Tuesday, April 29, 2008

أنا من الجيل اللي..




انا من الجيل اللي حضر حرب الخليج
انا من الجيل اللي شهد مذبحة الحرم الابراهيمي واتفاضة الاقصى واطفال الحجارة
انا من الجيل اللي شهد سقوط الاتحاد السوفيتي
انا من الجيل اللي انتهى في عهده جيل كامل من القادة العرب السابقين الا قليل
السادات ... عرفات ...الملك فهد ...الملك حسين ...حافظ الاسد ...صدام حسين ...
انا من الجيل اللي كان بيتفرج على فوازير نيللي ويقلد شيريهان
انا من الجيل اللي حضر مصر للتأمين ...المسلسل هيبدأ امتى
واكل بيمبو وجيرسي وسامبا اللون الموف
انا من الجيل اللي اتربى على صوت فيروز وام كلثوم
وحب على اغاني فؤاد وعمرو دياب وعرفهم من ايام في السكة في السكة والشمس تجمعنا وبتغني لمين يا حمام وهلا يا هلا
واتعلم العمق البسيط على ايدين منير ومنيب وصلاح جاهين
انا من جيل رافضك يا زماني يا مكاني انا عايز اعيش في كوكب تاني
انا من الجيل اللي حضر طفرة في عالم الموسيقى اسمها حميد الشاعري
انا من الجيل اللي عاصر 3 مصريين اخدوا نوبل
وقرأ من صغر سنه لنجيب محفوظ واحسان عبد القدوس ويوسف السباعي وعباس العقاد وغيرهم
واستمتع بملف المستقبل ورجل المستحيل
انا من الجيل اللي رقص على اغاني مادونا وياللي وسطك وسط كمنجة وحفظ كل اغاني جورج مايكل
انا من الجيل اللي قالوله في مغنين جداد اسمهم مصطفى قمر وايهاب توفيق ومغني شعبي اسمه حكيم
وفيلم جديد مكسر الدنيا اسمه Pretty women
انا من الجيل اللي لما كانوا بيقولوله وهوا صغير ان هيجي يوم هيبقى فيه تيليفون محمول
وممكن تشوف الشخص اللي بتكلمه
كان بيعتبر دا حلقة خيال علمي وماتصورش ابدا انه يحصل في الحقيقة
انا من الجيل اللي صدمته التكنولوجيا والانترنت
وماكانش فاهمها في الاول خالص !
انا من الجيل اللي شهد ايام ماكان التيليفيزيون قناة اولى وتانية وبيفكروا يفتحوا التالتة
غير كدا ماتلاقيش
انا من الجيل اللي كان بيستنى حلقة العلم والايمان بفارغ الصبر ويجيله حزن وشجن وخوف من موسيقته
انا من الجيل اللي كان بيقولوا عليه في برنامج العالم يغني ( اما لهواة التسجيلات فبنقولهم يستعدوا عشان جايبنلهم النهاردة مفاجأة)
انا من الجيل اللي ارتبط معاه يوم الجمعة بالشيخ الشعراوي
انا من الجيل اللي مادخلش سينما غير على كبر لما فتحوا سينمات ممكن الانسان الطبيعي يدخلها
وعملوا افلام ممكن الواحد يشوفها
انا من الجيل اللي شهد صحوة السينما الجديدة بعد ماكانت الافلام عبارة عن (كلمة السر ..خالتي بتسلم عليك)
في فيلم المفروض انه مخابرات وقضية واسرائيل وحاجة مهمة
ياااااه
الكلام مش هيخلص

شكرا لعمر طاهر :)

4 التعليقات:

محدش فاهم حاجة said...

حلقة العلم والايمان اللى كانت بتيجى يوم الاتنين
والشيخ الشعراوى بعد صلاة الجمعة
مصر للتامين حصن الملايين
وحرب الخليج اللى اتفرجت عليها فى التلفزيون
وحفلة افتتاح القناة التالتة والرابعة والخامسة والسادسة والسابعة والتامنة والنيل تى فى
حاجات كتيرة عارفها وفاكرها رغم انى كنت صغير
بس غصب عنى اتعلمتها فى صغرى
لما تكون الاخ الصغير فى عيلة وكلهم اكبر منك بمراحل حتتعلم منهم قهرا

رغم كل ده .. بس بحب اوى الاوقات دى وساعات بلاقى نفسى بقول يارب ارجع اعيش فى الزمن ده .. ارحم من الفيس بوك

Founoon said...

انا كمان بيوحشني اوي الزمن دا تصدق

انا حاسة ان دلوقتي مافيش عندنا حاجة ناخدها كذكريات معانا للمستقبل

مش لاقية حاجة بتحصل دلوقتي اقول ايوا الفترة دي فيها كذا وكذا وهبقى احكي لعيالي عليها

مش عارفه

يمكن احنا ما بنحسش بالحاجة الا لما تروح!!

Ranin said...

ذكريــات جميــله جــدا

بـس جمـالهـا فـى إننـا بنفتكرهـا دلوقتـى و نقـول عليـها كـانـت ايـام جميـله اوى

لكـن انـا مـش معـاكوا فـى إن الزمـن اللى فـات كـان احسـن مـن دلوقتـى

بصـراحـه بحسهـا نظـره تشـاؤميـه جـدا للمستقبـل

كـل زمـن ولـه مميـزاتـه و عيـوبه و زمـان كنـا بنبعـت الجـواب لأهالينـا اللى بـره او جـوه مصـر و نكتـب عليـه شكـرا سـاعى البـريد عشـان نخليـه يهتـم و يوصل الجـواب

لكـن دلوقتـى الإميـل او المسنجـر بقـوا يخـلوا اهلنــا اللى عايشين بعيـد عنـا يبقـوا كـأنهم معانــاو بنشوفهم صـوت و صـوره اونلاين

و حـاجـات زى دى كتيــر

و زمـان بـرده مكنـاش حـاسيـن بقيمــة او اهميـة الزمـن اللى عايشيـن فيــه و لا كنـا عامليـن حسـابنـا اننـا فـى المستقبـل هنقعـد علـى النـت و نكتـب عـن الزمـن الجميـل ده

و فـى المستقبـل إن شـاء الله هتلاقى نفسـك بتحـكى لأولادك عـن ايـام دلوقتـى و تقـولى إنك مـن جيـل المسنجـر و مـن جيـل العربيـات اللى بتمشـى ببنـزيـن و من جيـل الجنيـه :)

إستمتعـوا بدلوقتـى عشـان متندمـوش عليــه بكــره

Founoon said...

منورة المدونة يا رنين بجد

انتي مش متخلية انا فرحانه قد ايه بوجودك

متفقة معاكي في كلامك جدا