تابعت كما تابع الكثيرين "البرادعي مانيا" التي أصابت قرابة المائة ألف من أبناء مصر كما تابعت حوار العاشرة مساءا مع د.محمد البرادعي المدير العام السابق للوكالة الدولية للطاقة الذرية وليس عبد الله غيث صاحب المقولة الشهيرة في المسلسل " أنا البرادعي يا رشدي" كما أشارت سيدة بسيطة حين سؤالها في البرنامج عن البرادعي من يكون ! والدكتور البرادعي كما هو معلوم حاصل على جائزة نوبل مناصفة مع الوكالة وليس حاصلا على شهادة الأيزو كما تفضل شاب وأضاف في نفس البرنامج !
طالب البرادعي بإجراء تعديل على الدستور المصري كشرط للترشح ! وأكد انه لن يخوض الانتخابات ممثلا عن حزب مما يتطلب تعديل المادة التي تختص بشروط ترشيح المستقلين
وصلت ولا لسه ؟
نقول كمان
بغض النظر هل البرادعي من منظوري الشخصي يصلح أو لا يصلح
وبغض النظر عن إحساسي اللا متناهي بالألم والحسرة على شعب عانى من القهر في التلاتين سنة السابقة لدرجة انه بيتلكك عشان يبقى عنده أمل ووصل لمرحلة " أنت بتقول ترشيح !! انتخبوا البرادعي يا جدع" وقرروا يعملوا حملة لمسانده مرشح مش مترشح أصلا وقانونيا لا يمكنه أن يترشح
وبغض النظر إن البرادعي بيتكلم عن التعديلات الدستورية اللي اتكلم فيها كل خلق الله من سنة 2005 ولا حياة لمن تنادي مش عارفه إيه الجديد!
وبغض النظر عن إن كتير من المنضمين لجروب البرادعي فاكرين ان عددهم لما يزيد بعون الله البرادعي هيبقى الريس
وبغض النظر عن إن تكاثر عدد المنضمين للجروب مش هغيير من الوضع شيء
والموضوع أكبر من كدا بكتير
وبغض النظر عن السواد الأعظم والأغلبية الساحقة في الشارع المصري ما يعرفوش البرادعي دا يطلع إيه أصلا
وبغض النظر عن انعدام ثقتي في ال 100 ألف المنضمين للجروب في إنهم وقت الجد هيسدوا وهينزلوا الشارع ومش هترسي في الأخر على الناس اللي اتهانت وهي واقفة ضد التعديلات الدستورية في مايو 2005( اللي عايزين نغييرها دلوقتي ) وهما هما نفس الناس اللي هتتصدر دلوقتي والمية ألف يناموا قريرين العين وضميرهم مرتاح أنهم أدوا دورهم وداسوا الزراروانضموا للجروب !
بس عموما خير
البرادعي لمبه ! وإحنا داويتنا مسدودة بقالها 30 سنة ..والكهربا مش واصلة أصلا
وصلوا الكهربا ..ونضفوا الدواية ..ووقتها لمبات كتير هتظهر مش بس اللمبة اللي محطوطة في فاترينة العرض
21 التعليقات:
فعلا......الهوس بالبرادعي لايرجع لشخصه انما يرجع باعتباره قارب النجاة و الأمل الوحيد المتاح للأصلاح
البرادعي هو رمز و ليس شخص
جميل ان يكون البرادعي رمز ولكن اين الشخص ؟؟؟
عجبني قوي الكلام !!
ههههههههههههه
اكيد مسدوده
معلش الناس بتتلكك على النور
اول مره اشوف مدونتك... هروح اتصفح كده شويه :)
تحياتي
وحياتك لو سعد الصغير قال عايز اترشح فموزمبيق
حتلاقي الألافات هبت لنصرة القائد
و اخترناااه
سعد سعد يحيى سعد
كفاية شبعنااااااا كوسا
!
وفيها ايه؟
اه هو لمبه لمبه كان المفروض تنور من زمان
سيبك من الهوجه وده كله
لاول مره الكتل الوطنيه تتلم وتتوحد في صف واحد حوالين راجل واحد ويظهروا في العلن ويقولوا لا بصوت عالي ويروحوا ادام النظام ويستقبلوا الراجل ومعاهم ناس كتيره
لاول مره البركه السياسيه الراكده من 30 سنه تتحرك
لاول مره الناس تعمل حاجه علشان عارفين ان خلاص جابوا جاز
اه ماحدش يعتمد علي الفيس بوك اكيد بس لسه المشوار طويل لازم توعيه للناس البسيطه بحقوقهم السياسيه لازم البرادعي ينزل وسط الناس ولازم يعرف الناس بنفسه
لازم يطلع في برامج كتيره لازم يتحط جدول ومنهج يمشي عليه الجبهه الوطنيه المصريه من اجل التغيير
اه لازم ده كله انا فرحان باللي بيحصل من كام شهر كانت حمله البطاقه الانتخابيه ودولوقتي عوده البرادعي وامبارح اعلان رسمي في الجرايد والتلفزيون عن الجبهه المصريه من اجل التغيير الوطنيه
بباش النبره التشائميه دي احمد برده قاللي نفس الكلام وجابلي احباط قبل مالراجل يوصل مصر لا ياجماعه فيها ايه لما يبقي فيه امل ولو بصيص من النور
انا ميهمنيش مين اللي هيترشح المهم انا يبقي فيه تغيير لدستور ورؤيه حقيقيه للحياه السياسيه كفايانا بقي كلام جرايد ومنتديات واعتصامات عاوزين نتحرك
انا خايف نفس خوفك ان الهيصه دي تطلع اونطه بس عندي امل انها تتحول لحقيقه وواقع ويكبر الامل
ومش خسرلانين حاجه محتاجين بس نتضامن مع الجبه اللي اعلنوها ونتكلم عنها في كل مكان
يعني هي الفكرة انه مرشح توافقي و مش محسوب على حد ضد حد
و متوافق عليه الفرقاء من إخوان و علمانيين و شيعويين و ناصريين و ليبراليين و خلافه
و ده في حد ذاته شئ كويس
ثم أهم حاجة فعلاً هي تعديل الدستور
و الأهم منها هي الرقابة الدولية على الإنتخابات
و ساعة ما تبقى الإنتخابات ديموقراطية و نزيهة بجد حتلاقي 100 لمبة
:)
اصبرى بس طريق الالف ميل بيبدأ بخطوة
الرهان المرة دى على كمان 30 او اربعين سنة يااما تفضل عصور وسطى يااما تتغير بالبرادعى بقى بثورة شبة الثورة الفرنسية بأى داهية المهم نحاول نغير
بالرغم من صدق وصحة الكلام...بس بيتهيألي مش ده وقته...الوقت دلوقتي ان كل واحد يعمل بنفسه...احنا حاليا الجيل المنحوس ده لازم يخلص ذمته قدام ربنا ويقوله يا رب...انا ما كنتش جعلوه فانجعل...انا حاولت وجاهدت وبذلت كل ما املك...نجحت بقى ولا فشلت علمها عند الله....
صحيح ان فيه حالة من الvirtual reality الناس عايشة فيها من ساعة كتاب الوشوش ده ما ظهر...بس ادي الله وادي حكمته...وبالموجود الناس تجود...
يا ريت تغيري اللون الإسود عشان بيزغلل
تحياتي للمدونة اللطيفة
قلبي معاك يافاطمه انا لسه عارف والله بس هم الخسرانين
فيه إيه؟
رغم اني مش اعرفك لكن عرفت انك اتفصلتي من الشغل بسبب الكلام ده
... بجد انتي بنت ناس و محترمة انك مش رضيتي حتي تقولي اسم الشركة
تحياتي
the Egyptian people became desperate and lazy. They need someone to spoon feed them politics so they know their rights.
علينا الا نرفع سقف الاحلام الى منتهاه
الواقع بيقول عكس ما يحلم به الكثيرين
واذا كان النخبة ليها 20 سنة مش عارفة تعمل حاجة
يبقى معقولة شخص واحد - و مش معاه النخبة كلها - حيقدر يعمل
بغض النظر عن كل ده
انا شايفه ان البلد دى مش هينصلح حالها الا لما الشعب نفسه يتغير من جواه
مش الحكومه الى وصلت لو حدها لكده احنا كان لنا دور معاها
مش معقول ييجى حد جديد بتفكير جديد واحنا ز ى ما احنا سلبيين راضيين مادام واكلين ونايمين
انتى وحشانى قوىىى
معلش بجد
حسبى الله ونعم الوكيل لامتى هنفضل فى الجهل ده
هو المدير فصلك ليه؟ هو حزب وطني و لا اية؟
ولا خاف تتشدي بسبب التدوينة و تيجي رجله معاكي؟
بجد مش فاهمة لية؟
السلام عليكم
قد يكون الكلام فيه جزء كبير من الصحة
لكن لا نملك إلا الأمل
مفيش حاجة بعيدة على ربنا
تحياتى
جميل البوست بس مين يفهم
تحياتى
من أهم مظاهر كراهية الشعب المصري للنظام الحاكم
انه اتعلق بخيال مآتة زي البرادعي !
على فكرة 100ألف واحد واعيين ومدركين للى بيحصل وعايزين يغيروا عدد مش قليل الصفوة اللى بتقود الناس للتغيير فى أى مجتمع لاتتعدى 2% أنا لحد دلوقت بسمع ناس كتير بتقول آراء من عينة اللى نعرفه أحسن من اللى مانعرفوش ودول مغيببين تماما وعلى فكرة منهم ناس على مسوى عالى من العلم شىء يحزن على العموم الناس غرقى من سنين وبيتعلقوا بأى أمل
Post a Comment