Sunday, October 26, 2008

كلمات



ليه؟؟
اكتر سؤال بكرهه .
يمكن عشان بسأله لنفسي ولغيري وللدنيا وبتسئله كتير ودايما ما بلاقيلوش اجابة
او احيانا بتكون الاجابة كلمتين في منتهى البساطة بس بين سطورهم حكايات

وحدة
حاولت اكتب عن عروستي التانية زي ما كتبت عن عروستي الاولانية ...لاقيتني لسه واقعة تحت تأثير الصدمة ومحتاجة سنة تعدي على الاقل عشان اقدر اقول اي حاجة
انا حاسة بالوحدة
ثورة:)


حريةفي كلمة احلى من دي من الدنيا !!! كلمة لما بقولها بحس اني بتنفس ...بشوفني واقفه على قمة جبل وتحتي بحر ثائر وشعري بيطير حواليا وراسي مرفوعة وفاردة ايديا كأني طايرة في الهوا
انا كل يوم بيعدي عليا بفقد جزء من احساسي بالحرية



ناس
في ناس تقابلهم تحزن انك ما قابلتهمش من زمان ...
وفي ناس تقابلهم تحزن انك حتى لمحت طيفهم من بعيد



كذبة
بقيت بخاف اطلع احمد حلمي في اسف ع الازعاج..خايفة بجد اطلع عايشة في كذبة من صنع خيالي
بس انا مبسوطة ..حتى لو طلعت كذبة على الاقل انا عشت احساسي بصدق



تعوداتعودت اني ما تعودش على حاجة..في اشخاص واشياء كسروا القاعدة .... للأسف



الم
بخاف اتألم ..بخاف من فكرة الالم يمكن اكتر من خوفي من الالم نفسه شخصيا ...



حزن
ليه مش راضي يفارقني بقى ...هو دا قلة رضا ولا ايه ! انا حاسة اني مكركبة ومتلخبطة وخايفة اوي ..بكرا ما بقاش باينله ملامح ...عندي فوبيا من ان حاجة وحشة تحصل لحد بحبه ..انا عايشة الم الفكرة بجنون
موجوعة من الاحساس دا



فراق
انك تصحى في يوم تلاقي اللي كان معاك امبارح مابقاش موجود النهاردة ..وان اللي معاك دلوقتي بكرا ممكن ما تلاقيهوش
انا ما بفهمش الفراق ..الفراق اكبر بكتير من قدرتي على الاستيعاب !



لو
ياااااااااااااااااه ...لو !

8 التعليقات:

Ranin said...

انــا بعشــق الحريـــــه :)

Yasmine said...

انا بطلت اسال ليه
لا بستغرب من الناس ولا بستغرب من تصرفاتهم..و زى ما فى ناس بتخزلنى اكيد انا كمان بخزل ناس كتير..فا خلاص بقى

الاقيش عندك عريسين يخلصونى من العروستين اللى عندى:D
يا فنونتى اكيد هتلاقى اللى يكتب فى يوم عن عروسته اللى مشيت و سابته لما ييجى الوقت اللى تمشى فيه انتى كمان..سنة الحياة

خصوصا لو كانوا اللى هيعملوا الثورة دول ناس زينا يهيجوا و يثوروا على اغنية ولا خطبة و بعدين يناموا سنين..اى اصلاح فى الدنيا محتاج قبل الجماس اصرار على تمكيل الطريق لاخره..من غير الاصرار ده ولا مليون ثورة هينفعوا

انا بتنفس حرية :)

مش كتير اللى حزنت انى ما قابلتهمش من زمان و انتى منهم على فكرة :)
ولا كتير اللى زعلت انى قابلتهم..هم كام واحد فى حياتى و شيلتهم نهائى منها لما عرفتهم من قريب و عرفت انهم ما يستاهلوش المكان اللى كانوا فيه فى حياتى

انا خايفة ابقى زيه فى يوم من الايام..ما اعتقدش انى عايشة كذبة لان حياتى ماهياش احلى من الواقع..حياة عادية بحلوها و بمرها لكن لا هى حلم ولا حتى قريبة من انها تكون كده

انا كمان ما اتعودتش اوقف حياتى عند حد..الا شخص واحد ما عرفتش غير انى اوقفها عنده و مش عارفة من غيره هتكون عاملة ازاى

تصدقى انا بقيت بلوم نفسي على احساس الحزن مع انه مش بايدى..ساعات افضل اقول ده بطر على النعمة..اللى عندى ملايين غيرى بيتمنوه و لو فضلت احمد ربنا عليه من هنا لعشرين سنة قدام مش هيكون كفاية..بس انا ماليش اى دخل فيه..ده احساس مش بيرضى يسيبنى..وصلت اخيرا لنتيجة انى مش هيعدى وقت عليا فى حياتى و انا فرحانة بجد لانى دايما عارفة انى مش هلحق افرد ضهرى..دايما فى حاجة هتوقعنى تانى..و ده اللى بيدينى احساس القوة اللى انا فيها دى..انى ببقى متوقعة..و راضية جدا

الفراق مستنياه قريب..و عارفة انه جاى..بدعى ربنا كل يوم انه يهونه عليا

مش قادرة اصدق انى رغيت الرغى ده كله :)

mony said...

احساسك وجعنى:(

وحشانى اوى يا فنون

Fatma said...

ومين ما يحبهاش يا رنين

ساحرة الحرية

مش ناوية تعملي مدونة بقى ؟!

Fatma said...

بنوتي

انا لسه بسأل ليه ولسه بتسأل ليه
حتى لما بسأل نفسي ليه مابلاقيش اجابة

ليه دا سؤال تعبني اوي

بالنسبة للعرسان اما نجيبلك عريس انتي الاول ولا انتي ناوية تعملي زيي وتجوزي الاتنين وتستفردي بالبيت :)

الثورة عايزة استمرار معاكي حق ..حماس اللحظة ما بينفعش

الحرية حكاية غريبة ..انا خايفة افقدها لاني حاسة اني بفقد جزء منها كل شوية

ان شا الله يخليكي ليا يا فلة انا بحبك والله اوي

انا مش عايشة كذبة ..بس انا حاسة ان حيلتي كلها فيلم ومش حقيقة :)

ربنا يرحمنا بقى من الفراق والحزن

مبسوطة بالرغي بتاعك جدا ابقى تعالى ارغي كل شوية :)

Fatma said...

مونمونتي انتي وحشتيني بجد وعايزة اطمن عليكي

بالنسبة لاحساسي بعض ما عندكم ما انتي على طول واجعة قلبي الله يسامحك

Superman said...

ليه؟ ده اكتر سؤال بسأله دايمآ..و بيسبب لي مشاكل ساعات..مش فاهم ليه؟

وحدة..احساسك رهييييييب في وصف عروستك..حرام عليكي بجد :D

ثورة..الكلام سليم جدآ..

حرية..بمجرد ما قريت الكلمة شفت الصورة في دماغي..قريت و لقيتك بتوصفيها..

ناس..نفس الإحساس بيراودني بشدة..بحرص انني اقابل النموذج الاول و اتجنب النموذج التاني..

كذبة..كل واحد فينا جواه نسبة ما من اسف علي الإزعاج..ساعات بنضطر نكدب علي نفسنا..و ساعات نفسنا بتكدب علينا و تخدعنا..(ايه الكلام الكبير ده)

تعود..زمان ماكنش لي اي حاجة ثابتة..بس الحياة علمتني ابني روتيني و اتعود علي حاجات..و مع الوقت اتعودت علي حاجات كتير اوى..بعضها مش شايف له لازمة في حياتي..

الم..انا مش بخاف من الفكرة..انا بترعب منها..و بتوجع لما اشوف حد بيتألم و انا عاجز انني اتصرف..

3×1..طيب انتي زعلانة من 3..انا جوايا قبيلة بتتصارع و انا ممثلها الدبلوماسي لدي شعوب الارض..

حزن..حاجة اجبارية زي تطعيمالاطفال اللي كانوا بيهرونا به و احنا اطفال..بس زي ما التطعيم وقته عدى..الحزن بياخد وقته و يعدي..و الحمدلله علي نعمة النسيان..

فراق..مابحبش لحظات الفراق..امشي و انت ساكت عشان جو هتوحشني ده بيتعبني نفسيآ..دايمآ بسيب الاشخاص علي امل و ثقة انني هشوفهم تاني ان شاءالله..

لو..اكتر حاجة شغالة في دماغي..لو حصل كذا يبقي ممكن يحصل كذا او كذا..
و لو حصل اول كذا يبقي هيحصل كذا او كذا..لكن لو تاني كذا هيحصل كذا بس..
بستخدمها في التفكير في اللي جاى..لكن بكره اقول لو حصل كذا من اسبوع كان زماني بقيت كذا..
انا لا انظر خلفي حتي لا اصطدم بما امامي..(كلام كبير تاني)

و غالبآ الكومنت اطول من البوست ذات نفسها..بس الصراحة لما دست لينك "عروستي الاولانية" حسيت بمفعول سحرى..مما طير النوم من عيني و جعلني ارد كده! :D

Fatma said...

سعيدة جدا بردك الطويل يا سلطان بجد