فكرة ان الواحد يلاقي ركنة شبه كدا فكرة ان مصر تفوز بكاس العالم ( دا بمناسبة الفيفا اللي هيتم ذكرها في الموضوع لاحقا)
قلت مافيش مشكلة اركن في كونراد انا كدا كدا مش هتأخر كل الحكاية نص ساعة
قالك باركينج كونراد مقفول يعني ايه يا عم يعني كدا مليان مافيش مكان
طيب
الشارع اللي بعد كونراد
قافلينه بحاجز حديد بعجل وواقف عسكري مرور غلبان
ووراه ركنات فاضية كتيييييييييير قلت لا مش هقدر اقاوم
لوسمحت يا عم ممكن اركن هنا
لا ما ينفعش
ليه دانا مش هتأخر كلها نص ساعة
طيب تعالى
هكذا ببساطة وتلقائية
ركنت ونزلت ورجعت فعلا بعد نص ساعة
لقيت كل اجهزة الدولة واقفين عند عربيتي
قبل مافتح بقي لاقيت واحد ببنطلون وقميص بيقولي دي عربيتك ؟
ايوا
انتي مين ؟
يعني ايه ؟
بطاقتك لوسمحتي
مين حضرتك
بلا بلا بلا من مباحث امن الدولة
هاايل دا كلام جميل
فتحت العربية وحطيت حاجتي وفتحت الشنطة وطلعت البطاقة وادتهاله
قعد يبحلق فيها شوية
ولاقيت وراه اخ من اللي ما بستحملش شكلهم عنده 3 نجوم على كتفه ماعرفش بقى دا رتبته ايه بيقولي الرخص لو سمحتي
الاخ بتاع امن الدولة : انتي دخلتي هنا ازاي وبتعملي ايه ؟
انا: هو في ايه حضرتك معلش انا عملت حاجة غلط معينة ياريت توضحلي يعني بدل الارهاب دا
الاخ بتاع امن الدولة: في ان هنا ممنوع الركن وانا عايزاعرف انتي دخلتي هنا ازاي
دخلت عادي كان في راجل واقف قلتله عايز اركن فتحلي وركنت
امن الدولة: يا سلام بالبساطة دي وانتي ركنتي هنا عشان طالعة فين الاوتيل ؟
انا : لا مركز التجارة
امن الدولة: ليه؟
انا : عندي معاد شغل
امن الدولة : بتشتغلي هنا يعني ؟
انا : لا كان عندي معاد شغل هنا
امن الدولة : وانتي بتشتغلي فين وايه والمعاد في شركة ايه
انا بيني وبين نفسي ( احيييه) بشتغل في شركة كذا وجاية معاد في شركة كذا هو الاسئلة دي عادي ؟
امن الدولة : انتي متوترة ليه؟
انا : لا مش متوترة بس تخيل يعني انت راكن ونازل لا بيك ولا عليك ترجع تلاقي مصر كلها عند عربيتك وفي تحقيق مفتوح بصراحة خضتوني يعني
طيب خلاص يا ستي انا اصلا المفروض اتحفظ عليكي وعلى العربية عشان هنا في وفد الفيفا وفي امن مشدد وماكانش ينفع خالص تدخلي هنا ممكن الرخص بقى لبتنجان باشا او 3 نجوم
يادي اليوم اللي مش فايت ..رخصة العربية منتهية من سنة طلعت الرخص وامري لله
ابو النجوم: دي منتهية
انا : آه
ابوالنجوم : من سنة وشهرين
انا : آه
ابو النجوم: آه ايه وماشية بيها عادي كدا مافيش حد وقفك من ساعتها
انا : لا يوقفوني ليه بحط الحزام وما بتكلمش في الموبايل وانا سايقة (كذابة) ومابكسرش اشارات
ابو النجوم: ماعدتيش على لجان خالص
انا : لا عديت ما طلبوش الرخص عدوني عادي زي مانا ركنت هنا عادي ممكن امشي بقى
ابو النجوم : وماجددتيهاش ليه ؟
انا : عشان بزهأ !
بصلي نظره عجيبة جدا
بصلي نظره عجيبة جدا
كملت : آه والله بزهأ جدا انا ماعنديش وسايط يجيبولي الرخص ولما بروح المرور بتمرمط بصراحة فياريت تديني الرخص بقى بدل ما تمرمطني ع الفاضي وسبني امشي
ابو النجوم : لا تمشي فين انا هسحب رخصة
انا : بس العربية راكنة مش ماشية هو انت ينفع تسحب رخص عربية راكنة ؟
ابو النجوم: يا سلام مانتي ماشية بيها وبعدين بلاش لماضة دي اصلا خلصانة وانا خدمة ليكي يعني هسحب رخصة القيادة بتاعتك وهكتب في الوصل اني سحبتها عشان انتي ماشية بدون رخصة تسيير مركبة
انا : بس انا معايا رخصة تسيير مركبة منتهية آه بس معايا
ابو النجوم: تفرق في الغرامة
انا : مش هتفرق عايزة ادفع فوري وسيب الرخصة لو سمحت
ابو النجوم: اه ممكن فوري بس هعملهالك زي ماقلتلك غرامتها بسيطة خمسين جنيه
وعمال يخط ويكتب في الوصل
ابو النجوم: اسمك ايه
انا : هو مش مكتوب عندك في الرخصتين دا الاتنين باسمي
ابو النجوم: عندك كام سنة
انا : تفرق بالنسبة للمرور في حاجة ؟ اقصد يعني الغرامات وكدا بيفرق فيها موضوع السن ؟ اصل الحقيقة ما بفهمش في الحاجات دي خالص ( ابتسامة صفرا)
ابو النجوم: طيب يا آنسة ....وبيبص في الرخصة للمرة المليون ..مش آنسة بردو ؟!
لا احييه بجد
آه انسة ..كتبت الوصل .ممكن ادفع بقى وتديني الرخصة
ابو النجوم: لا ممكن تعدي هنا بكرة اديكي الرخصة وتدفعي الغرامة مافيش فوري دلوقتي
انا : يعني ايه مافيش فوري امال فوري على اساس ايه بقى ؟
ابو النجوم : ماعنديش دلوقتي فوري عدي بكرة اديكي الرخصة
انا : مش هاجي هنا تاني بكرة انا عايزة ادفع دلوقتي
ابو النجوم: طيب انتي ساكنة فين
يا خرااااااااااشي
انا : مكتوب في الرخصة
ابو النجوم : طيب ممكن اديكي نمرتي واخد نمرتك اكلمك بكرة اجيبلك الرخصة بكرة لحد عندك !!!!
انا : حضرتك كتبت الوصل ؟
ابو النجوم: ايوا
انا : طيب ممكن تدهوني
اخدت الوصل ودورت العربية وجاية امشي لاقيت بتاع امن الدولة بيضحك وبيقولي معلش بقى نصيبك ان رخصتك خلصانة ماكانش قصدنا نياهاهاهاها
الخفة
رفعت حاجب وشفة وقفلت الشباك ومشيت
27 التعليقات:
ماشية من غير رخص كل ده ازاى ؟ :s
لا مش من غير رخص
رخصة العربية بس خلصانة بقالها سنة وانا فعلا فعلا مش قادرة اروح المرور اجدد الرخصة بزهأ جدا بجد بقرف حياتي هناك
أبو النجوم ده نقيب شرطة عادى .. مقدور عليه .. لو عندك لوا إنشالله فى الأحوال المدنية ممكن يجيبلك حقك عميد ممكن عقيد فى حتة كويس إحتمال .. غير كده أقعدى ساكتة زى بقيت إخواتك - اللى همه إحنا يعنى - و ماتجيبيش لنفسك قرف و تسخيف أكتر من كده ..
خلصنا من النصيحة الأخوية ..
لأ اللى حصل ده غير قانونى و إسمه تحرش و يعاقب عليه المأسوف على شبابه القانون أيام ماكان عندنا قانون مع إنى معرفش إحنا كان إمتى عندنا البتاع ده ..
فاطمه انت مؤدبه بجد انا لو مكانك كنت شتمته وماتحكمتش في اعصابي وكان يجيلي هبل لاني مابطيقش بتوع الداخليه خالص ولما بتحط في موقف زي ده اعصابي بتفلت بجد وبصراحه كنت هتهور
تعليقي الوحيد مش احييه
بس ادي نتيجه ان بلد ماسكهها ظباط واحفاط ظباط
عارفه لو شاب كان في مكانك كان اتنفخ بجد مش هيسالوا بطاقه ولا يحزنون هيقولوا امن دوله ياروح ستك
لكن طبعا الباشا كان عاوز يظبط معاكي وقال اصطاد في الميه العكره بس انت سيديتي عليه الباب
بجد انت ازاي كنت ماسكه نفسك وانت بتردي عليه الردود دي
روحي شوفي لك واسطه يابنتي اوعي تمشي في شوارع المحروسه من غير واسطه عاوزه تصعدي الامر صعديه بس تراست مي
ملهاش لازمه مش هتاخدي غير اعتذارات وبس
عجبتنى قوى الحتة بتاعة .. لو سمحت يا عم ممكن أركن هنا .. :D
و بعدين .. الداخلية مش عارفة تعمل ايه معاكوا .. يبقوا زوق و لطاف و خفاف و لظاظ و ترى جنتى تقولوا مش عارف ايه
يبقوا زبالة تقول حبوب الأنسان ..
أنتى ازاى معندكيش واسطة فى القطاع المهبب دا .. الحاجتين اللى مليش سكة فيهم الداخلية والدفاع .. معرفش أعمل معاهم حاجة خالص
بصى أنتى تعملى عبيطة علشان سموك رخصتك منتهية .. و بالتالى لا حبوب الأنسان حتنفع ولا حتى جمعيات الرفق بالحيوان ..
يعنى هيا الرخصة فين دلوقتى ؟؟
ده واحد قليل الادب عايز يتسلى ويضيع وقت وبالمرة قال فرصة نتعرف على بنت حلوة
بس انتي مينفعش تعملي اي حاجة عشان ماشية برخص منتهية ولو نطقتي هتعملي لنفسك مشكلة معرفش بقانون السير عندكو
واصلا مستغربة انه بتجددوا رخصة العربية كل سنة
عندنا هي مرة واحدة لما تشتريها وخلاص
ورخصة السواقة مدتها بتاع 25 سنة
ربنا يعينك يا بنتي روحي بكرة جربي تجيبي الرخصة ولو معرفتيش معرفش تعملي ايه بس ربنا يسهلها وميحصلش اي تعقيدات
وابقي ابعتي حد يجددهالك بالواسطة كل حاجة بتحصل بسهولة
تأشيرة السفر محتاجة 21 يوم عشان تطلع سبحان الله ليا طلعت بيوم واحد تفتكري ليه
تامر
ماعنديش حد شرطة ولا داخلية الوحيد اللي اعرفه مات الله يرحمه بقى
انا مش غايظني غير موضوع فوري مانا كنت عايزةادفع فوري واخلص هوعمل اللي عمله دا ليه لو عنده استعداد يجيبلي الرخصة ديليفري ماكان يسيبهالي من الاول ونخلص
قرف قرف قرف
بغض النظر عن كونه قانوني أو لأ إنما هو تم بسخافه
فكالعاده يتصور البيه الضابط إنه يا ما هنا ويا ما هناك وإنه يستطيع بسلطته أنه يروش ويستظرف على مخاليق ربنا وانتي برافو عليكي مدتيلوش فرصه بس نصيحه بلاش الإجابات اللي من نوعية بزهق دي يعني ممكن تقولي نسيت مخدتش بالي من التاريخ هروح اعملها بكره أي إجابه من دول لأن إجابه زي بذهق دي بتدي ابو النجوم الفرصه انه يفرد عضلاته ويعند وهو حاسس من جواه انه ابن مصر البار اللي بينفذ القانون وبيحمي الحما ,
يعني من الآخر بدل ما كان ممكن يتكسف على دمه ويحس بسخافته بيحس انه على حق وطعم وأمور
عموما ربنا يرجعلك الرخصه بالسلامه ويبعدك عن مواقف حرقة الدم دي
لكتر
لا انا صبوووووورة جدا على فكرة انت ماتعرفش ولا ايه :)
وكل دا ومؤدبة ؟ دا قالي بطلي لماضة :) اصل انا اساسا مش مدركة لحد دلوقتي حجم الجرم اللي انا ارتكبته مالهم يعني بتوع الفيفا جري ايه يعني لما ركنت !!!
والله مافاهمه
انا اكتشفت ان اسم الاخ ابو النجوم على الوصل
ادوس واشوفلي حد يمرمطه ولا ايه ؟
كوبري
رخصة العربية المنتهية معايا ورخصة سواقتي شخصيا اللي شغالة سحبوها
يعني بعد ماكنت ماشية برخصة سارية ورخصة خلصانة بقيت ماشية برخصة خلصانة ووصل الرخصة المسحوبة
يعني فعلا دلوقتي خطر جدا اسوق كدا وانا بجد مش قادرة اروح اجدد افففففففففففففففففففففففففففففففففففففففففففففففففففففففففففففففف
مرموري
كان لازم تشوفي الخلقة والابتسامة اللي على جنب
يا لطييييف قد ايه دممممممه تقيييييييييييل
رخصة العربية ممكن نعملها سنوية تجدد كل سنة وممكن 3 سنين بحد اقصى
انا كنت عاملاها 3 سنين وخلصت من سنة :)
اما رخصة السواقة فباين بنجددها كل 10 سنين او 11 سنة
يالهوي
دي قربت تخلص هي كمان
محمد فوزي
انا فعلا عايزة اعرف هو اولا قانوني حد يسحب رخصة والعربية راكنة ؟
انا حاسة انه مش قانوني اصلا
لوانا متأكدة كنت قفلت العربية ومشيت ركبت تاكسي وخلصت من البلا الازرق دا كله
ثانيا هو قانوني اني ابقى عايزة ادفع فوري ويقولي مافيش فوري ؟ ازاي يعني مافيش فوري ؟
انا كنت قاصده ارد بسخافة اصلا الموقف كله كان سخيف جدا الحقيقة وكنت عايزة احسسه قد ايه هما مقرفين وبيطلعوا عين الواحد عشان يقضي مصلحة لو ماعندوش واسطة
كنت قاصدة ارمي الكلمة بصراحة
انا فاهم قصدك بس دي تترمي لحد رتبه لأنه غالبا بيبقى راجل كبير وناضج وبيعرف يقدر الشخص اللي قدامه وإحتمال كان يعتذرلك إنما الصغيرين لأ
من ناحية قانوني فالموقف قانوني ميه في الميه على فكره , انا سألتلك ضابط صاحبي وقالي انه من حقه بما إنك راكنه في الممنوع ودي مخالفة قائد وبالتالي رخصة القياده اللي تتسحب وقالي لو في نفس اليوم كنت جبتهالك إنما كده اتوردت للنيابه
إنما المهم صاحبي قالي ان حضرتك تروحي كده زي الشاطره يوم السبت أو الأحد مثلا للنيابه اللي تبع المكان اللي اتعملت فيه المخالفه وتدفعي الخمسين جنيه وتاخدي رخصتك ومحدش هيسألك خالص على رخصة العربيه المنتهيه ولا انتي تجيبي سيرتها
هو انا كنت عارفه رتبته اساسا دانا مسمياه ابو النجوم
انا ولا عارف حتى بعد ماقولتولي انه نقيب اذا كان دا حاجة كويسة ولا حاجة وحشة :)
انا اعرف الملازم والرائد واللوا
دا بقى اقل من الرائد ولا اكبر ؟
هو انا لازم اروح هناك ؟ ماينفعش مرور اللي رخصتي تابعه ليه ؟
دا ايه المرمطة دي يا ربي
حاجة تخيرة معلش تقلت عليك
متأكد ان ماحدش هيسألني على الرخصة الخلصانة ؟
اصل مكتوب في الوصل ان رخصتي اتسحبت عشان ماعنديش رخصة تسيير مركبة
متأكد مش هيقولولي فين رخصة تسيير المركبة عشان نسلمك التانية ؟
مش عايزة اطلع من نقرة اقع في ضحضيرة
هههههههه لا أقل من الرائد النقيب ده اللي بعد ملازم اول على طول
هو ليه كتب كده ابن التيت ده كان المفروض يكتب ركن في الممنوع
عموما قوليلهم انا رخصتي اتسحبت عشان ركنت في الممنوع وانا عندي عربيتين ومش بمشي باللي رخصتها منتهيه لو غلسوا زياده ممكن تقوليلهم اي حجه عن اليوم ده زي إن العربيه التانيه كانت عطلانه أو الرخص اتبدلت بين العربيتين أي حاجه
عموما كده الموضوع بقى في نيابه يعني اي وكيل نيابه ناشيء ممكن يجيبهالك , لولا اني مش في مصر كنت جبتهالك والله اصل الموضوع ده اتكرر معايا كتير وكانت بتخلص بسهوله
يالا ربنا معاكي ومتقعيش في ضحضيره دي
وبعدين ما تجددوا رخصكم بقى شعب متعب صحيح يعني
كل حاجة في السليم ماعدا جزئية الدفع الفوري
بس ليه ما تفترضيش ان الظابط ده انسان لطيف و فعلا مش هينفع بالنسبة له دفع فورى
لاحظي انه قالك عدي بكرة ادفعي و خدى الرخصة..و بعدين لما حس انه مش هينفع معاكى عرض انه يجيبهالك كنوع من الإعتذار عن انه غير مستعد النهاردة للدفع الفورى
مستني اعرف الموضوع هيوصل لفين و هتاخدى الرخصة ازاى..و بعدها ارجع اعلق علي الجزء التاني :D
حبيبتي فنون
أنا إسراء و اعتقد انهم في البطاقة ( اللي لسه مطلعتهاش ) ممكن يعملوا خانة يكتبوا فيها بكره الشرطة بجد بيخنقوني ده إيه الخفة دي انا مشفتش كده بجد كويس انك مفقدتيش اعصابك و ادتبلهم بالقلم يعودوا يسألوك سين و جيم و تاء و كأنك مشتبه فيه إحنا عايشيين في دولة بوليسية و يا حبيبتي متزعليش نفسك على المأسوف عليها الرخصة بجد في داهية أنا مش بفهم في القانون بس ده لا قانون و لا زفت
تحياتي يا كميلة :)
العربية اللى تقريبا كنا عايشين فيا 3 ايام رخصتها منتهية؟؟..انا عايزة ازغرط :D
لا تكبرى الموضوع ولا حاجة دول اقذر من بعض كلهم انتى تروحى تدفعى الغرامة و تاخدى الرخصة و يا دار ما دخلك شر..و احمدى ربنا انها جت على قد نمرتك و بس انا اعرف واحدة وقفها ظابط قالتله فى ايه قالها انتى سرحانة و انتى سايقة و مش معقول العينين الحلوة دى تبقى سرحانة كدا خطر عليكى..البنت بتحلفلى انه اتقالها كدا بالنص..فاحمدى ربنا انك ما كنتيش سرحانة و انتى راكنة :D..
ما أصعب الحياة و ما ألذ كيري
:D
فوزي
ربنا يخليك اشكرك بجد :)
هحاول والله اجدد الرخصة بالذات ان العروض ابتدت تنهال عليا بعد البوست :) لو كنت اعرف كدا كنت عملت بوست مشابه من زمان
دا اتضح ان نص مصر مظبطة نفسها مرور
جاتني خيبة :)
سلطان
دا ايه يا راجل قلبك الابيض المشع دا
دا الراجل طلع ملاك وانا اللي ماسكة الشوكة :)
واضح ان النهاية هتبقى اني هضطر اجدد الرخصة المنتهية وبعدها اروح اجيب الرخحصة المسحوبة
انا بقول اولع في العربية اسهل
اسراء
اه والله انا بشوفهم بيركبني عفاريت
مش عارفه ايه الكره الغريب لكل بتوع الداخلية
انا لبسهم ودبابيرهم وكاباتهم ابيض واسود صيف شتا منظرهم بيجبلي حالة نفسية بجد حقيقي
زي ماكون عاملة عملة وخايفة اتكشف :)
ههههههههههههههه
موتيني يا نينا موتيني
اه هي ياختي هو انا عمري ماقولتلك :)
قصةالسرحانة جامدة اوي هههههههه
خدمات جديدة تقدمها المرور
الديليفري وتحذيرك في حال كنت سرحان
بكررررررررههههههههممممممممم
جنة
كيري فقدت طعمها في ظل الاوضاع الراهنة :D
عنكم المرور بالبشاعة دي ولا دا انفراد حصري منقطع النظير عندنا بس في الحروسة
ايه الناس اللي دماغها تاعبها دي ؟!
طيب العمل ايه دلوقتي ؟
يعني حترجعيله تاني؟
الله يقرفهم بصراحة ! مش عارفة اقللك ايه
يا تري جبتي الرخصة ولا لسه؟
Post a Comment