Monday, May 05, 2008

عمار يا مصر 1


ممكن حد يقولي ليه الناس بترمي حاجات في الشارع ..طول مانت ماشي تلاقي حاجات بتتحدف عليك ..من عربيات ...من عمارات ...من اللي ماشي جنبك ..اي حاجة

كنت قريب عند ناس اصحابي ..وبناكل ايس كريم ..

واحدة من اللي قاعدين ( مش صاحبتي ولا اعرفها ولا عايزة اعرفها ) بتاكل ايس كريم بالشوكلاته البيضة

فجأة قررت انها تقيلة ومش قادرة تكملها ..وقعدت تدلل عليها ..يا جماعة حد ياكل ..


لا

طيب

وبمنتهى اللاشيئ ...رمت الكون بتاعت الايس كريم من الشباك من الدور ال 11 عشان تقع على صاحب نصيبها !!!

يالهوي يانا ياما

لو انا اللي تحت ولاقيت ايس كريم واقع عليا من السما زي القضا المستعجل ...تفتكروا كنت هعمل ايه .؟

تصدقوا مش قادرة اتخيل رد فعلي

شيئ كمان عجيب بيذهلني في سلوكيات البشر ...ليه دايما الرجالة بيلبوا نداء الطبيعة جنب الاسوار ووراء الاشجار في شوارع القاهرة المزدحمة في وضح النهار ؟!!

بمنتهى البساطة....
تلاقي واحد كان ماشي في حاله وبدون اي مقدمات

يقف ويدي وشه للحيطه زي مايكون بيعاقب نفسه عشان عمل شقاوة

ايه دا بجد

انا ببقى عايزة انزل اضربه على قفاه في اللحظة دي لولا الملامة بس

من اكتر بقى الحاجات اللي حقيقي بتفرسني ...ابقى ماشية بالعربية ( عفوا قصدي واقفة لاننا غالبا في شوارع مصر بنبقى واقفين ) والاقي عربية جنبي الاب المحترم مقعد ابنه اللي لا يتعدى عمره 3 سنين بالكتير على حجره قدام ديريكسيون العربية

نعم بقى ...نعم بجد ...ايه الاستهتار دا

مرة المنظر استفزني اكتر من اللازم وقلت لااااا مش قادرة اسكت ..فتحت الشباك وعملت نفسي لطيفة

مساء الخير حضرتك ( وابتسامة بلهاء مرسومة على ملامحي ) هوا حضرتك يعني كدا خطر اوي على البيبي ممكن لا قدر الله حضرتك لو فرملت فجأة البيبي يتخبط في وشه ولا حاجة ( نفس الابتسامة الهبلة)

مش قادرة احكيلكوا على رد الفعل ...عينكو ما تشوف الا النور

حرمت من يومها وقررت اكتم جوايا !

شيئ تاني عجيب بردو ..بيضحكني احيانا وبيشلني غالبا

لو سمحت ...شارع ( مش فاكرة اسم الشارع بصراحة ) فين .؟

قالك فين ؟

( يا فتاح يا عليم ) قالي هنا

هنا فين ؟

طيب خلاص شكرا

لا استنى بس ...قالك جنب ايه طيب

قالي جنب سوبر ماركت الفا

مممم طيب في سوبر ماركت الرحمة ع اليمين قدام شوية !!!

خير ؟! لا خير بجد ؟! دا على اساس اني كنت بدور على سوبر ماركت تايه يا ولاد الحلال عشان اجيب باكو لبان !!!

مرة كنت عمالة الف زي لفة الكونافة وهيا على الصاج بتتعمل ..ومش عارفه اوصل من كتر فتي البشر

لاقيت عسكري مرور ...سألته تاني على العنوان اللي عذبني كتير ...شرحلي وصفه على رأي عمنا صلاح جاهين ..


دي وصفه سهلة !

بصيتله وملئ عيني شك رهيب ...وقولتله طيب هما قالولي ان العنوان جنب سفارة مصر ..هيا سفارة مصر هناك

قالي اه اه لا كدا يبقى بدل ما تدخلي اخر شمال ابقى اكسري يمين !!!!!!!

للعلم ...انا كنت في قلب مصر ...في قلب القاهرة ...في قلب وسط البلد

كفاية كدا ..




8 التعليقات:

dr.lecter said...

ايس كريم من الدور ال 11؟

طيب مش عارفين ترموا ساندوتش همبرجر من بتاع بيرجر كينج كده علشان اواحد يتغذي كويس

مش مهم بقي ينزل علي راسه ولا علي قفاه المهم يدخل الحنك

بجد انا فخور اني مصري ياسلاااااام ايه ده ياحدعان مصر بجد عمار عمار ياحلوللي

كملي يافنون كملي

Fatma said...

انا عايزة ايموشنز هنا عشان اعرف اعبر

عايزة احط وش بيضحك اخر حاجة

منور يا محمد

وانتظر بقيت السلسة

دا انا شوفت الويل والله :) ومبروك المدونة بتاعتك اللي لسه بتتعمل

انا بس عايزة ابقى اول واحدة تبارك

Yasmine said...

و تلاقى الناس اللى المفروض انها "نضيفة" بتمشى فى الشارع و تقولك ياى ايه المكان البيئة ده كله زبالة بس هم يرموا عادى جدا و فيها ايه؟؟
بس سيبك انتى انا اول مرة اعرف ان فى ايس كريم بالشوكولاتة البيضا :D:D
و متقلقيش لو كان وقع على حد فى الحر ده مكنش هيتضايق خالص
سولكياتنا بقت توجع القلب و الكوميدى فى الموضوع اننا لما بنسافر بره بنمشر على قوانينهم زى ال.... حاجة غريبة بجد

dr lecter
مبروك البلوج اخيرا قررت تنضم لخواتك الهربانين:))

صبري سراج said...

مصدقك من غير حلفان

فعلا مصر ليها سفارة في وسط البلد

والملحق الثقافي عندنا في العباسية

Fatma said...

بنت مصرية وصبري بشكركم على الرد

والله هم يضحك وهم يبكي

يعني دي اساسيات وابط من البساطة

انا مش بتكلم في حاجات صعبة ولا طالبة عالم مثالي لاني انا ضخصيا مليانة بلاوي

بس بجد ماكدا بقى ...

leeno said...

الله يكون فعونك بصراحة

انا اتفقعت و انا بقرأ الموضوع !!!!


صباح الاستهتار و الفتي و العكننه يعني !!!!!!

ReEm said...

انا بس حابة اهنيكي على طريقة الكلام
و العرض اسلوبك هايل

و مش مصر والله بس اللي كدة في غيرها نفس
وضعوكو

اهنيكي تاني بجد مدونتك حلوة اوي

Fatma said...

لينو وريم

نورتوني واشكركم جدا على التعليق

وسعيدة يا ريم ان المدونة عجبتك

ربنا يكرمك يا رب كلك زوق والله