Sunday, October 18, 2009

صديقي العزيز

الزمان
من زمان اوي
يوم ما انا اتولدت
قالولك ان ماما بتولد ..وانت وقتها كنت قاعد بتسمع اغنية اسمها
dancing queen
جريت رحت المستشفى
واول ما انا اتولدت قولتلهم
she is my dancing queen
سموني في اليوم السابع ..وبالليل ماما حلمت ان اسمي حاجة تانية غير اللي سموهالي
بابا كان سافر
ماما كلمتك الصبح صحتك من النوم وقالتلك روح غير اسمها انا حلمت ان اسمها فاطمة
الاسم دا كان نفسك تسميهوني
انت انبسطت جدا ورحت غيرتلي اسمي
لما انا كبرت شوية ..كنت انت صاحبي ...صاحبي اوي ..وانا كنت فرحانة اوي
فاكرة تمشيتنا سوا في وسط البلد ...ايس كريم جروبي ..والكتب اللي كنت بتشتريهالي من مكتبة مدبولي
فاكرة اغاني
ABBA
وبالذات اغنيتي
dancing queen
..اسمي اللي فضلت تنادي بيه لحد اخرمرة شفتك
فاكرة اول كتاب كبار خليتني اقراه وانا كنت صغيرة اوي ..كان كتاب العظماء مئة واعظمهم محمد
فاكرة ضحتك
فاكرة شعرك الناعم وانا اختي وولاد عمي وولاد عمتي بنعكشهولك وبنضحك
فاكرة العود بتاعك ..انا اشتريت عود جديد وكنت عايزاك تشوفه
وفاكرة انك لما كبرت واتجوزت ما بقناش انا وانت صحاب خالص
انا كمان كنت وقتها كبرت
مش عارفه ليه مافضلناش صحاب
بس انت فضلت غالي عندي اوي
وفضلت بحبك اوي
لما عييت من كام شهر ورحت زرتك في المستشفى ماقدرتش امسك دموعي
بصتلك وهاجمتني كل الذكريات دي
ولاقيتك لسه بتضحك
اخدتك في حضني ..بس ماتكلمتش
وانت قعدت تضحك ضحكتك الحلوة وتقولي انا كويس بس انت وحشتيني كان لازم اعيا عشان اشوفك
زعلت من نفسي اوي وقتها
بس بردو ماتكلمتش
اخر مرة شوفتك في رمضان
جيتلنا ..وانا كنت فرحانة اوي انك بقيت كويس
وقلتلك على فكرة انت بتوحشني
قلتلي لو بوحشك كنت تعدي عليا اشوفك لازم يعني مناسبات عشان نتقابل
وقعدنا اكلنا سوا ..وانت بردو كنت بتضحك نفس ضحتك الحلوة
انا كان بقالي كتير مارحتش زرتك
بس النهاردة لما رحتلك ماقدرتش اشوفك
ماقدرتش
انا اسفه
بجد ماقدرتش
بس كنت قاعدة برا ...في بيت انًه الله يرحمها ..مكان ما كنا بنلعب وبنضحك ومكان مكتبتك القديمة ..وانت كنت جوا في سريرها ..في ناس كتير دخلولك ..بس انا ماقدرتش ..خفت اشوفك بشكل تاني ..عايزة شكلك وانت بتضحك يكون الشكل اللي افضل فاكراك بيه طول عمري ..لحد ما اقابلك
يا صديقي العزيز ...انا اسفه اني ماقدرتش اقولك انا قد ايه بحبك ...وانت قد ايه آثرت فيا ..انا لحد اللحظة دي مش متخيلة اني بتكلم عنك باعتبار انك مش موجود في عالمي دا ..وانك دلوقتي عند ربنا ..
يارب ..انا بحبه اوي يا رب ...اوي ,,ارحمه واغفرله ودخله جنتك وصبر بابا ..دا ماكنش اخوه الصغير ..دا كان ابنه الكبير
وماكانش عمي ..كان صديقي العزيز

14 التعليقات:

The Seagull said...

عينيـا دمعت بجد :)

البقاء لله يا حبيبتي وربنا يصبركم ويجعلها آخر الأحزان إن شاء الله :)

TAFATEFO said...

ربنا يرحمه ويصبركم جميعاً

موقف اليوم الأخير ده حصل معايا .. مكنتش برضى أروح أشوف حد في المستشفى لأني مش متخيل اني أشوفه وأفتكره بصورة غير اللي اتعودت عليها واللي بشوفه بيها طول عمري

ولما بقى كويس أوي وكان هيخرج خلاص من المستشفى رحت .. كان كويس أوي الحمد لله وكنا خلاص بنقول هو ليه مش بيخرج بقى .. أتاريه كان علشان الوداع .. فجأة توفي

ربنا يصبركم ويرحمه ان شاء الله

Anonymous said...

ربنا يرحمه يارب

ReEm said...

ربنا يرحمه و يحسن اليه و يغفرله

و يصبر قلبكم على فراقه يارب

leeno said...

ربنا يجعل مثواه الجنة و يغفرله و يرحمه و يصبركم

Jannah said...

البقاء لله الله يرحمه و يغفر له و يرزقكم الصبر

mony said...

ايه الحكاية..الحبايب كلهم بيسيبونا كدة..معلش يا فاطمة..ده قضاء ربنا
وربنا يسكنه فسيح جناته ويجعل قبره روضة من رياض الجنة ان شاء الله

وبجد فعلا الواحد مبيعرفش قيمة الحد اللى بتحبيه الا لما يروح والاكتر بقى انك بتشوفيه وهو بيحتضر ويدبل ادامك

البقاء لله

Superman said...

البقاء لله

الله يرحمه و يغفر له و يجعل مثواه الجنة ان شاء الله

ربنا يصبركم و يهون عليكم فراقه و يبدلكم به خير

dr.lecter said...

انا عارف كويس احساسك بجد وخاصه في حاله زي بتاعتك ويمكن ماتتخيليش انا زعلان اد ايه علشانك بجد لاني انا نفسي لسه بعاني من اثار اللي حصل لي برده

مش هاعرف اواسيكي لكن اللي هاقدر اقهولك هو نفسه اللي انت قولتيهولي
خدي وقتك واحزني براحتك يمكن تكوني حاسه بفقدان اتزان وتوهان وكل حاجه مالهاش طعم خالص

ربنا يصبرك ان شالله ويكون رفيقك في الجنه باذن الله وخليكي دايما فاكره الزكريات الحلوه بتاعتكم خزنيها في دماغك بجد او اكتبيها علي ورق وكل ماتحسي انه بيوحشك ارجعي ليهم وافتكريه

انا اسف اني بعزيك متاخر بس كنت عييان والله ولسه عارف ومش عارف اعزيكي ازاي مالقيتش غر مدونتك

ربنا بيحبه يافاطمه بيحبه جدا علشان كده اختاره دايما كده الناس الكويسه بتمشي بسرعه لانها مكانها مش في الارض

البقاء لله مره تانيه

شفـقــة و إحســــان said...

الله يرحمه رحمة واسعة
ويصبرك انت ووالدك
أثرت فينا بجد

ســـــاره said...

الله يعظم اجركم ويصبركم ياحبيبتي
ويرحمه ويغفرله ويجعل مثواه الجنة يارب

الشارده said...

البقاء لله يا فنون
ربنا يصبرك يارب

... amr said...

لااله الا الله

الله يرحمة و يصبرك ... متأخرة معلش
بس عزائنا انة في مكان أفضل من الدنيا و اللي فيها

~ Heba ~ said...

البقاء لله يافنون يارب تكون اخر الاحزان

وربنا يرحمه ويصبركوا يارب آمين