صديقي العزيز

الزمان
من زمان اوي
يوم ما انا اتولدت
قالولك ان ماما بتولد ..وانت وقتها كنت قاعد بتسمع اغنية اسمها
dancing queen
جريت رحت المستشفى
واول ما انا اتولدت قولتلهم
she is my dancing queen
سموني في اليوم السابع ..وبالليل ماما حلمت ان اسمي حاجة تانية غير اللي سموهالي
بابا كان سافر
ماما كلمتك الصبح صحتك من النوم وقالتلك روح غير اسمها انا حلمت ان اسمها فاطمة
الاسم دا كان نفسك تسميهوني
انت انبسطت جدا ورحت غيرتلي اسمي
لما انا كبرت شوية ..كنت انت صاحبي ...صاحبي اوي ..وانا كنت فرحانة اوي
فاكرة تمشيتنا سوا في وسط البلد ...ايس كريم جروبي ..والكتب اللي كنت بتشتريهالي من مكتبة مدبولي
فاكرة اغاني
ABBA
وبالذات اغنيتي
dancing queen
..اسمي اللي فضلت تنادي بيه لحد اخرمرة شفتك
فاكرة اول كتاب كبار خليتني اقراه وانا كنت صغيرة اوي ..كان كتاب العظماء مئة واعظمهم محمد
فاكرة ضحتك
فاكرة شعرك الناعم وانا اختي وولاد عمي وولاد عمتي بنعكشهولك وبنضحك
فاكرة العود بتاعك ..انا اشتريت عود جديد وكنت عايزاك تشوفه
وفاكرة انك لما كبرت واتجوزت ما بقناش انا وانت صحاب خالص
انا كمان كنت وقتها كبرت
مش عارفه ليه مافضلناش صحاب
بس انت فضلت غالي عندي اوي
وفضلت بحبك اوي
لما عييت من كام شهر ورحت زرتك في المستشفى ماقدرتش امسك دموعي
بصتلك وهاجمتني كل الذكريات دي
ولاقيتك لسه بتضحك
اخدتك في حضني ..بس ماتكلمتش
وانت قعدت تضحك ضحكتك الحلوة وتقولي انا كويس بس انت وحشتيني كان لازم اعيا عشان اشوفك
زعلت من نفسي اوي وقتها
بس بردو ماتكلمتش
اخر مرة شوفتك في رمضان
جيتلنا ..وانا كنت فرحانة اوي انك بقيت كويس
وقلتلك على فكرة انت بتوحشني
قلتلي لو بوحشك كنت تعدي عليا اشوفك لازم يعني مناسبات عشان نتقابل
وقعدنا اكلنا سوا ..وانت بردو كنت بتضحك نفس ضحتك الحلوة
انا كان بقالي كتير مارحتش زرتك
بس النهاردة لما رحتلك ماقدرتش اشوفك
ماقدرتش
انا اسفه
بجد ماقدرتش
بس كنت قاعدة برا ...في بيت انًه الله يرحمها ..مكان ما كنا بنلعب وبنضحك ومكان مكتبتك القديمة ..وانت كنت جوا في سريرها ..في ناس كتير دخلولك ..بس انا ماقدرتش ..خفت اشوفك بشكل تاني ..عايزة شكلك وانت بتضحك يكون الشكل اللي افضل فاكراك بيه طول عمري ..لحد ما اقابلك
يا صديقي العزيز ...انا اسفه اني ماقدرتش اقولك انا قد ايه بحبك ...وانت قد ايه آثرت فيا ..انا لحد اللحظة دي مش متخيلة اني بتكلم عنك باعتبار انك مش موجود في عالمي دا ..وانك دلوقتي عند ربنا ..
يارب ..انا بحبه اوي يا رب ...اوي ,,ارحمه واغفرله ودخله جنتك وصبر بابا ..دا ماكنش اخوه الصغير ..دا كان ابنه الكبير
وماكانش عمي ..كان صديقي العزيز