Monday, March 09, 2009

فاصل من الكوميديا السوداء


هي ايده مالها
صوابعه اتقطعت في حادثة
ربنا يشفيه
يشفيه ازاي ؟ بقولك اتقطعت خلاص يعني اتقطعت خالص مش موجودة ايده مش هتنبت صوابع تاني مثلا
ايه اللي انتي بتقوليه..هو لو ربنا عايز يشفيه مش هيقدر مثلا
قادر على شيئ ..بس ادعيله دعوة ليها معنى
يا سلام ..هي ربنا يشفيه مالهاش معنى !
؟*&%$#@@@!*&&%


**************************************


في حفلة اكون اللي كانت من اسبوع في مصر ..بغض النظر انه فاشل وياع وبغض النظر عن كم الدعاية المهول على واحد مالوش لازمة وبغض النظر عن الزحمة المريعة في الزمالك اليوم دا وبغض النظر ان ال stage وقع
ليه لما اكون يقرر يعمل
stage diving ويرمي نفسه على الجمهور الناس توسع له !!! ( الموقف اتحكالي من شاهد عيان )


************************************

واقفة كدا ليه يا انسة
العربية وقفت مني "اكيد مش واقفة بالعربية على كوبري اكتوبر الساعة 2 الضهر بشم عادم عربيات"
وقفت ليه ؟
قطعت بنزين
وحضرتك مش عارفه انك مش المفروض تطلعي الكوبري وانتي ماعكيش بنزين
والله انا اعرف اني مش المفروض اساسا امشي في الشارع من غير بنزين بس يظهر المؤشر بايظ فمعرفتش ان البنزين خلص بس في ناس جايبنلي بنزين وجايين دلوقتي "وانا راكنة على جنب وعاملة دابل فلاشر "
طب كدا يبقى في غرامة

غرامة !!! تحت مسمى ايه الغرامة بالظبط ؟! غرامة بنزين خلصان !
(وفي نص الحوار اذ بي افوجأ ب بيتش باجي بيخبط العربية من ورا سايقه واحد عسكري مرور)
ايييييييييييييييييييييييييه داااااااااااااااااااا انت بتعمل اييييييييييييييييييييييييييييييه
بنزقلك العربية !!!
حضرتك مش بتزق العربية حضرتك بتخبطني وانا اساسا شادة البريك يعني العربية مش هتمشي من مكانها !
انتي بتزعقي ليه الحق علينا يا انسة اللي عايزين نساعدك !! ..."فاصل من قلة ادب رهيبة من عسكري المرور "
قفلت الشباك ونزلت الهاند بريك واستسلمت لل بيتش باجي وهو بيرزع في العربية على كوبري 6 اكتوبر


*****************************************

في نفس ذات الوقت اللي انا واقفة فيه على الكوبري كان واقف قدامي واحد راجل لابس بدلة كاملة بالكرافات ونضارة شمس في عز الحر مابيتحركش ولا كأنه تمثال رمسيس ..انا الحقيقة افتكرته مخبر سري او امن قومي او امن دولة اي حاجة
بعد مدة مش قليلة لاقيت عربية جيب سودا وقزازها اسود وقفت ونزل منها بادي جارد وست شكلها كدا فنانة في نفسها اوي مختفية في نضارة شمس اكبر منها وبدلوا الاماكن في صمت وسرعة وجدية والاخ اللي كنت فاكراه مخبر ركب معاهم !
انا كنت فاكرة الحاجات دي بتحصل بس في افلام المقاولات في حقبة التمنينات المجيدة


****************************************
أنا عندي واحد صاحبي من مقيدين الفكرة دي
مقيدين ايه ؟! تقصد انه يعني ضد الفكرة ولا معاها
لا معاها من مقيدين اللي هي مؤيدين يعني
آآآآه ...انت كنت مزوغ في كل حصص العربي ايام المدرسة بقى
يا سلااااام لعلمك بقى انا كنت شاطر جدا في النحو ...انتي اللي شكلك كنتي خايبة في العربي قوليلي تعريب الفاعل كدا

شكررررررررررررررررا
فالنكتفي بهذا القدر

30 التعليقات:

Anonymous said...

بقولكم إيه بقى

خلوا لون المدونة أبيض :(

آسفة والله لو بضايقكم بطلبي ده

romansy said...

الحمد لله انك مكملتيش عاوز يرمى العربيه ولا بيخبط فيكى استحملى بقى
ربنا معاكى ومعانا فى الدنيا دى

Superman said...

تكتفي ليه بهذا القدر؟ :D
دول ناس زي الفل..

الدعوة بتاعة صاحبتك بتفكرني بدعوة الكهربائي اللي كان بيعمل لنا كهربة البيت ..ربنا يوفقك في الامتحانات إن شاء الله..مع إننا كنا في الصيف و انا خلصت تعليم من سنتين :D

-------------------

الحوار بتاع انهم سابوا اكون ده مسخرة..عمال اتخيل المنظر..
متهيألي عمره ما هينسي حفلة مصر طول حياته..
المسرح وقع..و بعدها بشوية اترزع ع الارض :D

إلا صحيح هي ليه الجرايد مصممة ان اسمه أيكون؟

---------------

انا كان لازم ابقي موجود ع الكوبري في الوقت ده..

انا كل ما انزل القاهرة لازم يكون في حوار بيني و بين عسكري مرور بحكم انني تايه علي طول :D
الحمدلله بعرف اتفاهم معاهم و بتدور بيننا احاديث ودية عن الطقس و الزحمة و انت منين و الجو ده :D
و مش بعيد كان بتاع البيتش باجي يديني لفة لحد ما البنزين ييجي :D

بعدين مين الراجل اللي كان مستني نادية الجندي ده؟
اوعي تقولي لي سعيد عبد الغني :D

------------------

انا برضه كنت بصادف نفس المشكلة مع صديقة عندها حرف همزة زيادة في الكلام..
"ايه اللي بتقوله داء؟"
"استنيء شوية"

dr.lecter said...

مش عاوز اعلق علي الدعوه بس الله يكون في عونك اكيد المراره عندك اتفقعت اووي


اكون سمعت عن اللي حصل بس مش مصدق انه رمي نفسه والناس وسعت يالهوي ايه المسخره دي؟ هم ماشافوش حفلات قبل كده ومش عارفين انه يقصد يسخن الحفله مش ينتحر يعني؟ ولا الجمهور الي راح راح وخلاص اي حفله والسلاام لتقضيه الملل


انا اول مره اعرف ان المرور عندهم بيتش بااجي بس مكانش يصح انك تتكلمي كده مع بتوع المرور والداخليه هم برده قلبهم علييكي وساليييني انا بقي ده جزائهم برده ؟


هههههه اللي يعيش ياما يشووف بس ياخووفي يكون الراجل ده شغلانته اللي في دمااغي بلاش الافكار السوده دي انا بخرف كتيير


بسسسسسسسسسسسسسسسسسسسسسسسسس كفااييه ايه ده ؟ بجد ده كله بيحصل

يانقول كلام في محله يانقول حاله ياحالو
يخرب بيت ام كده تعرييب ومقيدين

الله يرحمك ياسيبويه


عاجبني الاشارات دي احلي حاجه بدل مالواحد يشتم ويقول الفاظ خارجه هاستاذنك واسرقها بعد كده علشان ماحخدش يقول عليال سوقي هههههه


ياااه وحشتني بوستاتك يابنتي بجد عودا احمد

Fatma said...

ايمان

انا بحب اللون الاسود في المدونة شكله شيك يا ايمان ومش ناوية اعملها ابيض خالص :)
ما بيضايقنيش طلبك بس انا فعلا مش عاملاها اسود عشان الكئابة ولا حاجة يا حبيبتي مش اكتر من انه شكله عاجبني

Fatma said...

رومانسي

انا سكت عشان ماكانش فيا دماغ اتخانق مع واحد سوقي قليل الادب معقد نفسيا
بجد بتوع المرور جالهم سعار رسمي

Fatma said...

سلطان

هههههههههه الكهربائي دا جامد جدا
لا بجد الناس بتردد كلمات طالعة من الحنجرة مرورا باللسان وصولا لاذن المستمع
لا بتعدي الكلمات دي لا على عقل ولا على قلب بتطلع وخلاص
والمشكلة في المنطق !! طب دا واحد كهربائي انما التانية المتعلمة بتاعت المدارس ! ايه بقى ؟

انا اكون واللي جراله مموتني من الضحك
مش عارفه احنا ليه كل مرة نجيب مغني اجنبي نبهدله البهدلة دي
وهما بيجوا تاني ليه ؟!!

بالنسبة للاخ المريب والفنانة في نفسها لا ماكنتش ستايل نادية الجندي كانت ستايل ليلى غفران ..لطيفة حاجة السكة دي شعرها اسود ومنفوش كدا والنضارة واكلة وشها كله دا غير الزي اللي كانت لابساه تمنينات تمنينات يعني مش بتهزر

البنت بتاعت الهمزة دي جابتلي كريزة ضحك مش قادرة

Fatma said...

لكتر
أه اتفقعت اوي ياخويا هي كان ناقص تطلعني كافرة لاني مش واثقة في قدرة ربنا على شفاء المريض !!

بالنسبة لاكون انا متهيألي الناس عملتها على سبيل الدعابة ..اكيد دعابة ..مش ممكن طب حتى لو مش عارفين حكاية الستيج دايفنج اهو واحد بيقع ما يلحقوه !!!

أه عندهم بيتش باجي ياخويا راكبه واحد اخره يركب جاموسة في الحقل

شكرا يا محمد على سؤالك عليا بجد

محمد فوزي said...

ههههههههههه
بعد فاصل طويل من الضحك انا بقيًد البوست ده جداً

Yasmine said...

فكرتينى بدعوة ربا يرزقك بابن الحلال من سوسن اللى بتيجى تنضفلنا البيت
و اقولها ابوس ايدك دعوة تانية تنفعنى تقولى انتى مش عارفة مصلحتك فين :D

حد يطلع كوبرى اكتوبر الساعة اتنين الضهر برضه..ده كلام؟! :D
انا قلت هتقولى البنت فلة كانت زى الرجالة اللى بيقفوا وقفة رجالة و عرضت عليا تجيبلى باتنين جنيه بنزين:D
بس فكرتينى بغباء ظابط وقفنى عشان يشوف رخصتى
و مصر اصرار غريب انها مش بتاعتى بتاعت الانسة اللى جنبى و انى ما بلغتش السن القانونى :D
مع ان الانسة اختى كان عندها 17 سنة و ما اتعلمتش السواقة لسه..بجد غبائهم ما يتوصفش

و بالنسبة للمدعى الفاكس بتاع تعريب الفاعل
فهو ارحم من المدعية الفاكسة
اللى مقتنعة بان احمد عز بتاع الرهينة مش معقول يتجوز واحدة زى شاهيناز النجار :D

و بمناسبة الكوميديا السوداء خدى عندك
واحد معايا فى الشغل كان مسافر شرم مع اتنين صحابه
و خطيبته راحت معاهم ما تسألينيش ازاى
لما رجعوا واحد معانا بيسال البنت انهاردة طبعا احمد ما رضيش يسيبك تنزلى المية
قالتله بالعكس انا اللى ما رضيتش..احمد قالى عادى دول اسماعيل و ايهاب زى اخواتك
حقا اننا نعيش ازهى عصور الرجولة :D
عشان لما اقولك كان المفروض تفهمونى انى هيجرالى كده فى الشغل ما تبقيش تضحكى عليا تانى

هموت من الضحك على واحد بيقع ما يلحقوه دى :D

Unknown said...

قصص أكشن فعلا

هاي حياتك قلبت إثاره الأيام هاي:)

الحكايات كلها حلوه خصوصا تاعت الفنانه المتخفيه:)

Nanoz said...

فنونتى
فينك ... المصطبه بتندهلك :D

فكرتينى بمشهد كوميديا سوداء مش مصدقاه لحد دلوقتى

من كام يوم التليفون رن ... عادى بتحصل:D قمت رديت لقيت واحد بيقولى هنا مكتب مخدمين و بيعرض خدماته
المشكله بدات لما بدا يتكلم عن خدماتهم ..يا فندم احنا عندنا نوعين
النوع الاول الخادم العادى و ده سعره كذا
النوع التانى هو العبد !!!
وده بيبقى عبد و واجب عليه الطاعه العمياء يا ستى ... ستك مين يا عم انت مبحبش الكلمه دى ... لا انا عبد يا ستى و مينفعش مقولش كده

الى اخر شرح موضوع العبد و ان سنهم بيبدا من 7 سنين !!!!!!!!
عشان يطلع عبد بيسمع الكلام و مربياهم على ايديا

بس حسيت اننا فى العصر الجاهلى و ابو لهب هيدخل دلوقتى ...

*SosSoOo* l'o'l said...

انا اقيد كل ما قلتيه

ههههههههههههههه

ويا بنتى مفيش حاجة بعيدة على ربنا

ممكن يصحى الصبح يلاقى صوابعه طلعت تانى

leeno said...

عسكري المرور بيساعدك؟؟ ما بلاش و النبي كتر خيره مش عايزين مساعدة من حد

انا متخيلة اصلا الموقف (بيسم البدن ) من غير مساعدة العسكري المحترم !!

و بعدين مقلتليش تعريب الفاعل اييييييه؟؟؟ يا خرابي لو ماما سمعتها كانت عدمته القدرة على الكلام بالعربي اصلا هههههههههههه


عندي فاصل من الكوميديا السوداء دي بس مليش نفس ...... اكتفيت بالقدر بتاعك و لا اقولك اكتفيت بالأدر بتاعك هههههههه

Fatma said...

فوزي

أشكرك على تقييدك يا فندم :)

Fatma said...

فلة

ههههههههههههههههههههههه

لا هموووووت من الضحك
احمد عز بتاع الرهينة وشاهيناز النجار دي جاااااامدة موووووووووووت

والله موقف البنزين والظابط حارقين دمي اكتر حاجة عشان اللطعة اللي اتلطعتيها بجد :(

Fatma said...

مياسي

هي حياتي عموما مليانة اثارة زي عن اللزم بس الجرعة زايدة اليومين دول او بالاصح اليوم دا تحديدا

اتشرفت بزيارتك جدا :)

Fatma said...

نانسي

عبد !!! عبد !!!! لا انتي بتهزري اكيد !!!

فين حقوق الانسان !!! فين مجلس الطفولة والامومة
دا حتى مشيرة خطاب بقت وزيرة اهو
بلغي عنهم بجد يا نانسي دا ازهي عصور الجاهلية

مش معقول انا مذهولة

عايزين مصطبة بحق وحقيقي بقى ما تظبطوا حاجة قريب

Fatma said...

سوسو

على رأيك :)
وله في خلقه شؤون

انا مش بنكر حصول المعجزات
بس ما يبقاش دا العادي ولا المتنظر يعني ولا ان الشخص اللي مش متوقِع الغير متوقَع يبقى مش مؤمن بقدرة الله

اتشرفت بزيارتك :)

Fatma said...

لين

بيسم البدن بس
لا ونسيت اذكر ان الغلبانة فلة كانت مستنياني على الطرف الاخر من الكوبري ودا حاجة تانية كانت قهراني ومخلياني في نص هدومي اصلا

مامتك لازم تقابل الشركة عندي
اغلبهم نفس النموذج دا كدا

تسالي رهيبة :)

مواطن مصري said...

ب النسبة ل اكون يقال انو مسلم ما علينا اكون دة اسواء مغني راب و الي مظبطة في الكار الراب امنم


انا مش عارف الي يروح حفلة ل اكون المفروض عارف مين اكون و بيغني اية و راسلتة الي بيقدمها من خلال الراب اية الراب دي رسالة او ازاي تسوق فكرة معينة او قضية من خلال الراب

المهم انا لو اتعرض عليا اروح حفلة ل اكون ببلاش مش اروحها لائنة اسواء مغني راب شفتة في تاريخ الراب القديم و الحديث

The Seagull said...

حياتنـا كلهـا دلوقتي بقت كوميديـا سوداء واللي يقولك غير كدة يبقى أعمى وبيضحك على نفسه وعايز ينضرب فوق دماغه عشـان يفوق :)

عودًا حميلاً يا فنون :)

Anonymous said...

لاء هيتغير..آاآاآا

طيب بصي


مش قبل كدة مدونة بنت مصرية

كانت بيضا وكانت أجمل

صح ؟


بس اللون الأسود ده بيوجعلي عيني بجد :D

بيجيب لي كوابيس قبل ما أنام

جربي كدة تبقى بيضا

هتلاقي فرق فظييع : F


ههه..هي المفروض حرف D بس F اتحطت وشكلها أحلى :D


ههه,,طيب بصي..خليها سودة عادي بهذر بقى مش مشكلة:)


معلهش لو هتزعلي معلهش:)

Anonymous said...

بهذر معاكي ماشي :)

و

يويو

الحياة وربنا ماهي كوميديا سوداء ولا حاجة :D

انتي بس متهيألك كدة :D

هي لحظات ولحظات :D

روق كدة يا جميل :D


..........


هو انتم قصدكم..كومديا سوداء

شر البلية ما يضحك


ولا نجيب الريحاني :؟


مش عارفة,بقول أي كلام,عادي بقى :)


هههه..عادي عادي..ربنا يسعدكم :D

blackcairorose said...

فكرتيني بمصر ونوادرنا وسرياليتنا

بكوبري اكتوبر الملعون بزحمته وخنقته وحره وانا بمر فيه يوميا

بالدعوات واللي احيانا بحس انها كل ما نملك

بالنوعيات الغريبة اللي احيانا بنشوفها بالصدفة في مكان عام وبنسأل ساعتها نفسنا: هي الناس دي مين وتطلع ايه وبيبانوا امتى؟

بعساكر المرور الاغلب من الغلب وعساكر الشرطة اللي مش مرحومين ومبيرحموش في نفس الوقت

Fatma said...

مواطن

هو المشكلة اننا في مصر بنتبع سياسة الاحداث والزيطة مع كل شيئ جديد

Fatma said...

يسرا

معاكي حق :)

Fatma said...

ايمان

قصدي الاتنين

الريحاني وشر البلية ما يضحك

Fatma said...

روز

حقيقي انا بحب تعليقاتك وقدرتك على الدخول في اعماق احساسي بالموضوع

هي الناس دي مين وتطلع ايه وبيبانوا امتى؟

هو دا بالظبط احساسي وانا بكتب :)

اشكرك

Anonymous said...

ههه..طيب استني استني :D

انتي شكلك أصلا..زعلانة علىالآخر :D


روقي كدة :D

عاملة ايه :D