Wednesday, April 30, 2008

جوايا كتير كتير .....




جوايا كتير كتير

جوايا حزن وفرح

جوايا الم وسعادة

جوايا طاقة وكسل

عايزة اصرخ ...عايزة اضحك ...عايزة ابكي ...عايزة اقول

اقول كتير لناس كتير

اقول كلام يفرح ...واقول كلام يجرح

هقول ...وكل سطر من اللي هقوله بيقول كلام كتير ...لناس كتير...نفسي ...امي وابويا ...اخواتي وحبايبي ...صحابي واللي عاملين صحابي

لناس عدت ومابقتش موجودة ....لناس عايشة حواليا وناس عايشة جوايا ...ولناس لما بفتكرهم بحس الدنيا ضلمت وابقى عايزة اقول مين طفى النور !!

ولناس لما لاقوا دنيتي ضلمت بسبب الناس دي ..نورولي شمعه

اقول شكرا على الحلوة والمرة

اقول بدعيلك بظهر الغيب

واقول لقائنا يوم الحساب لاني مش مسامحة في حقي

اقول ليه كدا

اقول الله ...قد ايه انت جميل

واقول اخس ...قد ايه انت وحش

اقول ازاي انت ابيض اوي من جواك في وسط الدنيا السودا

واقول ازاي جواك كل الحقد والغل والكره دا وانت ما شوفتش مني غير كل خير

اقول ليه انت منافق عامل صاحبي قدامي وهوحشك ...ومن ورايا بتتكلم عليا

واقول ليه انت محترم كدا ومن ورايا بتتكلم عني احسن ما بتتكلم عني قدامي

اقول زهقت

اقول تعبت

اقول انا لسه قادرة اكمل المشوار الطويل

اقول انا يأست

اقول انا مليانه امل

اقول انا حياتي بتتمرجح بين الجنة والجحيم

اقول انا طفلة جدا

اقول انا عجوزة اوي

اقول قلبي نونو .....بس شاخ وهوا في اللفة

اقول اتخنقت

اقول انا بتنفس طول مانت جنبي

اقول خايفة اوي اصحى من النوم الاقيك مشيت

اقول ربنا يجعل يومي قبل يومك

اقول انا حاسة اني هموت قريب اوي

اقول انا حاسة اني هعيش يجي 100 سنة

اقول ليه البلد بتاخد مني كل شهر مبلغ وقدره ومش لاقية اي حاجة بتتعمل بفلوسي دي

لسه الشوارع مكسرة

لسه المستشفيات شبه المشرحة

لسه بناكل لحم حمير وبنشرب بدرة سيراميك

فلوسي بتروح فين يا جدعان !!!!!!

24 التعليقات:

samamasr said...

أخيرا :D

الرد ضاع ولا موجود :D

أصلي كتبتلك وكنت مش عارفة ادخل

........

أهو..معلهش بقى

مهو كلنا بشر :D

المهم تسامحي..الواحد مش عاوز يوم القيامة يشيل ذنوب حد وكلنا بنغلط في حق بعض :)

Maga said...

الرقعاء السخفاء سبوا الخالق الرازق جل في علاه ، وشتموا الواحد الأحد لا إله إلأ هو ، فماذا أتوقع أنا وأنت ونحن أهل الحيف والخطأ ، إنك سوف تواجه في حياتك حربا! ضروسا لا هوادة فيها من النقد الاثم المر ، ومن التحطيم المدروس المقصود ، ومن الإهانة المتعمدة مادام أنك تعطي وتبني وتؤثر وتسطع وتلمع ، ولن يسكت هؤلاء عنك حتى تتخذ نفقا في الأرض أو سلما في السماء فتفر من هؤلاء ، أما وأنت بين أظهرهم فانتظر منهم ما يسوؤك ويبكي عينك ، ويدمي مقلتك ، ويقض مضجعك.

إن الجالس على الأرض لا يسقط ، والناس لا يرفسون كلبا ميتا ، لكنهم يغضبون عليك لأنك فقتهم صلاحا ، أو علما ، أو أدبا ، أو مالأ ، فأنت عندهم مذنب لا توبة لك حتى تترك مواهبك ونعم الله عليك ، وتنخلع من كل صفات الحمد ، وتنسلخ من كل معاني النبل ، وتبقى بليدا!غبيا صفرا محطما ، مكدودا ، هذا ما يريدون بالضبط.

اذا فاصمد لكلام هؤلاء ونقدهم وتشويههم وتحقيرهم "أثبت أحد" وكن كالصخرة الصامتة المهيبة تتكسر عليها حبات البرد لتثبت وجودها وقدرتها على البقاء. إنك إن أصغيت لكلام هؤلاء وتفاعلت به حققت أمنيتهم الغالية في تعكير حياتك وتكدير عمرك ، الا فاصفح الصفح الجميل ، ألا فأعرض عنهم ولا تك في ضيق مما يمكرون. إن نقدهم السخيف ترجمة محترمة لك ، وبقدر وزنك يكون النقد الاثم المفتعل.

إنك لن تستطيع أن تغلق أفواه هؤلاء ولن تستطيع أن تعتقل ألسنتهم لكنك تستطيع أن تدفن نقدهم وتجنيهم بتجافيك لهم ، وإهمالك لشأنهم ، وإطراحك لأقوالهم!. { قل موتوا بغيظكم } بل تستطيع أن تصب في أفواههم الخردل بزيادة فضائلك وتربية محاسنك وتقويم اعوجاجك.

إن كنت تريد أن تكون مقبولأ عند الجميع ، محبوبا لدى الكل ، سليما من العيوب عند العالم ، فقد طلبت مستحيلأ وأملت أملأ بعيدا

Founoon said...

انتو مش متخيلين مدى سعادتي ان 2 من اكتر الناس اللي بحبهم في الدنيا هما اول 2 يردوا في مدونتي

انا فعلا سعيدة

ربنا يخليكو ليا يا رب

kabbary said...

وسع .....كوبرى جاااااااااااه

فنـــون ...

أى كلامـ من غيركـ ... أى كلامـ

بجد... أنتى رائعة يا بنتى ...

100 مره قلتلكـ دورى كده يمكن يكون عندكـ أخت صغننة :0)

Founoon said...

كوبرييييييييييييي

منور والله :)

بجد اشكرك جدا على كلامك

وهحاول اقنع ماما تخلف تاني :)

صبري سراج said...

الله اكبر.. كل الناس دي عندها مدونات وانا نايم في عسل مدونتي وشادد اللحاف!!

هضيف لينكات مدوناتكم في مدونتي .. وبجد مبسوط اوي اني زميل لكم في عالم التدوين

فنون .. قول معايا قول بجد.. هي عيشة ولا موتة ولا فوتة في حارة سد.. قول لحد أي حد.. حد رايح حد غايب حد جاي.. حد لسه فينا فايق حد حي.. قول يا عم قول يا هم.. قول لحد لسه فينا عنده دم

صبري سراج said...

ايه الاشتغالات دي :d

مدوناتكم فاضية ليه يا جدعان

انا ضفتهم عندي وجاي امزمز فيهم لقيتهم فاضيين

Founoon said...

ههههههههههههههههههه

صبري موتني من الضحك :)

نورت المدونة

كل الناس دي عندها مدونات تحت الانشاء

وقريبا الانطلاقة

banouta masreya said...

فلوسك فى الحفظ و الصون يا حبيبتى مش باين ولا ايه؟ مش عجبك ال30% الزيادة
ناس بتاكل و تنسى صحيح:))))

Founoon said...

30 % على القطاع العام يا اوختشي

بالنسبة بقى للعبيد امثالي ...ها ايه

احنا في القطاع الخاص بيتطبق علينا الخصومات بس مش الزيادات

banouta masreya said...

ما هى دى العدالة الاجتماعية يا فنون اول مرة اعرف انك اقطاعية:D:D

dr.lecter said...

ايه الزحمه دي ياخواننا انا حاسس ان ايجي كله جه هنا عندك يافنون

بس هاقولك حاجه نصيحه

بطلوا تشتكوا بطلوا تتذمروا انتم عارفين كويس ان الاوضاع مش هتتغير وان كل واحد فينا بيحلم بدنيا بطراز خاص
طبعا ده في المشمش وعند امه ياادهم فوفروا علي نفسكم ده كله

اه عاوزين تفضفضوا وتكتبوا اللي جواكم مافيش مانع ده نوع من التطهير النفسي وفعال جدا لكن بصراحه كده هل هتتوقعي انك تلاقي الناس بتتغير؟

للاسف عالمنا غدار مش منصف ابدا ممكن يكون منصف احيانا وعادل احيانا لكن اغلبه غدر

انا صحيح بؤمن بمبدا ان فيه نوع من العداله الشعريه الملوخيه موجوده هنا ساعات لكن بتيجي متاخر متاخر اوي

يعني ممكن اكون مت وبعد كده العداله دي اتحققت

نفسي اشوف العداله دي واحسها والمسها

Founoon said...

:)

والله منور يا دك.

سلمى انا طبعا اقطاعية كبيرة ومش مؤمنة بالمرة بمبادئ الاشتراكية العقيمة

بالنسبة لرأيك يا دكتور ...انا مش عايزة اغير العالم ولا عايزة الكون يتغير

بس عايزة الناس تفكر في ربنا ثانية قبل ما تفتح بوقها وتتكلم ...تفتكروا للحظة قبل ما يئذوا غيرهم

اما بالنسبة لفلوسي فعوضي على الله :)

banouta masreya said...

و هى عقيمة بعقل دى ناس طقة رسمى
بس حبيت اقولك ان العلاوة جاية للقطاع الخاص ابسطى بقى و عايزة نسبتى:)))

Here i'm said...

هيييييييييييييييييه

العلاوة نزلت على القطاع الخاص

أنت يا بنتى صدقتى أن الغلابة زى أنا و فنون ليهم نسبة فى العلاوة :)))))

دى تبع معجزة المعجزات

banouta masreya said...

ايوة ما انا طلعت هبلة:)
اتارى العلاوة دى بتبقى على المرتب الاساسى اللى معمول بيه العقد يعنى ممكن تطلعوا فى الاخر بعشرين تلاتين جنيه حلوين برده احسن من مفيش:)))

Founoon said...

عشم ابليس في الجنة

ماحدش يقدر يلزم صاحب العمل في القطاع الخاص برفع المرتبات

انسوا الفكرة دي

samamasr said...

علاوة ايه

وش مبحلق ومطلع عنيه الإتنين

* *

samamasr said...

خلينا في موضوعك :D

ناس بتقوليها كلام كتير :D




ناس قابلتني


بقولهم


أنا ليه دايما بقول عليكم ملايكة


ليه شايفاكم دايما كدة :)


عاوزة أنسى منكم ناس..وناس منسهاش :)



مهو..انتم فعلا ملايكة..بس ملايكة بعيدة..


أي حاجة أي حاجة صح :D

samamasr said...

أيوة أنا عرفت حكاية العلاوة دي :D

samamasr said...

على فكرة

فيه ناس جواها..

دووووووووم..طيخ طاخ طييييييخ


آه والله :D

اوعي تفهميني غلط والله :D

فهمتيني :D


طيخ طاخ طوخ

دووم ضم:D

samamasr said...

فنون على فكرة..حاجة برة الموضوع

الناس اللي بتشوف الملف في بلاد تانية ومش بيعرفوا عربي


هيتفرجوا على الصور :D

leeno said...

الموضوع طبعا من كتر روعته مش لاقية كلام اقوله !!!

Founoon said...

ايمان

فضفضي وقلي كل اللي جواكي :)

ما تكتميش بجد

لين

نورتيني :)