وقفة احتجاجية

غيروا المعاد بقى يوم التلات بنقابة الصحفيين الساعة السادسة مساء وقفة احجاجية ضد جدار العار

وبكره في وقفة احتجاجية في نقابة المحامين

 

بس خلاص ياريت تقروا الدعوة عند نوارة

وقفة احتجاجية بنقابة الصحفيين

سعيكم مشكور

المهزلة

ماكنتش ناوية اتكلم خالص ابدا نهائي عن مهزلة مصر والجزاير بس الخبر دا شنجني جدا وقضى على البقية الباقية من الصبر جوايا

http://www.shorouknews.com/ContentData.aspx?id=163460

كفاية بقى بجد كفاية

احنا كدبنا الكدبة وصدقنا نفسنا والعالم كله من حوالينا منقسم ما بين قرفان مننا ومصاب بنوبة ضحك هستيري علينا

عرررررة حاجة تعرررر بجد بقى احنا نسكت اكرملنا يمكن الناس تنسى او نصعب عليهم فيبطلوا ضخك علينا

كل اللي عملناه غلط من اول لقطة لاخر مشهد

من ساعة التسمم والكسكسي والبنج في التكييف والكلام دا كنا قدمنا مذكرة للفيفا تحقيق ولو لينا حق كنا خدناه ليه ماحصلش موقف رسمي من الحكومة المصرية ؟ ليه مافيش ولا محضر يوحد ربنا بالوقائع دي ؟

سؤال محتاج رد عليه فورا ؟ سكتنا ليه ؟

ليه لما جم ماتش القاهرة والالتراس ضربوهم بالطوب- باعتراف الالتراس شخصيا -اعلامنا عمل فيلم ساااذج ما يدخلش على عيل في ابتدائي؟ قال طوب جايبينه معاهم من برا قال !! ليه ماعذرناش بدل الانكار والفيلم الهابط ؟

بعد ماتش القاهرة لما اتقال ان في ميتيين جزائريين ليه مافيش موقف رسمي ؟فين الداخلية تنفي الادعاءات دي ؟ليه مافيش مسؤول محترم طلع في التيليفيزيونات ينفي الكلام دا بدل ما اعلامنا افتكر نفسه في عركة شارع وهاتك يا ردح ونرد على الشتيمة بشتيمة ؟ ليه ماستنكرناش تسخيين الاعلام الجزائري الكذاب ونعذر شعب واصلاله صورة بتقول اننا موتناهم ؟!!بدل مانقعد نشتم فيهم باسوأ الالفاظ العنصرية الموجودة والغير موجودة في الكتب !! ماكنش يصح اعلامنا ينساق لخناقة الحواري دي ابدا

لما يكونوا الجزائريين بيتابعوا إعلامنا ما يصحش ابدا يلاقوا كل الناس طالعين يسخروا منهم ويقولوا عليهم مش عرب أصلا ويعايروهم بالاحتلال ويفكروهم مرارا وتكرارا إننا أسيادهم مش عارفه بامارة ايه الى اخر الهراء

ليه في ماتش السودان باعتين ناس فاكرين نفسهم رايحين مهرجان كان ( حد يبعت فردوس عبد الحميد )مع انه معروف مسبقا انه ماتش مش بسيط وفي شحن نفسي بشع من الجانب الجزائري دول ناس فاكريين اننا موتنا مشجعينهم حطوا نفسكم مكانهم .فين مشجعيين الكورة. فين الالتراس اللي ضربوا منتخب الجزاير بالطوب ؟ وفين المشجعيين الاهلاوية اللي حرقوا مشجع زمالكاوي في احد الماتشات وليه الاندهاش من عنف مشجعيين الكورة الجزائريين واحنا عندنا زيهم بالظبط ؟!! كنا نبعت جمهور كورة ويتصرفوا مع بعض بقى بعيد عن الشعوب والحكومات اللي ماكانش المفروض تتدخل في خناقات عيال

نهايته ..احنا تعاملنا مع الوضع باسوأ ما يمكن دي ماتشات كورة وبيحصل كدا في العالم كله لو في غلط فهو علينا احنا تماما في كل حاجة بداية من اعلاميين مسخنتيه لفانيين جهلة عنصريين لابن رئيس الجمهورية اللي بيعاير الجزائريين انهم ما بيعرفوش يتكلموا عربي!!

نسكت بقى اكرملنا وننسى نغمة كله الا كرامتي اللي افتكرناها فجأة عشان شوية عيال تافهيين مشجعيين كورة متعصبين موجودين في كل العالم وموجودين عندنا بردو وياريت نفتكر ان المصريين بقالهم سنين بيتهانوا من القاصي والداني وجوا قبل برا وماحدش اتطرفله رمش

نهر الجنون

عجزت عن فهم الاسباب والدوافع الحقيقية لما يحدث هذه الأيام بين مصر والجزائر

يرفض عقلي ان يتقبل فكرة ان ما يحدث سببه كرة القدم ! لو صح هذا الافتراض فهذه ولا شك نهاية العالم

هناك كم لا معقول من الغل بداخل كلا الطرفين تعدى الملاعب والكرة وطال رموزا ليس لهم في ماحدث لا ناقة ولا جمل

وانطلقت العبارات العنصرية من هنا وهناك فهذا يعاير ذاك بموقف حكومته من احداث غزة التي حدثت في نهايات العام المنصرم والأخر ينعته بالهمجي والبربري الامازيغي

منتهى الجهل!!

اشاعات في الجزائر مفادها وصول 11 قتيلا في توابيت من القاهرة تسببت في سلسلة اساءات يتعرض لها المصريين المقيمين في الجزائر

الوضع حقا مؤسف لا استطيع تقبل فكرة ان يؤذى أحد أو يموت بسبب الكرة !

أنا أحب كرة القدم واتابعها باستمرار واشجع منتخبنا واتمنى وصوله لكأس العالم

ومازال حماسي للمباراة القادمة مشتعلا ولكني اقولها بمنتهى الصدق ان لم يقدر لنا ان نتأهل يوم الأربعاء وصعدت الجزائر فسأشجعها وكأنها مصر

الفائز يوم الأربعاء سيكون العربي الوحيد في كأس العالم القادم ..لست من المتحمسين للقومية العربية في الحقيقة ولكن بحكم اشياء كثيرة مشتركة هم الأقرب نفسيا لي

ومازال السؤال يطرح نفسه ..ماذا حدث ؟ ما الأسباب الحقيقة للغل والغضب والكره والعنصرية التي تبدو فيِ نظري بلا داعي ! لا أذكر أبدا أوربما لم يصل لعلمي أن هناك رواسب من أحداث قديمة بيننا وبين الجزائر بعيدا عن كرة القدم

يبدو أنه نهر الجنون الذي شرب منه الجميع الا من رحم ربي

أقاوم كل أسواري

أقاوم كل أسواري ..

أقاوم واقعي المصنوع

من قشٍ وفخار ..

أقاوم كل أهل الكهف ، والتنجيم ، والزار ..

تواكلهم

تآكلهم

تناسلهم كأبقار ..

أمامي ألف سيافٍ وسيافٍ

وخلفي ألف جزارٍ وجزار ..

فيا ربي !

أليس هناك من عارٍ سوى عاري ؟

ويا ربي ؟

أليس هناك من شغلٍ

لهذا الشرق ..

غير حدود زناري ؟؟

...

نزار قباني

ايش عرفك انت !!

حتى لو كان صوتنا واطي قصاد صوت اللي عايزينك
عشان محطوط عند بقهم ميكروفونات ومتسلط عليهم كشافات ابوللو كبيرة
وحتى لو انت كدا كدا واخدها
مش هيبقى بالساهل
ومش هيبقى وانت فاكر اننا مبسوطين
لأ احنا مش مبسوطين
عشان ايش عرفك انت ؟!
الحملة عند نوارة

: متضامنين مع الحملة
بنت خيخة
dr.lecter
يساري مصري
تامر موافي
قباري
وعلى فيس بوك

Dancing Queen

صديقي العزيز

الزمان
من زمان اوي
يوم ما انا اتولدت
قالولك ان ماما بتولد ..وانت وقتها كنت قاعد بتسمع اغنية اسمها
dancing queen
جريت رحت المستشفى
واول ما انا اتولدت قولتلهم
she is my dancing queen
سموني في اليوم السابع ..وبالليل ماما حلمت ان اسمي حاجة تانية غير اللي سموهالي
بابا كان سافر
ماما كلمتك الصبح صحتك من النوم وقالتلك روح غير اسمها انا حلمت ان اسمها فاطمة
الاسم دا كان نفسك تسميهوني
انت انبسطت جدا ورحت غيرتلي اسمي
لما انا كبرت شوية ..كنت انت صاحبي ...صاحبي اوي ..وانا كنت فرحانة اوي
فاكرة تمشيتنا سوا في وسط البلد ...ايس كريم جروبي ..والكتب اللي كنت بتشتريهالي من مكتبة مدبولي
فاكرة اغاني
ABBA
وبالذات اغنيتي
dancing queen
..اسمي اللي فضلت تنادي بيه لحد اخرمرة شفتك
فاكرة اول كتاب كبار خليتني اقراه وانا كنت صغيرة اوي ..كان كتاب العظماء مئة واعظمهم محمد
فاكرة ضحتك
فاكرة شعرك الناعم وانا اختي وولاد عمي وولاد عمتي بنعكشهولك وبنضحك
فاكرة العود بتاعك ..انا اشتريت عود جديد وكنت عايزاك تشوفه
وفاكرة انك لما كبرت واتجوزت ما بقناش انا وانت صحاب خالص
انا كمان كنت وقتها كبرت
مش عارفه ليه مافضلناش صحاب
بس انت فضلت غالي عندي اوي
وفضلت بحبك اوي
لما عييت من كام شهر ورحت زرتك في المستشفى ماقدرتش امسك دموعي
بصتلك وهاجمتني كل الذكريات دي
ولاقيتك لسه بتضحك
اخدتك في حضني ..بس ماتكلمتش
وانت قعدت تضحك ضحكتك الحلوة وتقولي انا كويس بس انت وحشتيني كان لازم اعيا عشان اشوفك
زعلت من نفسي اوي وقتها
بس بردو ماتكلمتش
اخر مرة شوفتك في رمضان
جيتلنا ..وانا كنت فرحانة اوي انك بقيت كويس
وقلتلك على فكرة انت بتوحشني
قلتلي لو بوحشك كنت تعدي عليا اشوفك لازم يعني مناسبات عشان نتقابل
وقعدنا اكلنا سوا ..وانت بردو كنت بتضحك نفس ضحتك الحلوة
انا كان بقالي كتير مارحتش زرتك
بس النهاردة لما رحتلك ماقدرتش اشوفك
ماقدرتش
انا اسفه
بجد ماقدرتش
بس كنت قاعدة برا ...في بيت انًه الله يرحمها ..مكان ما كنا بنلعب وبنضحك ومكان مكتبتك القديمة ..وانت كنت جوا في سريرها ..في ناس كتير دخلولك ..بس انا ماقدرتش ..خفت اشوفك بشكل تاني ..عايزة شكلك وانت بتضحك يكون الشكل اللي افضل فاكراك بيه طول عمري ..لحد ما اقابلك
يا صديقي العزيز ...انا اسفه اني ماقدرتش اقولك انا قد ايه بحبك ...وانت قد ايه آثرت فيا ..انا لحد اللحظة دي مش متخيلة اني بتكلم عنك باعتبار انك مش موجود في عالمي دا ..وانك دلوقتي عند ربنا ..
يارب ..انا بحبه اوي يا رب ...اوي ,,ارحمه واغفرله ودخله جنتك وصبر بابا ..دا ماكنش اخوه الصغير ..دا كان ابنه الكبير
وماكانش عمي ..كان صديقي العزيز

عن خدمة الديليفيري المتوفرة في المرور حاليا

-->

كان عندي شغل في مركز التجارة العالمي ع الكورنيش في وسط البلد

فكرة ان الواحد يلاقي ركنة شبه كدا فكرة ان مصر تفوز بكاس العالم ( دا بمناسبة الفيفا اللي هيتم ذكرها في الموضوع لاحقا)

قلت مافيش مشكلة اركن في كونراد انا كدا كدا مش هتأخر كل الحكاية نص ساعة

قالك باركينج كونراد مقفول يعني ايه يا عم يعني كدا مليان مافيش مكان

طيب

الشارع اللي بعد كونراد

قافلينه بحاجز حديد بعجل وواقف عسكري مرور غلبان

ووراه ركنات فاضية كتيييييييييير قلت لا مش هقدر اقاوم

لوسمحت يا عم ممكن اركن هنا

لا ما ينفعش

ليه دانا مش هتأخر كلها نص ساعة

طيب تعالى

هكذا ببساطة وتلقائية

ركنت ونزلت ورجعت فعلا بعد نص ساعة

لقيت كل اجهزة الدولة واقفين عند عربيتي

قبل مافتح بقي لاقيت واحد ببنطلون وقميص بيقولي دي عربيتك ؟

ايوا

انتي مين ؟

يعني ايه ؟

بطاقتك لوسمحتي

مين حضرتك

بلا بلا بلا من مباحث امن الدولة

هاايل دا كلام جميل

فتحت العربية وحطيت حاجتي وفتحت الشنطة وطلعت البطاقة وادتهاله

قعد يبحلق فيها شوية

ولاقيت وراه اخ من اللي ما بستحملش شكلهم عنده 3 نجوم على كتفه ماعرفش بقى دا رتبته ايه بيقولي الرخص لو سمحتي

الاخ بتاع امن الدولة : انتي دخلتي هنا ازاي وبتعملي ايه ؟

انا: هو في ايه حضرتك معلش انا عملت حاجة غلط معينة ياريت توضحلي يعني بدل الارهاب دا

الاخ بتاع امن الدولة: في ان هنا ممنوع الركن وانا عايزاعرف انتي دخلتي هنا ازاي

دخلت عادي كان في راجل واقف قلتله عايز اركن فتحلي وركنت

امن الدولة: يا سلام بالبساطة دي وانتي ركنتي هنا عشان طالعة فين الاوتيل ؟

انا : لا مركز التجارة

امن الدولة: ليه؟

انا : عندي معاد شغل

امن الدولة : بتشتغلي هنا يعني ؟

انا : لا كان عندي معاد شغل هنا

امن الدولة : وانتي بتشتغلي فين وايه والمعاد في شركة ايه

انا بيني وبين نفسي ( احيييه) بشتغل في شركة كذا وجاية معاد في شركة كذا هو الاسئلة دي عادي ؟

امن الدولة : انتي متوترة ليه؟

انا : لا مش متوترة بس تخيل يعني انت راكن ونازل لا بيك ولا عليك ترجع تلاقي مصر كلها عند عربيتك وفي تحقيق مفتوح بصراحة خضتوني يعني

طيب خلاص يا ستي انا اصلا المفروض اتحفظ عليكي وعلى العربية عشان هنا في وفد الفيفا وفي امن مشدد وماكانش ينفع خالص تدخلي هنا ممكن الرخص بقى لبتنجان باشا او 3 نجوم

يادي اليوم اللي مش فايت ..رخصة العربية منتهية من سنة طلعت الرخص وامري لله

ابو النجوم: دي منتهية

انا : آه

ابوالنجوم : من سنة وشهرين

انا : آه

ابو النجوم: آه ايه وماشية بيها عادي كدا مافيش حد وقفك من ساعتها

انا : لا يوقفوني ليه بحط الحزام وما بتكلمش في الموبايل وانا سايقة (كذابة) ومابكسرش اشارات

ابو النجوم: ماعدتيش على لجان خالص

انا : لا عديت ما طلبوش الرخص عدوني عادي زي مانا ركنت هنا عادي ممكن امشي بقى

ابو النجوم : وماجددتيهاش ليه ؟

انا : عشان بزهأ !
بصلي نظره عجيبة جدا

كملت : آه والله بزهأ جدا انا ماعنديش وسايط يجيبولي الرخص ولما بروح المرور بتمرمط بصراحة فياريت تديني الرخص بقى بدل ما تمرمطني ع الفاضي وسبني امشي

ابو النجوم : لا تمشي فين انا هسحب رخصة

انا : بس العربية راكنة مش ماشية هو انت ينفع تسحب رخص عربية راكنة ؟

ابو النجوم: يا سلام مانتي ماشية بيها وبعدين بلاش لماضة دي اصلا خلصانة وانا خدمة ليكي يعني هسحب رخصة القيادة بتاعتك وهكتب في الوصل اني سحبتها عشان انتي ماشية بدون رخصة تسيير مركبة

انا : بس انا معايا رخصة تسيير مركبة منتهية آه بس معايا

ابو النجوم: تفرق في الغرامة

انا : مش هتفرق عايزة ادفع فوري وسيب الرخصة لو سمحت

ابو النجوم: اه ممكن فوري بس هعملهالك زي ماقلتلك غرامتها بسيطة خمسين جنيه

وعمال يخط ويكتب في الوصل

ابو النجوم: اسمك ايه

انا : هو مش مكتوب عندك في الرخصتين دا الاتنين باسمي

ابو النجوم: عندك كام سنة

انا : تفرق بالنسبة للمرور في حاجة ؟ اقصد يعني الغرامات وكدا بيفرق فيها موضوع السن ؟ اصل الحقيقة ما بفهمش في الحاجات دي خالص ( ابتسامة صفرا)

ابو النجوم: طيب يا آنسة ....وبيبص في الرخصة للمرة المليون ..مش آنسة بردو ؟!

لا احييه بجد

آه انسة ..كتبت الوصل .ممكن ادفع بقى وتديني الرخصة

ابو النجوم: لا ممكن تعدي هنا بكرة اديكي الرخصة وتدفعي الغرامة مافيش فوري دلوقتي

انا : يعني ايه مافيش فوري امال فوري على اساس ايه بقى ؟

ابو النجوم : ماعنديش دلوقتي فوري عدي بكرة اديكي الرخصة

انا : مش هاجي هنا تاني بكرة انا عايزة ادفع دلوقتي

ابو النجوم: طيب انتي ساكنة فين

يا خرااااااااااشي

انا : مكتوب في الرخصة

ابو النجوم : طيب ممكن اديكي نمرتي واخد نمرتك اكلمك بكرة اجيبلك الرخصة بكرة لحد عندك !!!!

انا : حضرتك كتبت الوصل ؟

ابو النجوم: ايوا

انا : طيب ممكن تدهوني

اخدت الوصل ودورت العربية وجاية امشي لاقيت بتاع امن الدولة بيضحك وبيقولي معلش بقى نصيبك ان رخصتك خلصانة ماكانش قصدنا نياهاهاهاها

الخفة

رفعت حاجب وشفة وقفلت الشباك ومشيت

 

عندما يتحرك الكون من أجلك

--> 

ثوبان كان شديد الحب لسيدنا النبي جاءه في يوم وهو حزين جدا فقال له الرسول مابك يا ثوبان

فقال :

-->يا رسول الله ما لي من ضر ولا وجع غير أني إذا لم أرك اشتقت إليك واستوحشت وحشة شديدة حتى ألقاك ثم ذكرت الآخرة وأخاف أن لا أراك هناك لأني أعرف أنك ترفع مع النبيين وإني وإن دخلت الجنة كنت في منزلة أدنى من منزلتك وإن لم أدخل الجنة فذاك أحرى أن لا أراك أبداً

فأنزل الله ( ومن يطع الله والرسول فأولئك مع الذين أنعم الله عليهم من النبيين والصديقين والشهداء والصالحين وحسن أولائك رفيقا )

 

في القصة ...قلوب صادقة ..قلوب محبة ..قلوب لا تشغلها دنيا ولا تشغلها متعة ...قلوب شغلها الشوق والحب

قلوب لما صدقت حرك الله العالم من اجلها

 

(ومن يطع الله والرسول فأولئك مع الذين أنعم الله عليهم من النبيين والصديقين والشهداء والصالحين وحسن أولائك رفيقا)

اكراما لرجل

لم يفكر في الحور العين

لم يفكر في انهار لبن وعسل ولا قصور

فكر فقط في حب النبي وانه يتمنى جواره

الله من اجلنا نحن اذا صدقنا واخلصنا يحرك العالم

قلبك لو وجهته الى الله بصدق لتحرك الكون من أجلك

إن من عباد الله من لو أقسم على الله لأبره

هو الذي يشبهني

--> 

لم يكن الربيع صديقي في يومٍ من الأيام ولا تحمست لطبقات الطلاء الحمر، والأزرق التي يضعها على وجهه.. ولا للأشجار التي تقلد راقصات الـ (فولي بيرجير) الخريف وحده.. هو الذي يشبهني

او كما تقول السيدة العجوز هنا

عايشة انا والمزهرية والتكاية والحكاية !

الحكاية ! نعم ..عندي الكثير والكثير من الحكايا وكأني عشت عمري اخط سطور رواية !

ما أجمل الوحدة ..ما أقدس الوحدة !

وها أنا اسير بارادتي نحو طريقي الذي أراه ..نحو وحدتي الاختيارية ..

هلوسة

وقف تمسك في يدها علب دواء وهي تقول " خدي انتينال وسبازمو اميريز وبانادول خافض حرارة "
اين ذهبت السيدة مريم ؟ الم تكن العذراء هي من تزوروني في مثل هذه الاوقات ..وابدا لم تكن تخبرني باسماء الادوية التي يتوجب عليً اخذها كانت تكتفي باتسامة رائعة وتربيتة على موضع المي
من استبدل الام الحنون بهذه البني ادمه المملة !
 الحمى اني اتألم اتألم حقا
كم كانت مصر جميلة فيما مضى اهدتني صديقتي الصغيرة الرائعة كتاب كتبته جدتها تحكي فيه عن حبها العظيم لزوجة ابيها الكتاب مليئ بالقيم والرقي واللغة المستخدمة ولا اروع اين ذهبت مصر ؟ أبحث عن شيئ مفقود
اسمه وطن ..
 اني اتألم حقاً
بالتأكيد سبب الألم كم الأكل المرعب الذي اكلته في اليوم السابق ..فطار غدا عشا خارج المنزل والبلد مليئة بالأوبئة انفلونزا خنازير وانفلونزا طيور وطاعون وتايفود وخضار مروي بمياه المجاري ..بعض الناس لا تجد ما يسد جوعها وأنا آكل 3 مرات في يوم واحد خارج المنزل ...
الألم
ما يحكمشي ! ماهذه الاغنية الصفيقة التي ظهرت صبيحة يوم حوار جيمي المفتوح ! الم يكفيني ما تابعت من الحواروالذي أكد فيه جيمي بما لا يدع مجالا للشك ان مافيش مصريين عايزين يسافروا ! وكأن من أكلهم البحر وهم يحاولون الهرب كانوا يمارسون هواية الغرق ! نحن نعيش ازهى عصور الفوضى المنظمة بنظام ما يحكمشي !
يااا الله !!الألم غير محتمل
أكرهك لاني لا استطيع ان اسامحك ! أم اني لا استطيع ان أسامحك لأني اكرهك؟ كنت افخر بقدرتي الغير معقولة على العفو والغفران ..كيف يمكن لشخص ان يسامح شخصا اخرج من داخله اسوأ مافيه ؟
ان اسامحك هو شيئ فوق طاقتي وقدرتي وانت لا تستحقه وانا آسفة لنفسي...  وكيف اعفو عن شخص لا اذكره
أنا بالفعل بالكاد اتذكر وجهك
ولا اذكر تفاصيل الملامح
حاولت مرارا ان اتذكر صوتك ..كلماتك ..أي شيئ عنك ..فشلت
حاولت أن اتألم لفقدانك ويأبى قلبي الا ان يسعد
كم اشعر أنك غريب عني ..وأني لا أعرفك ..بل وكأننا لم نتقابل من قبل
كيف يمكن ان تطوى السنين في لحظات
اندهش من ذاكرتي ومن مقدرتها الفائقة على نسيان مالا اريد تذكره
أنت حقا لا تخطر لي على بال الا اذا ذكرت أمامي
ومثلك  لا يستحق الا ان يسقط من الذاكرة كما سقطت من النظر !
 جسدي يصرخ من الحمى 
اشعر انه يكرهني أو على افضل تقدير قرر ان ينفصل عني ولم ادعه في حاله فها أنا سممته ترى لو تحدث جسدي ماذا عساه ان يقول؟ سيصرخ ارحميني فارقيني .بالتأكيد !
كيف يمكن للألم أن يكون مؤلما الى هذا الحد ..
ما بين رحى الحياة تطحن حبات نفسي حتى تنسحق لم أعد شيئا متماسك ...فقط أشياء عدة لامتناهية الصغر منتشرة في كل مكان وكأني مبعثرة
ولكني اشعر بكم هائل من السلام النفسي ! اشعر انها هدية  لي ليس لاحد فضل في ذلك
يا الله كم انت كريم بمنحي هذا الكم من السكينة والرضا
هذا حقا اكثر مما اريد واكثر مما استحق
ماذا اريد ؟ أنا لم أطلب منك شيئا يا الله مؤخرا ! كلما حددت مطالبي وتوجهت اليك اجدني اردد يا الله يالله
لم أعد اريد شيئا ..فقط رحمتك فارحمني ولتكن مشيئتك وليجري في حياتي ما تريده انت
لن أطلب مرة أخرى طلب بعينه فكم أنا غبية في تحديد ما اريد ! كثيرا ما طلبت اشياء ظننتها خيرا ولم تكن كذلك
الألم فوق الاحتمال اريد أن أناااااام
النوم ياااه اعتقد انه شيئ جميل حقا ان ينام الانسان ويتوقف مخه عن العمل او على الأقل يقل نشاطه
يؤلمني مخي لا يتوقف أبدا ويزداد نشاطه في اوقات النوم
أبي أمي أخوتي..أهلي ..أصدقائي ..ايماني ....وطني المفقود ..قلبي الموجوع...عملي ...كتبي ..أفكاري ...احساسي ..طموحي ..حلمي الضائع ..واقعي ... ..موسيقاي المفضلة ..الرقص ..العود ...الليل والفجر وأنا وأنا وأنا
وانت  !
الساعة التاسعة ! بدأ اليوم الجديد ..يجب أن أذهب الى العمل ..ماذا قالت تلك التي زارتني ؟ نعم انتينال وسبازمو اميريز وبانادول خافض للحرارة ..أعتقد انهم سيفو بالغرض .

i will not refuse to do the something i can do

I am only one

But still I am one

I cannot do every thing

But still I can do something

I will not refuse to do

The something I can do

u can be what ever u choose to be,But as you’re choosing,remember to choose to first be a woman

You can go to Harvard
You can be a pilot
You can be an astronaut
But first, be a woman
When you're walking down the street
Show your feminine appeal
Even tho' you're wearing jeans
It's important to be real
You were born to be yourself
So no matter how you feel
If you want to impress the opposite sex
When he takes you for a ride
Let him open you the door
When he asks you for a dance
Let him lead you to the floor
When he kisses you good night
You just leave him wanting more
You can do all you can
Say I am what I am
But first be a woman
When he takes you out to dine
Don't you end up in his bed
Wedding bells will ring in time
Make him dream of you instead
And his passion can be like
All the stories that you've read
He can be Romeo if you act like Juliet
Nowadays it ends too soon
Even tho' it's just begun
You can take him to the moon
He'll leave with the morning sun
So take a lesson from the past
Make him want and make him run...
You can't be a quarterback
He can't wear a pretty dress
You cannot be Superman
And he's not a shy princess
So why try to be alike
When it's only self defense ?
You've got grace, he's got style
And together you'll rhyme
So remember to be true
To the legend that you are
All the feminine in you
Has worked miracles so far
So head up high and don't be shy
You can reach for any star
You can do all you can...
Say I am what I am
But first be a woman

لماذيــــات

لماذا نقابل الأشخاص " الصح "في الوقت الخطأ ؟ والأشخاص " الغلط" في الوقت الصحيح

ولماذا نقابل ناس مالهاش لازمة اشبه بالذباب وظيفتهم في حياتك زززززز وبس

لماذا نقيب الممثلين ممثل فاشل

ولماذا وزير الثقافة جاهل

ولماذا حاميها حراميها

ولماذا يطلب أحدهم فتوى من الأزهر في حكم تزغيط البط

ولماذا بعد مقتل مروة الشربيني أصبح الشغل الشاغل هل هي شهيدة الحجاب أم ضحية العنصرية ؟ (على أساس المسمى يفرق وهيرجعها للحياة أو هيقلل من بشاعة الجريمة )

ولماذا يحقق فيلم ( عمر وسلمى) أعلى الإيرادات في سباق أفلام الصيف !

لماذا هناك من يعتقد أن الأهرامات مقابر ولا يجوز زياراتها وأبو الهول أوثان !

ولماذا هناك من يرى ان ( رمضان السنة دي بوظلنا الصيف )!

ولماذا يوجد أشكال نمطية مكررة بشكل جنوني في الحياة حتى أصبحت أرى كل مجموعة أشخاص شخص واحد فقط يحمل وجوهاً مختلفة ؟

شكل نمطي 1 : السلااام عالايكووووووووم بنغمة معينة وميلة رأس الى اليمين قليلا وابتسامة لا معنى لها نتحدث اللغة العربية الفصحى والاطفال يرددون : أبي أمي كما لو أننا في فيلم كارتون نحمل ذات الأفكار نمارس ذات السلوك نكرر نفس الكلمات مصابين بداء عضال اسمه ضيق الأفق اللامحدود

شكل نمطي 2: هاي يا بنتي عاملة ايه أخبارك ايه كله تمام أنا تمام انتي ايه الأخبار تمام هكذا الكلمات متلاحقة لا تترك مجالا للأخر كي يرد ..الجملة تقال بنغمة معينة أخرى لا تحمل أي احساس يتم تبادلها في نفس ذات اللحظة بنفس التون وبابتسامة مصطنعة شيئ مذهل الحقيقة!

وايضا نفس الكلمات نفس الأفكار كلهم ذاكروا من نفس المقرر مصابين بداء آخر وهو السطحية المريعة والجهل التام والمنظرة الخانقة والفتي اللامعقول!

وانماط اخرى ربما أتحدث عنها في مرة قادمة

ولماذا هناك " ناس بجحة"

قالك اوعوا تظلموا حد وخلوا بالكم بتقولوا ايه عشان الكلمة امانة وهتتحاسبوا عليها يوم القيامة

ياااه ياااه كم انت انسان ملائكي !!

فقط لو يعرفون الحقيقة !

الصمت الذي لا يحوى كلاما هو صمت غبي

ومن لا يدرك الفرق ولا يفهم لغة السكوت هو الأكثر غباءا

لماذا !!!!!!!!!!

لـــيه هــما أسعـــد مننـــا ؟

زمان ماكنتش بحب الاطفال أوي ..بس مؤخرا ابتديت الاحظ حاجات كتير فيهم وقد ايه هما مختلفين عننا
هما أسعد ...بيتمتعوا بقدر كبير من السلام الداخلي ..مليانين تفاؤل وطاقات ايجابية ..بيعرفوا دايما يوصلوا للي هما عايزينه ..لا وكمان هما عارفين بالظبط هما عايزين ايه !

يمكن السر انهم عفويين ..بيعملوا اللي بيحسوه وبيقولوا اللي عايزينه من غير رقابة ومابيفرقش معاهم هل اللي بيقولوه من وجهة نظر الناس صح ولا غلط

كل ما بنكبر بنتحول لكائنات معقدة مشغوليين جدا بايه اللي لازم نقوله وايه اللي مش لازم نقوله ..بنبقى بشخصية مع ناس وبشخصية مختلفة تماما مع ناس تانية...الاطفال مش كدا !

في رأيي إن الاطفال اكتر قدرة على التواصل مع الناس ....لانهم بيبصوا بشكل مباشر لعين اللي قدامهم لو لفت انتباههم وبيوصلوا كل حاجة جواهم من خلال النظرة دي . نظرتهم البريئة في عنيك بشكل مباشر بتخليك تتصور انك اهم واحد في الكون بالنسبة ليهم بس لما تبتدي تبقى ممل أو يقرروا ان في حاجة تانية مثيرة للاهتمام أكتر منك بينسوك تماما ويتشدوا للحاجة التانية ودا مش لسبب غير انهم بيعرفوا كويس أوي يقييموا اللي قدامهم وايه اللي ممكن يقدموه ليهم.
هل احنا عندنا القدرة اننا نبص للناس بشكل مباشر في عنيهم ونقيمهم ونشوف هل فعلا الناس دي تستاهل اهتمامنا ولا لأ؟ ولو ادركنا انهم ما يستاهلوش الاهتمام هل بيبقى عندنا القدرة اننا نبعد عنهم ونشوف حد تاني يستاهل اهتمامنا بيه؟

الاطفال بيطلبوا اللي عايزينه في اللحظة اللي بيدركوا فيها انهم عايزين الشيئ دا ..ممكن نفشل في وقت معين اننا نفهم بالظبط هما عايزين ايه ..بس هما عارفين كويس هما عايزين ايه ومش هيستسلموا لحد ما يقدروا يوصلولك طلبهم وتفهمهم كويس وتنفذ اللي هما عايزينه

هل احنا عندنا القدرة اننا نطلب اللي عايزينه ؟ ولا بس بنتمى ان الناس تكتشف لوحدها احنا عايزين ايه ويعملوه لينا ونتضايق جدا لما ما يعرفوش احنا عايزين ايه؟ لما بنبقى عايزين حاجة ومانعرفش نوصلها هل بنستسلم ولا بنفضل نسعى ورا الحاجة اللي احنا عايزينها وعارفين انها هتسعدنا ؟!

الاطفال ما بيتكسفوش انهم يبينوا احاسيسهم ومشاعرهم وتقدريهم للناس ..ودي حاجة بتخلينا عايزين نسعدهم ونعملهم كل اللي في مقدورنا ..لما طفل بيطلب حاجة وتعملهاله بيبينلك فرحته الكبيرة بالحاجة دي حتى لو كانت حاجة بسيطة جدا ..ويكافئك بحضن دافي او بوسة رقيقة ع الخد
هل احنا بنوري تقديرنا للناس لما بيعملولنا حاجة كويسة ؟ ولا بنخاف شكلنا يبقى مدلوق وماصدقنا حد عملنا حاجة ؟!

الاطفال ما بيفكروش كتير في تبعات المواقف ..ما بيحللوش .آه لو عملت كذا هيحصل كذا ولو حصل كذا هيحصل كدا ..هما عارفين ايه اللي هيسعدهم وبيعملوه ...ببساطة
هل احنا بنعرف نعيش اللحظة ؟ ولا بنقعد نحلل ونستنتج ونستنبط كل واي حاجة بنسمعها وبنشوفها من الناس ! هل بنعمل ببساطة اللي شايفينه هيسعدنا ؟ اعتقد اننا بنفكر زيادة عن اللزوم واوقات كتير بنحمل الاشياء اكتر مما تحتمل

الاطفال واضحين وصادقين ..مش عشان هما كدا ..لا عشان ببساطة مش مهتمين بشكلهم هيطلع ايه قدام الناس ولا الناس هتفكر فيهم ازاي ..هما اقوى مننا بكتير ..عمرهم ما بيستنوا حاجة من حد ..لما بيبقوا عايزين حاجة هما اللي بيبتدوا وبيروحولها

الاطفال ما بيشيلوش ضغينة ولا حقد ولا كره لحد ..لو اتضايق منك في لحظة بينسى بعدها بدقيقة لو عملتله حاجة اسعدته ..ما بيستوعبوش فكرة التسامح لانهم اصلا مش مستوعبين فكرة العقاب
هما بيحبوا وبيعيشوا بالنقاء ومن غير تلوث بالكره
هل عندنا القدرة على اننا نسامح ؟ ولا بنعيش شايلين جوانا سلبيات كتير وكره وضيق يتعبنا شخصيا قبل ما يكون بيضايق اللي اتسبب لنا في الاحساس دا ؟

زي ما قلت ..كل ما بنكبر بنبقى جادين اكتر وبندخل في صراح الحياة ..بننسى نعيش ..بننسى نبتسم ونستمتع بجمال اللحظة اللي احنا عايشينها
لازم نتخلص من السلبية اللي اتبنت جوانا ..نعيش ولو شوية ونحاول نسترجع حياتنا تاني

النظرة الايجابية للحياة بتساعدنا على تحقيق اهدافنا وفي نفس الوقت بتخلينا نحافظ على احاسيسنا ونقائنا وشفافيتنا
كل واحد فينا جواه جزء برئ يشبه الاطفال تايه في زحمة حاجت وحشة كتير ..جزء بيخلينا سعداء وراضيين لازم نحاول نلاقي الجزء المفقود دا

اكيد ان الواحد يكون طفل دي نعمة كبيرة ...بس كون اننا كبار دا بردو ليه مميزات ..على الاقل ما بنعملش بي بي على روحنا :)

•كلامي عن الاطفال اللي تحت سن السنتين لانهم بعد كدا بيتحولوا لكائنات شريرة جدا وخبيثة
•الموضوع دا مهدى لابن اختي اللي غير كتير في نظرتي للحياة من يوم ما جه الدنيا
:)

لومالكش عازة ماكنتش اتخلقت ولا اتحسبت من الناس ولا اترزقت

Statutes for life

ماذا حدث للبني آدمين

ماشية في الاتوستراد من ناحية سيتي ستارز متوجهة الى شارع الطيران الساعة حوالي11 بالليل
الاتوستراد زحمة جدا فوق الوصف
والعربيات كلها بتمارس هوايتها في الحك والتزنيق
انا واقفة في الصف بتاعي سرحانه تماما وفي فراغ صغير بيني وبين العربية اللي قدامي
اذ بي افوجأ بواحد داخل من يميني ومصر يحشر نفسه عشان يملى الفراغ اللي قدامي
طبعا عربيتي وعربيته حكوا في بعض
مجرد حكة بسيطة عادية
زمرت ورحت موسعة وطلعت قدامه
لاقيت بني ادم منهار ..لا منهار دي كلمة تافهة
زي ماكون شتمته بالأم مثلا
كلاكسات وتشويح وصريخ واللي فهمته يعني انه عايزني اقف على جنب !
تجاهلته تماما وكملت طريقي ..طلع يجري ورايا والشارع اساسا مش متحمل جري لأنه زحمة جدااااااا
وبيحاول بجهد جهيد يكسر عليا بأي شكل وانا بنفس برودي وتجاهلي بطلع منه واكمل طريقي
شباكي مقفول واللوك بتاع العربية مقفول لأن دي احتياطات امنية لازم اي واحدة بنت تتبعها وهي ماشية في شوارع القاهرة
المهم ..فكرت اخلص منه فاديت اشارة شمال وقلت ادخل عباس العقاد
لاقيته مدي اشارة شمال ولازق فيا وداخل ورايا !!
وبردو نفس الانهيار اللي في ملامحه شايفاه من مراية العربية
غيرت رأيي وقررت اكمل على طول
في اللحظة دي واضح انه فقد اعصابه تماما
الشارع بيوسع شوية في المنطقة دي والعربيات بتقل نظرا لان الاغلبية بيلفوا عشان يدخلوا عباس العقاد
لاقيت فجأة واحد بيقف بعرض الشارع قدامي وبينزلي وبمنتهى الانهيار بيفتح باب عربيتي
زي ما قلت ..انا قافلة اللوك فباب العربية ماتفتحش معاه
رجعت ورا شوية عشان اعرف اطلع منه
لاقيته بكل القوة اللي ادهاله ربنا بيرزع بايديه الاتنين على شباك عربيتي من ناحيتي وبيصرخ بهستريا

اقفي بقولك اقفي
مشيت وسبته
وفضل يجري ورايا بنفس ذات الانهيار العصبي
لحد ما فجأة بردو مالاقتوش ورايا ! ماعرفش فعلا ايه اللي حصل ولا غير رأيه ليه ولا ناوي على ايه

أنا فعلا اعصابي تعبانة من ساعتها .. دا هو الغلطان اصلا وأنا مافرقليش
يعني لو مثلا الباب اتفتح معاه وانا ماكنتش قافلة اللوك كان هيعمل فيا ايه ؟
طب لو القزاز اتكسر وهو بيرزع عليه بالشكل الهستيري دا وأنا شباك عربيتي اصلا مش شباك دا بلكونة
يعني لو اتكسر في ايده كان زمانه قاعد معايا جوا العربية او شايلني مطلعني براها بمنتهى السهولة
ازاي واحد يفكر يعمل كدا في الشارع ! ومع واحدة بنت !!
وزي ما ذكرت بردو دا شارع كبير وزحمة
هو ليه ماحدش حاول يتدخل ؟
ايه اللي كان مطلوب مني اعمله ؟
انا من كتر الصدمة ما بصيتش في وشه ولا شفت نمرة عربيته
أنا فعلا عندي ذهول
نسيت اقول انه كان معاه بنتين في العربية ! طيب مش خايف عى منظره قدامهم ..
أنا لو راكبة مع واحد وعمل كدا في واحدة هسيب العربية وانزل ومش هعرفه تاني
إيه البلطجة دي
أنا فعلا حاسة ان أعصابي مهزوزة جدا من ساعتها
الناس دي مطلوقة في الشوارع ليه ..دول مكانهم مستشفى الأمراض العقلية أوعلى الأقل مصحة للأمراض النفسية
دا لا يمكن يكون انسان طبيعي سوي ايه كمية الفراسترايشن دي ..لا يمكن يكون بني ادم اصلا في اللحظة دي فكرني بجد بمصارعة التيران

لا حول ولا قوة الا بالله ! الناس جرالها ايه

بعد ما أنفض مولد سيدي أوباما وطلعنا بلا حمص

حليوة وعنده كاريزما

بادي لانجويدج مافيش أحسن من كدا

ها وبعدين ؟
مش عارفه ليه ناس متضايقة من الخطاب ..وبردو مش فاهمه خالص ليه ناس مبسوطة منه

أنا
indifferent

تماما
ماكنتش مستنية منه حاجة ..وهو فعلا ما اضافش حاجة لانه ببساطة مش مطلوب منه اصلا يعملنا حاجة

الراجل امريكاني..رئيس امريكا ..شغله واكل عيشه يخدم مصالح امريكا
خطابه الموجه للعالم الاسلامي هدفه الاساسي تحسين صورة امريكا اللي دمرها بوش تماما
هدفه تبرير اللي بيحصل في العراق وافغانستان وفلسطين
في ناس بتقول على الأقل خطوة كويسة من امريكا انها تبرر افعالها لانها طول عمرها ما بيهمهاش
أهو دا بقى مجد شخصي بيبنيه معجزة زمانه باراك أوباما
كلمنا بلغتنا ..بطريقتنا ..باللي بيعجبنا ومجد في الإسلام والحضارة الإسلامية وفضلها على البشرية واستشهد بالقرآن ( ودي من اكتر الحاجات اللي مش عاجباني كانت اوفر ومبالغ فيها كان كفاية مرة واحدة على أقصى تقدير انما شحاته العواطف دي كانت مستفزة فعلا )
وواضح انه عجب ناس كتير
وفي ناس بتقول اما نشوف ايه اللي هيحصل ؟ ايه اللي هيحصل مثلا ؟ هو قال ايه اصلا احنا مستنيينه يتحقق
الراجل ماقالش حاجة ..ماقالش حاجة خالص ..دا لعب السنيورة
طيب لو كان قال حد يقولي قال ايه معجزة مثلا ومستنينه يتحقق ويتحول من اقوال لافعال ؟
واللي متضايقين ..متضايقين ليه ؟! الراجل قال اللي عنده وشكرا ومشي ..ايه اللي حصل ؟! دا غير ايه من اللي احنا فيه ولا ممكن يغير ايه ؟ أضاف ايه ؟ أساء في ايه ؟ ولا حاجة ! خطابه كله ولا حاجة

ليه ردودالافعال المبالغ فيها سواء سلبا او ايجابا
يعني عايزين منه ايه ؟ ليه متصورين انه هيعملنا حاجة ..هو اصلا مش مطلوب منه يعملنا حاجة
خلينا موضوعيين شوية ..مين دا اساسا ؟وقال ايه وقاله ليه واستفادنا ايه أو خسرنا ايه
بناءا عليه نتعامل مع خطابه
بلاش العاطفية الغير مبررة المبالغ فيها
ردود الأفعال في مجملها اوفر
سواء اللي فرحانيين او اللي متضايقين
الموضوع في رأيي مش مستاهل
ليه التصفيق الحار بين كل جملة والتانية ..لا والراجل بيعمل Pause بعد كل كلمة عايز الناس تصقف فيها والناس فعلا تقوم تصقف ..كل التصفيق كوم والتصفيق اللي بعد كلامه عن القضية الفلسطينية والاسرائيليين المساكين كوم تاني
دا كان اسوأ حاجة اتقالت في الخطاب اساسا وعلى الأقل رد الفعل كان لازم يكون السكوت التام مش التصفيق بحرارة
وليه الهتاف اللي في الأخر ؟ هي الناس فاكرين نفسهم في حفلة تامر حسني ؟!!!!
على النت ردود الافعال في مجملها ضد الخطاب
في الواقع اللي قدامي ردود الأفعال في مجملها منبهرة بالخطاب
وبين دول ودول أنا

indifferent

سؤال جانبي : الفنانيين دول كلهم كانوا بيعملوا ايه هناك ؟ يعني سفراء النوايا الحسنة مفهوم ..انما ابطال عيال حبيبة وخليج نعمة والشياطين الخمسة وفنانيين لا عندهم قضية ولا موقف ولا حاجة راحوا يعملوا ايه ؟

!! رد الجميل يا صاحب الفضل

اذا ما كنتش اتفرجت على فيلم دكان شحاته وفي نيتك انك تتفرج عليه ماتقراش الموضوع دا لأني هحرق الفيلم

بداية قبل ما اتكلم عن تفاصيل الفيلم ..لو ماكنتش ناصري هتتخنق ..ولو بتحب السادات هتتشل ..ولو لسه عندك امل في البلد دي هتتأكد ان مافيش امل نهائي ومش بعيد تولع في نفسك
الفيلم كئيب ..جدا ..قبل ما ادخله الناس قالتلي بعد الاستراحة مش هتبطلي عياط ..انا الحقيقة بعيط من اول التترات
التيتر بيبدأ بأغنية توجع القلب اسمها مش باقي مني غير شوية ضي في عنيا كلمات جمال بخيت وبيغنيها أحمد سعد صوت أحمد سعد حزين وفيه بحة مصري أوي بيساعدك اكتر انك تكتئب جدا
كلمات الاغنية بتقول
مش باقي منى غير شوية ضى في عنيا
انا هدهملك وامشي بصبري في الملكوت يمكن في نورهم تلمحي خطوة تفرق معاكى بين الحياة والموت
مش باقي منى غير شوية نبض في عروقي خدي وعيشي
وافتحيلي تابوت افرح بريحة ورد فرعوني وربنا في عوني
إذا دخلت الجنة ولا النار حشتاق لضحكتك وقعدتى في الدار
والقهوة متحوجه من طيبة العطار
في كل يوم الصبح اشرب حليب قبطي
وفى النهار والمسا امسك ستار الكعبة لو سبتي
واثبت اذا هربتى
اهديكى عمري وحسي وجوارحي
اهديكى جرحى هو إلى باقي في دنيتي لما خلص فرحى
مش باقي منى غير شوية لحم في كتافى
بلاش يتبعثروا في البحر
بلاش يتحرقوا في قطر الصعيد في العيد
بلاش لكلب الصيد تنوليهم
خدي إلى باقي من الأمل فيهم
وابنيلى من عظمهم في كل حارة مقام
وزورينى مرة وحيده لو كل ألفين عام
الم الجراح يتلم
مش باقي منى غير شوية دم
متلوثين بالهم مرين وفيهم سم
كانوا زمان شربات والنكتة سكرهم
شربتهم الخفافيش في قلب أوكرهم
مش باقي منى غير شوية دم مقدرش اسقيكى مواجعهم
ويرضوا مقدرش ارميكى وأبعهم
يمكن في مرة تعوز تطلبيني شهيد
حاحتاج يوميها الدم يمضى على شهدتى
مش باقي منى غير شوية قوة في إرادتي
على شوية شعر من خطى
حسبي عليهم وأنت بتخطي
وأنت في صبح الدلال بتعطري شطي
مش باقي غير شوية ضى في عنيا
انا مش عاوزهم
لو كنت يوم حالمحك وأنت بتوطى
في معركة مفيهاش ولا طيارات ولا جيش
وأنت في طابور العيش
بتبوسى أيد الزمن ينولك لقمة من حقك المشروع
مش باقي منى غير شهقة
شهقة في نفس مقطوع
بفتح لها سكة ما بين رئة وضلوع
ما بين غبار ودموع
وأنا تحت حجر المقطم في الدويقة بموت
أنا والعطش والجوع
يئن تحتي التراب
وأنا صوتي مش مسموع
يا حلمنا الموجوع من المرور ممنوع
مستني لما يمر موكب سلاطينك
مش باقي منى غير شوية رحمة من طينك
على شوية صبر من دينك
مش باقي منى غير حبة غنى تايهين
في الضلمة مش لاقين حس الفواعلية
ولا صوت مركبي عفي فوق المعدية
ولا صوت بناتي العذارى في كل صبحيه
والغنوه أمنية ياما نفسي أقابل حبيبي
وأنا على الزراعية صوتك وصوتهم غاب
وأنا تحت حجر المقطم بموت لوحدية
الليلية راحت عيوني تطل على البستان
وجناين الرمان رجعت لي توصف عناد الغل والدخان
وسحابة سوده تضلل على غُنى الغلبان
رجعت لي توصف هبوب الموت على الألوان
رجعت لي توصف خيال الذل في موائد الرحمن
مش باقي منى غير شوية كفر بشروقك
وأنا منبع الإيمان
مش باقي منى غير شوية ضى
وعنيا مش قادرة تلمحك
في وحدتي محنى
خايف أموت من الخوف والضعف يفضحني
السجن عشش في قلبي وماشى في شوارعك
نفس إلى بعني وخدعني بالرخيص بيعك
أشيل حمولى أنا ولا أشيل حملك
ماعدت املك شيء فيكى ولا فيا
ولا قيراط ولا بيت
ولا نسمة صافية تلاغى النيل بحريه
مش باقي منى غير شوية حب جرحني
ولا باقي منى غير شوية ضى في عنيا
:) دا كبداية يعني
الخليفة الموسيقية اللطيفة دي شغالة اصلا بقى على مشاهد البؤس اللي مصر عايشة فيه من 30 سنة
بيبتدي من الاخر ..من سنة 2013 ويرجع بالسنين ...كل سنة على مانشيت جرنال وصور ارشيفية وفيديوهات للأحداث ..قطار الصعيد... قصر ثقافة بني سويف..حريق الشورى ..العبارة ..ازمة العيش.. .الدويقة ...وهكذا لحد ما يوصل لتعيين حسني مبارك رئيسا للجمهورية وقبلها اغتيال السادات ويبدأ الفيلم على ميلاد شحاته-عمرو سعد
الفيلم هو حكاية شحاته ...من يوم ميلاده لوقتنا دا ..30 سنة واللي حصل لشحاته فيهم بالتوازي مع اللي حصل لمصر فيهم
في مباشرة زيادة عن اللزوم في الفيلم كأننا في درس وعظ تتجلى عظمة المباشرة في مشهد قاعد فيه والد شحاته ( محمود حميدة) بيكلم شحاته بيشاورله على صورة ناصر اللي حطينها على الحيطة وبيقوله حط صورة الريس على الشرخ عشان تداريه ..فيرد شحاته بس الشرخ كبير يا آبا الصورة هتداري ايه ولا ايه..يقوله اهو تداري اي حاجة
مباشرة فجة ...بس بتوصل وجهة نظر ناصر عبد الرحمن السناريست والمخرج خالد يوسف
أحمد متضايق جدا ان الفيلم بيعرض وجهة نظر صناعه ومش محايد ..بس انا مش متفقة معاه في الرأي ..هو مش بيكتب تاريخ عشان يبقى محايد ..هو بيعمل فيلم سينما يستعرض فيه الاحداث اللي حصلت من وجهة نظره الشخصية ودا حقه ..اللي عنده وجهة نظر غيرها يعرضها
أحمد كمان شايف ان الفيلم بيهد ما بيبنيش ..ودي وجة نظر صديقة ليا كمان ..انا متفقة معاهم في النقطة دي مع اني مش عارفه كان ممكن الفيلم دا يبني ازاي ! بس من حيث المبدأ هما معاهم حق
صاحبتي بتقول ان الواحد طالع من الفيلم حاسس بأن الدنيا سودا واللي جاي اسوأ وحتى لو كل المؤشرات بتقول كدا حكاية اننا نأكد الفكرة دي هتخلي اللي احنا خايفين منه يحصل فعلا ويبقى واقع
بالذات انه كمان مضلمها ل 4 سنين قدام وبيتنبأ بحالنا في 2013
وان برا لما بيعملوا أفلام مهما كان في مأساويات في الفيلم دايما الخير بينتصر ودا مش بيتعمل اعتباطا دا مقصود عشان يأثر نفسيا على الناس ويفضل عندهم امل ويجاهدوا عشان حياة أفضل
انما اللي عمله خالد يوسف دا تدمير تام لنفسية كل اللي شافوا الفيلم كأنه بيوصلهم رسالة ان انت لو طيب وكويس وابن حلال هيتداس عليك وهيحصلك اللي حصل لشحاته لان الخير عمره ما بينتصر والشر عمره طويل وحظه حلو
أحمد متفق مع صاحبتي في الكلام دا تماما وأنا مقتنعة انه صح بس بردو مش عارفه كان ممكن دا يحصل ازاي لسبب بسيط ..الفيلم واقعي ..لو قفل على ان الخير بينتصر في الاخر مش هيبقى واقعي ابدا لأن الواقع عندنا هنا للاسف بيقول ان الخير عمره ما بينتصر

عموما على رأيهم خالد يوسف عامل فيلم لنفسه

همه الاول والاخير نجاحه الشخصي
أكيد ماخطرش في باله لحظة حجم الضرر اللي أحمد وصاحبتي بيتكلموا عنه

كان ممكن النهاية تتغير وتبقى سعيدة ويبقى ليه تأثير ايجابي بس دا ماكانش هيحقق اللي خالد يوسف عايزه

هو حر ! بس ورحمة والديه يبطل بقى يعيش دور المناضل صاحب القضية

الفيلم في مجمله مؤلم ..بيوجع القلب..على البلد واللي حصلها واللي بيحصلها ..على الناس وقد ايه بقوا وحشين ..واكتر وجع قلب على شحاته وطيبته وسط كل دا ونقائه وبساطته واحلامه المتواضعة مشاهد كتير بتوجع زي مشهد بيع البيت لسفارة اسرائيل مثلا وطبعا مشهد النهاية هو قمة المأساة وأداء غادة عبد الرازق والأخ الكبير اللي كان اسمه في الفيلم طلبة كان مؤلم

بالرغم من المباشرة في كتير من المشاهد الا ان الفيلم فيه رمزية

يمكن كمان رموز زيادة عن اللزوم بردو بشكل مباشر ..مش عارفه خالد يوسف عمل التركيبة دي ازاي بس هي كدا ..رمزية مباشرة

شحاته في اعتقادي الشخصي رمز للمصريين وابوه رمز لعبد الناصرودا بيبان في المشهد اللي بيمسك فيه شحاته صورة عبد الناصر ويقول الله يرحمك يابا.. اما هيفا وهبي وهنا المفاجئة رمز مصر أن أن تشششش بعد بهية وفؤادة مصر بقت بيسه يا ولاد !

اما باقي الرموز فتفسر نفسها تباعا مع الاحداث اللي سياقها الأساسي قصة النبي يوسف عليه السلام مع اخوته

الرموز اللي وصلتلي ممكن تكون من محض خيالي وفي حالة تشابه الاحداث مع الواقع فهو محض صدفة مش اكتر

:)
المواويل الصعيدي اللي كاتبها جمال بخيت جميلة
عمرو سعد رائع ..لا رائع دي قليلة ..الولد فعلا فنان وحساس ومبدع الله يسامحه على اللي عمله فيا
محمود حميدة الكبير كبير بردو
غادة عبد الرازق خرافية ..مش معقولة البساطة في الاداء وعدم التكلف والاحساس العالي
عمرو عبد الجليل ..دوره مش مختلف كتير عن دوره في حين ميسرة ..بس ما يمنعش انه كان ممتاز وان افيهاته على الرغم من انها مضحكة الا انها ليها معاني كبيرة وعميقة زي مثلا عنوان الموضوع ( رد الجميل يا صاحب الفضل ) دي جملة قالها في حملة الانتخابات لما أجروه أحد الاحزاب معروف مين طبعا هو وسواقين الميكروباص عشان الحملة
الجملة دي تبان انها افيه مضحك الا انها أثرت فيا جدا وحسيتها حقيقية جدا في الزمن دا وفي الموقف دا تحديدا وهو بيطلب من الناس انها تنتخب مرشح الحزب دا بالتحديد لانه بانتخابهم ليه هيبقوا فعلا بيردو الجميل اللي مش موجود لانهم اساسا اصحاب الفضل
الاخ الاكبر لشحاته للاسف ممثل مش عارفه اسمه ..اسمه في الفيلم طلبه كان كويس جدا
الاخ الاوسط محمد كريم واسمه في الفليم سالم محدود الموهبة جدا ودوره بيساعدك جدا انك اساسا ما تتقبلوش ونقدر نقول انه نجح في دا
عبد العزيز مخيون دوره صغير جدا الا انه اختيار موفق..الشخص المناسب في المكان المناسب
هيفا وهبي ..ما ضايقتنيش خالص ..توقعت اسوأ من كدا ..كتجربة أولى ليها مش مضرة ..كان ليها مشاهد مالهاش لازمة زي مشهد الرقصة يوم قراية الفاتحة بس اعتقد ان خالد يوسف ماهانش عليه يجيب هيفا وهبي ومايرقصهاش

المشهد كله لو اتشال مش هيأثر على الاحداث غير ايجابا الحقيقة

في واحد اسمه في الفيلم البرص ! دا لا يمكن يكون ممثل !دا أكيد هو كدا

لو هومش كدا فهو اكتر من ممتاز

اجمالا حتى الناس اللي عملت ادوار صغيرة كانت حقيقة
باقي في الاخر بس اني اقول اني مابحبش خالد يوسف ..ومشاكله باينه اوي في الفيلم ..بس الموضوع والاحداث وحرفية الممثلين شفيع ليه في الفيلم دا
خالد يوسف كمخرج لا يميزه غير توجيه الممثل هو دا اللي هو شاطر فيه وبس
عموما دكان شحاته فيلم لازم يتشاف ! على الأقل هو فيلم ممكن تتناقش فيه وتاخد وتدي وتنقد وتفكر وتتفق وتختلف يعجبك أو ما يعجبكش ...كدا يعني
! حظي السيئ او يمكن حظ أحمد السقا السيئ إني دخلت في نفس اليوم فيلم إبراهيم الأبيض

لو حد يعرف يحكيلي قصة فيلم ابراهيم الأبيض ينوبه فيا ثواب ويحكي لأني غلبت أدور على القصة طول مانا بتفرج على الفليم ما لاقيتش !!
خسارة والله شركة انتاج ضخمة وميزانية على ما سمعت عدت ال 30 مليون وأحمد السقا وهند صبري ومحمود عبد العزيز وعمرو واكد يعني كاست ممتاز وموسيقى تصويرة لهشام نزيه خرافية ومواقع تصوير رهيبة وحركة كاميرا اكتر من ممتازة ومخرج مش بطال أبدا ..ليه النتيجة تطلع كدا !! ليه سكتشات غير مترابطة وفيلم مفكك من بعضه ! بس الحق يقال كل سكتش في حد ذاته حلو :) ليه فيلم كامل مافيهوش ولا شخصية واحدة طيبة أو نضيفة ممكن اتعاطف معاها ! يادوبك هي حنان ترك اللي طلعت مشهدين ومالحقتش أحس بيها أصلا ومالهاش أي تأثير في الأحداث

أنا بصراحة ماحستش ب ولا شخصية في الفيلم مع ان شخصية عمرو واكد عجبتني وأدائه كان هايل الا إني بردو ماحستش بيها

ليه في مشهد النهاية اسخسخ من الضحك والمطلوب إني اعيط
تيمة روميو وجولييت دي عفا عليها الزمن بصراحة مش وقته خالص في اللي احنا فيه دلوقتي
!قال روميو وجولييت قال