لي كل اللي كنت عاوز اشوفه في الفيلم ده

لكن نيجي بقي ان الحلو مايكملش


سيناريو ضعيف جدا

قصه مهزوزه

مشاهد كتيره متشاله

لو انتي شفتي الاعلان الاصلي ابو 6 دقايق

هتعرفي انا بتكلم عن ايه

صديقي السيناريست قرا السيناريو الاصلي
قال لي ان فيه شخصيات كتيره ماطلعتش في الفيلم
وان فيه ساعه وربع متشاله في المونتاج

طيب بالذزمه ده اسمه كلام؟

علشان ككده انا حسيت بنقط ضعف كتيره في الفيلم وحسيت ان فيه حاجات ناقصه
وفيه توهان في بعض المشاهد وبرود

وماتعاطفتش خالص مع السقا ولا اندمجت مع قصته مع هند صبري


لولا عمرو واكد اللي خلاني اركز معاه وادقق في ملامح شخصيته

والدور الاسطوري بتاع محمود عبد العزيز
كان الفيلم هيبقي ماسخ فعلا

الفيلم مليان عيوب بسبب غلطات معرفش هل هي بسبب مروان حامد؟
ولا بسبب السكريبت؟

مش عارف والله


مشكله الفيلم فعلا ان انا ماتعاطفتش مع الشخصيات لكن تعاطفت مع الدورين اللبي زكرتهم

تخيلي واحد له سطوه ونفوذ وقوه

وضعيف ادام واحده بيموت فيها ومش قادر يلمسها وشايفها ادام عينيه وملك ييمينه لكنها متمنعه عنه ومش عاوزاه

فيه اكتر من كده رومانسيه ؟

وفي الاخر قتلها علشان هي فضلت عشيقا عنه

عمرو واكد شخصيه مركبه

الواد ده فعلا مالوش حل



زي ماقولت قبل كده

فيلم رومانسي علي خلفيه دمويه عنيفه بشكل شاعري

اه التيمه مكرره

لكن الجديد هو الرؤيه البصريه الغنيه جدا جدا وكل مقومات العمل السينماء الراقي

لكن اللي بوظ ده كله السيناريو وترهل بعض المشاهد اخراجيا للاسف


انا جالي احباط لاني كنت متوقع ان الفيلم هيبقي احسن فيلم للسنه دي

لكن خابت توقعاتي

عزائي الوحيد هي الاسباب اللي شايفها كمميزات للفيلم وبس

dr.lecter said...

اه نسيت اقول

الفيلم اللي بجد بقي استنوه

هو احكي ياشهرزاد

بتاع مني زكي ووحيد حامد

نازل الصيف ده

ده بقي انا متوقع هيبقي فيه ضرب نار عندك هنا في المدونه بعد مانشوفه


http://www.facebook.com/video/video.php?v=1153396080546&oid=62500114655

Fatma said...

لكتر

انا بردو مش معترضة ان الواحد يعرض وجهة نظره
خليني اديلك مثال
لو انت مثلا مخرج وهتعمل فيلم عن الفترة دي في تاريخ مصر
ماتقوليش هتقدر تطلع حيادي ومش هتجيب على لسان ابطال الفيلم قناعاتك ورؤيتك
صعب بصراحة
انا شخصيا لومكانه هعرض الشيئ من منظوري الشخصي
زي ماعرضت الفيلم هنا من وجهة نظري الشخصية ومستكترة اوي سيرة ناصر اللي ع الفاضي والمليان
وكأن الناس كان عايشة في الجنة ونعيمها ايام عبد الناصر
اللي يسمعنا يقول احنا اييييييه رأسماليين ولا ...عندنا استثمرات ومصانع وشركات وخايفين نتأمم 

لا حقيقي انا ضد فكرة البكاء على اطلال ناصر كلنا بنحبك ناصر كلنا عايزينك
بس من حق كل واحد يعرض وجهة نظره
معاك حق في نقطة ان خالد يوسف بيزعق بصوت عالي ..انا لسه في رد هنا بقول عليه حنجوري

اه شوفت حكاية رمز مصر ! انا اتمنى اكون غلطانه
مش لشيئ ..بس مصر معقولة بقت حلاوتها صناعي ودمها واقف ومش معبرة اوي كدا ؟
معقولة مصر بقى اسمها بيسة بعد ماكانت فؤادة وبهية ؟
زعلت تصدق !
مشهد الدخلة البلدي كان متشال على فكرة من النسخة اللي انا شوفتها
كان مشهد عادي جدا مافيهوش شيئ خادش للحياء
اللي اتحكالي كان بشع كويس انه اتشال

مشهد المدرسة خرافي
المواويل كلها تحفة والاغاني وجع قلب رسمي
انا كمان مش فاهمة ليه الاسلاميين ..المشهد دا زي ماقلت سابقا من المشهد اللي ضايقتني

حتى لو دا اللي مستنينا لازم ندي امل للناس مش نسيبهم عايشيين مستنيين اللي مستنينا دا
ماهو لو فضلنا مستنينه هيجي فعلا مليون الميه
لو فكرنا بشكل ايجابي ممكن نعمل حاجة
الفيلم ما بيقولش الحقوا نفسكم ..خالد يوسف اللي قال كدا في التيليفيزيون بس مش دا اللي وصل من الفيلم
رسالة الفيلم واضحة وصريحة
دا اللي جاي والطيب مالوش مكان

خالد مخرج متميز في توجيه الممثل ..والممثل اللي يمثل مع خالد يوسف وما يلمعش يبقى مافيش منه رجا
غير كدا خالد مش مخرج متميز ..اللي ميزه بس جرأة مواضيعه عشان بيداعب مشاعر الناس في الشارع

هو فيلم مهم مافيش كلام ..بس مش ابداع

في المجمل انا عجبني

Fatma said...

ابراهيم الابيض

سيناريو ضعيف جدا وقصة مهزوزة

انت كدا جبت المفيد

انا اتفرجت على سكتشات حلوة وصورة جميلة وموسيقى رائعة وحركة كاميرا ابداع واضائة خرافية ولوكيشنز تصوير غاية في الجمال
وممثلين موهوبين

فين القصة بقى!

حد يقولي فين القصة

حرام والله بعد كل دا يطلع فيلم بالشكل دا

مش معقول لسه بنلوك في سيرة روميو وجولييت مش معقول

انا افهم دا لو دي قصة جانية
ماشي شغال
بس دا الفيلم اساسا مبني على كدا

لا كتير اوي اوفر

انا كنت مسخسخة من الضحك في مشهد النهاية

خسارة بجد لان الفيلم في مقومات فيلم ممتاز

القصة دمرته

ليه عباس ابو الحسن يكتب !

Fatma said...

نسيت اقول حاجة مهمة
احمد السقا مش عايز فيلم يمثل فيه
احمد السقا عايز جبلاية قرود يتنطط فيها
دا مقياسه للفيلم الناجح

انا كمان مستنية احكي يا شهرزاد

:)

الشارده said...

بصراحه كده خالد يوسف ده مش بحس انه بيقدم فن الا فى افلامه الاولى لكن بعد كده دخل فى دور الواعظ الى عايش وسط الشعب وقال ايه بيصور مشاكلهم
يقعد يحشر سبعين مشكله ملهمش علاقه فى بعض وتلاقى نفسك فى الاخر دماغك وجعك وكرهتى حياتك
وده باسم انه بيصور الواقع
طيب ماهو عاطف الطيب كان بيصور الواقع واد ايه مرارته والفساد الى طرا عليه بس بطريقه محترمه تحس فعلا ان الراجل ده عايش قايم نايم مع الناس فعلا
لكن خالد يوسف ملوش دعوه بالناس الى من خلال انه يطلع يمثل علينا دور الانسان الى همه فئات الشعب المطحونه
ياسلام يا خويا امال هايفه دى جايبهلنا ليه
دى اكتر حاجه تستفز الناس

ثانيا بقى بتخنق من محاولاته فرض وجهة نظره علينا من خلال افلامه ده حتى لما بيجى يتكلم عن فى البرامج بيتكلم بتعالى كان هو الوحيد الى صح وباقى الناس يااااااااااااااى متخلفين مش فاهمين فن

ثالثا بقى وده الاهم لازم كل فيلم يدور على حاجه يحطها فيه علشان يعمل قبله وقلبان قبل ما يتعرض وياخد شهره
شويه يعمل مشهد شذوذ اساسا ملوش لازه شويه قال عايز يسمى فيلم خيانه شرعيه وبعدين يغيرها لمشروعه مع العلم ان مفيش علاقه خالص بين كلمة شرعيه ومشروعه
ودلوقتى طبعا قرر انه يجيب هايفه علشان الناس برده ترجع تتكلم
مع انها مغنيه اساسا فاشله ومجربهاش فى التمثيل وكانت مكن منه شلبى او سميه الخشاب يبقوا احسن منها دشليون مره بس هو برده كيفه انه يستفز الناس
ده جاب هايفه ده جاب هايفه
ربنا ينتقم منهم الاتنين


بس انتى زعلتينى يا فنونتى وجيبتيلى احباط
بقى فيلم السقا وحش ده انا كان نفسى اتفرج عليه
وبعدين انا حاسه انك جايه على السقا شويه انا بحس انه مجتهد جدا وممثل هايل

The Seagull said...

سيناريو ضعيف جدا

قصه مهزوزه

مشاهد كتيره متشاله


بالضبط .. هو ده اللي عمالة أرغي فيه من الصبح .. فين القصة؟ أنا مش لاقية أي خط أمشي عليه بصراحة .. هي فعلاً زي ما قلتي يا فنون اسكتشات مميزة ومعمولة بحرفية عالية جدًا .. رغم إنك لو دققتي برضه هتلاقي في تشابه في المشاهد مع "Slumdog Millionaire" :D

لكتر هيحنقني دلوقتي أنا عارفة :D

بالنسبة بقى ل"دكان شحاتة" فإن شاء الله لما ينزل دي في دي أبقى اتفرج عليه .. خالد يوسف ده أنا مش بطيقه أساسًا .. "رغم تحفته السنة اللي فاتت "الريس عمر حرب" بس بصراحة أسلوبه بيخنقني وبيستفزني آخر حاجة :)

Superman said...

كده اتطمنت ان إنطباعي في محله و مش هشوف الفيلم :)

من كام يوم كنت بقرأ حوار لتامر حبيب..كان بيقول فيه انه مابيحبش افلام خالد يوسف..بس دكان شحاتة من الافلام اللي هتنافس بقوة الصيف ده

و إتكلم عن طريقة تناول خالد يوسف للفقراء في افلامه و قد ايه هو بيسود الدنيا بطريقة مبالغ فيها مش مفهوم سببها

انا متفق مع كل حاجة تامر حبيب قالها..و بضيف عليها ان خالد يوسف نموذج للمدعين
مدعي انه مفكر..مدعي انه مخرج..و عاش و هيعيش في عباية انه تلميذ يوسف شاهين النجيب

في جريدة الشروق كانوا قاسمين صفحة الفن نصين..نص بيتكلم فيه عمرو سعد..و النص التاني بتتكلم فيه هيفاء

و كان النقاش مع هيفاء عن هل الفيلم بيدور حوالين الصراع العربي الإسرائيلي و هل الدكان رمز لفلسطين ولا لأ؟
و جاوبت انها مثلت الفيلم و عارفة انه فيه سياسة..لكن ماتعرفش لو فيه رموز ولا لأ :D

اما عمرو سعد..فكان كلامه منصب حوالين ان دكان شحاتة هو التطور الطبيعي لحين ميسرة و قعد يتكلم في السياسة و المجتمع

بصراحة حسيت الكلام ده بيأكد نظرتي و انطباعي..فمع بعض الظروف الخارجية..صرفت نظر عن انني اتفرج علي الفيلم

بالنسبة لإبراهيم الابيض..اوعدك إن شاء الله انني اكتب عنه اول ما اشوفه..بس انطباعي عنه من إعلانه مليان سلبيات

Superman said...

بالنسبة للنقطة بتاعة احمد حبيت ارد عليها رد لوحده

الفيلم لازم يبقي بيعرض وجهة نظر صناعه و مايكونش محايد

لان الفيلم بيعرض فكرة و وجهة نظر..حتى لو كان فيلم وثائقي

احنا ممكن نعمل فيلم عن منتخب مصر في عهد محمود الجوهري و نطلعه مدرب تكتيكي عبقري و صاحب نظريات خططية خلتنا نروح كاس العالم و نفوز ببطولة الامم الافريقية 98

و ممكن نعمل فيلم تانى نطلعه مدرب اقل من العادى صاحب فكر تكتيكي محدود و مابيعرفش يتعامل مع لاعيبته ولا اللاعيبة المنافسين بدليل انه علي مدي 15 سنة كان بيلعب بحسام حسن مهاجم و الـ10 لاعيبة الباقيين مدافعين

فطبيعي الفيلم يحمل وجهة نظر صناعه..حتى لو فيلم رومانسي
صناعه هيتكلموا عن رأيهم في الحب بطريقتهم

الحب في افلام محمد حفظي مختلف عن الحب في افلام تامر حبيب
و الضحك من منظور احمد حلمي غير الضحك من منظور محمد سعد

هندسة وصفية said...

هو طبعا انا عشان عايش في الكويت مش في مصر
فمش هيفرق معايا الفيلم يتحرق لاني كدة كدة مش قادر اشوفه
قصر ديل يعني
خالد يوسف بجد انا مخنوق منه من حين ميسر و الريس عمر حرب
بس انا حاسس ان في تقدم في الفيلم ده يا ريت توضحيه
ان يمكن لاول مرة مش بيدوس علي الناس المعدمة زي ماهو متعمد يعمل
يمكن
ثانيا مفيش حاجة اسمها كدة اصلا
مين في الدنيا المفروض انه فنان يوظف فنه في خدة قضيته الشخصية هو بس
و طظ في المجتمع كله بكل اراءه
دي تبقي سينما و لا نشرة دورية تصدر كل صيف
بجد انسان خنيق
يعني لو هو شايف نفسه كنموذج للطبقة المتوسطة فبجد يعني انا بتبراء من الطبقة دي تماما
احمد

Fatma said...

الشاردة

انا بردو ماعنديش مشكلة انه يعرض وجهة نظره كل واحد حر
واضح جدا انه هو هدفه الاساسي شخصي ودا مش غلط بس بلاش شعارات وبلاش دور المناضل
انا ماعنديش مشكلة مع هيفا على فكرة مش عارفه ليه الناس مستفزين منها اوي كدا

البنت مش موهوبة بس محط انظار الناس وهو عايز يستغل دا مش عيب
الموضوع كله بيزنس

ومش شايفة اساسا انها اضافة للفيلم عادي يعني وجودها زي عدمه لا زود ولا نقص

السقا مممم انا ما بشوفوش ممثل هايل مش وحش بس مش هايل
الفيلم ممكن يعجبك لانه عجب ناس كتير وهو من الناحية الفنية فيلم كويس جدا بس القصة فراغ
بصي ..انا اوقات كتير بحكم على الفيلم من احساسي وبس يعني من غير مبررات ممكن فيلم يعجبني ومن غير مبررات ممكن فيلم ما يعجبنيش
انا الفيلم دا طلعت منه مش مبسوطة ..مش عاجبني ..حتى ماتسليتش وزهقت جدا في الفيلم وكان نفسي يخلص
مفكك جدا من نفسه بصراحة

Fatma said...

يسرا

Slumdog Millionaire
معقول ! انا ماشفتوش بس كدا هشوفه بقى

الريس عمر حرب ماشفتوش ومش هشوفه دا فيلم من الافلام اللي انا واخدة منها موقف من غير ماشوفه ومش ناوية لعدة اسباب
اعلان الفيلم كان فيه تجاوزات مرفوضة بالنسبة لي تماما
دا غير ان هاني سلامة تقيل على القلب اوي وعلى ما سمعت ان الفيلم متاخد من فيلمين اجنبي ديفلز ادفوكاد وكازينو
يعني الخلاصة انا واخدة موقف من الفيلم دا ومش هشوفه
خالد يوسف زي ما ذكرت في الموضوع بالنسبة لي واحد ممتاز في توجيه الممثل بس فنيا هومخرج عادي تماما مش مستاهل الضجة اللي معمولة عليه

Fatma said...

سلطان
كلام تامر حبيب صح وكلامك صح خالد يوسف مدعي فاكس تماااما
بس بجد فيلم لازم يتشاف يا سلطان يعني بالرغم من كل البلاوي اللي عمالين نتكلم فيها طول الوقت الفيلم في الاخر حالة مش فيلم والسلام

انا مستنية موضوعك عن ابراهيم الابيض

متفقة معاك في نقطة ان الفيلم لازم يعبر عن وجهة نظر صناعة بغض النظر عن اني متأكدة ان دي مش وجهة نظر خالد يوسف دي وجهة النظر اللي قرر انها تكون وجهة نظره عشان يكمل صورة الشاب المناضل الثوري الاشتراكي البرجوازي البتنجاني واهو كله سلطة

Fatma said...

هندسة وصفية
أنا ماشوفتش الريس عمر حرب بس شوفت حين ميسرة وعجبني ويحسب له انه اول واحد اتكلم في فيلم عن فقراء المدن سكان العشوائيات بغض النظر عن التفاصيل

مافيش تقدم في الفيلم دا ..الفيلم في المجمل مستواه قريب من حين ميسرة الاعتماد الاساسي على اداء الممثلين وفكرة سرد الواقع والالحاح ان الاشتراكية هي الحل وان النهاية سودا والحل الثورة
كل دا في اطار قصة جذابة وبتشد دا في رأيي

لو الفنان صاحب قضية المفروض ان يعمل حاجة تخدم قضيته دا لو فرضنا يعني ان خالد يوسف فنان او صاحب قضية
بس انا مش ضد ان البني ادم يعرض وجهة نظره ويدافع عنها مش عيب

نشرة دورية مممم اه الفيلم دا كأنه نشرة تلخيصية للاحداث اللي حصلت في ال 30 سنة اللي فاتوا
عموما دي فكرة ناجحة وخالد بيلعب ع المضمون

هندسة وصفية said...

مش عيب ان الفنان يعمل حاجة لقضيته
بس عيب ان يحتكر كل حاجة لقضيته
ثانيا هو فعلا خالد اتناول الطبقات المعدمة
بس ازاي
نصب و ارهاب و زنا محارم و شحاتة
و الطبقة الغنية
خيانة و استهتار و تحشيش
و الطبقة المتوسطة ملايكة؟
هاني سلامة في ويجا
مي عز الدين في خيانة مشروعة
انا عموما بحب السينما في حد ذاتها و مش بنقي الافلام حسب رايي
بس هي وجهة نظري

Jannah said...

بس اعتقد انهم مهمين للمصريين لانهم بيتكلموا عن دواخلنا اوي مش هتبقى مسلية لحد مش مصري في اعتقادي
او يمكن مش هيحسها اوي زي ماحنا حاسينها
...............
لا لا والله
شفنا فيلم الأرض وعجبنا و شفنا فيلم المواطن مصري وعجبنا
وغيرهم
بس خالد يوسف ضعيف أصلا ماعندوش أدوات حتى يتمكن منها و يكون مخرج بمعنى مخرج
ضعيف ضعيف جدا
معتمد على الفرقعة بس و مستغل رصيد و اسم يوسف شاهين بطريقة حتى مو حلوة و مرنة و ذكية
هذا غير انه كل نماذج النساء في أفلامه يا اما عاهرات يا اما ما يشبه ذلك

Fatma said...

هندسة وصفية

مش حاسة خالص انه متحيز للطبقة المتوسطة

هو في رأيي متحيز تماما للطبقة الفقيرة او المعدمة

Fatma said...

جنة

ايش جاب ل جاب يا شيخة
:)
يوسف شاهين وصلاح ابو سيف في مقارنة مع خالد يوسف

متفقة معاكي في اعتماده تماما على الفرقعة واثارة الجدل ومحاولة استغلال اسم يوسف شاهين باعتبار انه تلميذة الاول
مع ان معروف ان اهم تلامذة يوسف شاهين هو على بدرخان بس خالد يوسف اخد اللقب وفرحان بيه يا حرام

فرق شاااسع بين تكنيك يوسف شاهين
كمخرج وبين تكنيك خالد يوسف
بغض النظر عن افكار شاهين انا بتكلم في نقطة تكنيكه كمخرج
خالد يوسف محدود الامكانيات كمخرج وزي ماذكرت قبل كدا ميزته الوحيدة في توجيه الممثل

اما عن نماذج النساء في افلامه انه بيظهرهم عاهرات فدا موجود بس مش بالصورة اللي انت متصوراها
يعني مثلا في حين ميسرة كان في عاهرات وكان في نماذج كويسة او طبيعية على الاقل
في فيلم هي فوضى كان بردو طبيعي
في دا وفي دا

على غير العادة مش موجود في فيلم دكان شحاته ولا نموذج واحد لست عاهرة على ما اذكر

يعني بالرغم من
انه جايب هيفا وهبي الا انه مطلعها بنت عادية لا ملاك ولا عاهرة

اجمالا الفيلم يستاهل يتشاف بغض النظر عن عيوب كتير اوي
واضحة ومزعجة

ياريت تغيري رأيك وتشوفيه :)

Fatma said...

اه ونسيت انت عمري كمان

ماكانش فيه نماذج لعاهرات خالص

وكان اجمالا فيلم حلو بردو

بغض النظر عن هاني سلامة طبعا لاني عندي مشكلة نفسية مع تمثيله :)

مواطن مصري said...

كل ناس دخلت الفلم و انا لا لية ينزلو الفلم في السينما وقت الامتحنات
اهىء اهىء اهىء


انا بحب افلام خالد يوسف شان تلميذ العبقري يوسف شاهين

ب الرغم انو ناصري و انا مش بحب الناصرين

بس انا بحب افلامة

انما الناس هاجمت الفلم عشان مشهد هيفا في مسجد الحسين


انا بقول للناس دي مرضى ولا زم يتعالجو قبل ما يدخلو السينما

ثانيا
من اطرف التعليقات الي ضد الفلم
ان هيفاء شيعية ولا يجوز لها انها تدخل المسجد الحسين

:dddddd


انا مستني عين شمس و عاوزز ادخل ابراهيم الابيض و دكان شحاتة

Fatma said...

مواطن

مستني عين شمس ايه دا نزل من بدري وتقريبا اتشال خلاص :)

هيفا شيعية ومايجوزش تدخل الحسين !!!!

مين العبقري صاحب التعليق دا

اذا كان في مسيحيين بيدخلوا ويهود بيدخلوا وبلا ملل ولا دين بيدخلوا دا مزار سياحي اصلا
هما بيعملوا كشف هيئة على باب الجامع ؟

وبعدين اساسا اساسا من اهم الشخصيات عند الشيعة سيدنا الحسين

لا بجد مين صاحب التعليق الهلامي دا :)

The Seagull said...

أنا اتفرجت على "الريس عمر حرب" دي في دي يا فنون ومافيهوش أي مشاهد تُذكر :)

بس القصة عجباني بصراحة واللي عاجبني فيها أكتر جرأتها وإثارتها للجدل :D

TAFATEFO said...

بعد مصر عمار بيك يا ريس .. والله مصر عمار بيك يا ريس صعب الواحد يبص في وش منى زكي

Jannah said...

ههههههههههههههه هذا هاني سلامة ملامحه متبلدة ماعرفت شلون صار ممثل أصلا و هو ملامحه غير مرنة مع المشاهد و الشخصيات

ماقدر أغير رأيي هنجت على فكرة واحدة عن خالد يوسف أبو الفنون
أتفرج على فيلم أستمتع بيه أما خالد يوسف جربته مرتين ماحققليش أي متعة
ضعيف محتاج دورات تدريب

Fatma said...

يسرا

ماعرفش انا واخدة موقف كدا من الفيلم مش مريحني :)

Fatma said...

مصطفى

ههههههههههههههههههههههههه

اه يا قلبي هموت من الضحك
طيب هي صحيح كانت منهارة ليه وهي بتقولها
مافهمتهاش

لو هنقاطع اي حد رأيه مختلف انا شخصيا مش هتفرج على حد :)

Fatma said...

جنة
هموووت من الضحك

بتخيل شكل خالد يوسف لو عرف ان في حد بيقول عليه انه محتاج دورات تدريب

:)

هو كان مساعد يوسف شاهين لقرون
ودي النتيجة

يعني دا اخره مافيش امل اظن