Sunday, January 03, 2010

Screw it….let’s do it AGAIN !

عدت السنة بسرعة

 لما قررت أقول وإيه يعني حاجات كتير أوي أتغيرت فيا وفي حياتي مابقتش بسمع الحاجات اللي بتضايقي نجحت في إني اعمل حواليا حيطة تمنعني من التأثر بالاشياء السلبية المحيطة
و"ليه لأ" النظرية اللي قررت امشي عليها سببتلي إحساس دائم بالسعادة لأني السنة اللي فاتت عملت حاجات كتير جديدة
أول مرة اعملها في حياتي  :)

في بداية السنة دي أنا عايزة اشكر ماما وبابا ..اتنين بيؤمنوا بالحب وعلموني أحب كل حاجة حتى ابسط الأشياء وعملوني أحب الحياة وأحس اني أنا وهي واحد وجزء من بعض واني اتبع منظومة الكون وفي رابط خفي بيني وبين كل حاجة وأي حاجة
كل اللي أقدر أقوله دلوقتي قد إيه شيء عظيم انك تختار إنك تحب بدل ما تعوز لما تحب الحياة بتديلك غالبا ولما ما بتديلكش ما بتزعلش لأنك أصلا مش عايز
بس لما تعوز مش دايما بتديلك وبتفضل عايز وعايز وعايز وتلف زي التور في الساقية وبتنسى تعيش وبتنسى تستمع وما بيبقاش عندك قدرة على الرضا
حياتي مش مثالية ..أبدا ...بس حقيقة واحدة أنا عارفاها ومتأكدة منها وهي قد إيه أنا كسبت كتير من حبي للحياة
أشكرك يارب على كل اللي عندي
كل سنة وانتو طيبين :)

9 التعليقات:

dr.lecter said...

كنت مستني البوست ده جدا واستغربت لانك اتاخرتي في نزوله

انا متفق معاكي لما بتكوني مليانه طاقه ايجابيه ناحيه الدنيا ساعتها بيحصل توافق بينك وبينها وتستلطفك وتبتدي تصاحبك وانت تصاحبيها وبغض النظر عن الجوانب السلبيه في 2009 بس الواحد ابتدي مايزعلش بدا يتقبل الموضوع عادي او بروح ايجابيه رياضيه
اللي حصل غريب ان الواحد في اخر 5 شهور بقي متمسك بالحياه جدا ومنجذب لها زي مايكون عداد عمره بيجري وبقي بيعمل حاجات كتيره ويجرب حاجات لاول مره تحصل وحاجات جريئه مكانش متخيل انه يعملها قبل كده

انت مثلا شاركت في مظاهره وبالمناسبه كانت مسخره بجد بدل ماتبقي ضد الجدار قعدتم تهدفوا بسقوط حسني مبارك

داون مبارك دوان مبارك

هههههههههههههه

الدنيا لما بتضحك بتضحك بجد بس عايزه حد يكون عنده استعداد انه يضحك مش حد مش متقبل الفكره دي وساجن نفسه في غرفه مظلمه

بالمناسبه حد يقول لاحمد يبقي يرد عليا علشان قافل مدونته ومابيردش علي التليفون خالص وساجن نفسه وعارف انه عنده امتحانات وكده بس يطمننا عليه علي الاقل


لو حصلت خساره في 2009 القيامه مش هتقوم انا خسرت كتير بس كسبت اكتر واستفدت اكتر واتحسنت اكتر وكل الناس قالت لي انك بقيت ايجابي اكتر وبقيت مش خامل زي زمان

انا اتحملت مسؤوليات اي حد تاني كان هيهرب منها او ينفض لها لكن كنت عاوز اشوف هل انا جدير بده ولا لا

معدا الزواج لاني لسه مقلق منه علشان هو قرار صعب جدا


ماتنسيش بقي تبقي تطلعي البطاقه الانتخابيه قبل 31 يناير

وابقي سلميلي علي فله وقولي لها المدونات مفتقداها جدا وكل الناس بتسال عليها بجد

فوتك بعافيه وكل سنه وانتي طيبه

sabry abo-omar said...

نحتاج دائما لقراءة تاريخنا وقراءة افكارنا القديمة ولو استطعنا ان نعبر مرة اخرى لمشاعرنا لفعلنا. انها مجرد لحظات الزمن ويتبدل حال الى حال حتى نصير اشكال مختلفة او متناقضة احيانا اخرى. سعدت بوجودى فى مدونتك وشعرت بانسان متميز وفكر مستنير.. وفقك الله

Anonymous said...

كل سنة وانتي طيبة
كل سنة وانتم طيبين:) مع الابتسامة

Jannah said...

et bien bravo
ana kol sana azid kassal 3n esana elli kablha
bas elhamdulillah kanet sanet ta7asson kbira fi7ayati
wejabiya aktar
ektebi mawdo3 3n elmocharka felmodahra dam awal mara la?
kol sana wenti tayeba we ejabeya w sa3ida wmn 7assan le2a7ssan inchAllah

Fatma said...

والله يا دوك بحس انك اكتر واحد هنا بتحس انا بتكلم في ايه :) كل سنة وانت طيب

Fatma said...

ابو عمر

اشكرك جدا على كلماتك واتشرفت والله بزيارتك :)

Fatma said...

وانتي طيبة يا ايمان :)

Fatma said...

جنه

اكيد السنة دي كانت سنة مميزة وماتتنسيش في حياتك انت بالخصوص :) يارب دايما اشوفك سعيده وراضية انتي بنت جميلة وتستاهلي كل خير وسبحان الله بالرغم من اني ماعرفكيش الا اني فعلا وبصدق عندي مشاعر حلوة وحقيقية ليكي
الله يوفقك دايما

والله احرجت اكتب عن المظاهره ماعرفش ليه حسيت انه هيبقى شو بس ماقدرتش ما اقولهاش ع الماشي لانها فعلا اسعدتني جدا :)

قمر الزمان said...

جميلة جدا

مقال رائع