Thursday, July 30, 2009

لـــيه هــما أسعـــد مننـــا ؟


زمان ماكنتش بحب الاطفال أوي ..بس مؤخرا ابتديت الاحظ حاجات كتير فيهم وقد ايه هما مختلفين عننا
هما أسعد ...بيتمتعوا بقدر كبير من السلام الداخلي ..مليانين تفاؤل وطاقات ايجابية ..بيعرفوا دايما يوصلوا للي هما عايزينه ..لا وكمان هما عارفين بالظبط هما عايزين ايه !

يمكن السر انهم عفويين ..بيعملوا اللي بيحسوه وبيقولوا اللي عايزينه من غير رقابة ومابيفرقش معاهم هل اللي بيقولوه من وجهة نظر الناس صح ولا غلط

كل ما بنكبر بنتحول لكائنات معقدة مشغوليين جدا بايه اللي لازم نقوله وايه اللي مش لازم نقوله ..بنبقى بشخصية مع ناس وبشخصية مختلفة تماما مع ناس تانية...الاطفال مش كدا !

في رأيي إن الاطفال اكتر قدرة على التواصل مع الناس ....لانهم بيبصوا بشكل مباشر لعين اللي قدامهم لو لفت انتباههم وبيوصلوا كل حاجة جواهم من خلال النظرة دي . نظرتهم البريئة في عنيك بشكل مباشر بتخليك تتصور انك اهم واحد في الكون بالنسبة ليهم بس لما تبتدي تبقى ممل أو يقرروا ان في حاجة تانية مثيرة للاهتمام أكتر منك بينسوك تماما ويتشدوا للحاجة التانية ودا مش لسبب غير انهم بيعرفوا كويس أوي يقييموا اللي قدامهم وايه اللي ممكن يقدموه ليهم.
هل احنا عندنا القدرة اننا نبص للناس بشكل مباشر في عنيهم ونقيمهم ونشوف هل فعلا الناس دي تستاهل اهتمامنا ولا لأ؟ ولو ادركنا انهم ما يستاهلوش الاهتمام هل بيبقى عندنا القدرة اننا نبعد عنهم ونشوف حد تاني يستاهل اهتمامنا بيه؟

الاطفال بيطلبوا اللي عايزينه في اللحظة اللي بيدركوا فيها انهم عايزين الشيئ دا ..ممكن نفشل في وقت معين اننا نفهم بالظبط هما عايزين ايه ..بس هما عارفين كويس هما عايزين ايه ومش هيستسلموا لحد ما يقدروا يوصلولك طلبهم وتفهمهم كويس وتنفذ اللي هما عايزينه

هل احنا عندنا القدرة اننا نطلب اللي عايزينه ؟ ولا بس بنتمى ان الناس تكتشف لوحدها احنا عايزين ايه ويعملوه لينا ونتضايق جدا لما ما يعرفوش احنا عايزين ايه؟ لما بنبقى عايزين حاجة ومانعرفش نوصلها هل بنستسلم ولا بنفضل نسعى ورا الحاجة اللي احنا عايزينها وعارفين انها هتسعدنا ؟!

الاطفال ما بيتكسفوش انهم يبينوا احاسيسهم ومشاعرهم وتقدريهم للناس ..ودي حاجة بتخلينا عايزين نسعدهم ونعملهم كل اللي في مقدورنا ..لما طفل بيطلب حاجة وتعملهاله بيبينلك فرحته الكبيرة بالحاجة دي حتى لو كانت حاجة بسيطة جدا ..ويكافئك بحضن دافي او بوسة رقيقة ع الخد
هل احنا بنوري تقديرنا للناس لما بيعملولنا حاجة كويسة ؟ ولا بنخاف شكلنا يبقى مدلوق وماصدقنا حد عملنا حاجة ؟!

الاطفال ما بيفكروش كتير في تبعات المواقف ..ما بيحللوش .آه لو عملت كذا هيحصل كذا ولو حصل كذا هيحصل كدا ..هما عارفين ايه اللي هيسعدهم وبيعملوه ...ببساطة
هل احنا بنعرف نعيش اللحظة ؟ ولا بنقعد نحلل ونستنتج ونستنبط كل واي حاجة بنسمعها وبنشوفها من الناس ! هل بنعمل ببساطة اللي شايفينه هيسعدنا ؟ اعتقد اننا بنفكر زيادة عن اللزوم واوقات كتير بنحمل الاشياء اكتر مما تحتمل

الاطفال واضحين وصادقين ..مش عشان هما كدا ..لا عشان ببساطة مش مهتمين بشكلهم هيطلع ايه قدام الناس ولا الناس هتفكر فيهم ازاي ..هما اقوى مننا بكتير ..عمرهم ما بيستنوا حاجة من حد ..لما بيبقوا عايزين حاجة هما اللي بيبتدوا وبيروحولها

الاطفال ما بيشيلوش ضغينة ولا حقد ولا كره لحد ..لو اتضايق منك في لحظة بينسى بعدها بدقيقة لو عملتله حاجة اسعدته ..ما بيستوعبوش فكرة التسامح لانهم اصلا مش مستوعبين فكرة العقاب
هما بيحبوا وبيعيشوا بالنقاء ومن غير تلوث بالكره
هل عندنا القدرة على اننا نسامح ؟ ولا بنعيش شايلين جوانا سلبيات كتير وكره وضيق يتعبنا شخصيا قبل ما يكون بيضايق اللي اتسبب لنا في الاحساس دا ؟

زي ما قلت ..كل ما بنكبر بنبقى جادين اكتر وبندخل في صراح الحياة ..بننسى نعيش ..بننسى نبتسم ونستمتع بجمال اللحظة اللي احنا عايشينها
لازم نتخلص من السلبية اللي اتبنت جوانا ..نعيش ولو شوية ونحاول نسترجع حياتنا تاني

النظرة الايجابية للحياة بتساعدنا على تحقيق اهدافنا وفي نفس الوقت بتخلينا نحافظ على احاسيسنا ونقائنا وشفافيتنا
كل واحد فينا جواه جزء برئ يشبه الاطفال تايه في زحمة حاجت وحشة كتير ..جزء بيخلينا سعداء وراضيين لازم نحاول نلاقي الجزء المفقود دا

اكيد ان الواحد يكون طفل دي نعمة كبيرة ...بس كون اننا كبار دا بردو ليه مميزات ..على الاقل ما بنعملش بي بي على روحنا :)

•كلامي عن الاطفال اللي تحت سن السنتين لانهم بعد كدا بيتحولوا لكائنات شريرة جدا وخبيثة
•الموضوع دا مهدى لابن اختي اللي غير كتير في نظرتي للحياة من يوم ما جه الدنيا
:)

14 التعليقات:

Superman said...

طبيعي الاطفال يكونوا اسعد مننا
مش احنا لما كنا قدهم كنا اسعد من دلوقتى؟

الاطفال مابيفهموش حاجة..لا عندهم صح ولا غلط
و مفيش عليهم اى واجبات و فروض

و مابيتحاسبوش علي افعالهم لانهم لا يعقلون

عالمهم متلخص في حلو و وحش و كمية مهولة من البوس من و الي اى شخص يقابلهم

هم عالمهم مبنى علي الخيال..ديناصورات و تنانين و كارتون..فاكر ان و انا طفل كان اكبر مشغولياتى هي نتيجة ماتشات الكابتن ماجد..و ازاى دوق فليد هيسحق اليوفو بتوع فيجا الكبير :D


بعدين علي جانب اخر الاطفال سهل اوى خداعهم بأى حاجة

معتقدش مثلآ انني لو رحت قلت لاي واحدة حلوة..تاخدي نص جنيه و تديني بوسة انها هيكون لها نفس رد فعل اى طفلة صغيرة بلعب معاها :D

leeno said...

النظرة الايجابية للحياة بتساعدنا على تحقيق اهدافنا وفي نفس الوقت بتخلينا نحافظ على احاسيسنا ونقائنا وشفافيتنا
كل واحد فينا جواه جزء برئ يشبه الاطفال تايه في زحمة حاجت وحشة كتير ..جزء بيخلينا سعداء وراضيين لازم نحاول نلاقي الجزء المفقود دا

الخلاصة في الكم كلمة دول :)

على فكرة لما يكبر ابن اختك عن سنتين حتحسي بحاجات تانية انه علمهالك و حتحسي برضه ان الاطفال يتحبوا فأي سن

كل حاجة ليهم ليها حلاوتها و شقاوتها و
(نغاشتها)

انا شخصيا لسةبحس بالاحاسيس دي مع اولاد اخويا

و على فكرة مفيش طفل مش خبيث و لا في كائن حي مش خبيث

بس احنا بنشوف خبث الاطفال مضحك و برئ مش بنشوفه مؤذي !

و لو عرفتي تسمحي للطفلة اللي جواكي تظهر و تاخد راحتها كدة حتحسي ان جواكي هموم و بتتغسل (مش لاقية كلمة تانية لان دة احساسي)

ســـــاره said...

عشان هم مش شايلين هم حاجه
مش فاهمين الدنيا ولا فاهمين الناس
عايشين حياتهم بكل براءة وزي ماتيجي تيجي
لاتفكير ولا هم
بيتسمتعوا بكل حاجه وممكن يلعبوا بأقل حاجه
حتى كلامهم حتى اسئلتهم فيها براءة عجيبة
بيعجبني اوووي منظر اتنين بيلعبوا والتالت بيبص عليهم من بعيد وتلاقيه ايه بيراقبهم في كل حركة ولما يضحكوا تلاقيه ضحك معاهم ولا يزعلوا تلاقيه كشر معاهم ولما يخافوا تلاقيه يجري زيهم مع انه ولا يعرفهم :D

.......................

على الهامش كده بعد اذنك يافنون

عايز ايه اللي فوق ده ابو نص جنيه :D
الا هم ليه كلهم بنات يامحمد d:

Israa El-sakka said...

البوست تحفة يا فنون بصي أجمل ما في الاطفال شقاوتهم بموت فيها لكن براءتهم انا بتمنى أرجع طفلة تاني مش بكره حد مش بشب من حد مش فاهمة الدنيا بعفانها بجد الواحد كان مضايق أنه مغمض لما فتخ بقى نفسه يغمض تاني

Jannah said...

طيب والله نفسي أتخلص من التشوهات الروحية ههههههههه
و أرجع بنفس الطفولية
بس هيهات هيهات
حقيقة الأطفال عالم قائم بذاته عالم البراءة الأولى
علشان شدي تلاقينا دايما نتلزق فيهم و نتقرب منهم و مصرين نقتحم عالمهم
مع اني متأكدة انه هم مو طايقين كل البشر اللي قاعدين يبوسوهم بمناسبة و غير مناسبة
:D
هي الحياة اللي بتغيرنا
بالمشاغل و المشاكل

Anonymous said...

مش عارفة يا فنون,بس متهيألي,إن الأطفال,بيشيلوا جدا جدا جدا :)

مش عارفة :)

بس فيه حاجات,رغم إنها صغيرة

بس الإنسان,بيفضل شايلها وفاكرها من وهو طفل

وممكن كمان,تعمل عقدة :)

وده,عيب فيه,في الإنسان أكيد :)


يمكن,أحيانا,مش بينسوا والله,إلا لو كانوا أطفال لسة رضع :)

مش عارفة,يمكن كلامي غلط :)


يارب تكوني انتي وفلة بخير بجد يارب:)

Fatma said...

سلطان
مين قال الاطفال ما بيفهموش حاجة؟ انا بشوفهم بيفهموا كل حاجة بذكاء فطري غريب ما بيحسبوش افعالهم ودا احلى حاجة فيهم
قريت قبل كدا ان الطفل قبل ما يتم سنتين ما بيبقاش عنده ضمير
استغربت اوي الموضوع دا ..يعني اللي بيخلينا بني ادمين وحشين هوالضمير ؟ ولا الطفل دا لو كان منه على كبير وهو معدجوم الضمير كان بقى كائن شرير ولا ايه؟
الاطفال مش سهل خداعهم ابدا بالعكس
هما عارفين عايزين ايه ولما بتعرض عليهم حاجة بيعرفوا يقيموا هل المقابل مستاهل ولا لأا وعلى الاساس دا بيدوك اللي انت عايزه عشان ياخدوا اللي عايزينه
عشان كدا لو رحت لواحدة كبيرة وقولتلها خدي ربع جنيه وهاتي بوسة هيكون رد فعلها سيئ لان ربع جنيه دا مقابل تافه جدا بالنسبة للبوسة في نظرها

Fatma said...

لين

لما يكبر عن سنتين هحبه ويمكن اكتر بس هيوحشني الهبل اللي هو فيه دلوقتي وهفتقد السن المجنون دا
ربنا يغسلك همومك كلها وحشتيني
:)

Fatma said...

سارة
مش شايلين هم حاجة كبيرة آه بس شايلين هموم صغيرة على قدهم ومش فاهمين الناس دا حقيقي ويمكن دا احسن حاجة لانهم بيتعاملوا زي ماهما عايزين مش زيينا لما بنتعامل مع الناس على اساس هما ايه
فكرتيني بابن اختي وهو بيتفرج على بيبي تي في ويقعد يعمل انفعالات وحركات بوشه معاهم

:)
ربنا يباركلك في اولادك ويفرحك بيهم يارب

Fatma said...

اسراء
معاكي حق
الواحد كان نفسه يكبر وبعد ماكبرنا ادركنا النعمة اللي كنا عايشين فيها
مبسوطة ان الموضوع عجبك وشرفتيني حقيقي بتعليقك اشكرك

Fatma said...

جنة
كلنا بجد نفسنا نتخلص من التشوهات الروحية ودا شيئ صعب جدا جدا لان كل ما تتخلصي من شيئ وبصعوبة يتطلعلك شيئ تاني
معاكي حق اكيد الاطفال بيتخنقوا مننا بشكل غير عادي وبالذات من البوس والاحضان والتفعيص اللي بنعمله فيهم يالهوي لو انا في مكانهم كنت اتخنقت انا اساسا ما بستحملش حد يقرب مني
الحياة فعلا بتغييرنا كتير وكل شوية احنا عايشين في تعيير مستمر يارب بس في الاخر نستقر على الافضل

Fatma said...

ايمان
الاطفال قبل سن سنتين بيشيلوا ؟ انا متهيألي انهم عاملين زي السمك بينسوا في لحظة حتى لدرجة انهم بينسوا الناس لو ماشافوهمش باستمرار
العقد والحاجات دي بعد سن سنتين مش قبله على ما اعتقد

:)

Anonymous said...

اممم
مش عارفة

يمكن,قبل سنتين

اه,يمكن بقى

انا فاكرة مرة,ماماكانت شايلاني,عللى كتفها,ورايحة البلد

ولحد دلوقتي

بتقولي

فضلتي تعيطي,وستك,تعيط جنبك


طالما كنت بتشال

وفاكرة

الصورة الصغيرة اللي اتصورتها بعدها دي

يبقى كنت؟؟

سنتين؟!!!

مش عارفة

Anonymous said...

ربنا يخليه :)

زميله,ابن صاحبتي :)

قريب,كنت عندهم

عاوز تفضلي ماسكة ايده,علشان يمشي

سبت ايده,عيط شوية,مركزتش

مامته,زعلت اني سبته يعيط

بس,تعبت من اني اقوم واقف علشان يمشي للباب,ويخرج ,ورايحة جاية

تربية الولاد صعبة قوي :)


ربنا يحميه يارب,ويحميهم :)