Wednesday, October 22, 2008

بنت جدعة



انا فرحانه بيكي اوي

فرحانه بجد وحاسة انك اخدتي حقي وحق امي واختي وبنتي وصاحبتي وحق كل بنت او ست ماشية فحالها في الشارع وبتتبهدل من طوب الارض سواء بنظرة او كلمة او لمسه

انتي بنت جدعه..وعشان انتي جدعه ..لازم يتعملك بدل الموضوع الف ...وكل الناس تعرف حكايتك ..يمكن يتعظوا

الحكاية هنا

ماتسكتوش يا بنات ..بجد ما تسكتوش ..من هنا ورايح ماحدش يسكت على حقه

اما نشوف اخرتها ايه ..

26 التعليقات:

dr.lecter said...

انا اول مره اشوفها بصراحه وشكلها بنت ناس مش يعني تثير حد للدرجه دي او تخلي حد يتحرش بها وكمان انا معفتش حاجه عن الحادثه الا من موضوعك وحصل امتي الكلام ده اصلا

عامه هو ده شيء كويس من 3 سنين كان فيه مسلسل سوري كان بيتكلم برده عم الموضوع ده خاصه ان بطلته اتعرضت للتحرش بس بالكلام من شاب فقررت رفع قضيه عليه وعملت جدل كبير خاصه انها اول مره في تاريخ القضاء السوري واحده ترفع قضيه علي واحد علشان اتحرش بها وطالبت بحقوقها الدستوريه واثارت موضوع التحرش بشكل كويس جدا ان شالله لو بكلمه او بنظره يذيئه

... amr said...

اخرتها كلبوش يا جميل :))))

banouta masreya said...

انا بجد فخورة بالبنت دى..مش بس لانها ما اهتمتش بكلام مجتمع مريض..جاهل..متخلف..عنده انفصام فى الشخصية..الشرف عندهم هو جسم البنت لكن الكرامة و حق البنى ادم فى ان جسمه يحترم مش مهم..
لكن كمان عشان القوة الرهيبة اللى ثبتتها على موقفها طول المدة دى و لحد ظهور الحكم
بس تفتكرى احنا ممكن نعرف نعمل زيها؟
انا عن نفسي ما اعتقدش انى هعرف اعمل كده اقصى حاجة بعرف اعملها انى امشى اتلفت ورايا زى الحرامية عشان ما يحصليش زيها

samamasr said...

ربنا يحميكي

قدرتي تخلينا نقول ممكن نبقى زيك في يوم.ونكون شجعان :)

Founoon said...

لكتر

ودي اول قضية تحرش في مصر يتاخد فيها حكم

نهى دي عملت حاجة كبيرة اوي كل البنات هيفضلوا مدينين ليها طول العمر

دلوقتي اي كلب هيفكر مليون مرة قبل ما يعمل حاجة زي دي

كفاية سيبان بقى

Founoon said...

عمرو

الى الجحيم ان شاء الله مش بس كلبوش

Founoon said...

فلة

انتي مش متخيلة انا فرحانه بيها ازاي

بالنسبة لسؤالك هنعرف نعمل زيهال ولا لا لما بفكر شوية بخاف ...بقول يمكن يطلع مطوة ولا يضربني في الشارع ولا حاجة

وطبعا ماحدش هيحوش

خايفة اتهان لو عملت زيها

بس مش هنكر انها شجعتني اوي اوي اوي

عقبال ما يطلعوا حكم على المتحرشين باللسان وتكون العقوبة انهم يقطعوا لسانهم

Founoon said...

معاكي حق يا ايمان

فعلا تصرفها اداني قوة داخلية وحسسني اني مش هخاف لو لا قدر الله حصلي كدا

Maga said...

ههههههههههههههههههههههه

دا على اساس ان مفيش احكام للقتل وكل يوم جرايم قتل

على اساس ان مفيش احكام ولا قانون للسرقة وكل يوم سرقة عيني عينك

على اساس ان مفيش احكام للبلطجة وكل شوارعنا مالينا بلطجية

على اساس اننا بلد نضيفة مفيهاش لا حشيش ولا مخدرات من كمية الاحكام اللى بياخدها اللى بيبع مخدرات
وكلها بتبيع حشيش اموت واعرف مين اللى بيشترى

يا ستى بلاش ارف لو اى حد بيفكر قبل ما يعمل الجريمة ايا كانت مش هيعملها انما احنا بلد تيييت

Ranin said...

مـا إنـت عنــدك Anti virus علـى جهـازك يـا مـاجـا
هـل ده معنـاه إن عمـر مـا دخـل Virus علـى جهـازك :)

اكيـد دخـل لكـن هـل ده خـلاك تشيـل ال Anti virus اللى عنـدك و تقـول مـاهى كـده كـده بـايظـه

اكيـد لأ بـرده لإنـك لمـا بتلاقـى ال Virus موجـود بتفضـل تحـاول و تجـرب و تغيـر فـى ال Anti virus اللى عنـدك لحـد مـا تتخـلص مـن الVirus لإن مـش مـن مصلحتـك إن ال Virus يفضـل موجـود لإنـه هيضـرك

نفـس الحكايـه علـى الأحكـام و القوانيـن الموجـوده فـى البلـد اللى معمـولـه عشـان تحمينــا مـن الجرايـم اللى بتحصـل

لكـن طالمـا مفيـش الحـد اللى يحـس بخطـورة وجـودهـا فعمـر القوانيـن ما هتكـون ليـها لزمـه و لا هتفيـدنـا و لا تحمينـا

العيـب فينـا و فـى سلبيتنـا اللى وصـلت لحـد الغبـاء

إحنـا بنلاقـى واحـد مـاسـك حـرامـى و تلاقينـا بنقـوله معـلش بلاش تبـلغ عنـه ده غلبـان و اكيـد ظروف البلـد هـى اللى خلتـه يعمـل كـده و اكيـد وراه عيـاله و مراتـه اللى هيتشـردوا بعـده

بنشـوف خنـاقـه بيـن إتنيـن و واحـد منهـم هيموت التـانـى و بنفضـل نتفـرج مـن بعيـد و نقـول فيـن الشـرطـه تتـدخـل و لا هـمـا مـش بييـجوا غيـر لمـا يخـلصوا على بعـض

بنلاقـى حـد محتـاج مسـاعـده بنخـاف نسـاعـده احسـن يضحـك علينـا بعـد كـده

خـايفيـن و مكبـريـن و مـاشيـين جـوه الحيـط و منفضيـن لكـل حـاجـه لحـد مـا تحصـلنـا الكـارثـه و نتهـم النـاس بالسلبيه انهـا موقفتـش معـانـا و كـانت ببتفرج علينـا

Ranin said...

ملحوظــه ..

ال Account بتــاعـى علـى إيجـى فيـلم إتقفـل يـا جمـاعـه مـن الإداره عشـان مـش عـاجبهـم كلامـى :)

هبقـى اطمـن عليـكو بقـى علـى مدونـاتكـوا علـى اد مـا اقـدر و اللى عنـدى علـى المسنجـر اكيـد هشوفهـم و اطمـن عليـهم

و إللى مـش عنـدى انـا بقولهـم إنـى مـش موجـوده علـى إيجـى و إنـى بحـب إيجـى فيـلم جـدا و بحـب كـل اعضـائـه :)

اسفـه يـا فنـون إنـى كتبت تعليـق خـارج الموضـوع

samamasr said...

بس متزعليش :)

Founoon said...

احمد

الموضوع هنا مختلف

لان اساسا 90 % من المتحرشين بيعملوا كدا من باب التسلية والاستمتاع بذعر الضحية وهي بتنهار وبتتعذب

يعني لو لقى ان تسليته دي تمنها 3 سنين حبس غالبا هيفكر دقيقتين على الاقل قبل ما يعمل اللي هو بيعمله

المتحرش انا ما صدقش انه مثار جنسيا اصلا

او على الاقل نسبة كبيرة منهم مش كدا

هو مش اكتر من مرض نفسي يتلخص في الاستمتاع بتعذيب الاخرين ودا طبعا نتاج القهر الممارس عليه هو شخصيا

انا اعتقد ان الحكم دا هيفرق كتير في مسألة التحرش اللي زادت عن الحد بشكل مريع بصراحة

Founoon said...

رنين

انا معاكي في كلامك

والدليل اللي حصل مع نهى

لما واحدة فكرت تستخدم القانون عشان تاخد حقها اخدت حقها بالفعل واحرجت ناس كتير كانوا فاكرين ان سكوتهم احسن

لا السكوت مش احسن

ما ضاع حق ورائه مطالب

فين بقى المطالب !

Founoon said...

رنين تاني معلش ماشوفتش التعليق التاني غير بعد ما بعت اللي قبله

انا عرفت موضوع ايقافك دا واتصدمت بصراحة

هو ايقاف نهائي ولا حبة كدا يعني ولا ايه ؟!!

Founoon said...

ايمان

ماتزعليش دي لرنين ولا لنهى ولا ليا :)

nA3'oUm HaNeM said...

البت دي جدعه اووووووي
و اصلا حكم التلات سنيين ع الحيوان ده قليل
لو الحكم قاسي و مؤبد المتحرشيين دوول هيهمدو .... بس بجد صدمني رد فعل الناس

ماجا : اهدى يا ابني صحتك :D

momken said...

هى دى البنات الجدعه
الى بتاخد حقها وقتى
مش تسكت وبعدين تفضل تنادى بحقوق المراءه

وهو مين الى سلب المراءه حقوقها

حق عندك مدى ايدك خديه متنتظريش حد يجيبه على صنيه لحد عندك

تسلم ايدك يا استاذه
وياريتها كانت سحلته فى الشارع وضربته علقه كمان
بس ياله تلت سنين مع الشغل هيتعلم فيه يعنى ايه مراءه
ويعنى ايه احتراء اداميه الاخر

تحياتى

Founoon said...

نوغا

انا ما صدمنيش غير ان في ناس متعاطفة معاه

مافهمتش بجد !!!!

Founoon said...

ممكن

يا اهلا يا اهلا

مش هو بس اللي هيتعلم ..انا شايفة ان نهى فتحت باب على طريق الايجابية وان الشخص ما يسيبش حقه ويدور عليه بالطرق المشروعة

leeno said...

انا محترماها و محترمة قوتها و شجاعتها و محترمة اهلها و ابوها اللي وقف معاها

انا عن نفسي معرفش لو كنت اقدر اعمل زيها

مرة وحدة بس زعقت و بصلي بصة حقيرة زيه و مشي و كان في ولد تاني افتكرلي بزعقله قعد يبصلي باستغراااااب


اهانة مقرفة من ناس ماقل كلمة تتقال عنهم حيوانات مريضة


بس احنا ايييه اللي بيخلينا ننحدر للدرجة دي؟

في مشاعرنا في افكارنا في اهانتنا لنفسنا و لغيرنا؟؟؟


بجد انا نفسي افهم بقينا بننحدر كدة ليه

بقت قيمنا مريضة كدة ليه؟؟

ايه الافكار الغريبة اللي بتسود المجتمع دلوقتي و منين و لييييه


سؤال يعل بس بجد نفسي افهم و نفسي الاقي الحل

Founoon said...

لينوتشي وحشتيني اوييييييييييييييييي

سؤالك مؤلم

فعلا منين وليه ..هي الاخلاق راحت فين

خلصت خلاص ما بقوش بينتجوا منها تاني ؟!!

اصل دا اكيد مش رغبات جنسية مكبوتة

الحكاية اكبر من كدا

انا بردو ماعرفش لو كنت في مكانها كنت عملت كدا ولا لا

بس بعد اللي هي عملته انا اتشجعت بجد :)

Maga said...

ههههههههههههههههههههههههههههههههه



سمعتوا باقى القصة ولا لاءلا !!


الظاهر ان للقصة اجزاء اخري ولا سعد الدالي

banouta masreya said...

تصدقى بالله يا فنونتى و انا جاية اشوف اذا حد سمع عن باقى الموضوع ولا لا كنت متاكدة ان ده هيكون رد فعل احمد :)

انا مش عارفة ايه مدى صحة الموضوع بتاع انها من عرب 48 ده لكن فى الاول و فى الاخر هتفضل انثى اتهانت على ايد حيوان و خدت حقها و بصراحة مش شايفة ان فى كونها من عرب 48 دى حاجة تأثر على القضية و حكاية القضية اللى رفعتها على الظابط الفرنساوى دى برضه ما تقللش من مصداقيتها عندى..وارد جدا انه يكون حصلها كده
ما حدش عمره هيفهم ان الموضوع ده بقى ظاهرة غير لو جرب يلبس لبس ست و ينزل الشارع ربع ساعة بس
عموما انا مش عايزة اسبق الاحداث بس بجد استفزيت من المحامية بتاعتها..ايه الغباء ده يعنى كانت ممكن ترفض تكمل القضية لصالحها مع انه كان هيبقى غباء برضه لكن تروح تدافع عن متحرش دى اللى مش قادرة افهمها بجد :S

حزينه said...

بجد فعلا مش لازم نسكت ابدا بعد كدة

بس فى بنات ومنهم انا السلبيه متحكمه فيهم

بس هى اكيد شجعتنا


حزينه

RoMeTa said...

الله بجد
مش قادره اوصف فرحتى
اخيرا هنغير ونصلح ونربى ونرعب الناس الى زى دول
اخير هنتكلم
ماهو ده الى بيخلي الناس دى تكتر وتتمادى الصمت والخوف
بس بجد بحيها .. وربنا يحميها ويحمينا كلنا.
فخوره اوى بيها.