Wednesday, July 20, 2011

سؤال ورد غطاه

في اسأله كتير بتتسأل وتعليقات كتير بتتقال من اول يوم في الثورة ولحد النهاردة مصدرها الناس اللي اتفرجت على الثورة في التيليفيزيون وتابعت تفاصيلها لحظة بلحظة من الجرايد

لذا وجب توضيح ما يلي على قد اللي انا شفته بنفسي والله على ما اقوله شهيد

1- الثورة سلمية :

بالتأكيد الثورة سلمية لان الشعب مش مسلح ومارحش رفع ار بي جيه في وش الشرطة ولا الجيش لو من المنطلق دا فهي بالتأكيد سلمية انما على ارض الواقع الثورة دي اتقل فيها اكتر من الف شخص في اقل من 10 ساعات يوم 28 يناير !مما دعى الثوار في اماكن عديدة للرمي بالحجارة وصناعة قنابل مولتوف بسيطة وحرق مدرعات الشرطة دفاعا عن النفس

2- اللي مات قدام اقسام الشرطة مش شهيد :

فعلا هو مش شهيد وبس دا فدائي !ضحى بنفسه عشان الاف يعيشوا!اقسام الشرطة ووزارة الداخلية كان على اسطحها القناصة وافراد مسلحين بيقتلوا اي حد معدي في المظاهرات غدر حتى لو هو بعيد عنهم واللي راح هجم على الاقسام كان بيحاول يوقف شلال الدم الطاهر مضحي بنفسه في سبيل الاخرين

3- مش دول ثوار 25 يناير:

وكأن ثوار 25 يناير اخدوا ختم معين او تم عمل كشف ثورة عليهم او طلعلهم كارنيهات او اتعمل قوائم باسمائهم! ساهم الاعلام بشكل كبير في الصورة المغلوطة دي بتصوير الثوار على انهم الشباب المستحمي الامور المتعلم !الثورة كان فيها كل طوائف الشعب بكل اشكالهم بكل انواعهم بكل طبقاتهم بكل توجهاتهم بنفس النسب اللي موجودة في الحياة الواقعية ..عزيزي انظر حولك هما دول المصريين لو مش عاجبينك تبقى دي مشكلتك والناس مش مسؤولة عن هلاوسك الشخصية

4- يا جماعة عجلة الانتاج !

هي كانت فين "عجلة الانتاج"دي طول عمرها في التلاتين سنة اللي فاتوا!المصانع اللي اضربت كانت مصانع حكومة المصانع دي عمرها انتجت ايه اي حد طبيعي من اللي بيشتكوا من عجلة الانتاج عمره استخدم اي من منتجات المصانع الحكومية!

عمال المصانع طول عمرهم بيضربوا ولا عمرنا سمعنا عن حد داري بيهم اصلا وعمر حد جاب سيرة عجلة الانتاج اللي واقفة

5- الجيش حمى الثورة

الجملة دي دايما بتتقال وما ببقاش فاهمه ايه المقصود بيها بالضبط! الجيش ظهر اول مرة يوم 28 يناير بالليل في صورة الحرس الجمهوري واللي كان دوره امداد الامن المركزي بسلاح بعد ما سلاحهم خلص علينا ! وسكتوا 3 ايام ويوم موقعة الجمل كانوا واقفين عل كل مداخل التحرير اللي دخل منها البلطجية اللي دخلوا ع الناس بالجمال والاحصنة والمولوتوف ولما كنا بنستنجد بيهم كانوا بيردوا يقولوا الجيش محايد !مش عارفه ايه الحياد في موقف زي دا ناس قاعدة في حالها بدون سلاح وناس داخلة عليها بسلاح يموتوهم والجيش شايف انه لازم ياخد موقف محايد الا المدخل اللي كان واقف عليه الضابط ماجد بولس "مش متذكرة رتبته" اللي رفض يدخل البلطجية وضرب نار في الهوا ونزل على ركبه يبكي وباس رجل احد الثوار في مشهد مؤلم ابكى كل اللي حضروه

دا غير هجوم الجيش على المتظاهرين يوم 25 فبراير في التحرير وعند مجلس الوزرا ونزلوا فيهم ضرب بالعصيان وبعصيان الكهربا وهجومهم يوم 9 مارس ويوم 9 ابريل ويوم ماكان الثوار عايزين يدخلوا لاظوغلي لما حشروا الثوار في شارع مالوش مخارج وضربوا نار من ناحية والبلطجية بيحدفوا مولوتوف وداخلين على المتظاهرين بالسنج والمطاوي من الناحية التانية ! دا غير المحاكمات العسكرية الظالمة اللي لما بيتعاد اي واحدة فيهم امام قاضي مدني اللي المحكوم عليه ب 5 سنين بياخد براءة !

وحدث ولا حرج على اننا بعد مرور 6 شهور مافيش اي انجاز يذكر بخصوص الداخلية او محاكمة القتلة او محاكمة حسني مبارك وعصابته ولسه الثوار في السجون والفاسدين بياخدوا براءات والعادلي محاكمته بتتأجل

6- انتوا لولا الاخوان كنتوا موتوا يوم موقعة الجمل

مش حقيقي بالمرة ..الاخوان نزولهم الرسمي كان بعد موقعة الجمل اصلا ..وممكن الرجوع لتصريحات العريان قبل وبعد يوم 25 يناير للتأكد

بس دا ما ينفيش ان كان في شباب من الاخوان معانا في التحرير وفي كل مدن مصر من اول يوم في الثورة بس بصفتهم مصريين

والفضل كل الفضل في انتصار الثوار يوم موقعة الجمل يعود لرجالة المناطق الشعبية وشباب التراس الزمالك والسلفيين الخارجين على شيوخهم الداعيين بحرمة الخروج على الحاكم والنشطاء السياسيين اللي كانوا حاضرين الموقعة واطفال الشوارع ومن الوجوه المعروفة اعلاميا الشيخ صفوت حجازي كان في الصفوف الاولى مع كل من سبق ذكرهم

7- الثوار كل ما يحققولهم مطلب سقف مطالبهم بيعلى

الثوار مطالبهم ثابتة من اول لحظة ..مش هنكر دور وسائل الاعلامية الرسمية في تضليل الناس بتصوير المطالب بغير حقيقتها ولما الحكومة تعمل اي حاجة يقولوا اهم عملولكم اللي انتوا عايزينه قاعدين ليه! في حين ان اللي اتعمل ماحدش طلبه في الواقع

اكبر مثال على كدا اننا يوم 25 يناير هتفنا الشعب يريد اسقاط النظام ولما المخلوع عبرنا وعمل شوية تغييرات واقال حكومة نظيف وشكل لجنة لتعديل الدستور وقال لم اكن انتوي الترشح طلعوا علينا الناس يقولوا ماكفاية كدا اهو عمل اللي انتوا عايزينه! لا مش دا اللي احنا كنا عازيزينه !لو كان عمل الاصلاحات دي قبل يوم 25 يناير قبل العنف والقتل يمكن كنا فرحنا ورضينا بس هو عملها بعد فوات الاوان تماما وبعد ما المطلب بقى واضح وصريح "ارحل" !

8- المعتصمين في التحرير بلطجية وبينادوا بتطهير الداخلية هما بيعملوا زيهم فرقوا ايه عن الداخلية

تساؤل اخر سببه في الاساس الاعلام الضلالي ..المعتصمين حاليا في التحرير هم اهالي الشهداء وبعض المتضامنين معهم وقلة قليلة من القوى السياسية اللي بتحاول تاخد مكاسب على قفا الاعتصام والكثير الكثير من الامن !

ايوا الاعتصام الموجود حاليا مخترق بدرجة كبيرة جدا والعناصر المدسوسة هي اللي بتقصد تعمل كل المشاكل لتصوير الاعتصام والمعتصمين وكانهم ناس مجنونة مفترية بلطجية في حين ان المعتصمين بيعانوا معاناة الله العليم بيها لمحاولة السيطرة على العناصر المدسوسة وايقاف المهازل اللي بيعملوها

ناخد الشاب اللي اتعلق على الشجرة كمثال:الشاب دا بلطجي طبعا حاول اقتحام الميدان هو و 25 بلطجي اخر وقاموا بطعن 7 بنات وشباب واقفين عند احد اللجان الشعبية واصابوهم اصابات بالغة وجري كل المعتصمين وراهم وماعرفوش يمسكوا غير اتنين طبعا اتضربوا ودا رد فعل طبيعي انا شخصيا مش معترضة عليه !اما التعذيب اللي حصل فبكل تأكيد مش محتاجة اقول اني ضده واني وناس تانية كتير انهاروا واللي انقذ البلطجي اللي كان على النخلة هما ناس مننا واللي كانوا معلقينه هم العناصر المدسوسة من الامن ...دا غير ان باستجواب البلطجي دا بعد ما انقذناه مين اللي باعتك قال مأمور قسم عابدين :) يعني حتى الداخلية مش عارفه تنسق مع بعضها او بيضحوا بالبلطجية في سبيل تثبيت فكرة ان المعتصمين ناس واطية!

مشكلة الشاب دا مش اول ولا اخر مشكلة بيواجهها المعتصمين..كل 5 دقايق في افتعال لمشكلة جديدة ..والقدر وحده اللي خلى يسري فودة يفضح الفضالي ويطلع فيديو يبين تورطه في موقعة الجمل في نفس اليوم اللي كان الفضالي فيه عندنا في التحرير عامل نفسه من الثوار وجايب واحد بلطجي معاه وبيحاول يقنعنا ان البلطجي بتاعه وبلطجيته هيجوا في 14 عربية نص نقل عشان يأمنوا الميدان مادام امن الميدان عندنا مخترق!الناس ماوفقتش بس ماكناش عارفين دا مين لولا القدر فعلا انه في نفس اليوم يتفضح مع يسري فودة وتاني يوم بلطجيته افتعلوا مشكلة كبيرة جدا مع الباعة الجائلين وضربوهم بالشوم وضربوا اي حد بيصور وطردوا كل الصحفيين والكاميرات من الميدان


المعتصمين حاليا بيواجهوا اكتر من مشكلة !التشويه الاعلامي ..الاختراق الامني الكامل للاعتصام...غضب الناس اللي في بيوتهم ...احتمالات هجوم بلطجية مأجورين مبعوتين من اقسام الشرطة..هجوم الجيش او الشرطة ..

الناس دي سايبة بيتها وحالها بقالهم اكتر من اسبوعين عشان حق الشهدا ومش بيتاجروا بيه زي ما بعض الناس والاعلام بيوصفهم !حق الشهيد يعني تطهير واعادة هيكلة الداخلية يعني تطهير القضاء يعني تطهير الاعلام يعني القصاص من القتلة وايقافهم عن العمل ومحاكمتهم فورا بدون تحايل يعني اقالة النائب العام ..حق الشهيد مطلب انساني شامل

لو اتحقق المطلب دا اضمن برقبتي ان الاعتصام في التحرير هيتفض


لو افتكرت اسأله تانية هكتبها بعدين كفاية كدا دلوقتي عليكم وعليا


سلام


7 التعليقات:

Moataz said...

ربنا يبارك لك ..
وينصرنا ..
يارب انت اعلم بالنوايا
انصرنا علي القوم الظالمين

Anonymous said...

رائعه كالعاده يا فاطمه قلتى كل المفيد

dr.lecter said...

افقتدنا المدونه

أدمن المدونة said...

و الله البوست ده بيخليني أحتار هو الشعب المصري ده ما يجيش غير بالكرباج ؟ هو الشعب ده بيخاف ما يختشيــش ؟

Fatma said...

ليه بس بيخاف مايختشيش؟ ليه كدا؟ البسطاء اللي ماعندهمش وسيلة يعرفوا بيها المعلومة غير من اعلام موجهه معذورين الدور والباقي ع المفترض انهم مثقفين وعندهم مخ وبيصدقوا الاعلام الموججه بدل ما يشوفوا بنفسهم وقبل ما يحللوا وينظروا المفروض يحاولوا يستوضحوا بس مافيش بني ادم في الدنيا يستاهل كرباج !!!!

Anonymous said...

الاخوان نزولهم الرسمي كان بعد موقعة الجمل

والله دمك خفيف

Anonymous said...

هل يمكن حل مشكلة اختراق الاعتصام؟
لماذا لا تقترحون تشكيل مجلس شعب انتقالي مكون من المصابين ومن أهالي الشهداء ومن الثوار الذين ظهروا بوضوح من 25 يناير؟ وبذلك ينتهي الاعتصام ولا يمكن للنظام السابق اختراق مجلس الشعب.